Tu tena kuijiia kiambote o kiuana kia mala a mondala ku jikabalu, ki tu bhingi ue kukala ni uôma. Mukonda diahi kana? Mukonda o Bibidia ni izulukutu iene mu bhita mu izuua ietu i tu kuatekesa kuijiia kiambote ihi ilombolola o kiuana kia mala a mondala ku jikabalu. Sumbala o kukaba-kaba kuâ kuene mu bheka malamba mu ngongo, kutena ue kulombolola njimbu iambote phal’eie ni muiji uê. Mu ukexilu uebhi? Kia dianga, tua-nda kuijiia hanji o mala a mondala ku jikabalu.

O kisuma ki mateka kiki: “Ngedi ngi tala, kua moneka kabalu kazele. O ua mondala-ku ua kuata mufula, muène anga a mu bhana kitundu kia ungana. Hé u tunda ni uzonda ua kuia ni kùluua ni kutolola.”—Dijingunuinu 6:2.

Nanhi o diiala dia mondala ku kabalu ka zele? O Bibidia mu divulu diene dia Dijingunuinu, i tu kuatekesa ku muijiia se nanhi. Mu jivelusu ja mukuá, o diiala didi mu diulu, a muixana “Diambu dia Nzambi.” (Dijingunuinu 19:11-13) O dijina, O Diambu, dia tokala kua Jezú Kristu, mukonda muene mukunji ua Nzambi. (Nzuá 1:1, 14) Muene a muixana ue “Sobha ia jisobha, Ngana ia jingana,” “a mu ixana Fiiele, a mu ixana Kidi.” (Dijingunuinu 19:16) Muene uala ni ungana, muene sobha u tolola ioso, maji muene u kalakala kiambote ni kutena kuala na-ku, muene ka talesa hadi kua akuâ mukonda dia ungana uala-nau. Maji nange tu dibhuidisa.

Nanhi ua bhana kua Jezú o ungana ua kutolola? (Dijingunuinu 6:2) O polofeta Daniiele mu kisuma kia usuku ua mono Mexiia, a mu sokesa ni “mon’a muthu,” a mu bhana kuala o “Mukula-ua-Ndamba,” Jihova Nzambi * o “kutumina, ni kijingo, ni ungana.” (Daniiele 7:13, 14) Mu kiki, o Nzambi Muteni-a-ioso, muéne ua bhana kua Jezú o kutena ni ungana ua kutumina ni kufundisa. O kabalu ka zele, kijimbuete kia tokala kia ita ia iuka ia-nda lúa o Mon’â Nzambi, mukonda o Mikanda Ikola mu ithangana iavulu i tumbula o kolo ia zele phala kulombolola kidi.—Dijingunuinu 3:4; 7:9, 13, 14.

Thembu kuxi kia mateka o mala ni kukaba-kaba? Ijiia-kiu kuma, o diiala dia dianga ku kabalu, Jezú, muene u moneka kioso kia tambula o kitundu kia sobha. (Dijingunuinu 6:2) Thembu kuxi kia bhana o kitundu kia Sobha kua Jezú? Ka mu bhana-kiu kioso kia mu fukununa iu ua vutuka ku diulu, kana. O Bibidia iamba kuila muene kia vutuka ku diulu, ua kingila hanji thembu iavulu. (Jihebeleu 10:12, 13) Jezú Kristu ua kuatekesa o akaiedi’ê kuijiia kioso kia bhu o thembu ia kingila muene ni thembu ia mateka o kutumina ku diulu. Muene uambele kuila, ku dimatekenu dia utuminu uê, o ima mu ngongo ieji iibha kinene. Kueji moneka ita, nzala ni mauhaxi. (Matesu 24:3, 7; Luka 21:10, 11) Kioso kia bhiti o Ita ia Dianga mu Ngongo Ioso ku muvu ua 1914, o athu a bokuene mu kithangana kienhiókio kia tangele Jezú, ithangana iabhonzo mu ngongo, o Bibidia ixana o kithangana kiki “izuua isukidila-ku.”—2 Timote 3:1-5.

