UZE ua kexile mu nhunga mu kaleia, ni ku suuala mukonda dia salu ni kalolo. Ku ixi ia Ijitu o muanha ua temene kiavulu, uexile kála dijiku dia uama kiavulu. Muéne uejidile se ji ndobi ji kuxi ja kexile mu kaleia, ni misula ia kexile mu ji phalelu. O kaleia kifua kiexile kala inzo iê. Maji Zuze akexile ku mu xila kiavulu, ne muene mu kaleia.

Muéne ua kexile mu xinganeka veji javulu o milundu ia Hebolone, mua kexile mu kuinga o ibhaku ia tat’ê! Muéne ua kexile ni 17 ia mivu kioso kia mu tumikisa tat’ê Jakobo, dikanga dia dibhata diâ. Maji kindala kiki muéne ka tenene dingi ku xinganeka ku ufolo ua kexile nau mu kithangana kieniókio. O jiphange ja Zuze akexile ni difuba diê, a mu zembele, ia a mu sumbisile ku ubhika. Muéne a mu ambatele ku Ijitu, kia dianga uai mu sidivila ku dibhata dia kabhitangu ka kilangidilu mukua Ijitu, dijina diê Potifale. Zuze a mu dielele kiavulu kua ngana iê, maji o kidielelu kiki kiabhu kioso o muhatu a ngana iê ua mu tatela kuila muéne ua mesenene ku mu ngombela, ia a mu takuile mu kaleia kaka. *—Dimatekenu kibatulu 37, 39.

Zuze ua tenesa kiá 28 dia mivu, kifua ua bhiti dikuinhi dia mivu ku ubhika ni mu kaleia. Muéne ka kexile mu tambula o ufolo kála kia kexile mu banza. O kuila eji ku mu katula mu kaleia? O kuila ueji di sanga dingi ni Tat’ê ni ndeng’ê ia kazola, Bejamí? Thembu kuxi ieji kala dingi mu kaleia?

O kuila eie ua divuile kiá kála kia divu Zuze? Kioso ki tu kula tu kala ni ibhidi iavulu ku muenhu uetu, ki tu i fikile kioso ki tua kexile mu unzangala uetu. O ibhidi íii i tena ku nangenena sé kuijiia kiebhi ki tu dibhana na-iu ni ku kolokota. Tua-nda mona ihi i tu longa o musoso ua Zuze.

Zuze uejidile kuila o Nzambi iê, Jihova, nuka ueji ku muenha ubheka. O kuijiia kuku sé phata kua mu kuatekesa o ku kolokota. Né muene mu kaleia, Jihova ua tena ku besoala Zuze. Mu kiki, O Bibidia i zuela: “Jihova-phe anga u kala ni Zuze, u mu bhanga henda, u mu sangesa ngalasa ku mesu a kasalelu ua tambula konda ia kaleia.” (Dimatekenu 39:21-23) Mukonda dia Zuze ku kalakala ni nguzu ioso, Nzambi ua mono kuila ua tokalele ku mu besoala. Sé phata, Zuze ua divu kiambote mu kuijiia kuila Jihova ua kexile jinga ku mbandu iê!

O kuila Jihova ua mesenene kuila Zuze u kala mu kaleia muenhomo izuua ioso sé dizubhilu? Zuze ka kijidile, maji muéne uambatele o maka enhó kua Nzambi mu musambu. Kála kiene mu bhita, Nzambi u tambuijila o misambu ietu mu ukexilu ki tu u fikile. Saí kizuua mu kaleia mua bokona pelezu jiiadi ji fixiiadi ja Sobha Falaó. Diiala dimoxi uexile padelu ia dikota ua kexile ku pholo, o diiala dia mukua uexile kopelu ia dikota ua kexile ku pholo.—Dimatekenu 40:1-3.

O kabhitangu ka kilangidilu ua bhingi Zuze phala ku tambula konda ia maiala aiadi iá, exile akalakadi a Sobha. * Saí usuku, kiiadi kiâ a loto nzoji ia bhonzele ku i jimbulula. Kioso Zuze kia a mono mu kamene, muéne ua mono kuila ene kexile kiambote. Kienhiki, uebhula: “Lelu mua di suuatela-hi kiki, pholo jenu ja luuala?” (Dimatekenu 40:3-7) Nange o henda ia Zuze kua ene iene ia a bhangesa ku divua kiambote ni ku mu tangela ihi ia kexile mu a luualesa. Zuze kejidile o maka enhá, maji o kuzuela ni ene kueji lungulula o muenhu uê. Se Zuze ka londekesele henda ku maiala enhó hinu ene keji mu tangela o maka. O ia bhange muéne ia tokala ku tu suínisa ku di bhuidisa, ‘O kuila ngi londekesa o kixikanu kiami kua Nzambi mu ku zola o athu?’

