Madiia: Sala eió. Nga uabhela kiavulu ku ku mona mu Fesa ia Lembalsa ia Kufua Kua Jezú Kristu mu semana ia bhiti. * Ua uabhela o kiônge?

Sala: Nga uabhela kiavulu kuia mu kiônge, maji ki nga tendela kiambote o milongi ioso ia zuela mu kiônge. Ngene mu mona athu ku bhanga o fesa ia uvualukilu ua Jezú mu Natale ni difukunukinu diê mu fesa ia Phasu, maji nuka nga mono muthu ua mu bhanga o fesa ia lembalasa ia kufua kuê.

Madiia: Kidi muene, o Natale ni Phasu, ene mu i bhanga ku mundu uoso. Maji o Jimbangi ja Jihova ejiia kuila o lembalasa ia kufua kua Jezú kuene kua beta-o-kota. Se uala ni kithangana nga mesena ku kulondekesa se mukonda diahi ene a banza kiki.

Sala: Ngala ni kithangana.

Madiia: O Jimbangi ja Jihova ene mu lembalala o kufua kua Jezú, mukonda muéne ua tendelesa o akaiedi’ê ku bhanga kiki. Tu mone ihi ia bhiti mu usuku ande dia Jezú kufua. Uevuile kiá kuila saí kizuua Jezú ua dile kumoxi ni akaiedi’ê a fiiele?

Sala: O kuila ua mu zuela o Seialu ia Ngana?

Madiia: Kiene muene. A i xana ué Lembalasa ia Kufua Kua Jezú. Kioso kia kexile mu kudia, Jezú ua bhanene itendelesu ku akaiedi’ê. Nga ku diondo, o kuila u tena ku tanga o izuelu íii mu divulu dia Luka 22:19?

Sala: Xe. ‘Anga u katula o mbolo, u sakidila Nzambi, anga u i uana, u i bhana o maxibulu, uixi: íii i lombolola o mukutu uami, ióbhane mukonda dienu. Bhangenu jinga kienhiki mu ku ngi banza eme.’

Madiia: Nga ku sakidila. Tala kiambote o itendelesu ia Jezú mu disukilu dia velusu: ‘Bhangenu jinga kienhiki mu ku ngi banza eme.’ Ande dia ku tendelesa o akaiedi’ê ku mu lembalala, Jezú ua a lombuelela kiambote ihi ia tokalele ku lembalala ia lungu ni muéne. Muéne uambe kuila ueji bhana o muenhu uê phala ku bhulula o akaiedi’ê. Jezú ua tumbula o izuelu íii kala kia i tumbula mu divulu dia Matesu 20:28. O velusu izuela: “Mukonda uila ki eza Mon’a Muthu, kana kukala ni athu a mu bhikila muène, maji muène-ku kubhika, ni kubhana o muenhu uê mu kukula mundu.” Kiki kiene ki bhangesa o Jimbangi ja Jihova ku diongeka ku mivu ioso phala ku lembalala o sata ia kukula ia bhana Jezú. O kufua kuê ku bhana muenhu ku athu oso a belesela.

Sala: Ngene mu kuívua o athu kuzuela kuila Jezú uafu phala tu kale ni muenhu. Maji mu kidi ki ngejiia se kiki kilombolola ihi.

Madiia: K’eie ngó, Sala. O maka alungu ni sata ia ku kula kua Jezú maka a zongo.  Maji maka ambote, tu a sanga mu Mak’â Nzambi. O kuila uala hanji ni kithangana?

Sala: Xe ngala hanji ni kithanaga.

Madiia: Kiambote. Eme nga tange kiá milongi ia lungu ni kukula, eme nga-nda kulomboluela-iu mu izuelu ia bhebhuluka.

Sala: Kia uabha.

