Sai maujitu ala ni valolo, mukonda o muthu ua a bhana uala ni fuma mba etu tu mu ximana kiavulu. O maujitu a mukuá né muene kate kalu iavulu, maji a kala ni valolo mukonda o muthu ua a bhana, ndandu mba dikamba dia kazola. Kiki kiene kia bhitile ni ujitu ua bhanene Lusele kua Njolodá, o muthu u tua mu tange mu milongi ia dianga. Kiebhi o musoso iú, ua lungu ni ujitu ua kukula?

Kia dianga, o Bibidia iamba kuila ‘Nzambi ua katula Mon’ê umoxi-èlele, anga u mu tumikisa mu ngongo, phala etu ni tu mone muenhu kua muène.’ (1 Nzuá 4:9) Mu kiki o ujitu iú, ua beta-o-kota mu valolo. Ki bhuala muthu uala ni kutena kua dikota Nzambi ndenge. Mu kuzuela ia lungu ni Nzambi, o mukua Jisálamu ua soneka: “Eie ngó uavu o dijina dié dia Jihova, ku moneka luiadi; eie-muène ngó Suke-ku mu ngongo ioso.” (Jisálamu 83:18) Kijingu kia dikota kutambula ujitu ku muthu uala Suke-ku mu ngongo ioso.

Kaiiadi, Nzambi muéne “Tat’etu.” (Izaia 63:16) Kibhita kiebhi? Muéne ua tu bhana o muenhu. Muene ue u tu langa kála o tata ia henda kia langa an’ê. Mu kuzuela ni mundu uê m’ukulu, Nzambi uambe: ‘Manhi Ifalaíme ki mon’ami ua kazola? Kamona kami ka makembu? . . . Hanji nga-nda ku mu kuatela henda iavulu.’ (Jelemiia 31:20) Nzambi kiene ue kiene mu divua ia lungu ni abhezi’ê lelu. Muene ki Mubhangi uetu ngó, muteni-a-ioso, maji Tat’etu ni Kamba dietu dia kazola. Kiki ki bhangesa kuila, ujitu uoso-uoso u tu bhana Nzambi u beta-o-kota mu valolo.

Sai maujitu ala ni valolo, mukonda o muthu ua a bhana ni henda sé ku mu jijidika. O muthu u bhana ni henda ioso, ka kingila ku mu vutuila ku mbote ia bhanga.

Nzambi ua bhana Mon’ê, phala o mbote ietu mukonda muene ua tu zolo. O Bibidia iamba: “Muene mua tu tukuluila Nzambi o henda iê ia tu kuatela, Nzambi kia katula Mon’ê umoxi-èlele.” Phala-hi? “Phala etu ni tu mone muenhu kua muène.” (1 Nzuá 4:9) O kuila Nzambi a mu jijidika o kubhanga kiki? Kana! ‘Jezú Kristu ua tu bhulula,’ mukonda dia “kiadi mba henda ia Nzambi.”—Loma 3:24.

Kiebhi o ujitu ua Nzambi ulondekesa “o kiadi kia Nzambi?” O Bididia i jimbulula: ‘Nzambi-phe ua tu idikisa o henda ia muène ia tu kuatela; mukonda kioso ki tua kexile hanji tu akua ituxi, kiene kia tu fuila Kristu bhu kididi.’ (Loma 5:8) O henda ia kidi, iene ia bhangesa Nzambi kubhulula o athu akua ituxi. Etu ki tu fuamene ku tu londekesa o henda íii, ki tu tena ue kufuta kima kua Nzambi mu mbote ioso ia tu bhange. O ujitu ua tu bhana Nzambi, kilondekesu kia henda iê ia beta-o-kota.

Sai maujitu a kala ni valolo, se o muthu ua a bhana ua bhange nguzu iavulu. Kioso muthu kia tu bhana ujitu uala ni valolo ia dikota phala muene, etu tu ximana kiavulu o ujitu iú, mukonda dia nguzu ia bhange muene.

Nzambi ua bhana “Mon’ê umoxi-èlele.” (Nzuá 3:16) Muene ua tu bhana Mon’ê ua kazola. Mu mivu ioso ia bhange Nzambi o ngongo, Jezú ua kalakala-né mbandu ni mbandu, iu ua kituka, kisangusangu kiê. (Jisabhu 8:30) Jezú muéne o ‘Mona ua kazola’ ua Nzambi “kidifua kia moneka ku mesu, kia Nzambi ua kambe kumoneka ku mesu.” (Kolose 1:13-15) Nuka kua monekene kiiadi kia athu jinjimu, a kalakala kumoxi ni kudituma kiambote, kála Jihova ni Jezú.

Maji “Nzambi uedile ni Mon’ê muène ka mu fikixila mba ka mu kondeka.” (Loma 8:32) Jihova ua tu bhana kima kia beta-o-kota ku ioso iexile na-iu. Ki kuexile ujitu ua mu bhonzele kiavulu, o kubhana Mon’ê ndenge.

Sai maujitu ala ni valolo iavulu mukonda a tu kuatekesa mu ibhindamu ietu. Mu kifika, eie ueji sakidila kiavulu se kumoneka muthu mu vondadi iê, u ku futila kitadi phala ku ku saka, se eie kuexile ni kitadi kia kubhanga kiki! Sé phata o ujitu iú ueji beta-o-kota phala eie.

“Ene oso kia fuila mua Adá, kiene ue kia phaphumukina ene oso mua Kristu.” (1 Kolindo 15:22) Kuma tu an’a Adá, etu enioso “tua mu fua,” ki tu tena kubhuluka ku uhaxi ni ku kalunga, mba kuluualula ni Nzambi phala kukala sé kikuma ku pholo ia Nzambi. Kuma tu athu a ituxi, ki tu tena kudibhulula mudietu mba kubhulula akuetu. O Bibidia iamba: “A bhange ioso ia tena maji kibhuala u tena kukula phang’iê, mba ku mu bhakela kua Nzambi, ni kubhana kitadi . . . Kuma jene ji dianga kúbhua.” (Jisálamu 49:7, 8) Etu tua bhingi kikuatekesu, mukonda ki tu tena ku dibhulula mba kubhulula akuetu. Se a tuehelele ubheka uetu, hinu tua diboto.

Mu henda iê Jihova ua futu “o kitadi ki tua bhindamene,” bhu kaxi ka Jezú ‘ene oso a-nda phaphumuka.’ Kiebhi o kukula ku tena kubhanga kiki?  ‘O manhinga ma Jezú, Mon’ê, a tu zelesa ku ituxi ioso.’ Kiene, o kixikanu ku manhinga a Jezú, ki jikula o dibhitu phala tu kale ni muenhu ua kalela-ku. (1 Nzuá 1:7; 5:13) Ihi ia-nda bhanga o kukula ku athu afú? “Kuma o ki ejila o kalunga ku muthu umoxi, ni ku muthu umoxi [Jezú] ue kuene ku ejila o kufukunuka kua madifundu.”—1 Kolindo 15:21. *

Ki kuala ujitu uo bhane ku muthu uala ni kutena kuavulu mba uo bhane ni henda kala o sata ia Jezú. Ki kuala muthu ua tu bhana ima iavulu, kála kia bhange Jihova Nzambi. Ki kuala ujitu u bhana muenhu kála o ujitu ua sata ia ku tu bhulula ku kituxi ni ku kalunga. Mu kidi, ki kuala ujitu ua beta-o-kota, o ujitu ua kukula ndenge.