O Kuila ua Tokala ku Lungulula o Kibanzelu Kiê?
SAÍ kibuka kia minzangala Jimbangi ja Jihova, a bakana kuia mu tala filme. O athu oso mu xikola a mu zuela ia lungu ni filme íii, ene oso amba kuila filme iambote. Kioso kia bhixila ku cinema, ene a tonginina o jifoto ja lungu ni filme, anga a mona-ku mauta a katunda ni ahatu a zuata kia iibha. Ihi ia-nda bhanga o minzangala Jimbangi ja Jihova? O kuila ene a-nda bokona mu cinema phala ku tala o filme íii?
Izuua ioso, etu tua tokala ku sola, o kima ki tu sola ki tena ku kolesa o ukamba uetu ni Jihova mba ku zozesa o ukamba uetu ni muéne. Eie nange u sola ku bhanga kima, maji kioso ki u banza kiambote ia lungu ni kima ki ua solo, u lungulula o kibanzelu kiê, anga u sola ku bhanga kima kiéngi. O kuila eie uejiia ku sola kiambote o ima, inga kana?
Kithangana Ki u Tokala ku Lungulula o Kibanzelu Kiê
Mukonda dia ku zola kiavulu Jihova, tua bhakula o muenhu uetu kua muéne mu ku tu batizala. Etu tua kanena Jihova ku mu kala fiiele, mu kiki, tua mesena ku kumbidila o kikanenu ki tua bhange. Maji o nguma ietu Satanaji o Diabhu, ua-nda bhanga ioso, phala ki tu kolokote mu ufiiele uetu. (Dijingunuinu 12:17) Etu tua solo ku sidivila ni ku belesela Jihova. Se tu lungulula o kibanzelu kietu, tua-nda texa o muenhu uetu.
Ku 2.600 a mivu ku dima, o Sobha Nabukodonozolo ia Babilonha, uedika kiteka kia dikota kia ulu, ni ku jijidika o athu oso ku ki bheza. Muthu uoso-uoso ua ditunine, eji mu takula mu kijiku kia túbhia. Maji Sadalake, Mizake ni Abede-neko, kitatu kiâ exile abhezi a Jihova, mu kiki ka mesenene ku mu luualesa. Mukonda dia kiki, ene ka belesela o kitumu kia sobha, o sobha anga u a takula mu kijiku kia túbhia. Jihova ua bhange madiuanu ni ku bhulula o mienhu iâ. Ene a solo o kufua mu veji dia ku xibhaka Nzambi.
Mu ku bhita Thembu, Daniiele uejidile kuila, se o athu a mu monene ku bhanga musambu, eji mu takula mu ngenda ia jihoji ni kufua kuenhoko. Maji né kiki, muéne ua suluka mu ku samba veji jitatu ku kizuua. Muéne ka lungulula o kibanzelu kiê kia ku bheza o Nzambi ia kidi, mukonda dia kiki, Jihova ua mu bhulula ku ‘uhamenu ua nguzu ia jihoji.’
O jiselevende ja Nzambi lelu, a kumbidila ué o kikanenu kia bhange kua Jihova kioso kia di bhakula kua muéne. Saí kibuka kia minzangala kia Jimbangi ja Jihova ku África, a ditunu ku bheza o dibandela mu xikola, mukonda dia kiki, o jimesene ja xikola a mesenene ku a kaia. Mu ku bhita thembu, o mutuameni ia ji xikola joso ja ixi, ua zuela ni minzangala iá, Jimbangi ja Jihova. Ene ka kexile ni uôma, mu kiki a jimbulula ni ku xila kuoso, se mukonda diahi ka kexile mu bheza o dibandela. Tundé mu kithangana kieniókio, o jimesene ja xikola, ka kexile dingi ku a thandanganhesa mukonda dia ku kamba ku bheza o dibandela. Mu kiki, o minzangala akexile múia kiá mu xikola sé hele, mukonda ka kexile dingi mu a jijidika ku xibhaka Jihova.
