Nzuá: Matesu, ngi sanguluka kiavulu mu ku kala mu zuela n’eie maka alungu ni Bibidia. * Mu kizuua kia tundu-mu, eie uebhula maka alungu ni Utuminu ua Nzambi. Eie ua ngi bhuidisa se mukonda diahi o Jimbangi ja Jihova a xikina kuila o Utuminu ua Nzambi ua mateka o ku tumina ku muvu ua 1914.

Matesu: Kiene muene, nga kexile mu tanga o madivulu menu, nga tange-mu kuila, o Utuminu ua Nzambi ua mateka o ku tumina ku muvu ua 1914. Eme nga mesena kuijiia kiambote o maka enhá, mukonda enu muene mu zuela kuila, o ilongesu ienu ioso i tunda mu Bibidia.

Nzuá: Kidi muene.

Matesu: Eme nga tange kiá o Bibidia ioso. Maji ki ngi sange-mu kibatulu kia tumbula o muvu ua 1914. Kienhiki, ngai mu tokuesa mu Internete o muvu uenhú “1914.” Maji né njimbu né njimba.

Nzuá: Ngi ku ximana mu ima iiadi. Moxi, mu ku tanga o Bibidia ioso. Kiki kilombolola kuila ua uabhela o Mak’â Nzambi.

Matesu: Kiene muene. Se-ku divulu diéngi dia soko ni Bibidia.

Nzuá: Kidi. O ia kaiadi, mu ku lengela mu Bibidia mu ku sota o itambuijilu ia Ibhuidisu iê. Eie ua bhange kala ki tu tendelesa o Bibidia o ku bhanga: “Sota” o kuijiia. * Kima kiambote ki ua mu bhanga.

Matesu: Kidi kiê. Nga mesena kuijiia muene. Nga tokuesa ué o maka enhá alungu ni muvu ua 1914 mu divulu didi mu tuene mu di longa. O maka alungu ni nzoji ia Sobha, nzoji ia lungu ni muxi ua dikota a u batula iu ua kulu dingi, nga fika kiene.

Nzuá: Kiene muene. O maka enhá tu a sanga mu divulu dia Daniiele kibatulu 4. Di tanga o nzoji ia loto Nabukodonozolo Sobha ia Babilonha.

Matesu: Kiene muene. Nga tange o maka enhá veji javulu. Maji ngi ku tangela o kidi kuila, ki ngi tendela kiebhi o maka enhá alungu ni Utuminu ua Nzambi mba ni muvu ua 1914.

Nzuá: Matesu ni polofeta Daniiele ué ka tendela ioso ia mu tumu o ku soneka!

Matesu: Mbe?

Nzuá: Xe. Bhabha mu divulu dia Daniiele 12:8, muéne uambe: “Eme-phe kia zuel’iki nga k’ivu maji ki kia ngi jimbulukila.”

Matesu: Mbe k’eme ngó kana.

Nzuá: Mu kidi, Daniiele ka tendela o maka  mukonda ki i kexile hanji o kithangana kia Nzambi kia ku bhangesa o athu ku tendela o maka enhó u tu sanga mu divulu dia Daniiele. Maji mu lelu didi, tu tena kiá o ku tendela kiambote o maka enhá.

Matesu: Mukonda diahi ua mu zuela kiki?

Nzuá: Tala ihi i zuela o velusu ia kaiela. Daniiele 12:9, di zuela: “Mak’ama a ma jika, ia ate-ku kidimbu katé kia k’èza o thembu ia sukidilá-ku.” O izuelu íii ilombolola kuila, o maka enhá eji ku a tendela ngó ku hádia, mu “thembu ia sukidilá-ku.” Tua-nda di longa ku pholo kuila, o izulukutu ioso iene mu bhita lelu ilondekesa kuila tuala kiá mu thembu ia sukidila-ku. *

Matesu: U tena ku ngi jimbuluila o maka enhá?

Nzuá: Nga-nda fikisa.

