GUY HOLLIS PIERCE, ua tokalele ku Kibuka Kia Utuminu kia Jimbangi ja Jihova, uafu kia Tersa, mu kizuua kia 18, ku mbeji ia Katanu, ku muvu ua 2014, muéne ua kexile ni 79 dia mivu. Mukonda muéne phange ia Kristu mu nzumbi, a mu fukununa, iú ua tambula o kikoué kiê ku diulu.—Jihebeleu 2:10-12; 1 Phetele 3:18.

Guy Pierce a mu vuala mu kizuua kia 6, ku mbeji ia Kamoxi, ua muvu ua 1934, mu sanzala ia Auburn, mu mbanza ia California, mu ixi ia Estados Unidos da América, a mu batizala ku muvu ua 1955. Muéne ua kazala ni muhatu’ê Penny ku muvu ua 1977, anga a vuala an’a. Muéne uexile ué kala tata ia athu a mukuá. Ku muvu ua 1982, muéne ni muhatu’ê Penny, a bokona mu sidivisu ia thembu ioso. Ku muvu ua 1986, ua kituka kafunga ka ilunga mu ixi ia Estados Unidos, anga u sidivila mu 11 kia mivu.

Ku muvu ua 1997, Guy Pierce ni muhatu’ê Penny, a mateka ku sidivila ku Betele ia Estados Unidos. Phange Pierce ua kalakala mu Departamento de Serviço, ku muvu ua 1998, a mu solo phala ku kuatekesa o Comissaõa de Pessoal ia Kibuka Kia Utuminu. Mu kizuua kia 2, ka mbeji ia Kamusasadi, ka muvu ua 1999, kioso kia kexile mu bhanga o kiônge kia dikota kia muvu, a bhange o ngolokela kuila, muéne a mu solo phala ku bhanga mbandu mu Kibuka Kia Utuminu. Ku mivu ia sukina, muéne ua sidivila mu ibuka iavulu kala o Comissão de Pessoal, Comissão de Redacção, Comissão Editora, ni Comissão de Coordenadores.

Phange Pierce uexile muthu uambote, mukuá henda, mukua ngalasa. Muéne ua zolele o athu oso. Maji o kima kia bhangele o athu ku mu zola, kiexile o henda iê, ni kulenduka kuê, a mu uabhele uê mukonda, muéne ua kexile mu xila o itumu ni ijila ia Nzambi, ua kexile ué ni kixikanu kia tenena kua Jihova. Guy Pierce ua kexile mu zuela kuila, nange o muanha ki u moneka, maji o ikanenu ia Jihova ia-nda di kumbidila muene, muéne ua mesenene kuila athu oso ejiia o kidi kiki.

Phange Pierce ua zolele ku kalakala phala Jihova, ua kexile mu mateka selu mu kamene, anga u zumbuka ngó mu usuku. Muéne uendele mu jixi javulu ku mundu, phala ku suínisa o jiphange jê, né muene se ua kexile ni kikalakalu kiavulu, nuka ua ditunine ku kuatekesa phange ia bhindama, mba phange u mu bhinga kikuatekesu. Né muene se ku bhita thembu iavulu, o jiphange a lembalala o ukexilu uê ua ku zalela, o ukamba uê, ni kikuatekesu kia a bhana bhu kaxi ka Bibidia.

O muhatu’ê, ni kisamanu kia an’ê, ni alulu’ê, ni alául’ê, ni an’ê oso mu nzumbi, a-nda kala ni ngunzu ia phang’etu, kamba dietu dia kazola. Mu kizuua kia 22, kia Sábhalu, ku mbeji ia Katanu, ka muvu ua 2014, Mark Sanderson, ua tokala ku Kibuka Kia Utuminu, ua bhange o diskursu dia Phange Pierce, ku Betele ia Brooklyn. Muéne ua zuela ia lungu ni kidielelu kia Phange Pierce, kia kuia ku diulu, anga u tanga o izuelu ia Jezú: “Sai ididi iavulu ku bhata dia Tat’etu, . . . Se ngai, anga ngi mi iudikila kiá kididi, hádia ngiza, ngi mi tambulula ko kuami; o kuoso ku ngala eme, enu uenu kuene ku muà kala. Muejiia kuoso ku ngiia, muejiia ue o njila.”—Nzuá 14:2-4.

Tua-nda kala ni ngunzu iavulu ia Phange Pierce. Maji tu sanguluka mu kuijiia kuila, muéne ‘uejidile o njila’ iia ku ‘dibhata’ diê dia kalela-ku.’