Rigobert ua di bhana ué ni ibhidi kioso o muhatu ué uafu. Muéne uambe: “Nga divu kia iibha. Etu ki tu fikile kuila, uexile uhaxi ua dikota. Mu ku bhita mbeji imoxi mu inzo ia ku saka, muéne uafu. Ku jindandu jetu, avulu ki jimbangi ja Jihova, mukonda dia kiki, nga tokalele ku di langa ni athu a mesenene kuendesa o thambi. Ene a mesene ku bhanga ima ia zembe Nzambi. Mukonda eme ki nga mesenene ku lungulula o ukexilu uami ua ku banza, ene a mesenene ku fuinhisa o an’ami, maji ene uá a kolokota mu ufiiele uâ kua Nzambi. Kioso ki tua zubha o ku funda, o jindandu ka mesenene ku vutuka ku mabhata mâ. Maji eme nga a tangele phala kuia, n’a xale ngó ió a tungile dikanga, maji né kiki, ka tokalele ku bhanga o ima ia lungu ni ubhezelu ua madifundu mba komba.”
“Mu kithangana kioso kiki kia bhonzo, eme nga diondela kua Jihova, phala o muiji uetu ka bhukumuka o itumu iê. Muéne uevu o misambu iami, iú ua tu kuatekesa ku kolokota mu ufiiele, né muene ni ijijidiku.” Rigobert ni an’ê ka xinganeka ku lungulula o kibanzelu kiâ, kia ku belesela Jihova.
Kithangana Ki Bhinga ku Lungulula o Kibanzelu Kiê
Ku muvu ua 32 K.K., saí muhatu kexile Judé, ua bhingi kua Jezú phala ku kaia dimonho kua mon’ê. Sumbala ua bhingi mu veji javulu, maji muéne ka mu tambuijila. Muéne uambe ku maxibulu mê: “Eme a ngi tumu ngó ku jimbudi ja jimbidila ja dibhata dia Izalaiele.” O muhatu ua kolokota mu ku bhinga, mukonda dia kiki, Jezú ua mu ambela: “O mbolo ia ana, ki i tokala ku i texila tuana tua jímbua.” O muhatu ua londekesa kuila ua kexile ni kixikanu kia dikota, kioso kiambe: “Kiene, Ngana! Maji o tuana tua jímbua-phe, tu dia ku ixete i lalumuka ku meza a ngana jâ.” Jezú ua lungulula o kibanzelu kiê, iú ua kaie o dimonho kua mon’ê.
Mu ku kala polondo phala ku lungulula o kibanzelu kiê mu kithangana kia tokala, Jezú ua kaiela o phangu ia Jihova. Mu kifika, kioso akua Izalaiele kia bhukumukina Jihova mu ku bheza o kangombe ka ulu, Jihova ua kanene ku a jibha. Maji kioso Mozé kia diondela phala Jihova ku a
Kála Jihova ni Jezú, o poxolo Phaulu ua kexile ué polondo phala ku lungulula o kibanzelu kiê. Mu veji ia dianga kuia mu ukunji ku jixi jengi, Marku ua mu xisa mu njila iú ua vutuka. Mukonda dia kiki, kioso kia kexile phala kuenda njila iéngi, Phaulu ka mesene dingi kuambata Marku. Maji mu ku bhita thembu, Phaulu nange ua mono kuila Marku ua kudile mu nzumbi ni kuila muéne ueji mu kuatekesa mu sidivisu. Mu kiki, Phaulu ua tangela Timote: “Katula ue Marku, uize-nê, kuma u ngi kuatekesa ku sedivisu.”
Kiki ki tu longa ihi? Né muene Jihova muthu ua iuka, maji uala polondo phala ku lungulula o kibanzelu kiê, mukonda muéne mukuá muanhu ni henda. Etu tu akua ituxi, mukonda dia kiki, saí ithangana ki tu tena kuijiia kiambote o ima. Mu kiki, tu lungulula kiavulu o ibanzelu ietu. Mu kifika, etu tu lungulula o kibanzelu kietu kia lungu ni akuetu, kioso ki tu tendela kiambote o ima ia lungu ni ene.
