ZUZE uemana mu jaludim iê, ua mu tala o dikumbi kioso kia mufua. Nange ua mu tala ué o maie ni mixi ia mukua i bhana ibundu, ni mazanga muala iangu ia menha, ua kexile mu tala ué o mbonge ia Falao ia kexile dikanga. Xinganeka o jimbibi ja kexile mu kuivua Zuze ja kexile mu tunda m’onzo iê, o mon’ê Manassa ua kexile mu kuelelesa ndeng’ê Ifalaime uexile mona ua maku. Zuze ua kexile mu xinganeka o kima kia kexile mu bhita m’onzo, o muhatu’ê ua mu kuelela mu ku mona o tuana tuê tua mu tonoka. Muéne ua kexile mu kuelela. Zuze uejidile kuila Nzambi ua kexile ku mu besoala.

Zuze ua lukile mon’ê ua dianga o dijina dia Manassa, mukonda dia lombololuele ku jimbisa. (Dimatekenu 41:51) O mabesá a Nzambi akexile mu tambula, sé phata a sosolola o ndolo ia Zuze ni ima ia iibha ia bhitile ku muiji uê, ni lembalasa ia tat’ê ni jiphange jê. O ku mu zemba ku jiphange jê ja makota kua lungulula o muenhu uê. Ene a mu betele a mesenene ku mu jibha, maji a mu sumbisa ku ubhika ku jingeji. Tundé kizuuokio o muenhu uê uezalele ngó ni ibhidi. Muéne ua kolokota mu ubhika mu dikuinhi ni kiiadi kia mivu, ni mu kaleia—mu makonga. Maji kindala muéne o muthu ua kaiadi ku unguvulu ua Falao mu ixi ia Ijitu! *

Mu mivu iavulu Zuze ua mono izulukutu iavulu ia dikumbidila kala kia kanene Jihova. O sambuadi dia mivu ia kudia kua nzungule ia kanene Nzambi ia kexile mu dikumbidila mu ixi ia Ijitu, Zuze muéne ua kexile ku pholo mu ku bhongolola o kudia kua ixi ioso. Mu kithangana kieniókio muéne ua vuala an’a kiiadi kia mala ni muhatu’ê Azenate. Maji né kiki saí ithangana ua kexile mu xinganeka hanji o muiji uê ua tungile dikanga—benge-benge ndeng’iê Bejamí ni tat’ê Jakobo. Nange Zuze ua kexile mu xinganeka se ene akexile kiambote. Nange ua kexile mu xinganeka ué se o makot’ê a xile kiá o ukexilu ua iibha, mba se muéne ueji tena ku bhanga paze ni muiji uê ni ku kala dingi kumoxi ni ene.

Se ku muiji uê kuala maka mukonda dia difuba mba ku di zemba, eie ua mu bhita ué mua bhiti Zuze. Ihi i tu longa o kixikanu kia Zuze mu ku di bhana ni muiji uê?

Zuze ua kexile ni ikalakalu iavulu, o mivu ué ia kexile mu bhita ni lusolo. Kala kia kanene Jihova mu nzoji ia njiua Falao, kioso kia zubha o sambuadi dia mivu, o ima ia lunguluka. O kudia kuabhu. Ki ku bhitile kithangana kiavulu kua moneka nzala ku jixi joso. Maji kala ki tanga o Bibidia, “m’oxi ia Ijitu-phe kudia sai.” (Dimatekenu 41:54) Sé phata o kikanenu kia Zuze, ni uhete ué ua ku bhongolola o kudia kua kuatekesa o akua Ijitu.

O akua Ijitu a sakidila ni ku ximana kiavulu o uhete ua Zuze ua ku bhaka o kudia, a monene kuila muéne ua a bhuluile. Maji né kiki Zuze ka mesenene ku tambula o kijingu, ua mesenene o kijingu a ki bhana kua Nzambi iê, Jihova. Se tuala ni  uhete mu sidivisu ia Nzambi, muéne ua-nda tuehela ku bhanga ima ia makota ki tu i fikile.

