1. Ihi i banza o athu ia lungu ni ió a bheza Nzambi?

LELU, athu avulu a zuela kuila o jingeleja ja makota ku mundu, ki jene mu bhanga ima iavulu phala ku kuatekesa o athu. A mukuá a banza kuila Nzambi ka xikina o jingeleja jiji, mukonda ki jene mu longa o kidi kia lungu ni Nzambi, ni kuila, ene a bhanga ima ia iibha. Maji né kiki, ene a xikina kuila, Nzambi u xikina o athu a jingeleja joso. Maji o kuila Nzambi u xikina muene o athu oso? Mba muéne ua mesena kuila o athu oso a mu bheza, a tunda mu jingeleja ja makutu? Tua-nda kuijiia o kitambuijilu, mu ku di longa o musoso ua abhezi a kidi a Jihova mu Bibidia.

2. A nanhi a kituka o mundu ua Jihova? Ihi ia kexile mu londekesa kuila ene akexile ni ukamba uambote ni Jihova? (Tala o foto ia dianga.)

² Mu 4.000 ja mivu ku dima, Jihova ua solo kibuka kia athu mu ixi, phala ku kala mundu uê. O Bibidia i zuela kuila, Mbalahamu “tata ia oso a xikana Nzambi,” muéne uexile uê o mutuameni ua muiji ua dikota, ua kexile ni hama ia jiselevende  ndenge. (Loma 4:11; Dimatekenu 14:14) Mu ixi ia Kanana, a kexile ku mu ixana “muadiakime ua Nzambi.” (Dimatekenu 21:22; 23:6) Jihova ua bhangele kikutu ni Mbalahamu ni mbutu iê. (Dimatekenu 17:1, 2, 19) Nzambi ua tangela Mbalahamu: “Kikutu kiami ki mu kuata kienhiki, bhu kaxi kami eme ni enu ni mbutu ié i ku bhingana; mala oso ku miji ienu kikale a kà a saia.” Muéne uambe dingi: “Kienhiki ki kala kijimbuete kia kikutu kiami bhu kaxi k’ami ni enu.” (Dimatekenu 17:10, 11) Mu kiki, Mbalahamu ni maiala oso a muiji uê, a a sáiele. (Dimatekenu 17:24-27) Mukonda dia ku a saia, o mbutu ia Mbalahamu ia londekesele kuila, a kexile ni ukamba uambote ni Jihova.

3. Kiebhi o mbutu ia Mbalahamu kia kituka mundu uavulu?

³ O mulaula ua Mbalahamu Jakobo, mba Izalaiele, ua kexile ni 12 kia an’a. (Dimatekenu 35:10, 22b-26) Mu ku bhita thembu, o an’a iá, a kituka jitata ja 12 a madiembu a Izalaiele. (Ikalakalu 7:8) O mon’a Jakobo, Zuze, a mu ambatele mu ixi ia Ijitu, mu ku bhita mivu, Falaó ua mu bhana ungana ua dikota. Mu kithangana kia nzala, Zuze muene uexile o nguvulu ia kexile mu sumbisa o kudia ku athu oso mu ixi. Mukonda dia nzala, Jakobo ni muiji uê, ai mu tunga mu ixi ia Ijitu. (Dimatekenu 41:39-41; 42:6) O mbutu ia Jakobo ia di sokolola, mu kiki, akexile mu ku a exana “ndumba dia ifuxi.”—Dimatekenu 48:4; tanga Ikalakalu 7:17.

4. Ukamba uahi ua kexile nau akua Ijitu ni mbutu ia Jakobo ku dimatekenu?

⁴ O mbutu ia Mbalahamu ia tungile mu ixi ia Ijitu, mu mbanza ia Ngozene, mu 200 ja mivu ndenge. (Dimatekenu 45:9, 10) Falaó ua tumine akua Izalaiele phala kuia mu tunga mu ixi ia Ijitu, mukonda uejidile kiambote Zuze, ni kuila, ua kexile ku mu xila. (Dimatekenu 47:1-6) Mu 100 ia mivu, ene a kexile mu paze ni akua Ijitu. O akua Izalaiele a tungile mu jisanzala, mukonda akexile ni iama. Né muene o akua Ijitu a zembele o abhidi a jimbudi, maji ene a belesele Falaó, iá ehela akua Izalaiele ku tunga mu ixi iâ.—Dimatekenu 46:31-34.