Nzuá: Ande dia ku mateka, tu bhitulule hanji bhofele o nzoji ia Sobha Nabukodonozolo. Kiene ki tua-nda mona ihi ilombolola o nzoji íii.

Matesu: Kiambote.

Nzuá: Mu nzoji, Nabukodonozolo ua mono muxi ua dikota ua tula ku diulu. Iu ua kivu o mukunji ua Nzambi ku tumina ku batula o muxi uenhú. Maji Nzambi ua tumu ku xisa o kixinji kiê. Mu ku bhita “sambuadi dia jithembu,” o muxi ueji kula dingi. * Kia dianga, o maka enhá a bhiti ni Sobha Nabukodonozolo. Sumbala muéne uexile Sobha ia fuma—kala o muxi ua tula katé ku diulu—Nabukodonozolo a mu batula mu “sambuadi dia jithembu.” Uejiia ihi ia bhiti ni muéne?

Matesu: Kana, ki ngi kijiia.

Nzuá: Se-ku maka. O Bibidia ilondekesa kuila Nabukodonozolo ua saluka mu sambuadi dia jithembu. Mu kithangana kieniókio, muéne ka tenene ku tumina. Maji kioso kia bhiti o sambuadi dia jithembu, Nabukodonozolo ua disanze iu ua mateka dingi o ku tumina kala sobha. *

Matesu: Kiambote, eme ngi tetuluka. Maji kiebhi o maka enhá alungu ni Utuminu ua Nzambi ni muvu ua 1914?

Nzuá: O kikanenu kiki kiala mu luiadi. Kia dianga, o maka enhá a bhiti kioso o ungana ua Sobha Nabukodonozolo kia u batula. Kia kaiadi, kia lungu ni kioso o ungana ua Nzambi kia u batula. Kienhiki-phe o ki kumbidilu kia kaiadi kiene kia lungu ni Utuminu ua Nzambi.

Matesu: Kiebhi ki uejiia kuila, o kikanenu kiki kia lungu ué ni Utuminu ua Nzambi?

Nzuá: Kia dianga, o kikanenu kiene kiki, ki tu londekesa o maka enhá. Kala kilondekesa o divulu dia Daniiele 4:17, o kikanenu kiki a ki bhanene ‘phala ki bhekele athu ku tongolola kuma, mbé Suke-ku muene utumina o utuminu ua athu; u u bhana uoso a mu andala.’ Ua mono o kizuelu ‘o utuminu ua athu?’

Matesu: Nga mono, kiambe kuila ‘Suke-ku muene utumina o utuminu ua athu.’

Nzuá: Kiene muene. Mudiê, nanhi o “Suke-ku?”

Matesu: Nga fika Nzambi.

Nzuá: Kiene muene. Tu tena ku mona-phe bhabha kuila, o kikanenu kiki ki ki lungu ngó ni Nabukodonozolo kana. Kia lungu ué ni “utuminu ua athu”—mba o ungana ua Nzambi ku athu. Kiki kiene ki tu londekesa ué o jivelusu ja mukuá.

Matesu: Kiebhi?

Nzuá: O divulu dia Daniiele di tumbula veji javulu diambu dimoxi. Di tanga o kikanenu kioso o Utuminu ua Nzambi kieji u tudika bhu maku a Mon’ê, Jezú. Mu kifika, tu tange o ibatulu ia mukua mu divulu dia Daniiele. O kuila u tena ku tanga o divulu dia Daniielel 2:44?

Matesu: Se-ku maka. Di zuela: “Maji, mu izuua ia jisobha jenhiji, o Nzambi ia diulu ua kà bheka-ku o Utuminu ki u xikina dingi ku u jikinisa; o utuminu iú kà u ehela ku bhita dingi bhu maku ma miji iengi, uene kiá ua kà sasujula o mautuminu moso’ama anga a-bhua-ku, maji o uene ua kà xalela ni kutumina mu thembu joso katé ku hádia ni hádia.”

 Nzuá: Nga sakidila. U tena ku mona kuila o velusu íii ia mu tanga maka alungu ni Utuminu ua Nzambi?

