O divulu dia dianga dia Bibidia, o divulu dia Dimatekenu, di jimbulula se nanhi ua bhange o ngongo: “Ku dimatekenu Nzambi ua bhange o diulu ni ixi.” (Dimatekenu 1:1, NW) Kioso Nzambi kia zubha o ku bhanga o iangu ni iama, ua bhange o athu a dianga, Adá ni Eva. Ene ka difuile ni iama mukonda a a bhangele ni ídifua ia Nzambi, ni ufôlo ua ku sola o ima ia mesenene. Kienhiki, ene a tokalele o ku sola o ima ia mesenene o ku bhanga. Se a belesele o itendelesu ia Nzambi, ene eji kumbidila o vondadi ia Nzambi mu ku kala o jitata ja dianga ja miji ioso mu ngongo, eji sanguluka ni ku kala ni muenhu ua iuka mu ixi ku hádia ni hádia.

Maji saí anju, muthu mu nzumbi, ua nganala o athu phala o mbote iê. Kienhiki ua kituka Satanaji, kilombolola “Nguma.” Bhu kaxi ka nhoka, Satanaji ua nganala Eva, mu ku mu tangela kuila, muéne ueji beta o ku zediua sé o itendelesu ia Nzambi. Adá ni Eva a kaiela Satanaji, ni ku batula o ukamba uâ ni Mubhangi ua ngongo. Mukonda dia ku sola kuâ, o jitata jetu ja dianga a texi o kidielelu kiâ kia ku kala ni muenhu ua kalela-ku mu ixi, ni ku tu bhitisa o kituxi ni kufuá.

Maji Nzambi ua kanena ku bhanga kima phala ku batula o maka enhá ni kulondekesa o njila ia muenhu ua kalela-ku ku muiji ua Adá. Nzambi ua kanena “mbutu”—muthu ua katunda—ueji buikisa Satanaji ni ku zubha o hadi ioso ia tu bhekela Satanaji, Adá ni Eva. (Dimatekenu 3:15) Nanhi ueji kala o “mbutu” íii? Ueji moneka ku pholo.

Mu kithangana kieniókio, Satanaji ua bhange ioso phala ku fidisa o vondadi ia Nzambi ku di kumbidila. O kituxi ni kuiibha kua di bandekesa mu ngongo. Kienhiki, Nzambi ua banze ku buikisa o athu a iibha ni dilúvio. Muéne ua tumu Noué ku tunga álaka—kaxa ionene—phala muéne ni muiji uê, ni iama ia mu tumu Nzambi o ku i iambata mu álaka.

Muvu umoxi kioso kia bhiti o dilúvio, Noué ni muiji uê a tundu mu álaka ni ku kala mu ixi ia zele. Maji o “mbutu” ki iejile luua.

—O milongi íii ia tundu mu divulu dia Dimatekenu mu kibatulu 1 ndu 11; Juda 6, 14, 15; Dijingunuinu 12:9.