5, 6. (a) Kiebhi kia lunguluka o ima ia lungu ni mundu ua Nzambi mu Ijitu? (b) Mukonda diahi ka jibha Mozé, ni ihi ia bhangele Jihova phala o mundu Uê?

⁵ Mu ku bhita thembu, o akua Ijitu a te o akua Izalaiele mu ubhika. O Bibidia i zuela: ‘Mu ku kala-phe, ungana ua Ijitu a u bhingana kuala muthu uéngi k’ejiia Zuze. Muéne anga uambela o mundu uê, uixi: Mua mono-ze, an’a Izalaiele ala ifuxi  ia dikota ia nguzu, etu ndenge.’ Mu kiki, akua Ijitu a jijidika akua Izalaiele k’umba ji tijolo, ni ku bhanga ikalakalu ioso ia mábhia, ni ikalakalu ia mukuá ia ubhika. Ene a talesa hadi iavulu ku akua Izalaiele.—Makatukilu 1:8, 9, 13, 14.

⁶ Falaó ua tumina ué ku jibha o an’a oso a mala, akexile mu vuala o ahatu akua Izalaiele. (Makatukilu 1:15, 16) Mu kithangana kieniókio, saí muhatu mukua Izalaiele a mu ixana Jokebede, ua vuala Mozé. Kioso kiexile ni mbeji jitatu, muéne ua mu sueka bhu kaxi ka dibu, bhu mbandu ia Ngiji ia Nilu. O mon’a Falaó ua mu bongo, iú ua mu bhange mon’ê. Muéne uehela manhã Mozé ku mu sasa. Mu ku bhita kithangana, Mozé ua kituka selevende ia fiiele ia Jihova. (Makatukilu 2:1-10; Jihebeleu 11:23-25) Jihova ua mono kuila o mundu ua kexile mu tala hadi, mukonda dia kiki, muéne ua tumina Mozé ku a katula mu Ijitu. (Makatukilu 2:24, 25; 3:9, 10) Mu kiki, Jihova ua a ‘kula,’ mba ua bhulula o akua Izalaiele.—Makatukilu 15:13; tanga Matendelelu 15:15.

7, 8. Kiebhi o mundu ua Jihova ua kituka kifuxi kia zele?

⁷ Jihova ua solele akua Izalaiele phala ku kala mundu uê, maji kexile luua kifuxi kia Nzambi, mukonda ka a bhanene luua itumu, ka kexile ué ni akunji. Mukonda dia kiki, Nzambi ua tumina Mozé ni Alá ku tangela Falaó: ‘Kiene kia zuela Jihova, Nzambi ia Izalaiele: Eha mundu uami phala aie mu kikangalakata a ngi bhangele-mu fesa.’—Makatukilu 5:1.

⁸ Maji Falaó ka mesenene kueha akua Izalaiele. Phala ku bhulula o mundu uê, Jihova ua bheka kuinhi dia mabhebhu mu Ijitu, mu ku bhita kithangana, muéne ua buika Falaó ni masoladi mê mu Kalunga ka Kusuka. (Makatukilu 15:1-4) Ki ku bhiti mbeji jitatu, Jihova ua bhange kikutu ni akua Izalaiele ku Mulundu ua Sinai, mu ku zuela: “Se mu tumaka muene dízui diami, se mu kuata o kikutu kiami, mu kala mu athu ami angene, mua di tungula mu miji ioso.” Ene eji kituka ‘mundu ua zele.’—Makatukilu 19:5, 6.