Matesu: Manhi kiá.

Nzuá: Tua mono kuila o Utuminu iú “ua kà xalela ni kutumina mu thembu joso katé ku hádia ni hádia.” Kiki kiene kia-nda bhita ni Utuminu ua Nzambi, maji ki kiene kiene mu bhita ni mautuminu a athu, ki kiene?

Matesu: Kana, ki kiene.

Nzuá: Tala dingi o kikanenu kia mukuá mu divulu dia Daniiele kia lungu ni Utuminu ua Nzambi. Tu ki sanga mu divulu dia Daniiele 7:13, 14. Ia lungu ni nguvulu iú ua-nda tumina ku hádia, o jivelusu jiji, ji zuela: “A mu bhana kutumina, ni kijingo, ni ungana, phala miji ioso, ni ifuxi, ni madimi moso ende ni ku mu bhikila muene. O ku tumina kuê kua miaka, ku kuene dizubhilu, o ungana uê uene ngó, ka tena ku u buisa-ku.” Saí kizuelu bhabha ki ua kijiia kiá?

Matesu: O jivelusu ja tumbula o kizuelu utuminu.

Nzuá: Kiene muene. Ki utuminu uoso-uoso kana. Tua mono kuila, o Utuminu iú ueji tumina “miji ioso, ni ifuxi, ni madimi moso.” O izuelu íii ilombolola kuila, o Utuminu ueji tumina o ngongo ioso.

Matesu: Ki ngi ki fikile kuila o izuelu íii ilombolola kiki, maji kiene muene. Kiene ki tua tange.

Nzuá: O kikanenu ué kia tange dingi, kixi: “O ku tumina kuê kua miaka, ku kuene dizubhilu, o ungana uê uene ngó, ka tena ku u buisa-ku.” O izuelu íii ia difu ni izuelu i tua tange mu divulu dia Daniiele 2:44, ki kiene?

Matesu: Kiene muene.

Nzuá: Tu bhitulule bhofele i tua zuela katé mu kindala kiki. O kikanenu mu divulu dia Daniiele kibatulu 4 a ki tange phala o athu ejiie kuila o “Suke-ku muene utumina o utuminu ua athu.” O izuelu íii ilondekesa kuila, o kikanenu kiki kiala ni di kumbidilu dia mukuá dia dikota, o ia bhiti ni Nabukodonozolo, ndenge. Mu divulu dioso dia Daniiele, tu sanga-mu ikanenu ia lungu ni utudilu ua Utuminu ua Nzambi ni ungana ua Mon’ê. Mudiê, o kuila tu tena ku xikina kuila o kikanenu kiki kia tange o divulu dia Daniiele mu kibatulu 4, kia lungu ué ni Utuminu ua Nzambi?

Matesu: Xé. Maji o muvu ua 1914?

Nzuá: Tu zuele dingi ia lungu ni Nabukodonozolo. Kia dianga, tua mono kuila, o muxi ua lombolola o Sobha iú. O ungana ua bhu kioso o muxi kia u batula iu ua xala kiki mu sambuadi dia jithembu—mba kioso muéne kia saluka. O sambuadi dia jithembu jiji, ja bhu kioso Nabukodonozolo kia di sanze iu ua mateka dingi o ku tumina. Kia lungu ni Utuminu ua Nzambi, eji u batula ué—maji ki mukonda dia kuila Nzambi ua lueza, kana.

Matesu: Kiki kilombolola ihi?

Nzuá: M’ukulu, o jisobha akua Izalaiele akexile mu tumina mu mbanza ia Jeluzaleme edile kala a xikama ku “kiandu kia Jihova.” * Ene akexile mu lombolola Nzambi ua mu tumina o mundu uê. Kienhiki, o ku tumina kua jisobha jenhojo kua kexile mu lombolola o ku tumina kua Nzambi. Maji mu ku bhita thembu, jisobha javulu a bhukumukina Nzambi, mukonda dia kiki, athu avulu a bhange uá kiki mu ku a kaiela. Mukonda  dia ku bhukumuka kua akua Izalaiele, Nzambi ka a kuatekesa bhu maku a akua Babilonha ku muvu ua 607 A.K.K. Tundé ku muvu uenhó, kana-ku dingi sobha ua kexile mu lombolola Jihova mu mbanza ia Jeluzaleme. Kienhiki, o ungana ua Nzambi a u batula. Ua tetuluka?

