Mukonda Jihova Nzambi * muéne o Mubhangi ua ima ioso, ni Muteni-a-Ioso, athu avulu a mu tatela kuila muéne uene mu bheka o hadi iene mu bhita mu ngongo, katé muene ni kuiibha kuoso. Maji talesa ihi i longa o Bibidia ia lungu ni Nzambi ia kidi:

• “Jihova mukua kidi mu njila jê joso.”—Jisálamu 145:17.

• ‘O uendelu uoso ua Nzambi ua kidi; o mua muene ki muene mangonha; izuua ioso muéne ngó ua iuka, o ku tetuluka ué muene ngó.’—Matendelelu 32:4.

• ‘Jihova ua vulu o ku kuatela henda ni ku lendukila.’—Tiiaku 5:11.

Nzambi ki muéne uene mu bheka o ima ia iibha mu ngongo. Maji o kuila muéne u diangula athu ni ima ia iibha? Kana. O Mikanda Ikola i zuela: “O muthu kia dianguka mu ithangana ia malamba ienhi’ii, k’ele, uixi: Nzambi muène ua ngi diangula.” Mukonda diahi ka tokala ku banza kiki? “Mukonda Nzambi kene ku mu diangula ku kima kiaiibha kioso-kioso, o muène ue kene mu diangula muthu.” (Tiiaku 1:13) Nzambi kene mu diangula muthu mba ku mu bhangesa ku bhanga ima ia iibha. Kienhiki, Nzambi kene mu bheka o kuiibha, kene ué mu diangula muthu kana. Kienhiki-phe, nanhi tua tokala ku mu tela o kikuma mu ima ia iibha i bhita mu ngongo?

Mu kulondekesa o kima kia dianga kiene mu bheka o hadi ku athu, o Bilbidia izuela: “O ibatu ni jithembu ja tokala ene oso.” (Ndongixi 9:11) Kioso ku bhita mavuua mba iluezu ioso-ioso, iene i kuama ngó muthu se o muthu muenhú u kala mu kididi ni mu kithangana kienhokio. 2.000 ja mivu ku dima, Jezú Kristu ua zuela ia lungu ni dikuinhi dia athu ni dinake afu kioso o sabhalu kia lundumukina ku thandu diâ. (Luka 13:1-5) Ene ka fu mukonda dia ima ia iibha ia bhangele m’ukulu; ene afu mukonda exile m’oxi dia sabhalalu kioso iene kia lundumuka bhoxi. Ku mbeji ia Katatu ua muvu 2010, kua bhiti mavuua mu ixi ia Haiti; o nguvulu ia Haiti a zuela kuila, o mavuua a jibha 300.000 a athu. O athu oso enhá ka fu mukonda dia ima ia iibha ia bhangele ande dia kufua kana. O makukata a jibha uá athu mu kithangana kioso-kioso.

Saí athu a dibhuidisa: ‘Nzambi ka tokalele ku fudisa o mavuua enhá phala ene ka bhite? Ka tokalele ku fikidila o athu ambote?’ Phala Nzambi ku fudisa o ima íii phala ki i bhite, kilombolola kuila muéne uijiia o ima íii, ande dia iene ku bhita. Né muene Nzambi uala ni kutena kua ku tanga o ima ia-nda bhita ku hádia, tua tokala ku dibhuidisa: O kuila Nzambi mukonda dia kutena kuê, uejiia ioso ia-nda bhita?—Izaia 42:9.

O Mikanda Ikola i zuela: “Nzambi ietu-phe uene mu diulu; mukua ku bhanga ioso iandala.”  (Jisálamu 115:3) Jihova u bhanga ioso i mona kuila ia tokala ku i bhanga—kana ioso ia tena muéne o ku bhanga. Kiki kia lungu ué ni ima ia-nda bhita ku hádia, muéne kejiia ioso. Mu kifika, m’ukulu kioso o kuiibha kuezalele mu mbanza ia Sodoma ni Ngomola, Nzambi uambela Mbalahamu: “Ngi tuluka-ku, ki ngal’iki, nga kà sange se kidi muene a bhange kala kudikola ku ngevu, o ki ki kala makutu, phala ngi k’ijiie.” (Dimatekenu 18:20, 21) Jihova ua solo ku muxima uê ku kamba kuijiia o kuiibha kueji bhita mu jimbanza jenhojo. Kiki kilondekesa kuila Jihova u tena ku sola se uijiia o ima ia-nda bhita ku hádia mba kana. (Dimatekenu 22:12) Kiki ki kilondekesa kuila Nzambi kale ni kutena mba mukua ituxi. Mukonda “kima kioso kia bhanga kitenena,” Nzambi u sota kuijiia ngó o ima iejiia muéne kuila ia lungu ni vondadi iê; muéne kene mu jijidika o athu ku kaiela njila imoxi. * (Matendelelu 32:4) Ihi-phe i tu tena o ku banza? Tu tena ku banza kuila: Nzambi u sola kuijiia o ima ia-nda bhita ku hádia.

Saí bhabha, o athu ene ala ni kikuma mu ima ia iibha iene mu bhita mu ngongo. O Bibidia i jimbulula kiebhi kiki kiene mu bhita. “Muthu-phe u dianguka, ki mu sanga o hanji iê-muène iiaibha, anga i mu bhomba. Kienhiki o hânji iaiibha ienhi’ii, ki i zubha o kuimita, i vuala kituxi. O kituxi k’ila kiza ku kitala, ki vuala kalunga.” (Tiiaku 1:14, 15) O athu a tena ku di bhekela ima ia iibha ku mienhu iâ, mu ku kaiela o jihanji jâ mba ku ta kituxi ni ku di bhekela hadi iavulu. (Loma 7:21-23) Kala ki tuene mu mona, tundé ukulu o athu ene mu bhanga ima iavulu ia iibha iene mu bheka hadi iavulu ku akuâ. O athu a iibha a funhisa akuâ, ku kituka ué athu a iibha, mukonda dia kiki-phe o kuiibha kua mu suluka katé kiki.—Jisabhu 1:10-16.

