“Jihova Nzambi anga u kuata o muthu, u mu ta mu díbhia dia Edene phala ku dima ni ku di tambula konda. Jihova Nzambi anga u tendelela o muthu, uixi: Ku mixi ioso mu díbhia u die-ku kioso ki ua mesena; maji ku muxi-phe ua kuijiia kiauabha ni kiaiibha kana kudia-ku; mukonda o kizuua ki ua kà dia-ku, ijiia na-kiu kuma ua kà fua muene.’”—Dimatekenu 2:15-17.

Nzambi ua te o diiala dia dianga, Adá, mu Jaludim ia Edene, o kididi kiki kiexile Palaízu, iezalele ni iama ia muxitu ni ithulu iambote. Mua kexile ibundu iavulu, Adá ueji dia ibundu ioso. Maji Jihova Nzambi ua mu ambela kuila muxi umoxi ka tokalele kudia-ku o kibundu kiê, ua tendelesa ué Adá kuila, o kizuua kieji diâ o kibundu ueji kufua.

O kuila Adá ua tendela o kitumu kiokio? Muéne uejidile se o kufua ku kala kiebhi; mukonda muéne ua kexile mu mona kioso o iama kia kexile mu fua. Se Nzambi ua bhangele Adá phala kufua, muéne keji mu kidika dingi kudia ku kibundu. Maji Adá uejidile kuila, se ua belesele Nzambi, anga u kamba kudia o kibundu, ueji kala ni muenhu ua kalelaku—keji kufua.

Saí athu a zuela kuila o muxi ua kidika Nzambi, ulombolola o diiala ku zeka ni muhatu, maji kiki ki kidi kana. Mukonda kioso kia zubha ku a bhanga, Jihova uambela Adá ni muhatu’ê, Eva, kuila “vualenu, mu sokoloke,” ni kuila “mu izalese ixi ioso mu i tolole.” (Dimatekenu 1:28) O muxi ua fidisa Nzambi muxi ua kidi. Jihova uambe “muxi ua kuijiia kiauabha ni kiaiibha,” mukonda ua kexile mu lombolola kuila muéne uala ni ungana ua kuzuela ku athu ihi ia uabha ni ihi ia iibha. Se Adá ka dile ku kibundu keji londekesa ngó kuila ua belesela, maji ueji londekesa ué ua sakidila o Mubhangi uê ua mu bhanene ima iavulu iambote.

“Anga [Nzambi] u ambela Adá uixi: ‘mukonda eie . . . ua di ku muxi u nga ku kidika, ngixi kana kudia-ku, . . . ku suualu ia pholo ié kuene ku ua kà dia o mbolo iê, katé ki ua kà vutuka ku mavu; mukonda kuene ku ua tundile; kuma eie uala u mavu, ku mavu kuene ku ua kà vutukila.’”—Dimatekenu 3:17, 19.

 Adá ua di ku kibundu kia mu kidikile Nzambi. O ku kamba ku belesela o kitendelesu kiki kiexile maka a dikota. O ku bhukumuka kuku kua londekesa kuila muéne ua kambele kisakidilu ku ima ioso ia mu bhanene Jihova. Mu kudia o kibundu, Adá ua ditunu o ungana ua Jihova iu ua solo o ku di tumina muéne mudiê, kiki kieji mu bhekela ibhidi iavulu ku muenhu.

Mu ku bhita kithangana Adá uafu muene kala kia kanene Jihova. Nzambi ua umbile Adá “ni mavu ma bhoxi,” iu ua mu ambele kuila, “ku mavu kuene [kueji] vutukila.” Adá kai bhu kididi kiéngi. Muéne uafu, kioso kiafu, o muenhu ua jimuka kala o mavu a mu bhangele nau.—Dimatekenu 2:7; Ndongixi 9:5, 10.

“Mukuâ ni kia bokona o ituxi mu ngongo ku muthu umoxi, o kufua kù kuejila mu ituxi; kiene ue kia bhiti o kufua ku thandu dia athu oso, kuma ene oso ituxi a i te.”—Loma 5:12.

O ku bhukumuka kua Adá mba o kituxi kia te muéne, kieji bheka ibhidi ia makota. Mu ku ta o kituxi, Adá ka texi ngó muenhu ua 70 mba 80 a mivu, maji ua texi o muenhu ua kalelaku. Mu kusuka-ku mukonda dia ku bhukumuka muéne ua texi o kuiuka, o muiji uê uoso ua lundula o ituxi.

Etu enioso tu muiji ua Adá. Mukonda dia muéne, a tu vuala ni mikutu ia ituxi i bhekela o kufua, sumbala k’etu tua solo o ukexilu iú. Phaulu ua jimbulula kiambote o ukexilu uetu. Muéne ua soneka: “Eme-phe ngi muthu ua kufua, a ngi sumbisa ku ituxi. Kokolo diami dia kuxixima kiki! Nanhi u ngi kudila ku mukutu iú ua mu ngi bheka mu kalunga.” Phaulu ua tambuijila o kibhuidisu kiê, muéne uixi: “Nga sakidila-phe Nzambi, kuma sai-ku kubhanduluka mua Jezú Kristu, Ngana ietu!”—Loma 7:14, 24, 25.