Maji mu ku bhita kithangana mu Ijitu mua bokona ué nzala. Kioso o mundu ki ua mateka ku di kola kua Falao, muéne ua ambela: “Ndenu kua Zuze o kioso kia mi ambela muene ku bhanga, bhangenu-kiu.” Kiki-phe Zuze ua mateka ku jikula o inganja ioso mua bhakele o makudia, inga o mundu u kala mu sumba o kudia kua bhindamene.—Dimatekenu 41:55, 56.

Maji mu jixi ja mukuá ki mu kexile kudia. O muiji ua Zuze ua tungile dikanga mu ixi ia Kanana akexile mu tala hadi ni nzala. O kikulakaji Jakobo uevu kuila mu Ijitu mua kexile kudia, muéne-phe ua mbela an’ê, ku kulumuka mu Ijitu ku sumba-mu kudia.—Dimatekenu 42:1, 2.

Jakobo ua tumikisa dikuinhi dia an’ê, maji ka tumu o kasule kê Bejamí. Jakobo ua xinganeka o kizuua kia tumine mon’ê ua kazola Zuze kuia mu kunda o makot’ê ubheka ué. Kiene o kizuua kia suku-ko kia monene o munzangala. O an’a a makota a bhekele ku bhata o divunga dia Zuze dia tandujukile, a di bondekele mu manhinga, o divunga diódio dia lomboluele o henda ia Jakobo ni kijingu kia kexile nakiu kua mon’ê. Ene a bhangesa tat’â ua kukile kiá, ku kala ni lamba ku muxima, mu ku mu xikinisa kuila kiama kia iibha kia jibhile Zuze ni ku mu dia.—Dimatekenu 37:31-35.

Mu ku bhita izuua iavulu mu njila o ana Jakobo a bhixila mu ixi ia Ijitu. Kioso kiebhula kuebhi kueji sumba o kudia, a a tumikisa ku mutuameni Zafenate-Paneia. (Dimatekenu 41:45) Kioso kia mu mono, o kuila ejidile kuila muéne Zuze? Kana. Ene a mono ngó kuila nguvulu ia dikota ia Ijitu a mesenene kuila u a kuatekesa. Phala ku xila o nguvulu ene a bhange kala kia tokala mu kijila kia ixi: Ene “a mu diundila ni jipholo ja tula ku mavu.”—Dimatekenu 42:5, 6.

Ihi ia bhange Zuze? Muéne ua edi muene suii anga u mona o jiphange jê! Kioso kia a mono a fukama bhu pholo iê, muéne ua lembalala kiexile mona-ndenge. O musoso u tu tangela kuila, “Bhenhobho Zuze ua lembalala o jinzoji jê” ja mu bhanene Jihova kioso kiexile hanji munzangala, o jinzoji ja tangele o kithangana kieji mu fukamena o makot’ê—kala kia kexile mu bhanga mu kithangana kieniokio! (Dimatekenu 37:2, 5-9; 42:7, 9) Ihi ieji bhanga Zuze? Ku di bhubhala nau? Ku vutula phonzo?

Zuze uejidile kuila ua tokalele ku xinganeka kiambote a-nde dia ku bhanga kima, né muene se exile athu a iibha. Jihova muéne ua kexile mu kuendesa o izulukutu ienioio. Kia lungile ni vondadi iê. Muéne ua kanene kuila o muiji ua Jakobo ueji kituka kifuxi kia dikota. (Dimatekenu 35:11, 12) Se o jiphange ja Zuze ka lunguluile o ukexilu uâ ua iibha, o kikanenu kia Nzambi kia kuila o muiji ua Jakobo u kala kifuxi kia dikota kieji bhangesa Jihova kubhanga kima kiéngi phala ku kumbidila o kikanenu kiê! Se Zuze ka xinganekene kiambote, muéne ueji bheka maka ku  bhata dia tat’ê, ueji ta o muenhu ua tat’ê ni ua phang’ê Bejamí mu kiluezu. O kuila ene akexile hanji ku muenhu? Zuze ka di londekesa, phala kuijiia kiambote se o jiphange jê exile hanji athu a iibha. Mu kiki, muéne ueji tena kuijiia kiebhi Jihova kia mesenene kuila muéne u dibhana ni jiphange jê.