O maiala aiadi a zuela kuila a luualele mukonda a lotele nzoji ia bhonzele o ku i jimbulula ni kuila ki mu kexile muthu ueji tena ku a jimbuluila na-iu. Akua Ijitu a bhanene valolo ia dikota ku ji nzoji, akexile mu dielela kiavulu ku jinganga ambele kuila akua ku jimbulula o ji nzoji. O maiala aiadi kejidile kuila o ji nzoji jâ ja tundile ku Nzambi ia Zuze, Jihova. Maji Zuze uejidile. Muéne ua a tangela: “Manhi o kujimbulula ki kuangene kua Nzambi? Ngi tangedienu-iu, [o nzoji] nga mi diondo.” (Dimatekenu 40:8) Lelu o ia zuela Zuze iala hanji ni valolo ia dikota ku jiselevende joso ja Nzambi akua ku di longa o Bibidia. Kima kiambote se athu oso akua ngeleja a lenduka! Mu veji dia ku di nanza, tua tokala tu dielela kua Nzambi kuila muéne ngó u tena ku a jimbuluila o Maka Mê!—1 Tesalonika 2:13; Tiiaku 4:6.

O kopelu muéne ua tuamena mu kuzuela o nzoji ia lotele muéne. Muéne ua tangela Zuze kuila ku nzonji ua mono muvidi, o ku muvidi anga ku kala thangu jitatu kua buingita ithulu ni jiuva. O jiuva jabhi kiá, o kopelu ua ji kamena mu kopho ia Falaó. Ni kikuatekesu kia Jihova, Zuze uejidile o dijimbuluilu dia nzoji. Muéne ua tangela o kopelu kuila o jithangu jitatu, jilombolola izuua itatu; mu izuua itatu ienioio o Sobha Falaó ueji mu tudika dingi ku kididi kua kexile kiá mu kalakala m’ukulu. O kopelu ua divu kiambote ni dijimbuluilu didi, Zuze anga ua mu tangela, uixi: “Kioso ki ua kà bhanduluka, u ngi kuatele henda, nga ku diondo, u ngi zuelele kua Falaó.” Zuze ua tangela o kopelu kuila a mu nhanene mu ixi iê-muene ni kuila ka bhange kima kia tokalele ku mu tela mu kaleia.—Dimatekenu 40:9-15.

Mu kuívua o dijimbuluilu diambote dia nzoji ia kopelu, o padelu uebhula Zuze o dijimbuluilu dia nzoji iê. Muéne ua mono mihamba itatu ia kuambatela jimbolo, jinjila ji kala mu kudia mu mu hamba umoxi uambatele ku mutué uê. Nzambi ua bhana ué kua Zuze o dijimbuluilu dia nzoji íii. Maji o padelu keji sanguluka ni njimbu. Zuze uambe: “O dijimbuluilu diê dienhidi: O mihamba itatu, izuua itatu. Bhua kà bhitila izuua itatu, Falaó ua-nda ku katula o mútue ku mukutu, u ku nienga ku muxi, o xitu ié anga i diua ku jinjila.” (Dimatekenu 40:16-19) Kála kiene mu bhita ni jiselevende joso ja Nzambi, Zuze ni ku suina kuoso ua boko o njimbu ia Nzambi, ki kala o njimbu iambote mba o njimbu ia kufundisa.—Izaia 61:2.

O kia bhiti izuua itatu, ia bhiti muene kala kia tangele Zuze. Falaó ua tenesa mivu ia uvualukilu iu ua bhana fesa, maji o mundu ua Nzambi ka kexile mu bhanga o ji fesa jiji. Mu fesa íii ia bhange o Sobha, muene mua fundisa o maiala aiadi. O padelu a mu nhenga kála kia tangele Zuze, maji o kopelu a mu tudika dingi ku kididi mua kexile kiá m’ukulu. Maji muéne ua jimbi o ku tumbula Zuze kua Sobha.—Dimatekenu 40:20-23.