9, 10. (a) Kala kia ki jimbulula mu divulu dia Matendelelu 4:5-8, kiebhi o Kitumu kia bhangesa akua Izalaiele ku di tungula bhu kaxi ka ifuxi ia mukuá? (b) Ihi ia tokalele ku bhanga akua Izalaiele phala kulondekesa kuila exile o ‘mundu ua di zelesa kiasoko; ua di lumbila kua Jihova?’

⁹ Ku hama ni jihama ja mivu, o jiselevende ja Jihova akexile mu kua endesa ku atuameni a miji, akexile mu sidivila kála atuameni, afundixi ni akunji. Mu ixi ia Ijitu, o akua Izalaiele akexile mu kaiela o ukexilu iú ua ku tumina, ande dia ku kituka abhika. (Dimatekenu 8:20; 18:19; Jobe 1:4, 5) Maji kioso Jihova kia bhulula o akua Izalaiele, muéne ua a bhana itumu ia a tungula bhu kaxi ka ifuxi ia mukuá. (Tanga Matendelelu 4:5-8; Jisálamu 147:19, 20) Bhu kaxi ka Kitumu, a solo kibuka kia akunji phala o kifuxi. O kitumu kia londekesele ué kuila, o “adiakimi” akexile mu ku a xila mukonda dia kuijiia kuâ ni unjimu uâ, ene eji kala afundixi. (Matendelelu 25:7, 8) O kitumu kia kexile mu bhana ku athu, milongi ia lungu ni ku bheza, ni kiebhi kia tokalele kuenda izuua ioso.

 ¹⁰ Ande dia akua Izalaiele ku bokona mu Ixi ia a Kanene, Jihova ua bhitulula o itumu iê. Mozé ua a a tangela: ‘Jihova lelu ua ku jingisa iu ua ku edi: Tanga-kiu muene kuamba u kala u kifuxi kiami muene, kala kia ku ambelele kiá, iu ua ku solo phala uende ni kualuka jinga o ijila iê ioso. Kifua ua mu bhana o dikuatelu mukonda muene ua-ndala ku ku zangeleka ku thandu’a ifuxi ia miji ioso ia bhange; u kale u di tunda diê, u fuma iê, u kijingu kie, u mundu ua di zelesa kiasoko; ia di lumbila kua Jihova Nzambi ié.’—Matendelelu 26:18, 19.

11-13. (a) A nanhi akexile mu bheza kumoxi ni mundu ua Nzambi? (b) Se o athu ka tokalele ku Izalaiele a mesenene ku bheza Nzambi, ihi ia tokalele o ku bhanga?

¹¹ Sumbala Jihova ua solo o akua Izalaiele phala ku kala mundu uê, muéne ua kexile mu kuehela o ifuxi ia mukuá ku tunga kumoxi ni mundu uê. Mu kifika, o Bibidia i zuela kuila, kioso Nzambi kia katula akua Izalaiele mu Ijitu, o athu a mukuá, katé muene ni akua Ijitu, ai kumoxi ni akua Izalaiele. (Makatukilu 12:38) Nange bhu kaxi kâ, bhua kexile o jiselevende ja Falaó ja belesele o kitendelesu kia Mozé, kioso kia zuela ia lungu ni dibhebhu dia ka sambuadi.—Makatukilu 9:20.

¹² Kioso kiexile polondo phala ku zaúka o Ngiji ia Njolodá, n’aie ku ixi ia Kanana, Mozé ua tangela akua Izalaiele kuila, a tokalele ku zola o asonhi akexile bhu kaxi kâ, mba ió ka tokalele ku kifuxi kia Izalaiele, a tungile bhu kaxi kâ. (Matendelelu 10:17-19) Se o muthu ka tokalele ku kifuxi kia Izalaiele ua mesenene ku kaiela o itumu, kala o Kuinhi dia Itumu, o mundu ua Nzambi ua tokalele ku mu ehela ku tunga bhu kaxi kâ. (Ijila 24:22) Saí iâ, ka tokalele ku kifuxi kia Izalaiele, a kituka abhezi a Jihova. Mu kifika, Lute uexile mukua Mouabhe, maji ua mesenene ku sidivila Jihova. Muéne ua tangela Nouemi, mukuá Izalaiele: “O mundu ué u kala mundu uami, Nzambi ié Nzambi iami.” (Lute 1:16) O athu iâ ka tokalele ku kifuxi kia Izalaiele, a kexile mu ku a exana ‘asonhi,’ o mala, a tokalele ku a saia. (Makatukilu 12:48, 49) Jihova ua a ehela ku kala kumoxi ni mundu uê, ni ngalasa ioso.—Dialuilu 15:14, 15.

