O kuila Jihova u bhana valolo mu nguzu i bhanga o abhezi’ê phala ku mu uabhela? Saí athu nange amba kuila, kana, mu kuzuela kuila Nzambi ka tu suu. Maji o ku banza kiki, ki bhangesa o athu ku banza kuila Nzambi muthu ua iibha. Maji ki kiene ki zuela o Maka mê, o Bibidia. Iene i tu tangela kuila Jihova, u mona o nguzu i bhanga o abhezi’ê a fiiele. Di longe o izuelu ia poxolo Phaulu mu divulu dia Jihebeleu 11:6.

Ihi ia bhingi phala ku uabhela Jihova? Phaulu ua soneka: ‘Muthu ua kambe o kixikanu ka tena ku uabhela kiambote Nzambi.’ Bhabha, Phaulu kambe kuila ku bhonza ku uabhela Nzambi sé kixikanu. O poxolo uambe kuma, o muthu ka tena ku uabhela Nzambi. Kiki kilombolola kuila, ku bhinga kixikanu phala o muthu ku uabhela Nzambi.

Kixikanu kiebhi ki uabhela Jihova? O kixikanu kietu kua Nzambi ku bhinga ima iiadi. Kia dianga, tua tokala ku xikina “kuila sai-ku Nzambi.” Bibidia ja mukuá amba kuila, tua tokala ku xikina kuila, “muéne muthu ua kidi.” Kiebhi ki tueji tena ku uabhela Nzambi se ki tu xikina kuila muéne muthu ua kidi? Maji, o kixikanu kia kidi ku bhinga ku bhanga dingi kima, mukonda ni madimonho, a xikina ué kuila Jihova muthu ua kidi. (Tiiaku 2:19) O kixikanu kietu kia kuila Nzambi muthu ua kidi, kia tokala ku tu suínisa ku bhanga kima, mba kulondekesa o kixikanu kietu mu ku bhanga ima i mu uabhela.—Tiiaku 2:20, 26.

Kia kaiiadi, tua tokala ku xikina ‘kuila Nzambi’ ‘mukua ku bhandulula.’ O muthu uala ni kixikanu kia kidi, u xikina kuila o nguzu ia mu bhanga phala ku uabhela Nzambi, ki ia-nda kala sé valolo. (1 Kolindo 15:58) Kiebhi ki tueji uabhela Jihova se tu kala ni phata ia kuila muéne ka tena ku tu bhandulula mu ima i tu bhanga? (Tiiaku 1:17; 1 Phetele 5:7) O muthu u zuela kuila Nzambi ka langa, ka uabhela, ki mukua ku bhana, o muthu iú kejiia o Nzambi ia Bibidia.

Jihova u bhandulula nanhi? Phaulu uambe: ‘Oso a mu sota ni muanhu.’ Saí divulu phala o alunguludi a Bibidia, di zuela kuila o kizuelu, ‘mu sota ni muanhu’ mu Ngeleku, ki kilombolola “ku tunda phala ku mu sanga” maji, kilombolola kuíza kua Nzambi phala “ku mu bheza.” O divulu dia mukuá di jimbulula kuila o kizuelu kiki mu Ngeleku, kilombolola ué nguzu i bhanga o muthu phala ku mu bheza. Mu kidi, Jihova u bhandulula ió ala ni kixikanu kia a bhangesa ku mu bheza ni henda ni muanhu.​—Matesu 22:37.

Kiebhi Jihova kia bhandulula o abhezi’ê a fiiele? Muéne ua kanena ku bhana kima ku hádia ku athu​—o muenhu ua kalelaku mu palaízu mu ixi phala kulondekesa o ukexilu uê ua ku bhana ni henda iê. (Dijingunuinu 21:3, 4) Né muene lelu kiá, o ió a sota Jihova ni kidi kioso, ene kiá mu tambula mabesá avulu. Ni kikuatekesu kia nzumbi iê ikôla, ene ala ni ukexilu uambote ua muenhu.—Jisálamu 144:15; Matesu 5:3.

Mu kidi, Jihova, Nzambi ua uabhela o ima i bhanga o abhezi’ê a fiiele. O kuila o kuijiia o kidi kiki, ki ku suínisa ku zukama dingi kua muéne? Se kiene, mukonda diahi ki u di longe dingi ia lungu ni kiebhi ki u tena kulondekesa o kixikanu kiê phala Jihova ku ku bhandulula?