O kuila akuá kutokuesa a sange ima koxi a mavu ilondekesa kuila o i zuela o Bibidia kidi muene? Ku muvu ua 2014 sai divulu ditokuesa o milongi ia Bibidia, (Biblical Archaeology Review) dia bhange o kibhuididi kiki: “Kikuxi kia athu a a tumbula mu Mikanda ia Ibalaiku a a sange o majina-u ku akuá kutokuesa o ima koxi a muvu?” A tambuijila kiki: “A sange 50!” Maji o dijina diaTatenai ki di kexile mu mukanda. Muene uexile nanhi? Tua-nda dilonga se muene uexile nanhi mu musoso ua Bibidia.

O mbanza ia Jeluzaleme ia tokalele mu Utuminu ua Pélesa. O mbanza ia kexile mu kididi a kixanene kuala akuá Pélesa kuila Sámbua dia Honga ia Ufalate. Kioso kia tambula o mbanza ia Babilonha, akuá Pélesa a bhulula o Jijudé akexile mu Babilonha, ia a tambula o disesa dia kutungulula o tembulu ia Jihova mu Jeluzaleme. (Ejidala 1:1-4) Maji o jinguma ja Jijudi, ka ehela ku tungulula o tembulu, ambe kuila o Jijudé a kexile mu bhukumukina o nguvulu ia Pélesa. (Ejidala 4:4-16) Mu utuminu ua Ndala I (522-486 A.K.K.), o mukunji ua Pélesa a muixanene Tetanai ua tokuesa o maka. O Bibidia i muixana kuila “nguvulu ia Sàmbua dia kunu dia honga.”—Ejidala 5:3-7.

Sai ibasakasa ia matadi kua soneka o dijina dia Tatenai, ia nangenena katé lelu, i bhanga mbandu ku divulu diene mu kuixana kuila, divulu dia muiji. O kibasakasa kia ditadi kisokesa muthu ua tokala ku muiji uenhú, ni muthu a mu tumbula mu Bibidia, o kibasakasa kiki kifua kamukanda ka muvu ua 20 ia Ndala ia Dianga kala sobha, 502 A.K.K. O kamukanda kaka ka londekesa mbangi kala selevende ia “Tatenai, nguvulu ia Sàmbua dia kunu dia Honga”—muéne Tatenai, a mu tumbula mu Bibidia mu divulu dia Ejidala.

Kikalakalu kiahi kia kexilu na-kiu o diiala didi? Mu 535 A.K.K., Silu ia Dikota ua sokejeka o utuminu ue mu ibatu-ibatu, sai kibatu a kixanene “Babilonha ni Sàmbua dia Honga.” Ku pholo dia kuenda o kibatu a kiuanuna mu luiadi, kibatu kimoxi a kixanene Sàmbua dia Honga. Mu kibatu kiki muene ue mua kexile o jixi ja Coele-síria, Finísia, Samádia, Judá ni mbonge ia kexile mu mbanza ia Damasku. Tatenai ua tumina o kibatu kiki tundé ku muvu ua 520 ndu 502 A.K.K.

Kioso kiai mu Jeluzaleme mu tokuesa o maka, Tatenai ua sonekena sobha Ndala kuila, o Jijudé ambe kuila a tambuile disesa kua sobha Silu, phala ku tungulula o tembulu ia Jihova. Kioso kia tokuesa mu madivulu a sange kuila kidi muene. (Ejidala 5:6, 7, 11-13; 6:1-3) Mukonda dia kiki Tatenai a mu tangela phala ka fidise o kikalakalu, muene anga ua belesela.—Ejidala 6:6, 7, 13.

Mu kidi, “Tatenai nguvulu ia Disámbua diódio dia Ufalate,” muene ka bhange ikalakalu ia makota. Maji o Bibidia i mu tumbula ni ku muixana mu dijina dia tokala dia ujitu. O musoso iú u tu bhana dingi polova iengi kuila, o ima i sanga o jingijie koxi’a mavu i londekea kuila o misoso ia Bibidia ia kidi muene.