Saí ithangana tu bhinga ku lungulula o ibanzelu ietu, ia lungu ni jimbambe mu kilunga. Etu tu tena ku di longa o Bibidia ni kuia mu iônge, maji nange tu bhita thembu iavulu phala ku tu batizala. Mba nange tu kala ni hele ia ku kala muboki ua thembu ioso. Phange ia diala nange u kala ni hele ia ku sidivila kala múkuatekexi a tufunga mba kafunga mu kilunga. (1 Timote 3:1) O kuila eie ua divu kiá kiki? O kuila u tena ku lungulula o kibanzelu kiê? Jihova ua mesena kuila u katula mbote ku ujitu iú ni ku sanguluka mu ku sidivila Nzambi ni akuenu.
O ku lungulula o kibanzelu kietu ki tena ku bhekela mabesá
O phange mukua Betele ku Africa a mu ixana Ella uambe:”Mu kithangana ki nga bhixila ku Betele, ki nga kexile mu banza ku kala bhabha thembu iavulu. Eme nga mesenene muene ku sidivila Jihova ni muxima uoso, maji nga zolele ué kiavulu o muiji uami. Ku dimatekenu nga kexile ni ngunzu iavulu ia muiji uami! Maji
o phange u nga kexile nê kumoxi mu xilu, ua ngi suínisa kiavulu, mu kiki nga solo ku xala. Mu ku bhita kuinhi dia mivu ku Betele, ngala hanji ni vondadi iavulu ia ku suluka mu ku sidivila o jiphange jami, mu ku kolokota ku sidivila ku Betele.”Kithangana Kia Tokala Phala Ku Lungulula o Kibanzelu Kiê
Saí ithangana etu tua tokala ku lungulula o kibanzelu kietu. Mu kifika, Kaini ua kexile ni difuba dia phangi’ê anga “njinda i mu kuata.” Nzambi ua mono kuila Kaini ueji bhanga kima kia iibha, mukonda dia kiki, ua mu dimuna, phala ku di langa ku njinda. Nzambi uambe kuila o ‘kituxi kia batamene bhu muelu.’ Maji mu veji dia ku lungulula o kibanzelu ni ukexilu uê, Kaini ka bhana mátui ku izuelu ia Nzambi. Mukonda dia kiki, Kaini ua jibha phangi’ê!
Ihi ieji bhita se Kaini ua lungulule o kibanzelu kiê?
Tu tena ué ku di longa ku phangu ia Sobha Uziia. Ku dimatekenu, muéne uexile muthu ua belesela, mu kiki, ua kexile ni ukamba uambote ni Jihova. Maji, mu ku bhita thembu, muéne ua kexile mu di zangeleka kiavulu. Uziia uai mu tembulu ku satela uasu ua dizumba, sumbala o akunji ene ngó a tokalele ku bhanga kiki. O akunji a mu dimuna phala ka bhange kiki, maji muéne ka lungulula o kibanzelu kiê. Uziia “njinda i mu kuata,” ka bhana mátui ku izuelu iâ. Mukonda dia kiki, Jihova ua mu kuama ni uhaxi ua dibhute.
Mu izuua ietu, Joachim phangu iambote ia muthu ua bhingile ku lungulula o kibanzelu kiê, muéne a mu batizala ku muvu ua 1955, maji ku muvu ua 1978 a mu kaie mu kilunga. Mu ku bhita 20 a mivu muéne ua lungulula o kibanzelu kiê, ua diela o ituxi iê, ni ku vutuka mu kilunga. Kioso kafunga kia mu ibhula se mukonda diahi ua laleka kiavulu, Joachim ua tambuijila: “Eme nga kexile ni njinda iavulu, ng’exile ué ni ukumbu uavulu. Ngi divua kia iibha mukonda dia ku laleka kiavulu phala ku vutuka mu kilunga. O thembu ioso i nga kexile dikanga dia kilunga, nga kijidile muene kuma, o Jimbangi ja Jihova a longa o kidi.”
Etu ué nange tu bhindamena ku lungulula o ibanzelu mba ibhangelu ietu. Se tu kala polondo phala ku bhanga o ima íii, tua-nda sangulukisa Jihova.