Kua bhiti mivu iiadi ia muvimba. (Dimatekenu 41:1) Sé phata, Zuze ua divu kiaiibha! Nange muéne ua dielele kiá kuila ueji tambula ufolo mukonda dia kikuatekesu kia mu bhana Jihova kia ku jimbulula o ji nzoji ja bhonzele ja kopelu ni padelu. Izuua ioso ki kukia, Zuze u dielela kuila a-nda mu bhulula. Maji mu ku bhita izuua, ua mono kuila ua kexile hanji mu kaleia. O mivu iiadi ienioio ia betele ku bhonza phala Zuze. Maji muéne nuka ua bhana dikunda kua Nzambi iê Jihova. Mu veji dia ku bhuila, muéne ua kolokotele, o ibhidi mua bhitile ia mu bhangesa ku kala dingi ni nguzu ia ku kolokota.—Tiiaku 1:4.

Mu izuua íii ia bhonzo, etu oso tua bhingi ku kolokota. Phala ku di bhana ni ibhidi ia kizuua ni kizuua, tua bhingi o nguzu, ni muanhu ni ku tululuka kua muxima kuijila ngó kua Nzambi. Kála kia kuatekesa Zuze, Nzambi u tena ué ku tu kuatekesa phala ki tu thandanganhe, muéne u tu bhana kidielelu.—Loma 12:12; 15:13.

O kopelu ua jimbi Zuze maji Jihova kana. Saí kizuua, m’usuku, Nzambi ua njiuisa Falaó nzoji jiiadi. Mu nzoji ia dianga, o Sobha ua mono kuila ku honga ia menha a Ngiji ia Nilu u mona mua mu tunda sambuadi dia jingombe ja di sanze ji ja nete kiambote, u mona dingi sambuadi dia jingombe ja mukuá ja bhele ni ja iibha. O jingombe ja bhele ji dia o jingombe ja nete. Mu ku bhita kithangana, Falaó ua mono dingi sambuadi dia mítue ia masa a sabhuka ku kixina kimoxi. Maji kua sabhuka mítue ia mukua ia masa a tolo a xoueta ni kithembu anga a minha akuâ a uabha. Ki kukia, mu kimene, muxima u mu sakalala ni jiphata, iu ua tumu kuixana o jinganga ni jinjimu phala ku mu jimbuluila o ji nzoji jê. Maji ki bhu kexile muthu ua tenene ku ji jimbulula. (Dimatekenu 41:1-8) Ki tu kijiia se ene a diuanene mu kuivua o ji nzoji mba kala muthu uejile ni ibanzelu iê. Mukonda dia kiki, Falaó ua divu dingi kia iibha, ua thandanganhele, ua mesenene kiavulu kuijiia o dijimbuluilu dia ji nzoji jê.

Kophelu kiene ngó kia banze Zuze! O kitongoluelu kiê kia mateka ku mu fundisa moxi diê, iu ua tangela o Sobha Falaó kuila mivu iiadi ku dima, mu kaleia mua kexile munzangala ua mu jimbuluile kiambote o nzoji iê ni nzoji ia padelu. Bhenhobho Falaó u tuma kuixana Zuze anga a mu katula ni lusolo mu kaleia.—Dimatekenu 41:9-13.

Xinganeka kiebhi kia divu Zuze mu ku mona o akunji a Sobha Falaó a mu kuiza ni njimbu ia ku mu katula mu kaleia. Ni lusolo-luoso, muéne ua di bhutu o muezu, ua zuata izuatu iengi, nange ua kolola o ndemba ioso ku mutué mukonda kiene kiexile o kifua kia akua Ijitu. Sé phata, muéne ua sambe ua dióndo kua Jihova n’a mu kuatekesa! O kia bhiti kiki, muéne uai ku kiandu kia ungana ua Sobha. O Bibidia i zuela: “Falaó anga uambela Zuze, uixi: Eme ng’anjiua nzoji, maji ki bhuala-phe muthu u tena ku i jimbulula; eie-phe nga kuívu, exi se uevu nzoji, ua soko-bho ku i jimbulula.” O ia zuela Zuze ia londekesa dingi o kulenduka kuê ni kixikanu kua Nzambi. Muéne uambe: ‘Kiókio k’eme ngala na-kiu; Nzambi muéne u bhana kua Falaó o dijimbuluilu di tululuisa.’—Dimatekenu 41:14-16.

