A ngi vualela ku Riga, mbanza ia Letônia. Eme ni phang’iami ia muhatu a tu sase kuala mam’etu. Sumbala mam’etu uexile mukua Katolika, etu tua kexile múia ngó mu ngeleja mu ithangana ia jifesa ji kôla. Eme nga xikinine kuila, kuene Nzambi, maji mukonda dia unzangala, nga landukile mu ku bhanga ima iéngi i nga uabhele.

Kioso ki nga kulu, mam’etu ua mono kuila nga kexile ni uhete ua ku bula o ima ni ku i iudika dingi. Mam’etu ua thandanganhele kiavulu ku ngi xisa ubheka uami kubhata, mukonda ua kexile ni uôma ua kuila ngeji bula o ima ioso kubhata. Mukonda dia kiki, ua ngi sumbila ima phala ngi tonoke na-iu, nga uabhele kiavulu o ku i bula ni ku i tunga dingi. Nga uabhele ué kiavulu—bixi ia motolo. Mam’etu iu ua ngi sonekesa mu xikola ia ku lenga ni bixi ia motolo, a i xanene, Zelta Mopēds (Bixi ia Motolo ia Ulu). Eme nga mateka o ku lenga ni bixi iofele ia motolo, ku pholo nga kexile kiá mu lenga ni dinhunhu dia dikota.

Ki ngi laleka kiavulu o kuijiia, eme nga kituka hete mu ukexilu iú ua iibha ua ku tonoka. Nga nganhala kiá o joko íii mu veji jitatu mu mbanza ia Letônia, mu veji jiiadi nga nganhala o joko ia ku lenga ni dinhunhu ku Estados Bálticos.

Kioso ki nga kexile mu di tunda kiambote mu ufunu iú, o sai iami, Evija (ua kituka kaza diami) ua mateka o ku di longa o Bibidia ni Jimbangi ja Jihova. Muéne ua sangele o madivulu a Jimbangi ja Jihova, mua sangele o mbandu ia ku bhinga phala ku di longa o Bibidia. muéne ua soneka o mukanda iu ua u tumikisa. Sé ku laleka, Mbangi jiiadi ja Jihova, a mu kundu kubhata, muéne anga u mateka o ku di longa o Bibidia ni ene. Ki kiexile maka phala eme, maji mu thembu iná ki ngi mesenene kuijiia maka alungu ni ngeleja.

 Mu ku bhita thembu, o Jimbangi ja Jihova a ngi bhingi phala ku xikama ni kuívua kioso kia kexile mu longa o Bibidia kua Evija. O kima kia ngi tula muene ku muxima, o kikanenu kia Bibidia kia lungu ni palaízu mu ixi. Mu kifika, a ngi londekesa o kikanenu mu divulu dia Jisálamu 37:10, 11, kiambe: “Bhu bhita ngó kathangana, mukua phulu-ó ubhua athu ku mesu; u tala kiambote, bhu kididi kiê kala-bhu dingi. Oso-phe a lenduka, ene a lundula o ixi; a kala ku ngalasa ni kutululuka kuavulu.” Nga uabhela kiavulu kuívua o kikanenu kiki.

Nga mateka ku uabhela o ima mu nzumbi. Nga mateka o ku mona kuila kua kexile makutu avulu mu jingeleja. Maji o milongi ia Bibidia ia ngi suínisa kiavulu mukonda iexile ia kidi ki i bhonzele o ku i tendela.

Kioso ki nga suluka ni ku di longa o Bibidia, nga di longo kuila Jihova u bhana valolo ku muenhu, ni kuila iala ni valolo iavulu phala etu. (Jisálamu 36:9) Kiki kia ngi bhangesa ku xinganeka ku ufunu uami ua ku lenga ni dinhunhu—ki ngi mesenene dingi ku ta o muenhu uami mu iluezu. Nga mesenene kia ngó ku bhana o muenhu uami phala ku ximanesa Jihova. kienhiki, o fuma, o kijingu, o ku lenga ni dinhunhu, ki i kexile dingi ni valolo ku muenhu uami.

Ku muvu 1996, ngai mu kiônge kia dikota kia Jimbangi ja Jihova ku mundu uoso ku mbanza ia Tallinn, ku Estônia, bhua zukamene ku kididi ku nga kexile mu lengela ni dinhunhu. Mu kiônge kiki kia dikota, nga mono athu a tundu mu jixi javulu ejile mu kiônge kiki, tua kexile kumoxi ni paze. Mu kifika, kioso Mbangi imoxi ia Jihova ua jimbidisa o mbuenga iê, nga banzele kuila muéne nuka dingi ueji i sanga. Maji ki kua bhiti thembu iavulu, Mbangi ia Jihova ua sange o mbuenga iu ua i bheka ni ioso ia kexile-mu. Nga diuanene kiavulu! Eme nga tendela kuila o Jimbangi ja Jihova ene muene mu kumbidila o itumu ia Bibidia. Evija n’eme, tua suluka o ku di longa o Bibidia, ia a tu batizala kala tu Jimbangi ja Jihova ku muvu 1997.

Saí makamba ami, afú mu ufunu ua ku lenga ni dinhunhu. Ni kikuatekesu kia Bibidia, nga mono kuila nga tokalele ku bhanga kima phala ku sakidila o Mubhangi ua muenhu, Jihova. O milongi ia Bibidia ia bhulula o muenhu uami.

Mu mivu iuana, Evija n’eme, tua kexile ni ujitu ua ku kala mu sidivisu ia thembu ioso mu betele ia Jimbangi ja Jihova ku mbanza ia Riga. Lelu tua sanguluka kiavulu mu ku sasa mon’etu ua muhatu, Alise, ni ku mu kuatekesa ku zola ué Jihova. Ngala ué ni ujitu ua dikota ua ku kalakala kizuua kimoxi ku betele, mu ku iudika makalu ni ima ia mukua ia budika. Kiki ki ngi sangulukisa kiavulu, ku kalakala ni uhete u nga di longo mu undenge phala ku bhanga ima iambote! Mu kidi, katé lelu ngene hanji mu bula ima ni ku i iudika dingi.

Ngi bhana valolo iavulu o ujitu ua ku bhana umbangi ua lungu ni Nzambi ia kidi kumoxi ni muiji uami, mukonda dia ima i nga di longo mu Bibidia. kienhiki, o kikanenu kia palaízu mu ixi, kia lungulula o muenhu uami!