Madiia: Phala kuijiia ihi ilombolola o sata ia kukula, kia dianga tua bhingi kuijia ihi ia bheka Adá ni Eva mu ku ta o kituxi kioso kia kexile mu Jaludim ia Edene. Phala ku tu kuatekesa kuijiia o maka enhá, tu tange kumoxi o divulu dia Loma 6:23. Ua mesena ku tanga o velusu íii?

Sala: Nga mesena. Iambe kiki: “Kuma o futu ia ituxi kufua. Maji o ujitu-phe ua Nzambi muenhu ki uabhua, mua Kristu Jezú, Ngana ietu.”

Madiia: Nga sakidila. Tu xinganeke mu izuelu íii. Kia dianga tonginina kiebhi ki mateka o velusu íii: “Kuma o futu ia ituxi kufua.” Kiene ué kia zuelele Nzambi kioso Adá ni Eva—kia bhukumukine. Ku dimatekenu ki kuexile muthu uexile mukua ituxi. Adá ni Eva exile athu a iuka o an’a eji vuala eji kua vuala ué ni ku iuka. Mu kiki-phe se-ku muthu ueji kufua. Adá ni Eva ni muiji uê uoso eji kala ku muenhu hádia ni hádia ni ku zediua kuoso. Maji kala ki tuejiia kiá, ki kiene kia bhitile, anga kia bhiti?

Sala: Kana. Adá ni Eva adi o kibundu kia a fidisile Nzambi.

Madiia: Kidi muene. Kioso kia di o kibundu—mba kioso Ada ni Eva kia solo ku bhukumukina Nzambi—ene a te kituxi. Mu kidi ene-muene a solo o ku kala akua ituxi. Kiki kieji ku a bhekela ibhidi iavulu, ni ku muiji uê uoso.

Sala: Kiki ki lombolola ihi?

Madiia: Ngi ku tele kifika. Eie ua uabhela ku bhanga ji bolo?

Sala: Xe! Nga uabhela kiavulu.

Madiia: Xinganeka kuila uala ni imbia iambote ia ku bhangela ji bolo. Maji ande dia ku bhangela-mu o ji bolo, iene i baluka anga i bofoka. Se u bhangela-mu o ji bolo kiebhi kia-nda tunda o ji bolo? O kuila ja-nda iuka?

Sala: Kana.

Madiia: Kiene kia bhiti ni Ada ni Eva kioso kia bhukumukina Nzambi, ene a “bofoka” ku kituxi, ni ku kamba o ku iuka. Mukonda dia ku kala akua ituxi ande dia ku vuala an’â, kioso kia mateka o ku vuala, o muiji uê uoso ua “bofoka.” Ene oso eji ku a vuala mu ituxi. Mu Bibidia o kizuelu kituxi, ki kilombolola ngó ku bhukumuka, maji kilombolola ué o ukexilu ua ituxi u tua lundula. Sumbala eie n’eme ki tua bhange kima kia iibha, maji ka tu vualele luua kioso ene kia te o kituxi, mu kiki o muiji uê uoso ni etu ué tua lundula o kituxi kiâ, ki bhekesa o kalunga. Kala ki tua tange mu divulu dia Loma 6:23, o futu ia ituxi kufua.

Sala: Kiki ki kia tokalele ku bhita. Mukonda diahi o athu oso eji tala hadi mukonda ngó dia kituxi kia Adá ni Eva?

Madiia: Ua zuela—kidi. Ki kia tokalele o ku bhita. Maji Nzambi ua balakala Adá ni Eva mu kufua mu kituxi kiâ, maji etu tu muiji uê a tu bhana kidielelu. Nzambi ua bhange kima phala ku tu bhulula ku hadi ioso. Kiene kia bhangesa o ku tu kula kua Jezú. Tanga dingi o divulu dia Loma 6:23. Kioso kiambe kuila “o futu ia ituxi kufua,” o velusu izuela ué: “Maji o ujitu-phe ua Nzambi muenhu ki uabhua, mua Kristu Jezú, Ngana ietu.” Tu mona-phe kuila o kufua kua Jezú kuene  ku bhangesa kuila tu bhuluka ku kituxi ni ku kalunga. *

Madiia: Kuala dingi kima kia mukuá mu velusu íii, nga mesena ku kulondekesa-kiu.

