NANHI uexile Thomas Emlyn, ni ihi ia mu bhangesa ku zokela o kidi? Ihi i tu tena o ku di longa kua muéne i tena ku tu kuatekesa lelu?

Phala ku tambuijila o ibhuidisu íii, tua bhingi kuijiia ia bhiti ku hama ia 17 ni mu dimatekenu dia hama ia 18 mu ixi ia Inglaterra ni Irlanda. Mu mivu ienioió, o Ngeleja ia Inglaterra ia kexile ni ungana ua dikota. Saí ibuka ia akua Prostante ni athu a mukuá ka xikinine o ilongesu ni ifua ia Ngeleja.

Thomas Emlyn a mu vualele mu kithangana kieniókio, mu kizuua 27 kia mbeji ia Kasambuadi ua muvu 1663, mu mbanza ia Lincolnshire, Inglaterra. Kia tenesa 19 dia muvu, muéne ua bhange o diskursu diê dia dianga. Mu ku bhita kithangana, muéne ua mateka ku kuatekesa ni ku longa o mak’â Nzambi ku muhatu ua Sobha. Mu ku bhita dingi kithangana, muéne uai mu tunga mu mbanza ia Belfast, ku ixi ia Irlanda.

Kia bhixila mu mbanza ia Belfast, muéne ua mateka ku sidivila mu ngeleja. Mu ku bhita kithangana, Emlyn ua kalakala kála mukunji mu ididi iavulu katé ku mbanza ia Dublin.

Mu kithangana kieniókio, Emlyn ua kexile mu di longa o Mikanda Ikola ni nguzu ioso. O ku di longa o Bibidia, kua mu bhangesa ku dituna o ulongelu ua Tilindade, sumbala ua u xikinine mu dimatekenu. Kioso kiai ni ku tokuesa o divulu dia Matesu, Marku, Luka ni Nzuá, muéne ua mono kuila o madivulu enhá a kuatekesele o ukexilu uê ua ubhe ua ku banza.

Emlyn ka jimbulula kiá ni lusolo o kidi kia sangele. Maji amoxi, mu ngeleja iê mu mbanza ia Dublin, a mono kuila muéne ka kexile dingi mu tumbula o kizuelu Tilindade mu madiskursu mê. Kia mono kuila, akuâ keji tambula kiambote o ibanzelu iê, muéne ua soneka: “ki ngi tokala ku kinga ku kala jinga mu kididi kiki, kioso ki nga-nda fisala o ibanzelu iami.” Ku mbeji ia Kanake ia muvu 1702, athu kiiadi mu ngeleja a zoko ni muéne mukonda dia muéne ku jima o ulongelu ua Tilindade mu madiskursu mê. Emlyn ua fisala ni kidi kioso kuila ka xikinine dingi mu ulongelu ua Tilindade iu ua mesenene ku tunda mu ngeleja ienioió.

Mu ku bhita izuua, muéne ua tundu mu mbanza ia Dublin, Irlanda, iu uai ku Inglaterra. Maji, mu ku bhita mbeji jiiadi ni semana jiiadi, ua vutuka mu mbanza ia Dublin phala ku batula tu maka, ni ku banza kuia ku tunga mu mbanza ia Londres. Kioso kia kexile mu mbanza ia Dublin, muéne ua mesenene kulondekesa o ibanzelu iê ku athu, kienhiki ua soneka o kadivulu ni diambu: An Humble Inquiry Into the Scripture-Account of Jesus Christ. Mu kadivulu kaka, muéne ua londekesa mu Mikanda Ikola se mukonda diahi Jezú ka tokalele ku kala o Nzambi Suke-ku. Kiki kia bhekela njinda ku athu a tokalele mu ngeleja mua kexile Emlyn m’ukulu mu mbanza ia Dublin. A soneka mukanda phala ku mu kasa.

Emlyn a mu ambata kua Mvuale ia Inzo ia Kufundisa ku mbanza ia Dublin mu kizuua kia 4 kia mbeji ia Kanake ua muvu 1703. Mu kadivulu kê,  True Narrative of the Proceedings, Emlyn uambe kuila akexile ku mu tatela makutu “mukonda dia ku soneka divulu mu nga zuela kuila Jezú Kristu ka soko ni Nzambi o Tata.” Athu ka xikina mu itatelu íii ia makutu. Sambuadi dia ji Bispu ja Ngeleja mu ixi ia Irlanda a xikama mu kialu kumoxi ni afundixi. Emlyn ka muehela kuzuela phala ku di zokela. O, Ngana Richard Levins, muzokedi ua katunda ua athu, uambela Emlyn kuila eji mu kaia “kala kimbungu, kia kambe kitumu.” Mu disukilu dia kufundisa, Richard Pyne, mutuameni ua Kufundisa mu ixi ia Irlanda, uambela o kibuka kia afundixi kuila, se a kambele ku fundisa kala kia kexile mu kinga muene, o “jingana jê, o ji bispu, eji mu tala,” nange mu kulondekesa kuila o kibuka kia afundixi eji kua kaxtikala.