Nange kua mu bhita mu maka enhá. Maji lelu ku mundu o miji iene mu di muangununa, iene mu zoka. Kioso ki tu bhita mu maka enhá, nange tu mesena ku bhanga kála ki tua xinganeka etu tu akua ituxi. Maji kima kiambote ku kaiela o phangu ia Zuze mu ku sota kuijiia kiebhi Nzambi kia mesena kuila tu batula o maka. (Jisabhu 14:12) Ejiia kuila o ku di bhana kiambote ni muiji uetu kima kiambote, maji o ku kala ni ukamba ni Jihova ni mon’ê kiene kia beta-o-kota.—Matesu 10:37.

Zuze ua bhange ima iavulu phala ku lola ni ku mona ihi ia kexile mu mixima ia jiphange jê. Muéne ua mateka kuzuela nau ni undanda bhu kaxi ka mulunguludi, ua a tatela kuila alondi. Phala ka a tatele dingi ene a mu tangela o muiji uâ—a mu tangela ué kuila a xisa o kasule kâ ku bhata, uexile hanji munzangala. Zuze ua di kondeka. Ndeng’ê ua kasule ua kexile hanji ku muenhu? Kindala Zuze uejidile kiá ihi ieji bhanga. Muéne uambe: “Bhene bhu nga-nda ku mi muena o kidi,” ua ambela ué kuila muéne ua mesenene ku mona o kasule kâ. Mu ku bhita kithangana muéne ua xikina ku a ehela ku vutuka ku bhata se bhu xala muthu ku upelezu.—Dimatekenu 42:9-20.

Kioso o jiphange kia mu di kunda mudiâ, ene kejidile kuila Zuze uejidile o dimi diâ, ene a di tatela o kituxi kia tele mu 20 mivu ku dima. Ene ambe: “Tua bele mukonda dia kiki ki tua bhangele phang’ietu; tua muene malamba a muxima uetu, iú tu dionda, maji nguetu kuivua; kiene kia tu ijila o uíndua uos’ú.” Zuze uevu ioso ia kexile mu zuela, muéne ua tundu phala ka mu mone kuila ua mu dila. (Dimatekenu 42:21-24) Maji muéne uejidile kuila o ku diela ki kuzuela ngó kuila o muthu ua diela mukonda dia ibhidi. Kienhiki muéne ua suluka ni ku lola o jiphange jê.

Muéne ua a tumikisa ku bhata maji ua kutisa Xima. Muéne ua vutula o kitadi kiâ, ua tumina ku ki ta mu jisaku jâ. O jiphange ja vutuka ku bhata ia a diondela Jakobo kua ehela kuambata o kasule Bejami ku Ijitu. Kioso kia bhixila mu Ijitu ene ka sueka kuila a sangele o kitadi mu jisaku jâ, a kitangela ku selevende ia Zuze, ene a mesenene kuvutuila o kitadi kioso. Kiki kiexile kima kiambote, maji Zuze ua mesenene ku mona dingi se o jiphange a xisa muene o ukexilu uâ. Muéne-phe ua a bhana kudia, maji ka a londekesa luua o kisangusangu kiê, mukonda dia ku mona Bejamí. Muéne u a vutukisa dingi ku bhata ni jisaku jezala ni kudia, maji o veji íii, o dikau diê ua tumina ku di ta mu saku ia Bejamí.—Dimatekenu 42:26–44:2.

Zuze-phe ua te o kibhetu kiê. Muéne ua tumina ku kaiela o jiphange jê ni ku a kuta, muéne ua a tatela kuila a nhana o dikau diê. Kioso kia sange o dikau mu saku ia Bejamí oso a a bheka kua Zuze. Kindala Zuze ueji mona kiambote se o jiphange jê mala ambote kiá mba kana. Juda muéne ua zuelela bhu kididi kia jiphange joso. Muéne ua bhingi ku a kuatela henda, muéne ua bhingi kuila muéne ni jiphange jê joso a kala abhika mu Ijitu. Zuze ua tambuijila kuila oso eji vutuka ku bhata, Bejamí ngó ueji xala ku ubhika.—Dimatekenu 44:2-17.

Juda ua tambuijila mu kuzuela ni henda. Juda uambe: “O ku ana a manh’â muene ngó ua subhukaku, o tat’â iu ua mu zolo,” o izuelu iii ia bokona ku muxima ua Zuze, mukonda muéne uexile o mona ua dianga ua Lakele, uexile o muhatu ua kazola ka Jakobo, ua fuile mu kuvuala Bejami. Zuze ua kexile mu banza kiavulu Lakele, kála kiexile mu banza ué Tat’ê. Mukonda dia kiki Zuze ua zolele kiavulu Bejami.—Dimatekenu 35:18-20; 44:20.

