Nzebele * uai mu kibatu kia Europa mukonda a mu tangele kuila ua-nda kala mukua kuinda ndemba. A mu beta kiavulu mu dikuinhi dia izuua. A mu tangela kuila muiji uê eji u beta ni ku u vutukisa mu ixi iâ se u dituna kukalakala kala kidianzunga. Mukonda dia kiki Nzebele ua kituka muhatu ua undumbu.

Nzebele ua tokalele ku nganhala 200 mba 300 ja jieuro mu usuku umoxi phala kufuta o dikongo dia 40.000 a jieuro * dia tele muene kua ngana iê. Nzebele uambe kiki: “Ithanana ioso nga kexile mu xinganeka kulenga, maji nga kexile ni uôma ua kuila ene eji bhanga kima kiaiibha ku muiji uami. Ngexile kala a ngi kutu bhu jingoji.” O musoso ua Nzebele ua difu ni misoso ia mazunda auana a athu ala abhika mu matenda a kubhanga undumbu ku mundu uoso.

Midi jiuana ja mivu kudima, kamunzangala a muixanene Zuze, a mu sumbisile kuala o jiphange jê. Muene ua sidivila kala mubhika m’onzo ia diiala dia dikota mukua Ijitu. Maji ku dimatekenu, Zuze ka mu talatala kiaiibha kuala ngana iê kala kia bhitile ni Nzebele. Maji kioso muene kia ditunu kuzeka ni muhatu ua ngana iê, a mu tatela o makutu a kuila ua mesenene kuzeka ni muhatu ua ngana iê. Bhenhobho a mu takula mu’aleia, iá a mu kutila ku jifelu.—Dimatekenu 39:1-20; Jisálamu 105:17, 18.

Zuze uexile mubhika m’ukulu; maji Nzebele mubhika mu izuua ietu. Maji kiiadi kiâ ka a bhele valolo, a a talatala kala uenji mba kima kia kusumbisa.

O ita ia jikula njila phala athu ku mundu uoso kukala ni abhika. O athu amba kuila o sobha mukua Ijitu, ngana Tutmósis III, ua kutile 90.000 a abhika mu ita mu ixi ia Kanana. Akua Ijitu a tumine o abhika enhá kubula matadi, kutunga jitembulu ni kuiudika milombo ia menha.

Mu Utuminu ua Loma, o ita ia bhangesa kukala ni abhika avulu, kuma athu oso a mesenene kukala ni  abhika m’onzo, o ita iavudile. Amba kuila, ku hama ia dianga, kaxaxi ka athu mu ixi ia Loma, exile abhika. Abhika avulu akua Ijitu ni akua Loma akexile mu a tatesa kiavulu. Mukonda dia kiki, o abhika akexile mu bula matadi mu ixi ia Loma, akexile mu kala ngó 30 a mivu ku muenhu.

Mu kubhita thembu, o ubhika uai ni ku dibandekesa ithangana ioso. Tundé ku hama ia 16 ndú ku hama ia 19, o uenji ua kusumbisa abhika mu jixi ja Africa phala o jixi ja America, ua bhanene kitadi kiavulu ku jingana. O kisangela kia UNESCO kiambe kuila ‘25 mba 30 a mazunda a mala, ahatu, ni ana-ndenge a a sumbisile kala abhika.’ Athu ene mu zuela ue kuila, jihama ni jihama ja abhika afu kioso kia kexile mu zauka o Kalunga ka Atlântico. Olaudah Equiano, mubhika ua bhuluka, uambe kiki: “O kudikola kua ahatu akexile mu fua, ni ioso iaiibha ia kexile mu bhita, sé-ku muthu u tena ku i lombolola.”

Mu kienhiki, o ubhika ki musoso ngó uokulu kana, maji katé lelu iú hanji. O Kisangela kia Akalakadi ku Mundu kiambe kuila, 21 a mazunda, mala, ahatu, ni ana-ndenge ene mu kalakala hanji kala abhika, ene a kalakala kiavulu sé kua futa kitadi. O abhika mu izuua ia lelu, a kalakala kiavulu mu matenda a kubula o matadi, a kutunga izuatu, a kubhanga jiboloko, ni mu jinzo ja kubhanga undumbu. O ukexile iú né muene ene mu u bhanga sé kukaiela o itendelesu ia jinguvulu, uene mu dibandekesa kiavulu.

