1. Mukonda diahi Phaulu ua zuela kuila, ‘Kristu muéne o kutena kua Nzambi?’

JIHOVA ua londekesa o kutena kué bhu kaxi ka Jezú Kristu, mu ukexilu ua dikota. Kioso Jezú kia kexile mu ixi, muéne ua bhangele madiuanu. Madiuanu amoxi, tu tena ku a tanga mu Bibidia, ni kukolesa o kixikanu kietu. (Matesu 9:35; Luka 9:11) Mu kidi, Jihova ua bhana kutena kua dikota kua Jezú, mukonda dia kiki, poxolo Phaulu uambe: ‘Kristu muéne o kutena kua Nzambi.’ (1 Kolindo 1:24) Maji kiebhi o madiuanu a bhangele Jezú a lungu n’etu?

2. Ihi i tu longa o madiuanu a Jezú?

² O poxolo Phetele ua tange kuila, Jezú ua bhange ‘isuma’ mba madiuanu. (Ikalakalu 2:22) Ihi i tu longa o madiuanu enhá? A tu longa o ima ia-nda bhanga Jezú ku hádia mu Utuminu ué ua Midi ia Mivu. Mu thembu ienioió, muéne ua-nda bhanga madiuanu a dikota phala kukuatekesa o athu oso mu ixi. O madiuanu a bhangele muéne, a tu kuatekesa ué ku tendela kiambote o ídifua iê ni ia Tat’ê. Mu milongi íii, tua-nda  zuela ia lungu ni madiuanu atatu a Jezú, ni ku mona kiebhi ene a lungu n’etu lelu ni ku hádia.

3. (a) Mukonda diahi Jezú ua bhangele o madiuanu’ê a dianga? (b) Kiebhi Jezú kia londekesa o ukexilu ua kubhana mu mbanza ia Kanana?

³ Jezú ua bhange o madiuanu’ê a dianga, mu fesa ia ukaza ia bhitile mu mbanza ia Kanana. Etu ki tuejiia se ihi ia bhitile, maji mu fesa ienioió, o vinhu ki i sokele phala o ajitu. O dikaza dia ubhe dieji bhita jisonhi, mukonda ene a tokalele kuzalela kiambote o ajitu. O manh’a Jezú, Madiia, ua kexile ué mu fesa ienioió. O kuila muéne ua bhingi kikuatekesu kua Jezú, mukonda muéne ua kijidile kuila, Jezú ua kexile ni kutena kua ku bhanga madiuanu? Nange Madiia ua xinganekene mu ikanenu ioso ia lungile ni mon’ê, ni kuijiia kuila, muéne eji mu ixana “Mon’a Nzambi ia Diulu.” (Luka 1:30-32; 2:52) Mu kidi, ki-kale Madiia mba Jezú, a mesenene kiavulu kukuatekesa o dikaza. Mu kiki, Jezú ua bhange o madiuanu a kubhangesa 380 a ji litulu ja menha ku bhiluka “vinhu ia mbote.” (Tanga Nzuá 2:3, 6-11.) O kuila Jezú ua tokalele muene ku bhanga o madiuanu enhá? Kana. Muéne ua bhange o madiuanu enhá, mukonda ua mesenene kukuatekesa o athu ni kukaiela o phangu ia Tat’ê, uala ni ukexilu ua kubhana.

4, 5. (a) O madiuanu a dianga a Jezú a tu longa ihi? (b) O madiuanu a bhangele mu mbanza ia Kanana, a tu longa ihi ia lungu ni ima ia-nda bhita ku hádia?

⁴ Jezú ua bhange mu madiuanu, vinhu iavulu iambote, ia sokele phala o athu oso. Mudiê, o madiuanu iá a tu longa ihi? A tu longa kuila, Jihova ni Jezú ki akua kuimina kana, ene a uabhela o ku bhana. Kiki kilondekesa ué kuila, Jihova ua-nda tu bhana kudia kuavulu ku mundu ua ubhe, kabasa kididi ki tu tunga mu ixi.—Tanga Izaia 25:6.

⁵ Xinganeka! Kua kambe ngó bhofele, Jihova ua-nda tu bhana o ima ioso i tua bhindamena. Athu oso a-nda kala ni jinzo jambote, ni kudia kuambote. Tu sanguluka kiavulu, kioso ki tu xinganeka mu ima ioso iambote, ia-nda tu bhana Jihova mu Palaízu mu ixi.

6. Kiebhi Jezú kia londekesa o kutena kuê, ni kiebhi ki tu tena kukaiela o phangu iê?

⁶ Jezú nuka ua bhangele madiuanu phala o mbote iê muene. Xinganeka o kithangana kioso Diabhu kia tendala Jezú, mu ku mu bhinga kubhangesa o matadi ku kituka jimbolo. Jezú ua ditunine ku bhanga madiuanu phala o mbote iê muene. (Matesu 4:2-4) Maji Jezú ua mesenene ku bhanga madiuanu phala kukuatekesa athu engi. Kiebhi ki  tu tena kukaiela o phangu iê? Jezú ua tu tendelesa kukala ni ukexilu ua ‘kubhana ku akuetu.’ (Luka 6:38) Tu tena kubhanga kiki, kioso ki tu ixana akuetu phala ku dia kumoxi n’etu ku bhata. Tu tena ué kubhita kithangana ni akuetu kioso ki bhua o kiônge, tu tena ué kubhanga kiki kioso ki tu kuatekesa uoso ua bhindamena kima, ni kuívua kiambote kioso phange kia disokejeka phala kubhanga diskursu. Mba kukuatekesa ni ku longa kiambote o jiphange mu ukunji. Tu kaiela o ukexilu ua kubhana ua Jezú, kioso ki tu bhanga ioso phala kukuatekesa o jiphange.