Sala: Kima kiahi?

Madiia: O velusu izuela kiki: “O ujitu-phe ua Nzambi muenhu ki uabhua, mua Kristu Jezú, Ngana ietu.” Se Jezú muéne ua tale hadi ni ku bhana o muenhu uê phala ku tu bhulula, mukonda diahi o velusu íii ia mu zuela kuila, o kukula ‘ujitu ua Nzambi?’ Mukonda diahi ki iambe, “ujitu ua Jezú?” *

Sala: Kibhuidisu kiambote. Ki ngi kijiia o kitambuijilu kiê.

Madiia: Nzambi muéne ua bhange Adá ni Eva. Maji mu veji dia ku mu belesela a solo ku bhukumuka mu Jaludim ia Edene. Nzambi ua divu kia iibha kioso an’ê a dianga, Adá ni Eva, a solo ku mu bhana dikunda. Maji Jihova ua bhange kima. * Ku ji-anju joso, muéne ua katula-ku imoxi iu ua mu tumikisa mu ixi, kala muthu mu xitu, phala ku bhana o muenhu uê ua iuka kala sata ia kukula o mundu. Kienhiki, o sata ia kukula ujitu ua Nzambi. Kuene dingi kima kia mukuá kilondekesa kuila, o sata ia kukula, ujitu muene ua Nzambi. Ua banzele kiá kiebhi Nzambi kia divu mu ku mona mon’ê ku mu jibha kuala o athu?

Sala: Kana, kiluua.

Madiia: Nga mu mona bhabha ima ia ku tonoka na-iu o ana-ndenge. Ngi mona kuila uala ni ana m’onzo.

Sala: Kiene muene, ngala ni ana kiiadi—diiala ni muhatu.

Madiia: Kienhiki, banza hanji kiebhi o Tata ia Jezú mu diulu, Jihova Nzambi, kia divu mu kizuua kioso Jezú kia fu. Kiebhi kia divu muéne ku mona ni mesu mê mon’ê ua kazola a mu mu kuta, ku mu tobhesa ni ku mu beta? Kiebhi o Tata kia divu kioso Mon’ê kia kexile ku mu phaphela ku muxi, ia a muehela kuenhoko phala kufua kála imbua?

Sala: Kiki kia mu bhekela lamba ku muxima. Nuka nga banzele kiki!

Madiia: Ki tu tena kuzuela kiebhi kia divu Nzambi mu kizuua kieniokio. Maji tuejiia kuila Nzambi uala ni muxima kala etu, tuejiia ué se mukonda diahi muéne uehela o ima ioio o ku bhita. O divulu dia Nzuá 3:16 di tu jimbulula kiambote se mukonda diahi Nzambi uehela o ima ioio o ku bhita. Ua mesena ku tanga o divulu didi?

Sala: Xe, nga mesena. Di zuela kiki: “Mbata Nzambi ua zola o mundu, katé kia suku mu kubhana Mon’ê umoxi-èlele, phala uoso u mu xikana muène, káfue, maji a kale ni muenhu ki uábhua.”

Madiia: Nga sakidila. Tala dingi mu dimatekenu dia velusu íii. Diambe kiki: “Nzambi ua zola o mundu.” O henda iene ia bhangesa Nzambi ku tumikisa mon’ê mu ixi phala ku tu fuila. Mu kidi, o sata ia kukula, o kilondekesu kia dikota kia henda ia Nzambi ko kuetu. Kiki kiene ki bhangesa o Jimbangi ja Jihova ku lembalala mivu ioso o kufua kua Jezú. Manhi se ua tetuluka?

Sala: Xe, nga tetuluka. Nga ku sakidila mu ku ngi kuatekesa kuijiia o maka enhá.