Kioso Emlyn kia mu tangela kuila ua bele mu kifundisu, o mufundixi ua dikota mu ixi ienioió ua mu tangela phala ku dituna o umbangi uenhó ua makutu. Maji Emlyn ua ditunu ku bhanga kiki. A mu bhingi dijimu ni ku mu ta mu kaleia mu mivu iavulu. Kuma muéne kexile ni kitadi phala ku futa o dijimu, ua bhiti mu kaleia mivu iiadi katé kioso kamba diê kia zuela ni jingana phala ku sosolola o kitadi kia dijimu. Emlyn a mu katula mu kaleia mu kizuua kia 21 kia mbeji ia Kavua ua muvu 1705. O jisonhi mua bhiti muene, ja mu bhangesa ku tumbula o izuelu i tua tange kiá mu dimatekenu: “Ngene mu tala hadi mu ku zokela o kidi ni fuma iê [ia Nzambi].”

Emlyn uai mu tunga mu mbanza ia Londres, muenhomo ua di sange ni William Whiston, diiala ua kexile ué mu tokuesa o Mikanda ikola ni ku mu zukutisa mukonda dia ku soneka o kidi kia sangele mu Bibidia. Whiston ua kexile mu xila kiavulu Emlyn, ni ku mu i xana “‘o padele ia dianga’ ia ‘ukidistá.’”

Kala William Whiston ni athu a mukuá akexile mu tokuesa o Bibidia kala Isaac Newton, Emlyn ua mono kuila o Bibidia ki i longa o Tilindade kala kia kexile mu londekesa o ulongelu ua Atanasiano. Muéne ua jimbulula: “Mu ku tokuesa kiambote o maka, ni ku di longa o Mikanda ikola, . . . nga mono kuila . . . nga tokala ku lungulula o ukexilu uami ua ku banza ia lungu ni Tilindade.” Muéne ua suku mu kuzuela kuila, “o Nzambi ni Tata ia Jezú Kristu muéne ngó o Suke-ku mu ngongo ioso.”

Ihi ia bhangesa Emlyn ku banza kiki? Muéne ua sange ibatulu mu Bibidia ia londekesa kuila Jezú ka soko ni Tat’ê. O ibatulu íii iala ku luiji (o ibanzelu ia Emlyn ia lungu ni mikanda ikola ia zendalala):

• Nzuá 17:3: “Kristu ka zuela kuila muéne uexile o Nzambi ió mba muéne o Nzambi imoxi-élele.” O Tata ngó a mu i xana “Nzambi ia kidi imoxi-èlele.”

• Nzuá 5:30: “O Mona ka bhanga o vondadi iê muene, maji o vondadi ia Tata.”

• Nzuá 5:26: “O muenhu uê a mu bhana nau kua Tata.”

• Efezo 1:3: “Kuma Jezú Kristu a mu i xana Mon’a Nzambi, nuka tua sange mu Bibidia kuila o Tata a mu i xana Tata ia Nzambi, maji a mu i xana o Tata ia Ngana ietu Jezú.”

Kioso Emlyn kia tange o ibatulu ioso íii, muéne uambe: “Se-ku kibatu mu Mikanda ikola mu tu sanga kuila o Tata, o Mona ni Nzumbi Ikôla a sokela ngó.”

Lelu athu avulu ene ni uôma ua ku zokela o kidi kia Mikanda Ikola. Maji Emlyn ua suínine mu ku zokela o kidi kia Bibidia. muéne uebhuidisa: “Se o muthu ka tena ku zokela o kidi kia sanga mu Mikanda Ikola, phala-hi muéne ua mu tanga ni ku di longa o Bibidia?” O muthu iú keji londekesa kuila muthu ua kidi.

O phangu ia Emlyn ni ia akuâ dingi, i tu suínisa ku dibhuidisa se tua mu suína ué mu ku zokela o kidi kioso ki tu bhita ni izukutisu. Tua tokala ué ku dibhuidisa: ‘Ihi ia beta dingi kota phala eme—o kijingu ni mabesá a bhana o athu ku diembu inga o ku zokela o kidi kia Mak’â Nzambi?’