O kuila Nzambi ua tokala ku fudisa o athu phala ka bhange ima ia iibha? Talesa kiebhi kia bhange o muthu. O Mikanda Ikola ilondekesa kuila Nzambi ua bhange o muthu mu kidifuanganu kiê. Kienhiki, o athu ala ni kutena kua kulondekesa o ídifua ia Nzambi. (Dimatekenu 1:26) Nzambi ua bhange o athu ni ujitu ua ku sola, se a zola Nzambi mba kana, se a mu belesela mu ku bhanga o ima ia uabha bhu pholo iê mba kana. (Matendelelu 30:19, 20) Se Nzambi ua jijidikile o athu ku kaiela ngó njila imoxi ku muenhu, kiki kieji katula o valolo ia ujitu ua tu bhana Nzambi, o ujitu ua ku sola o ima? O athu keji kala ni valolo, eji kala kála jimakina ji kalakala ngó kala kia ji bhange! Kiene kimoxi ué se a xindile kiá ioso i tua-nda bhanga ni ioso ia-nda bhita ku muenhu uetu. Tu sanguluka kiavulu mu kuijiia kuila Nzambi ua tu jingisa mu ku tu bhana o ufolo ua ku sola o uendelu uetu  ku muenhu! Maji kiki ki kilondekesa kuila o kuiibha kuene mu bheka o athu ni ima ia iibha iene mu sola ene, ia-nda suluka ku mivu sé dizubhilu, kana.

Se uibhuidisa muthu mukua Hindu mba mukua Buda o kibhuidisu kiala ku thandu dia kadivulu kaka, ene a-nda ku tambuijila: “O athu ambote a bhita mu ima ia iibha mukonda dia kitumu kia Karma. Ene a mu futa o ima ia bhange m’ukulu ande dia kufua.” *

Ia lungu ni ulongelu ua Karma, kima kiambote kuijiia ihi i longa o Bibidia ia lungu ni kufua. Mu jaludim ia Edene, muejila o athu, o Mubhangi uambela o diiala dia dianga, Adá: “Ku mixi ioso mu díbhia u die-ku kioso ki ua mesena; maji ku muxi-phe ua kuijiia kiauabha ni kiaiibha kana ku dia-ku; mukonda o kizuua ki ua kà dia-ku ijiia na-kiu kuma ua kà fua muene.” (Dimatekenu 2:16, 17) Se Adá ka tele kituxi mu ku bhukumukina Nzambi, muéne ueji kalelaku ku muenhu. O kufua o kaxtiku kejila mu ku bhukumukina o kitumu kia Nzambi. Kienhiki, kioso Adá kia vuala an’a, ‘o kufua kua bhiti ku thandu dia athu oso.’ (Loma 5:12) Kienhiki tu tena kuzuela kuila “o futu ia ituxi kufua.” (Loma 6:23) O Bibidia ué i jimbulula: “Uoso uafu, ua jituka kiá ku nguzu ia ituxi.” (Loma 6:7) Kiki kilombolola kuila, o athu kene mu ku a kaxtikala mukonda dia ituxi kioso kiafuá.

Athu avulu lelu a banza kuila o athu a tala hadi mukonda dia kitumu kia Karma. O muthu u xikina o hadi iê ni ia akuâ sé ku fundisa. Maji o kibanzelu kiki, ki ki bhana kidielelu kia kuila hádia o kuiibha kua-nda bhua mu ngongo. Ene mu zuela kuila o muthu ka-nda tala dingi hadi se a kamba ku mu vuala mu kididi kiéngi. Sé phata o ibanzelu íii, ki i difu ni ima i longa o Bibidia. *

Maji o muthu ki muéne ua mateka ni kuiibha. Mu dimatekenu Satanaji, o Diabhu uexile anju ia fiiele ia Nzambi, ‘ka nange mu kidi’ iu ua bheka o kituxi mu ngongo. (Nzuá 8:44) Muéne ua suínisa o ku bhukumuka mu jaludim ia Edene. (Dimatekenu 3:1-5) Jezú Kristu ua mu ixana ‘kadiaphemba’ ni “sobha ia mu tumina mu ngong’umu.” (Matesu 6:13; Nzuá 14:30) O athu a belesela Satanaji, kioso kia dituna o njimbu iambote ia Jihova. (1 Nzuá 2:15, 16) O divulu dia 1 Nzuá 5:19 di zuela: “Mundu uoso-phe ua zeka mua Kadiaphemba ió mukua ku tondalesa.” Kuene ji-anju ja mukuá a di bhange ji-anju ja iibha ji ja di bundu ni Satanaji. O Bibidia ilondekesa kuila, Satanaji ni madimonho mê, a mu ‘nganala o mundu uoso,’ ni ku bheka ‘malamba mu ngongo.’ (Dijingunuinu 12:9, 12) Kienhiki, tua tokala ku tatela Satanaji o Diabhu mu kuiibha kuoso kuene mu bhita mu ngongo.

Mu kidi, Nzambi ki muéne uene mu bheka o ima ia iibha ku athu mu ngongo; ki muéne ué uene mu a talesa hadi. Maji muéne ua kanena ku zubha o kuiibha kuoso kala kia-nda londekesa o mbandu ia-nda kaiela.