“Nzambi ua tumikisa Mon’ê mu ku kala kibhamuenhu kia mundu.”—1 Nzuá 4:14.

 Jihova Nzambi ua bhange kima phala ku jima o kituxi ni ku tu bhulula ku kalunga. Ihi ia bhange? Muéne ua tumikisa Mon’ê ua kazola tundé ku diulu phala ku mu vuala mu ixi ni mukutu ua iuka kála kiexile Adá. Maji Jezú ka difuile ni Adá, mukonda Jezú “ka tele kituxi.” (1 Phetele 2:22) Mukonda dia ku kala muthu ua iuka, muéne ka lundula o kufua, muéne ueji tena ku kala ku muenhu hádia ni hádia, mukonda ka kexile ni kituxi.

Maji Jihova uehela o jinguma ja Jezú ku mu jibha. Mu ku bhita izuua itatu Jihova ua mu fukununa mu nzumbi phala ku tena ku vutuka ku diulu. Kuenhoko Jezú ua londekesa kua tat’ê o valolo ia muenhu uê ua iuka mu xitu, phala ku kula o muenhu ua texi Adá phala o muiji uê. Jihova ua xikina o sata, phala oso a kala ni kixikanu kua Jezú a tambula o muenhu ua kalelaku.—Loma 3:23, 24; 1 Nzuá 2:2.

Mu ku bhanga kiki, Jezú ua bheka dingi ia texile Adá. Muéne ua tu fuila phala tu tene ku tambula o muenhu ua kalelaku. O Bibidia izuela: ‘Jezú uafu mu kiadi kia Nzambi, ua lola o kalunga mu mulonga ua mundu uoso.’—Jihebeleu 2:9.

O ujitu iú u tu longa kiavulu ia lungu ni Jihova. O ku iuka kuê kua fidisa o akua ituxi ku di kula mudiâ. Maji o henda iê ia mu suínisa ku kumbidila o itumu iê, iu ua tu bhana mon’ê phala ku tu kula, sumbala kia mu bhonzele o ku bhanga kiki.—Loma 5:6-8.

“Kristu ua fukunuka muene mu’alunga ni kidi, iú ua di bange ngunji ia tu dielelesa kuila athu oso afu kiá hadia ue a kà fukunuka. Kuma o ki ejila o kalunga ku muthu umoxi, ni ku muthu umoxi ue kuene ku ejila o kufukunuka kua madifundu. Uila ene oso kia fuila mua Adá, kiene ue kia phaphumukina ene oso mua Kristu.”—1 Kolindo 15:20-22.

Kana muthu uene ni phata kuila Jezú ua kexile ku muenhu iu uafu, maji ihi i tu xikinisa kuila muéne a mu fukununa muene mu’alunga? O kima kia beta-o-kota ki tu xikinisa, o kuijiia kuila Jezú ua monekena athu avulu mu ididi iavulu. Saí kizuua muéne ua monekena ku 500 ja athu ndenge. O poxolo Phaulu ua ki soneka mu mukanda ua sonekena akua Kolindo, mu kuijiia kuila saí jimbangi ja kexile hanji ku muenhu, ene eji tena ku bhana umbangi ua ima ia monene ni ievuile.—1 Kolindo 15:3-8.

Kioso kia soneka Phaulu kuila Kristu muéne a “tuamene” ku mu fukununa mu’alunga, muéne ua kexile mu londekesa kuila, a mukuá ué eji ku a fukununa. Jezú uambe ué kuila kueji kuíza kithangana, “oso ala mu jimbila” eji “kutunda-mu.”—Nzuá 5:28, 29.

Mbata Nzambi ua zola o mundu, katé kia suku mu kubhana Mon’ê umoxi-èlele, phala uoso u mu xikana muène, káfue, maji a kale ni muenhu ki uábhua.”—Nzuá 3:16.

 O ibatulu ia dianga ia Bibidia, i tu tangela kiebhi athu kia mateka o kufua, ni kiebhi kia texika o Palaízu. Maji o ibatulu ia sukina ia Bibidia i tu tangela kiebhi Nzambi kia-nda zubha o kalunga, ni ku bheka dingi o Palaizu mu ixi. Kienhiki, o athu a-nda tena ku kala ku muenhu ni ku sanguluka katé ku hádia ni hádia. O divulu dia Dijingunuinu 21:4 di zuela: “Ki ku kala dingi kùfua.” Phala kulondekesa o kidi kia kikanenu kiki, o velusu ia 5, izuela: “Maka iá a kidi, a tokala ku a dielela.” Ioso i kanena Jihova, muéne u tena ku i bhanga.

O kuila u xikina kuila o “maka iá a kidi, a tokala ku a dielela?” Di longe-phe dingi ia lungu ni Jezú Kristu ni ku mu xikina. Se u bhanga kiki, ua-nda kala ni ukamba ni Jihova. Kua-nda zediua ngó lelu, ua-nda tambula ué o muenhu ua kalelaku mu Palaízu mu ixi, ki mua ka kala dingi kufua, “nè ngó mukôndo, mba kudila, mba kukata.”