Maji mukonda diahi o ima mu ngongo ia iibha kinene tundé Jezú kia tambula o kitundu kia u sobha ku muvu ua 1914? Mukonda mu kithangana kienhókio, Jezú ua mateka kutumina ku diulu, ki mu ngongo kana. Ku diulu anga kua moneka ita, o Sobha ia ubhe, Jezú, a muixana ue Mingedi, ua lundumuina Satanaji ni madimonho mê mu ngongo. (Dijingunuinu 12:7-9, 12) Tundé kia mu takula mu ngongo mumu, Satanaji uala ni njinda iavulu mukonda uejiia kuila o thembu ié ia butu. Mu kidi, kua kambe ngó bhofele, Nzambi ua-nda kumbidila o vondadi iê ni kubuikisa Satanaji. (Matesu 6:10) Mu kiki tua-nda mona kiebhi o kitatu kia mala a subhuka-ku a tu kuatekesa kuijiia kuila mu kidi tuala muene mu ithangana ia bhonzo mba mu “izuua isukidila-ku.” O a mondala ku jikabalu jitatu,  ki athu kala ió ua mondala ku kabalu ka dianga kana, mu kidi ene a lombolola izulukutu iene mu bhita mu ngongo ioso ni kubhekesa hadi iavulu ku athu.

“Anga ku tunda kabalu kamukuá kakusuka. O ua mondala-ku, a mu bhana o kubheka ita mu ngongo, ni kubhangesa athu kudijibha-jibha mudiâ. Anga a mu bhana kixibhata kia dikota.”—Dijingunuinu 6:4.

O ua mondala ku kabalu kaka, ulombolola ita. Talesa kuma muene u katula o kutululuka kana ngó mu jixi jofele maji mu jixi joso. Ku muvu ua 1914, mu veji ia dianga, ku mundu uoso kua moneka ita, nuka ia bhitile. Kua kaiela o ita ia kaiadi ku mundu, ia beta kujibha athu o ita ia diangele-ku ndenge. A bhange o jikonda ja athu afu tundé ku muvu ua 1914 mu ita ni jinvunda ja kamukuá, a somboka 100 ia jimidi ja athu! Nzungule ia athu a mukuá a nemeka mukonda ue dia ita.

Katé bhebhi bhua suku o ita mu izuua ietu? Nuka kia bhitile, lelu o athu ala ni kutena kua kubuikisa o athu oso kulu dia mundu. Katé muene ni isangela i zokela o kutululuka, kala o Jinações Unidas, ki ia mu tena kubhuisa o kabalu ka kusuka mba o ita.

“Kambudi kia jikula o kidimbu kia katatu, ngevu o kiama kia katatu, kixi: Enda kunu! Ngedi ngi tala kua moneka kabalu kaxikelela. O ua mondala-ku, ua kuata pezu bhu lùkuaku. Anga ng’ivua kala dízui dia mu tunda mu’axaxi ka iama iuana ia muenhu, dixi: Kizongelu kioxi kia tiliku mu kizuua kia muvimba ki kalakala o muthu, o sevada izongelu itatu mu kizuua kia muvimba ue ki kalakala o muthu. O mu maji-phe ni mu vinhu, kana kufungisa-mu kima kioso-kioso.”—Dijingunuinu 6:5, 6. 

O ua mondala ku kabalu kaka, u lombolola nzala. Jivelusu jiji jilombolola kuila o kudia kueji bhonza kiavulu, mukonda dia kiki kizongelu kimoxi (1.08 L) kia tiliku eji ki sumbisa mu denadia dimoxi, o kitadi kia kexile mu nganhala o muthu mu kizuua kia muvimba ku hama ia dianga! (Matesu 20:2) O kitadi kiki, eji sumba na-kiu ue izongelu itatu (3.24 L) ia sevada, kifua o tiliku ia beta-o-kota o sevada ndenge. Kiebhi o muiji uoso kieji tena o kuikuta? Mukonda dia kiki o athu ene mu a dimuna phala kupopala o kitadi kiâ, katé muene mu kusumba o kudia kua kizuua ni kizuua, kala o maji ni vinho m’ukulu.

Tundé ku muvu ua 1914, o kuila tuene mu mona o ijimbuete ilondekesa kuila o kabalu ka xikelela ka mu kaba-kaba katé kiki? Xiê, tuene mu mona! Makuinhi a sambuadi a jimidi ndenge a athu afu mukonda dia nzala mu hama ia 20. Sai ngana uambe kuila “805 a jimidi—kifua ku divua dia muthu mu ngongo ioso, muthu umoxi ua katele nzala ku muvu ua 2012 ndú 2014.” Minangu ia mukuá iambe kuila “mivu ioso o nzala i jibha dingi mundu uavulu, o afu mukonda dia Sida, uhaxi ua masambisambi ni uhaxi ua thulu ala ndenge.” Sumbala ni nguzu ia mu bhanga phala kudisa ió ala ni nzala, o ua mondala ku kabalu ka xikelela katé kiki iu hanji u kaba-kaba.