¹³ Saí musambu ua Solomá ua londekesa kuila, Jihova ua xikinine o athu ka tokalele ku Izalaiele, ku kala abhezi’ê. Kioso kia bhakula o tembulu kua Jihova, Solomá ua sambe: “Muthu uoso-uoso u tunda kuengi, ka tokala ku mundu ué ua Izalaiele, maji u tunda ku maxokololo ma jixi, mukonda dia kuzola o dijina dié-eie diónene ni lukuaku lué luala ni kutena, ni mukonda dia lukuaku lué lua sununuka; ene kioso kieza hé a samba m’onzo mumu, kuabhu-phe, eie ívua muene tundé ku maúlu, ku kibuta kia dibhata dié, u bhange muene ioso ia ku bhingi mukua ixi iengi kioso kia kudionda, phala miji ioso ejiie dijina dié, nda a ku kuatele uoma kala o mundu ué ua Izalaiele; n’a tene kuijiia kuila o mu dijina dié muene  mu’exanena o inzu iii i nga tungu.” (2 Malunda 6:32, 33) Né muene mu izuua ia Jezú, o athu ió ka tokalele ku Izalaiele, a mesenene ku bheza Jihova, a kexile ni ujitu ua ku mu bheza kumoxi ni mundu Uê.—Nzuá 12:20; Ikalakalu 8:27.

14-16. (a) Kiebhi o akua Izalaiele kieji kituka kifuxi kia jimbangi ja Jihova? (b) Ihi ia kingila Jihova ku mundu uê lelu?

¹⁴ O akua Izalaiele akexile mu bheza Nzambi iâ, Jihova, maji o ifuxi ia mukuá, akexile mu bheza o jinzambi jâ. Mu kiki, kua bhingile ku tambuijila kibhuidisu kia dikota: Nanhi uexile o Nzambi ia kidi? Mu izuua ia Izaia, Jihova ua zuela kuila, o kibhuidisu kiki, a tokalele ku ki tambuijila kála kia tambuijila o ibhuidisu mu inzo ia ku fundisa. Muéne uambe kuila, se o jinzambi ja ifuxi jexile ja kidi, ene a tokalele ku kala ni jimbangi jâ phala o maka enhá. Muéne uambe: “A tule-bhu jimbangi jê, phala mundu a k’ivue, nda a ki xikine kuila, kidi kiene.”—Izaia 43:9.

¹⁵ O jinzambi ja ifuxi ka tenene ku londekesa kuila, jinzambi ja kidi. Ene exile ngó iteka ki i tenene ku zuela, né kuenda, se ki ku monekene muthu phala ku ji ambata. (Izaia 46:5-7) Maji Jihova ua tangela o mundu uê ua Izalaiele: ‘Enu-enu mu jimbangi jami ni selevende iami, nga mu solo bhene mu k’ijidila, nda mu ki xikane, mu tongolole kuila, eme-muéne Nzambi, ki kua kexidié Nzambi iéngi ua ngi diangela iu ua di-iudika, o ku pholo ue ku tuia kana-ku nzambi iengi ua kà bhingana eme. Eme, eme-muéne ngi Jihova,  kana-ku Mubhuludi uéngi, enu-ene mu jimbangi jami, eme ngi Nzambi.’—Izaia 43:10-12.