Matesu: Xe, nga tetuluka.

Nzuá: Mu kiki, o muvu ua 607 A.K.K. kiene kia mateka o sambuadi dia jithembu. Mu disukilu dia sambuadi dia jithembu, Nzambi ueji ta ku ungana nguvulu iengi ieji lombolola Muéne—maji muthu ku diulu. Kiki kieji bhita kioso o ikanenu ia mukuá i tua tange mu divulu dia Daniiele, kia-nda di kumbidila. Kienhiki, ng’ibhula: O sambuadi dia jithembu ia bhu thembu kuxi? Se tu tambuijila o kibhuidisu kiki, tua-nda tena kuijiia se thembu kuxi o utuminu ua Nzambi kia mateka o ku tumina.

Matesu: Nga tetuluka. Kienhiki-phe, o sambuadi dia jithembu ja bhu ku muvu ua 1914?

Nzuá: Kiene muene.

Matesu: Maji kiebhi ki tuejiia o maka enhá?

Nzuá: Kioso Jezú kia kexile mu ixi, Jezú ua londekesa kuila o sambuadi dia jithembu ki ji bhuile luua kana. * Kiki kilondekesa kuila, o sambuadi dia jithembu, thembu iavulu. O sambuadi dia jithembu ia matekene hama ja mivu ande dia Jezú kuíza mu ixi ni ia suluka katé muéne kia vutuka ku diulu. Ijiia-kiu ué kuila, o athu eji tendela ngó kiambote o ikanenu ia Daniiele mu “thembu ia sukidilá-ku.” * Ku mivu ia 1800, o Adilongi a Bibidia a a suínisa ku tokuesa kiambote o kikanenu kiki ni ikanenu ia mukuá. Ene a mateka o ku tetuluka kuila o sambuadi dia jithembu eji bhua ku muvu ua 1914. Izulukutu iavulu ia bhiti ku muvu ua 1914 ia londekesa kuila, o Utuminu ua Nzambi ua mateka o ku tumina ku muvu uenhó ku diulu. Tundé ku muvu uenhó, o mundu ua bokona mu thembu ia sukidila-ku. Nga mu mona kuila, íii milongi iavulu phala eie . . .

Matesu: Kiene, milongi iavulu muene. Nga-nda bhinga muene ku i tanga dingi phala ku i tendela kiambote.

Nzuá: Ku luuale. Eme nga bhingile uami ku katula kithangana phala ku tendela o ikanenu íii. Manhi se ua mono kuila ioso i xikina o Jimbangi ja Jihova ia lungu ni Utuminu, iala mu Bibidia.

Matesu: Kiene nga mono. Eme ngi diuana kiavulu mu kuijiia kuila ioso i mu longa, i tunda mu Bibidia.

Nzuá: Ngi mona kuila, kiene ué ki ua mesena. Maji kala ki nga zuela kiá, íii milongi iavulu phala eie u i xinganeka kindala. Nange uala dingi ni ibhuidisu ia mukuá. Mu kifika, tua di longo kuila o sambuadi dia jithembu ia lungu ni Utuminu ua Nzambi ni kuila o jithembu jiji ja mateka ku muvu ua 607 A.K.K. Maji kiebhi ki tuejiia kuila o jithembu jiji ja bhu ku muvu ua 1914? *

Matesu: Kidi muene, nga kexile kiá mu dibhuidisa ué kiki.

Nzuá: O Bibidia iene i tu kuatekesa ku tanga o sambuadi dia jithembu jiji. Ua mesena ku ta o maka enhá mu kizuua kia mukuá ki nga-nda kuíza bhabha? *

Matesu: Kiene, nga mesena.