Thonhi: Ua zekele kiebhi Timi. Nga sanguluka ku ku mona dingi.

Timi: N’eme uami nga sanguluka.

Thonhi: Nga ku bhekela Mulangidi ni Despertai! dia mbeji íii. Ua-nda uabhela kiavulu o ku a tanga.

Timi: Nga sakidila. Ua bhange kiambote uéza lelu mukonda nga mesena ku kuibhuidisa kima.

Thonhi: Kiambote, ihi?

Timi: Mazá nga kexile mu zuela ni koleka kami mu salu. Nga mu tangela o maka ala mu tumikanda tu ua ngi bhana. Maji muéne ua ngi tangela kuila ki ngi tokalele tu tanga o madivulu enhá, mukonda o Jimbangi ja Jihova ka xikina Jezú. O kuila kidi? Nga mu tangela kuila ngeji di kunda n’eie kioso ki ueji kuíza mu ngi kunda.

Thonhi: Nga sanguluka mu ku ngi tangela o maka enhá. Kima kiambote ua mu ta o maka enhá ni Mbangi ia Jihova. Mukonda se ua mesena kuijiia mu ihi mua xikina muthu, ku tokala ku mu ibhuidisa?

Timi: Kiene muene.

Thonhi: Ngi ku tangela kuila, o Jimbangi ja Jihova a xikina Jezú ni kidi kioso, mukonda tuejiia kuila phala ku bhuluka tua bhingi ku xikina Jezú.

Timi: Kiene ki nga kexile mu banza, maji kioso koleka kami kia ngi tangela kuila enu ki mu xikina Jezú, phata ia ngi kuata, eme nga mesenene kuijiia kiambote o maka enhá. Etu ué nuka tua zuelele o maka enhá.

Thonhi: O kuila ngi tena ku kulondekesa ibatulu mu Bibidia ilondekesa o valolo ia ku kala ni kixikanu kua Jezú? O Jimbangi ja Jihova ene mu kuatekesa athu avulu mu ukunji uâ ni ibatulu íii.

Timi: Ngi londekese.

Thonhi: Tu mateke ni ku tanga ihi ia zuela Jezú mu divulu dia Nzuá 14:6. Jezú ua kexile mu zuela ni poxolo jê. O Bibidia i zuela: “Jezú uixi: Eme ngi njila, ngi kidi, ngi muenhu. Kana muthu u bhixila kua Tata, ua kambe kuijila ko kuami.” Kala kilondekesa o velusu íii, kiebhi ki tu tena ku bhixila kua Tata?

Timi: Bhu kaxi ka Jezú.

Thonhi: Kiene muene. Kiki kiene kia xikina o Jimbangi ja Jihova ni muxima uoso. Ngi tangele: Mu kuijiia kuê kua lungu ni itumu ia Nzambi, o muthu kia samba, ua tokala u bhinga o ima mu dijina dia nanhi?

Timi: Mu dijina dia Jezú.

Thonhi: Kiene. Kiki kiene ki bhangesa kuila izuua ioso ki ngi samba, ima ioso ngi i bhinga mu dijina dia Jezú. Kiene uá kia bhanga o Jimbangi ja Jihova ku mundu uoso.

Timi: Nga sanguluka mu kuijiia o maka enhá.

Thonhi: O divulu dia mukua di tua tokala o ku tanga o divulu dia Nzuá 3:16. O velusu íii iala ni valolo ia dikota, saí athu a zuela kuila o velusu íii ilombolola o divulu dia Matesu, Marku, Luka ni  Nzuá. Kiki kilombolola kuila se u katula o misoso ioso io soneke ia lungu ni muenhu ua Jezú ni ukunji uê mu ixi ni ku i ta mu velusu imoxi, tueji sola o velusu íii. Nga ku dióndo tanga o velusu íii.

Timi: Kiambote. I zuela: ‘Nzambi ua zola o mundu, katé kia suku mu ku bhana Mon’ê umoxi-élele, phala uoso u mu xikana muene, kafue, maji a kale ni muenhu ki uábhua.’

Thonhi: Nga sakidila. Ua tangele kiá o velusu íii?

Timi: Xe, athu ene mu i tumbula veji javulu, saí bhabha a i soneka mu matadi.

Thonhi: Athu avulu ejiia o velusu íii. Tu tale kiambote ihi ia zuela Jezú mu velusu íii: Muéne uambe kuila o henda ia Nzambi i bhangesa o athu ku kala ni muenhu ua kalelaku—maji ihi i tua tokala o ku bhanga?

Timi: Ku kala ni kixikanu.

Thonhi: Kiene muene. Ku xikina o Mona umoxi-élele, Jezú Kristu. Kienhiki mu mbandu 2 ia kadivulu kaka, ku nga ku bhekela—tu sanga-mu o kidi kiki kia kuila o kuxikina Jezú ku jikula o njila ia ku bhuluka. O kadivulu, O Mulangidi, a ka bhange phala ku “suínisa o kixikanu kua Jezú Kristu, uafú phala etu tu tambule o muenhu ua kalelaku, lelu muéne ua mu tumina kiá kala Sobha ia Utuminu ua Nzambi.”

Timi: Nga diuana, mbé io soneke muene mu madivulu menu kuila o Jimbangi ja Jihova a xikina Jezú?

Thonhi: Kiene.

Timi: Maji-phe mukonda diahi athu ene mu mi tangela kuila ki mu xikina kua Jezú?

Thonhi: Muala ima iavulu i bhangesa o athu kuzuela kiki. Saí bhabha, athu a zuela kiki mu ku kaiela athu a mukuá ene mu zuela kiki. Mba kiene kia di longo mu jingeleja jâ.

