Atangi a Madivulu Metu Ebhula
Ihi I lombolola o izuelu ia Jelemiia kioso kiambe kuila, Lakele ua mu dila tuana tuê?
O divulu dia Jelemiia 31:15, di zuela: “Jihova ua zuela kiki: Mu Lama, evu-mu mbimbi, jingololo ni kudila lujiji; Lakele ua mu dila tuana tuê, nguê ku mu di xibisa ku tuana tuê, mukonda ki tua moneka dingi.”
Lakele muéne ua dianga kufua ande dia an’ê. Mu kiki o izuelu ia Jelemiia, a i soneka mu ku bhita 1.000 a mivu kudima, kioso kiafu Lakele, iedi kala ki ia kidi.
O mona ua dianga ua Lakele uexile Zuze. (Dimatekenu 30:22-24) Mu ku bhita thembu, Lakele uafu mu kithangana kia kexile mu vuala o mon’ê ua kaiadi, Bejamí. Mu kiki, nange tu tena ku dibhuidisa: Mukonda diahi o divulu dia Jelemiia 31:15 diamba kuila, muéne ua mu dila tuana tuê, mukonda “ki tua moneka dingi?”
Zuze ua kexile ni kiiadi kia an’a, Manasa ni Ifalaíme. (Dimatekenu 41:50-52; 48:13-20) Mu ku bhita thembu o muiji ua Ifalaíme uexile ni kutena kuavulu, ku thunda dia utuminu ua Izalaiele ni ku kala ku pholo dia kuinhi dia miji dia utuminu ua thunda. O muiji ua tundila ku mona ua kaiadi ua Lakele, Bejamí, ua bhangele mbandu ku muiji ua utuminu ua Juda ua kexile ku luiji. Mu kiki tu tena ku zuela kuila, Lakele u lombolola o ji mama joso ja utuminu ua thunda ni ua luiji.
Kioso kia soneka o divulu dia Jelemiia, o akua Asídia a tambuile kiá o utuminu ua thunda ua Izalaiele ni kuambata athu avulu mu ubhika. Maji, saí mbutu ku muiji ua Ifalaíme ua lengele ku mbanza ia akua Juda. Ku muvu ua 607 ande dia Kristu, o akua Babilonha a tambula o miji iiadi ia utuminu ua thunda ua Juda ni kuambata athu avulu ku ubhika. Avulu a ambatele ku mbanza ia Lama ia kexile nange nake dia ji kilómetulu ku thunda dia Jeluzaleme. (Jelemiia 40:1) Nange athu avulu a a jibhile mu mbanza ia Bejamí, mua fundile Lakele. (1 Samuuele 10:2) Mu kiki, o kudila kua Lakele ku lombolola o mukôndo ua athu akexile mu dila o akua Bejamí mba o athu oso a a jibhile ku mbanza ia Lama. Nange o izuelu ia Jelemiia ilombolola ué o ji mama joso ja kexile mu dila o mundu ua Nzambi a u ambatele ku ubhika.
Mu kiki, tu tena ku zuela kuila, kioso Jelemiia kia zuela kuma, Lakele ua mu dila tuana tuê, ua kexile mu bhanga kikanenu. O izuelu íii, ia lungu ni ia bhitile ku hama ja mivu kioso Jezú kia kexile mona ndenge. O Sobha Helode, ua tumine ku jibha o an’a oso a mala akexile ni mivu iiadi mba ndenge, mu mbanza ia Beleme ia kexile ku luiji lua Jeluzaleme. Xinganeka kiebhi kia kexile mu dila o ji mama jojo, mukonda o tuana tuâ ‘a tu jibha?’ Nange o kudila kuâ kua kexile ué mu bhixila katé ku Lama, o mbandu ia thunda ia Jeluzaleme.
Mu kiki, ki kale mu izuua ia Jelemiia mba ia Kristu, o izuelu ia lungu ni Lakele, “ua mu dila tuana tuê,” ilombolola o mukôndo ua ji mama akua Juda mukonda dia an’â a a jibhile. Tuejiia kuila oso afu kia, ai ku “ixi ia nguma iâ” a-nda vutuka kioso kia-nda mateka o difukunukinu.