Mukonda dia ukexilu uaiibha uene mua talatala, abhika avulu ene mu lengela kuala o ufolo. Ku hama ia dianga A.K.K., sai dizonda a muixana Espártaco, ni 100.000 ia abhika a mukuá, a bhange ita ni akua Loma, maji ene ka ditundile kiambote. Ku hama ia 18, o abhika mu Kikolo kia Karaíba, a kixanene Hispaniola, a bhukumukine o itumu ia jingana jâ. O ukexilu uaiibha ua talatala o abhika mu ididi ia kukuna o mienge, ua bheka ita ku ixi ia Haiti o ita íii ia bhange 13 a mivu. Mukonda dia kiki, ku muvu ua 1804 o ixi ia tambula o ufolo.

Maji o ukexilu ua akua Izalaiele ua kutunda ku ixi ia Ijitu, kiene o kizulukutu kia beta-o-kota kia kulenga o ubhika, ki tu sanga mu misoso ku mundu uoso. Nange mazunda 3 a athu, kifua mundu uavulu, a a bhulula ku ubhika ku ixi ia Ijitu. Mu kidi, ene a tokalele muéne kukala ni ufolo. O Bibidia iambe kuila anga “a a bhikisa mba a a talatala jinga kiaiibha ni kuazukutisa.” (Makatukilu 1:11-14) Sai Falaó ua bhana ngonge phala kujibha o ana-ndenge oso  akua Izalaiele, kiki kieji mu kuatekesa kufidisa o ku dibandekesa kua akua izalaiele.—Makatukilu 1:8-22.

Akua Izalaiele a a talatala mu ukexilu uaiibha, ku ixi ia Ijitu, mukonda dia kiki Nzambi uambela Mozé: “Eme ngejiia o malamba mâ. Kala kiki, [ngi] tuluka-phe mu ku a kudila.” (Makatukilu 3:7, 8) Tundé mu kizuua kienhókio, o Jijudé ene mu bhanga o fesa ia Phasu mivu ioso, phala kulembalala o kizulukutu kiki.—Makatukilu 12:14.

O Bibidia iamba kuila, “kua Jihova, Nzambi ietu, ki ku moneka kituxi.” O Bibidia i tu tangela ue kuila Nzambi ka lunguluka kana. (2 Malunda 19:7; Malakiia 3:6) Nzambi ua tumikisa Jezú phala ‘kuxika ngonge ia ufôlo kua abhika . . . ni ku jituna oso a a kuika.’ (Luka 4:18) O kuila o izuelu íii ilombolola ufolo ua ubhika mu xitu? Mu kidi kana. Nzambi ua tumikisa Jezú phala kubhulula o athu ku jingoji ja kituxi ni kufua. Jezú uambe: “O kidi anga ki mi bhana ufôlo.” (Nzuá 8:32) Katé mu izuua ia lelu, o kidi kia longo Jezú, kia mu bhulula o athu mu maukexilu avulu.—Tanga o kaxa “ Lenga o Maukexilu a Mukuá a Ubhika.”

Mu kidi, Nzambi ua kuatekesa Zuze ni Nzebele kulenga o ubhika. U tena kusanga o musoso ua Zuze mu Bibidia mu divulu dia Dimatekenu kibatulu kia 39 ndu 41. Nzebele ue ua sange ufolo.

Kioso Nzebele kia mu kaie mu ixi mua kexile, muene uai mu ixi ia Espanha. Kuenhoko, muene ua disange ni Jimbangi ja Jihova iu ua mateka kudilonga nau o Bibidia. Muene ua mesenene kiavulu kulungulula o muenhu uê, mu kiki ua soto salu iu ua bhingi o muhatu uexile ngana iê, phala kukala ni muanhu mu kuila ueji futa o dikongo mbeji ni mbeji. Sai kizuua, Nzebele a mu xindi kuala o muhatu uexile ngana iê. Muene ua tangela Nzebele kuila ka bhingi dingi kufuta o dikongo, ua mesenene ue kubhinga muloloki kua Nzebele. Mukonda diahi? Muene ua kexile ue mu dilonga o Bibidia ni Jimbangi ja Jihova! Nzebele uambe: “O kidi ki bhulula o muthu mu ukexilu nuka ua u fikile.”

Jihova Nzambi ua kexile mu divua kiaiibha mukonda o abhika akua Izalaiele akexile mu a zukutisa kiavulu mu ixi ia Ijitu; mukonda dia kiki tu tena kuzuela kuila muene u divua ue kiaiibha mukonda dia kuiibha kuene mu ngongo lelu. Mu kidi phala kuzubha o maukexilu moso a ubhika, o athu mu ngongo a tokala kulungulula o ibanzelu iâ. Maji Nzambi ua kanena kubhanga kiki. O Bibidia iamba: “Etu-phe, tua kinga, uila kia bhana Nzambi muène o kizuelu, maùlu m’obhe, ni oxi i’obhe, muà tunga ubatuilu ua kuiuka.”—2 Phetele 3:13.