Timi: Nga mu xinganeka​—nange saí athu a zuela kiki mukonda enu a mi jiia kuila mu Jimbangi ja Jihova, kana kala mu Jimbangi ja Jezú.

Thonhi: Nange kiene.

Timi: Mukonda diahi muene mu zuela kiavulu ia lungu ni Jihova?

Thonhi: Etu tu xikina kuila tua tokala ku tumbula o dijina dia Nzambi, Jihova—kala kia bhange Mon’ê, Jezú. Talesa ihi ia zuela Jezú kua Tat’ê mu musambu. Io soneke bhabha mu divulu dia Nzuá 17:26. Ua mesena ku tanga o divulu didi?

Timi: Nga mesena. ‘Eme nga ejidisa o dijina diê, hanji ngi d’ijidisa o dijina diê, hanji ngi d’ijidisa dingi, phala o henda i ua ngi zola na-iu eme, ni i kale mua ene, ni eme-muéne mua ene.’

Thonhi: Nga sakidila. Jezú uambe bhabha kuila uejidisile ku athu o dijina dia Nzambi. Mudiê, mukonda diahi Jezú ua bhange kiki?

Timi: Ki ngejiia.

Thonhi: Tu tange divulu diéngi phala tu mone se mukonda diahi muéne ua bhange kiki. O divulu dia Ikalakalu 2:21. Diambe: ‘Ki bhita kuma, uoso ua kola o dijina dia Ngana, u bhuluka.’ Kienhiki, ua-nda xikina n’eme kuila se phala ku bhuluka, o muthu ua bhingi ku kola o dijina dia Jihova, sé phata Jezú uejidile kiambote o kitumu kiki.

Timi: Kiene muene.

Thonhi: Kienhiki, o ubhulukilu ua akaiedi’ê kiene kia bhangesa Jezú ku mesena kuila ene ejiie o dijina dia Nzambi ni ku di tumbula. Kiki kiene ué ki tu bhangesa kuzuela ia lungu ni Jihova veji javulu. Tu mona kuila kima kia valolo ku ijidisa o dijina dia Nzambi ku athu phala ene uá a di tule ku akuâ.

Timi: Maji né muene se athu kejiia o dijina dia Nzambi mba a di tumbula, ene ejiia kuila a mu zuela o Nzambi ia kidi.

Thonhi: Nange kiene. Mu ku tu tangela o dijina diê, Nzambi ua mu tu jikula o njila phala tu mu zukame dingi.

Timi: Kiki kilombolola ihi?

Thonhi: Xinganeka: Etu ki tu bhingile kuijiia o dijina dia Mozé. Tua tokalele ku mu ijiia ngó kala o diiala dia jikula o Kalunga ka Kusuka mba o diiala dia tambula kua Nzambi o Dikuinhi dia  Ijila. Kiene kimoxi ué ni Noué—mukonda diahi tua tokala kuijiia o dijina diê? Hinu a mu ixanene ngó o diiala dia tungu o álaka iu ua bhulula o muiji uê ni iama. Ni Jezú Kristu ué kiene kimoxi, hinu a mu ixanene ngó o muthu ua tundu ku diulu iu uéza mu ixi mu fuila o ituxi ietu. Ki kiene?

Timi: Kiene.

Thonhi: Maji Nzambi ua bhangesa kuila tuijiia o majina a athu enhá. Mukonda o kuijiia o majina mâ, ku bhangesa o misoso iâ ku kala dingi ia kidi. Sumbala nuka tua di sangele ni Mozé, Noué ni Jezú, o kuijiia o majina mâ ku tu kuatekesa ku mona kuila o mala enhá akexile muene ku muenhu.

Timi: Nuka nga banzele kiki, maji ua lungu’ê muene!

Thonhi: Kiki kiene ué ki bhangesa o Jimbangi ja Jihova ku tumbula veji javulu o dijina dia Nzambi. Tua mesena ku kuatekesa o athu ku kala ni kixikanu kua Jihova Nzambi ni ku mu mona kala muthu ua kidi a tena ku bhanga nê ukamba. Maji tuejiia ué o kididi kia dikota kia Jezú mu ubhulukilu uetu. Tu tange dingi mu Bibidia kibatulu ki tu kuatekesa ku tendela o diba didi.

Timi: Kiambote.

Thonhi: Mu dimatekenu tua tange o divulu dia Nzuá 14:6. Jezú uambe kuila muéne ‘o njila, o kidi ni muenhu.’ Tu vutuke mu dimatekenu dia kibatulu kiki, Nzuá 14:1. Nga ku dióndo tanga o divulu didi.

Timi: Kiambote. Di zuela: “Dielelenu Nzambi; eme uami ngi dielelienu.”

Thonhi: Nga sakidila. O kuila kiki kilombolola kuila etu tu sola se tu xikina Jezú mba Jihova?

Timi: Kana. Jezú uambe kuila tua bhingi tu xikina kiiadi kiâ.

Thonhi: Kiene muene. Ngejiia kuila eie u xikina kuila ki ku bhingi ngó kuzuela kuila ngala ni kixikanu kua Nzambi ni kua Jezú. O uendelu uetu ua tokala ulondekesa kuila, etu tuala ni kixikanu kua ene.

Timi: Kiene muene.

Thonhi: Maji kiebhi o muthu kia londekesa kuila uala ni kixikanu kia kidi kua Nzambi ni kua Jezú? Tu tena kuzuela o maka enhá kizuua kiéngi. *

Timi: Nga-nda ku kingila.