“Ngedi ngi tala, kua moneka kabalu ka mukète. O ua mondala-ku ‘jina diê Kùfua, o kuema diê kua mu kaiela Kalunga-Ngombe. Enhá anga a a bhana ukota ua mbandu ia kauana mu ngongo, phala kujibha ni ita, ni nzala, ni dibhebhu, ni ku iama i kuama iene mu mukáu mu ngongo.”—Dijingunuinu 6:8.

O diiala dia kauana ua mondala ku kabalu, dilombolola kufua mukonda dia uhaxi mba malebhu engi. Kioso kia bhiti o muvu ua 1914, o uhaxi ua kukohona ua Spanha, ua jibha jimidi ni jimidi ja athu. Nange 500 ja jimidi ja athu a kuatele o uhaxi uenhó, kifua ku 3 kia athu, muthu 1 ua u kuatele!

Maji o uhaxi ua kukohona ua Spanha uexile ngó o dimatekenu. O jingijiie ja tokuesa kuila jihama ja jimidi ja athu afu mu hama ia 20 mukonda dia kingongo. Mu lelu didi, o athu a mu fua selu mukonda dia Sida, uhaxi ua thulu ni masambisambi sumbala ni nguzu iavulu ia mu bhanga o jidotolo mu kusota o milongo.

 O disukilu diene dimoxi, o kufua—kikale mukonda dia ita, nzala mba mauhaxi. O Mbila ki ia mu bhuila mu kutambula o imbi, sé kubhana kidielelu.

Kua kambe ngó bhofele, o jithembu jetu ja bhonzo, ja-nda bhua. Ijiia na-kiu kuma: Jezú “u tunda ni uzonda ua kuia ni kùluua ni kutolola” ku muvu ua 1914, ua takula Satanaji mu ngongo maji Jezú ka zubha kutolola ku muvu uenhó. (Dijingunuinu 6:2; 12:9, 12) Kua kambe ngó, mu Alumajedone, Jezú ua-nda zubha o ibhangelu ioso ia Satanaji ni kubuikisa o athu ene mu kuatekesa Diabhu. (Dijingunuinu 20:1-3) Jezú ka-nda zubha ngó ni kukaba-kaba kua kitatu kia mala a mondalu ku jikabalu, maji ua-nda zubha ue o hadi iene mu bheka ene. Kiebhi? Tala i tanga o Bibidia.

Mu kididi kia ita, mua-nda kala kutululuka. Jihova ‘ua-nda sukisa o ita katé ku maxokololo a’xi. Uta ua mufula ua u bukula, dionga ua di batula mu kaxi.’ (Jisálamu 46:9) Oso ió a zolo o kutululuka, “a kala ku ngalasa ni kutululuka kuavulu.”—Jisálamu 37:11.

Mu kididi kia nzala, mua-nda kala nzungule ia kudia. “Mu ngongo mu kale nzungule ia masa katé ni ku thandu dia milundu.”—Jisálamu 72:16.

Mu kididi kia mauhaxi mba kufua, kua-nda kala sauidi iambote ni muenhu ua kalelaku phala o mundu uoso. Nzambi ua-nda kua “kondona o masoxi moso ku mesu mâ! Ki ku kala dingi kùfua, nè ngó mukôndo, mba kudila, mba kukata.”—Dijingunuinu 21:4.

Kioso kia kexile mu ixi, Jezú ua londekesa kiebhi kia-nda kala o ngongo kioso muene kia-nda i tumina. Muene ua suínisa o kutululuka, ua disa jimidi ni jimidi ja athu, ua sake jihaxi iu ua fukununa athu a fuile.—Matesu 12:15; 14:19-21; 26:52; Nzuá 11:43, 44.

O Jimbangi ja Jihova a-nda sanguluka kiavulu ku kulondekesa mu Bibidia ié ihi i ua tokala o kubhanga phala kukala polondo ku disukilu dia kukaba-kaba kua maiala enhá a mondala ku jikabalu. Ua mesena kudilonga dingi o maka enhá?