Juda ua suluka ni ku diondela Zuze phala ka te Bejamí ku ubhika. Ua suku mu ku bhinga ku kala bhu kididi kia Bejamí. Muéne ua suku ni izuelu íii: “O tat’etu ngi di mona-nê kiebhi o pholo, se o kaial’aka ua xala phala ki ngi mone dingi o lamba dia kuiza kua tat’etu.” (Dimatekenu 44:18-34) Kindala Juda ua mu londekesa kuila diiala diéngi kiá.  Muéne ka londekesa ngó kuila ua diela, maji ua londekesa ué henda.

Zuze ka tena dingi ku di kondeka. Muéne ua tokalele ku katula moxi o ima ia mu kexile ku muxima. Kienhiki-phe ua tubhula o jiselevende jê iu ua didi ni dizui dia suina ni mu Mbonge ia Falao a muivu. Mu kusuka-ku muéne ua dijidisa ku jiphange: “Eme muene Zuze, phange ienu.” Muéne ua di bhubhala ni jiphange jê ni henda ioso ua a loloka ioso ia mu bhangele. (Dimatekenu 45:1-15) Kienhiki muéne ua kaiela o phangu ia Jihova mukua ku loloka. (Jisálamu 86:5) O kuila tuene mu bhanga ué kiki?

Kioso kievu Falao o kizulukutu kia kexile mu bhita mu inzo ia Zuze, muéne ua tendelesa Zuze ku bheka Tat’ê ni muiji uê uoso mu Ijitu. Ki ku bhitile kithangana kiavulu phala Zuze ku di sanga ni tat’ê ia kazola. Jakobo ua didi iu uambe: “Né nga fu kiá kuabhu, kabasa nga ku mono pholo, kuila eie hanji ku muenhu.”—Dimatekenu 45:16-28; 46:29, 30.

Mu kidi Jakobo ka fué mu kithangana kieniókio, mukonda muéne ua kexile hanji ku muenhu mu 17 dia mivu mu Ijitu. Iexile thembu ia soko phala kubhana mabesá ku 12 dia an’ê. Ku mona ua 11 ua Zuze muéne ua mu bhana mabesá mu luiadi, o dibesá didi dia tokalele ku mona ua phande-kumbi. Kua muéne kueji tunda miji iiadi ia Izalaiele. Ihi ia bhiti ni Juda o mona ua kauana, ua beta-o-kota mu kulondekesa kuila ua diela? Muéne ua tambula dibesá dia dikota: O Mexiia ueji tunda ku muiji uê!—Dimatekenu, kibatulu 48, 49.

Kioso kiafu Jakobo mu 147 a mivu, o jiphange ja Zuze akexile ni uôma ua kuila muéne ueji kua vutula phonzo. Maji Zuze ua kuatela henda. Muéne uejidile tundé ukulu kuila Jihova muéne ua bhangesa o muiji kuia ku Ijitu, mu kiki o jiphange jê ka tokalele dingi ku divua kia iibha mukonda dia kima kia bhitile kiá. Kindala muéne ua bhange o kibhuidisu kiki: “Kifua ki ngal’iki eme ngala bhu kididi kia Nzambi?” (Dimatekenu 15:13; 45:7, 8; 50:15-21) Zuze uejidile kuila Jihova mufundixi ua iuka. Bhu pholo ia Nzambi Zuze uexile nanhi phala ku fundisa ió a a loloka kua Jihova?—Jihebeleu 10:30.

O kuila ki ku bhonza o ku loloka akuenu? Nange ki bhonza se o muthu ua tu xingi, ua ki bhange muene mu vondadi iê. Maji se tu loloka ni muxima uoso o athu a diela ni muxima uoso tua-nda kua kuatekesa ku kala ni kitongoluelu kia zele—etu ué tua-nda kala ni kitongoluelu kia zele. Tua-nda kaiela ué o phangu ia Zuze ni Tat’ê ia henda mukua kuloloka, Jihova.