Paul munumi uala ni an’a kiiadi uambe: “Kioso kia bhiti o maka a kukamba o kitadi mu ixi ietu, o kudia kua bhonzele, akexile mu ku ta kalu iavulu, tua kexile mu kala ku munono ola javulu, maji kioso ki bhixila o kithangana kietu, o kudia kuabhué kiá. O athu abhelele kiavulu, saí iá akexile mu bua mu ikoka. Katé muéne ni ima iofele ia kexile mu ta kalu iavulu. Mu kusuka-ku, o kitadi kia ixi ietu, ki ki kexile dingi ni valolo. O kitadi kiami kioso ki nga bhakele mu bango kia diboto.”

Paul uejidile kuila phala kubhulula o muiji uê, muéne ua tokalele ku kala ni “unjimu ua kidi.” (Jisabhu 3:21) Muéne uambe: “Eme ngala ni ufunu ua kuiudika mukengeji, maji nga kexile mu bhanga kabasa salu ia kexile mu moneka, sumbala ka kexile mu ngi futa kiavulu. Saí athu akexile mu ngi futa kudia mba imbamba ia mukuá. Se a ngi bhele ixinhi iuana ia nzaba, ngi katula-bhu iiadi, anga ngi sumbisa iiadi. Nga kexile ué ni 40 a tuana tua jisanji. Kioso ki tu kula nga kexile mu ji sumbisa, anga ngi sumba dingi 300. Mu ku bhita kithangana nga tolokala 50 a ji sanji, mu 50 a jikilu ja fuba ia masa. Nga kexile mu disa o muiji uami ni fuba ienioió, ni ku kuatekesa ué o miji ia mukuá mu ithangana iavulu.”

Paul uejidile ué kuila o kima kia betele kota o kubhanga, o kudielela kua Nzambi. Kioso ki tu belesela Nzambi, muéne u tu kuatekesa. Jezú uambe ia lungu ni kusota o ibhindamu ia muenhu: “Kana ku vula uê ilunji; . . . tata ienu ua k’ijiia kuma ima iíi mua i bhindamena.”—Luka 12:29-31.

O nguma ia dikota ia Nzambi, Satanaji, uene mu bhangesa o athu ku mundu kuthandanganha kiavulu ni ibhindamu ia muenhu. O athu a thandanganha kiavulu ni ibhindamu iâ, katé muéne ni ima ka i bhindamena, ene a di suínisa kiavulu phala  kukala ni ima íii. Saí athu a sobha kitadi, mu ku sukaku ene a di longa kuila, o “mukua ku sobha muene selevende ia ió mukua kusobhesa.”—Jisabhu 22:7.

Saí athu ene mu bhanga ima ia a bhekela ibhidi. Paul uambe: O jivizinhu jami a xisa o miji iâ ni makamba mâ ai mu sota ‘jimbongo ku jixi jengi.’ Amukuá kambata o madukumendu, phala kubokona mu jixi jieniojo, mukonda dia kiki, ka tenene kukalakala. Saí ithangana ene akexile mu lenga a xiku dia ngoxi, ni kuzeka bhu kanga. Ene kehela Nzambi ku akuatekesa. Maji eme ni muiji uami, tua dielela ku kikuatekesu kia Nzambi ku maka u tua kexile nau.”

Paul u suluka: “Jezú uambe: ‘Kana ku ki kuatela hele. Mukonda o kizuua kia mungu kia di kalela ni hele íê. O hadi ia lelu ia soko ni kizuua kiê.’ Izuua ioso-phe nga kexile mu samba kua Nzambi phala ‘ku tu bhana ngó o mbolo ia kizuua kieniókio,’ phala ki tu fue ni nzala. Muéne-phe ua tu kuatekesa kala kia kanena Jezú. Ki tu kexile mudia o kudia ku tua mesenene. Saí kizuua nga kexile ku munono phala kusumba kudia, maji ki ngejidile ihi ia kexile mu sumbisa. Kioso ki nga bhixila ku pholo, nga mono kuila akexile mu sumbisa iogurte. Eme ki ngi uabhela iogurte. Maji iexile kudia, mu kiki tuadi o iogurte mu usuku uenhó. Ngi sakidila Nzambi, mukonda mu ithangana ioso ia nzala, o muiji uami nuka ua zekele ni nzala.” *

Lelu o kitadi ki ki tu kambe dingi. Maji o musoso uetu ua tu longo kuila, o milongo phala o hele, o kudielela kua Nzambi. Jihova * nuka ua-nda tuehelela se tu suluka kubhanga o vondadi iê. Tuene mu mona o kidi kia divulu dia Jisálamu 34:8: ‘Lole-nu, mu mone kuila Jihova uene ni mbote; muthu ió u lunga uoso ua mu dielela muene.’ Mukonda dia kiki, ki tuala ni uôma ua kubhita dingi mu ibhindamu ia ku kamba kitadi.

Lelu tuejiia kiambote kuila phala ku kala ku muenhu o athu ka bhingi kitadi, mba salu, maji o kudia. Tua mu kingila o kithangana kioso Nzambi kia-nda kumbidila o kikanenu kiê, kixi: ‘Mu ngongo mu kale nzungule ia masa.’ Mu kiki, ‘se tua mono-phe kia kudia ni kia kudivunga, ima ienhi’ii i tu soke.’ O Bibidia i tu bhana nguzu iavulu, iene i zuela: ‘Ki mu kale mu akua luimbi lua kitadi, ioso i mua mono i mi soke. Kuma Nzambi uambe uixi: Eme nuka nga kà mi xisa, ki nga kà mi ehelela ue, kana. Uila kiki, tu kolokotienu ni kuila: Ngana muène mukuatekexi uami, eme ki ngi kala ni uoma.’” *

Kubhinga kixikanu kia kidi phala ‘kuenda ni Nzambi,’ kála kia mu kuenda Paul ni muiji uê. (Dimatekenu 6:9) Ki kale se mu kithangana kiki tua mu bhita ni maka alungu ni kitadi mba tua-nda bhita-mu ku hádia, o phangu ia Paul ni kixikanu kiê ni unjimu uê, i tu longa ima iavulu iambote.

Maji ihi i tu bhanga se o maka ku muiji a mu tu thandanganhesa kiavulu?