Jihova ua zolo o athu alenduka a mu kala fiiele, kiki kiene kia bhangesa Jihova ku bhana kua Zuze o kitambuijilu kia kexile mu sota o jinganga ni jinjimu akua Ijitu. Zuze ua tangela o Sobha kuila o jinzoji jiiadi ja loto muéne kifua nzoji imoxi ngó. Mu ku tona o njimbu, Jihova ua kexile mu londekesa kuila o maka “kua Nzambi kiókole kiá”—Nzambi keji nanga dingi phala ku ki bhitisa. O jingombe ja nete kiambote ni jithangu ja masa ja uabha, jilombolola kuila mu sambuadi dia mivu o ixi ia Ijitu ieji bhana idimu iavulu, maji o jingombe ja bhele ja iibha ni masa a tolo a xoueta eji lombolola kuila kueji kuiza ué sambuadi dia mivu iezala ni uadiama ni nzala. O nzala íii ieji zubha o kudia kuoso kua Ijitu.—Dimatekenu 41:25-32.

Falaó uejidile kuila Zuze ua kexile mu jimbulula kiambote o ji nzoji jê. Maji ihi-phe ia tokalele ku bhanga o Sobha? Zuze ua bhana ndunge kua Sobha. Falaó ua tokalele ku sota muthu “ua dimuka, uala ni kilunji” phala ku tambula konda ia ixi ia Ijitu ni ku bhongolola o kudia n’a i bhake mu jimbonge kioso kiala ku mivu iambote ia idima ni ku i uanena ku athu a bhindama phala kafue ni nzala. (Dimatekenu 41:33-36) O kuijiia kua Zuze ni mauhete mê a mu kuatekesa ku mu sola phala ku bhanga o kikalakalu kiki, maji muéne ka soto fuma phala muéne. Muéne ka bhange kiki mukonda dia kulenduka kuê ni kixikanu. Se tu kala ni kixikanu kua Jihova, ki tua-nda bhinga ku di zangeleka mba ku di sota fuma. Ki tua-nda bhinga ku thandanganha, mak’etu oso tua-nda a takula bhu maku a Nzambi!

Falaó ni ji selevende jê a mono o unjimu ua ku kaiela o ndunge ia Zuze. O sobha ua xikina ué kuila, o Nzambi ia Zuze muéne ua bhanene o unjimu uoso kua Zuze. Muéne uambe bhu pholo ia isengele iê ioso, uixi: “Muthu tu mu sanga kuebhi u soka ni muenhú, [muthu uala ni] nzumbi ia Nzambi?” Muéne uambela Zuze: “O ki kiedi Nzambi ua kuidikisa ima ioso íii, kana-ku muthu ua dimuka uala ni kilunji kala eie. Eie muène-muene ua-ndu tambula konda ia dibhata diami; kioso ki u zuela eie, o mundu uami uoso kiene kia tumaka; eme ngi ku tunda ngó mu kuila emi-eme ngi muenexi nga xikama bhu kiandu.”—Dimatekenu 41:38-41.

Falaó ua bhange kála kia zuela. Zuze a mu zuika izuatu ia linhu ia fina. Falaó ua mu te lubhambu lua ulu bhu xingu, ni nela ia sineta, u muambela ku sambela mu dikalu dia kaiadi, ua mu bhana ué ungana ua kuia mu ixi ioso phala ku bhanga o kikalakalu kiê. (Dimatekenu 41:42-44) Mu kizuua kieniókio, Zuze ua tundu mu kaleia iu uai ku mbonge. Muéne ua balumuka kála pelezu, maji ua zeka kála o muthu ua kaiadi ku utuminu ua Falaó. O kixikanu kia Zuze kia bhangesa Nzambi ku mu besoala! Jihova ua mono o hadi ioso ia bhiti na-iu selevende iê, Zuze, mu mivu iavulu. Muéne ua batula o maka mu kithangana kia tokala ni mu ukexilu ua tokala. Jihova ka mesenene ngó ku batula o maka a Zuze maji ua mesenene ué ku langa o muenhu ua kifuxi kioso kia Izalaiele. Tua-nda mona o maka enhá ku pholo mu milongi kála íiii.

Se ua mu bhita ni ibhidi iavulu, nange a mu ku bhanga kia iibha mu mivu iavulu, kana ku bhuila. Lembalala o musoso ua Zuze. Jihova ua mu besoala mukonda muéne uexile muthu uambote, mukua henda, ua lenduka, mukua ku kolokota iu ua kexile ni kixikanu kia kolo kua muéne.