A ngi vuala mu mbanza iofele mu ixi ia Polônia, ia zukama ni mbambe ia Alemanha. Mu mbanza iami mua kexile mábhia avulu ni mixitu, nga kexile ni muenhu ua tululuka. O jitata jami a ngi suínisa kukala ngi muthu uambote, kusuína mu xikola ni kusota kukala ni ufunu ua fuma.

O maka ku muenhu uami, a mateka kioso ki ngai mu di longa o ufunu ua kukala muzokedi mu xikola ia katunda mu mbanza ia Wrocław. Kuma nga kexile dikanga dia jitata jami, nga di te mu izomba ia iibha. Tundé ukulu nga uabhele jijoko, maji mukonda dia kudilunga ni makamba a iibha, o joko ia kituka nzambi iami. Nga uabhele kiavulu o kibuka kia joko kia tundile mu mbanza ia Warsaw, mu mausukilu a semana, nga kexile mu a kaiela bhuoso-bhuoso bhua kexile múia mu jokala. Mu jinjila jiji tua kexile mu nua kiavulu, kuxibha makanha ni kudibeta ni ió a tokalele ku mbandu ia mukuá. Eme nga kexile mu divua kiambote ni ukexilu iú, maji ng’ejidile kuila se a ngi kuatele kuala a xiku dia ngoji, ngeji zanga o ufunu uami ua kukala muzokedi.

O makamba mami a uabhele kiavulu kuia mu masemba ni jifesa. Mu jifesa jenhojo tua kexile mu di ta mu jinvunda. A ngi kuatele luavulu kuala a xiku dia ngoji, maji nga kexile mu bhanga ioso phala ki ngi kale ni maka, saí ithangana nga kexile mu futa kitadi. Nga fikile kuila nga kexile mu kuambata kiambote o muenhu uami. Maji mu kidi, ngejidile kuila nga kexile mu kaiela njila ia iibha. Nga kexile múia mu ngeleja mu Malumingu phala kutululukisa o muxima uami.

Ku muvu ua 2004, Mbangi jiiadi ja Jihova a ngi kundu, eme nga xikina kudilonga o Bibidia ni ene. Mu kudilonga ima iavulu ia lungu ni Jikidistá ja kidi, o muxima uami ua mateka ku ngi fundisa kiavulu. Nga di longo kuila nga tokalele kúnua ni kilunji, kueha o makanha ni kudilunga ni athu ka mu kaiela o ijila ia Bibidia. Nga di longo ué kuila nga tokalele kulungulula o ukexilu uami, ni kueha o njinda ni usuéia. Maji ki ngi bhange kima phala kulungulula o ukexilu ua muenhu uami, nga suluka ni kubhanga ima ia iibha.

Saí kizuua nga di te mu jinvunda ni dinake dia mala. Ngi di lembalala kuila a ngi takuile bhoxi, akexile mu ngi bhana jihuxi ni ku ngi diata ku mutué. Mu kumona kuila ngeji fua, nga sambe: “Ngi loloke ngana Jihova, mu kukamba kubelesela o itumu iê. Se  ngi bhuluka, nga-nda dilonga o Bibidia ni Jimbangi ja Jihova, nga-nda lungulula o ukexilu ua muenhu uami.” Nga bhuluka. Nga bhange kála ki nga kanene, nga mateka kudilonga o Bibidia.

Ku muvu ua 2006, ngai mu tunga mu ixi ia Inglaterra. Nga mesenene ku nganhala kitadi kiavulu ni ngi tene kuvutuka mu ixi iami ia Polônia ni kuzubha o xikola ia katunda. Mu ku suluka mu ku dilonga o Bibidia, nga tange kibatu kia ngi suínisa kiavulu. O poxolo Phaulu ua soneka: “Ima iosololo ngi i kita kingoho mu ujitu ua kuijiia Kristu Jezú, Ngana iami. O mukonda dia muène, ima i nga kuatele, nga i texi dikanga, ioso ia di boto. Eme-muene-phe nga i kiti dixilu, phala ngi nganhale Kristu, nda ngi kondamene kua Muène.” (Filipe 3:8) Kála eme, o poxolo Phaulu ua dilongele ué o ufunu ua kukala muzokedi—muéne uexile ué muthu ua iibha. (Ikalakalu 8:3) Maji muéne ua mono kuila, phala kusanguluka ku muenhu, muéne ua tokalele kubhanga kima: Kubheza Nzambi ni kubhanga ioso phala kukaiela o phangu ia Jezú. Mu kuxinganeka mu phangu ia Phaulu, nga mono kuila o kukala ni ufunu ua fuma ni kudita mu usuéia, ki iene i sangulukisa o muthu kana. Nga dielele kuila ngeji tena kulungulula o muenhu uami, mukonda Phaulu ua tenene ué. Kienhiki, nga xala mu ixi ia Inglaterra, ki ngi mesenene dingi kusuluka ni kudilonga o xikola ia katunda.

Mu kudilonga ima iavulu ia lungu ni Jihova, o henda iami kua muéne ia dibandekesa dingi. Nga sanguluka kiavulu mu kuijiia kuila, muéne u loloka ni henda ioso oso a mesena kulungulula o mixima iâ. (Ikalakalu 2:38) Nga tendela kiambote se mukonda diahi Nzambi ua zembe o usuéia, kioso ki nga xinganeka mu izuelu i tu sanga mu divulu dia 1 Nzuá 4:16, iambe kuila “Nzambi henda.”

Nga diuana ué kiavulu mu kumona o uendelu uambote ua Jimbangi ja Jihova. Ene a bhanga ioso phala kukaiela o itumu ia Bibidia ia lungu ni kuzela. Nga mesenene ué kusanguluka kála ene. Nga bhange ioso ku muenhu uami, ia a ngi batizala kála ngi Mbangi ia Jihova ku muvu ua 2008.

O Bibidia ia ngi kuatekesa kueha o luímbi, o usuéia, o makanha ni ku uabhela kiavulu o jijoko. Lelu nga sanguluka kiavulu mu kukuatekesa o athu kuijiia o Mak’â Nzambi, o Bibidia. Nga uabhela hanji kutala malunda a fiti, maji ngi i ta mu kididi kiê.

Nga zediua, nga kazala ni Esther, muhatu ua uabha, ua zolo ué kiavulu Jihova. Tu sanguluka kiavulu mu kulonga o Bibidia ku athu a zuela Polonês, mu ixi ia Inglaterra. Nuka nga divuile kiambote ku muenhu uami. Lelu nga sanguluka kiavulu, ngala ni muxima ua zele.