¹⁶ Kála o jimbangi mu inzo ia ku fundisa, o mundu ua Jihova ua tokalele ku bhana kijingu kua Jihova, ni ku bhana umbangi kuila, Jihova muene ngó o Nzambi ia kidi. Muéne uambe: ‘Mundu uami nga u solo phala ende ni ku ngi ximana.’ (Izaia 43:21) O akua Izalaiele a ejidile ku athu kuma, mundu ua Jihova. Kuma Jihova ua bhuluile akua Izalaiele ku Ijitu, muene ua mesenene kuila, ene a mu belesela mu vondadi iâ, ni ku mu bhana kijingu kala Mubhuludi uâ. Lelu, Jihova ua mesena ué kuila o mundu uê u mu belesela. O polofeta Mikeia ua londekesa o ima ia tokalele ku bhanga o mundu ua Nzambi, kioso kia zuela: “Ifuxi ioso a mu kuendela, muthu mu dijina dia nzambi iê, muthu mu dijina dia nzambi iê; etu-phe tua k’èndela mu dijina dia Jihova Nzambi ietu, ku izuua ni izuua ki iene ni dizubhilu.”—Mikeia 4:5.

17. Mukonda diahi Jihova ua kexile mu mona o akua Izalaiele kála vinhu ki ia kexile dingi ni valolo?

¹⁷ O mundu ua Izalaiele ka kolokotele mu ufiiele uâ kua Jihova. Ene a mateka ku kaiela o ifuxi ia kexile mu bheza jinzambi jo bhange ni mixi ni matadi, anga a bhanga ji kalatódio javulu phala o ubhezelu ua makutu. Mu 2.800 a mivu ku dima, polofeta Hozeia ua zuela kuila, o akua Izalaiele exile kala muxi ua muvidi ki u kexile dingi mu kuima ibundu iambote. Muéne uambe dingi: ‘Muxima uâ ua a kala luiadi, kiene kia kexila ni kikuma.’ (Hozeia 10:1, 2) Mu ku bhita 150 a mivu, Jelemiia ua sokesa ué akua Izalaiele ni muxi ua muvidi, mukonda a bhukumukine. Muéne ua a sokesa ni vinhu iambote ia lunguluka, ki iala dingi ni valolo. Bhu kaxi ka Jelemiia Jihova ua zuela: “O jinzambi jé-phe ji ua di iudikila jala kuebhi? Ji balumuke se ji tena ku ku kudila, bhu kithangana kia ku bhondalala kué.” Muéne uambe dingi: “ O mundu uami ua ngi jimbi muene.”—Jelemiia 2:21, 28, 32.

18, 19. (a) Kiebhi kia kanene Jihova kuila, ueji kala ni mundu ua ubhe mu ixi? (b) Ihi i tua-nda di longa mu milongi ia-nda kaiela?

¹⁸ O akua Izalaiele akexile mu bhana ibundu ia iibha, mukonda ka kexile dingi mu bheza Jihova mu ukexilu uambote. Mu veji dia ku kolokota ku kala jimbangi jê, ene a kexile mu bheza iteka. Mukonda dia kiki, Jezú ua tangela o atuameni a iibha a Jijudé mu izuua iê: “O Utuminu ua Nzambi a-nda ku mi tambula na-u, n’a u bhane athu engi a bhana idima iê.” (Matesu 21:43) O athu eji ku a sola kua Jihova, ene ngó eji tokala ku kifuxi kiobhe, o Izalaiele mu nzumbi. Muéne ueji bhanga “kikutu kia ubhe” ni ene. Jihova ua zuela ia lungu ni ene: “Eme nga kà kala ngi Nzambi iâ ene a kà kala mundu uami.”—Jelemiia 31:31-33.

¹⁹ Kioso Izalaiele kia bhukumukina Nzambi, Jihova ua solo o Izalaiele mu nzumbi, phala ku kala o mundu uê ku hama ia dianga. Lelu, o mundu uê nanhi? Kiebhi o athu a mesena ku sidivila Nzambi, a tena o kuijiia o abhezi a kidi a Nzambi? Tua-nda di longa ia lungu ni maka enhá mu milongi ia-nda kaiela.