7. Ihi ia-nda nangenena ku mundu iú ua Satanaji?

⁷ O uadiama ki maka a lelu. Jihova ua tangele ku akua Izalaiele kuila, ‘mu ngongo ki mueji kamba jingadiama.’ (Matendelelu 15:11) Mu kubhita hama ia mivu, Jezú uambe: “Jingadiama mua xalela na-ju.” (Matesu 26:11) O kuila Jezú ua kexile mu zuela kuila, ku hádia mu ixi mueji kala ué jingadiama? Kana. Muéne, ua mesenene kuzuela kuila, o uadiama ueji nangenena ngó ku mundu iú ua Satanaji mu tuala. O ima ia-nda lunguluka kioso ki tua-nda kala ku mundu uobhe! Mu thembu ienioió, ki mua-nda kala dingi uadiama. Oso a-nda kala ni kudia kuavulu, a-nda dia ni ku ekuta!

8, 9. (a) Mukonda diahi Jezú ua disa midi ja athu? (b) Kiebhi ki u divua ia lungu ni madiuanu iá?

⁸ O mukua Jisálamu ua sambe kua Jihova: “Eie uila u jikula o lukuaku lué, mienhu ioso i dia, ikuta ni ima iambote.” (Jisálamu 145:16) Kioso Jezú kia kexile mu ixi, muéne ua kaiela kiambote o phangu ia Tat’ê, ni kukuatekesa o athu mu ibhindamu iâ. Muéne ka bhangele o madiuanu phala kulondekesa ngó kuila, muéne uala ni kutena. Mu kidi, Jezú ua zolele kiavulu o athu. Tua-nda zuela ia lungu ni divulu dia Matesu 14:14-21. (Tanga.) Saí mundu uavulu ua tundile mu jimbanza javulu, a kaiele Jezú. (Matesu 14:13) Kioso kia mono kuma ngoloxi kiá, o maxibulu a thandanganhele ni athu a bhuile kiavulu, a kexile ué ni nzala. Mu kiki, ene a bhingi kua Jezú ku tumina o athu kuia mu sumba o kudia. Ihi ia bhange Jezú?

⁹ Ni mbolo jitanu, ni mbiji jiiadi, Jezú ua disa 5.000 ja maiala, o ahatu ni an’a ndenge ka a tange. Mukonda diahi jezú ua bhange o madiuanu enhá? Mukonda ua zolele kiavulu o athu, muéne ua mesenene kubhanga ioso phala kudikila o ibhindamu iâ. Nange Jezú ua bhanene kudia kuavulu ku athu, mukonda, o mundu uoso ‘ua di, uekuta.’ O kudia koko, kueji kua kuatekesa ku kala ni nguzu n’a tene kuenda dikanga, ni ku vutuka ku mabhata mâ. (Luka 9:10-17) Kioso enioso kia zubha kudia ni ku ekuta, o maxibulu a nona ku Jisekenha ja subhuka-ku, 12 kia ji ngalu!

10. Ku hádia, ihi ia-nda bhita ni uadiama?

¹⁰ Mukonda dia luímbi lua jinguvulu ja iibha, hama ni hama ia mazunda a athu mu ixi ioso ala mu uadiama. Né muene phange jetu javulu, kala ni kudia kua soko. Maji, kua kambe ngó bhofele, o athu ene mu  belesela Jihova, a-nda tunga mu ixi sé luímbi ni uadiama. Jihova muene o Muteni a ioso, muéne uala ni kutena ni vondadi ia ku dikila o ibhindamu ia athu oso mu ixi. Muéne ua kanena ku zubha o hadi ioso!—Tanga Jisálamu 72:16.

11. Mukonda diahi u tena ku dielela kuila, Kristu ua-nda kalakala ni kutena kuê kuoso, phala ku kuatekesa o athu mu ixi, ni ihi i ua mesena o kubhanga?

¹¹ Kioso Jezú kia kexile mu ixi, muéne ua bhange madiuanu mu kididi kimoxi ngó kia ixi, mu mivu itatu ni kaxaxi. (Matesu 15:24) Maji kala Sobha, Jezú ua-nda kuatekesa o athu oso, mu Midi ia Mivu ia Utuminu uê. (Jisálamu 72:8) O madiuanu a bhangele Jezú, a tu bhangesa ku xikina kuila, muéne ua-nda kalakala ni kutena kuê kuoso, phala o mbote ietu. Etu ki tuala ni kutena kua ku bhanga madiuanu, maji ihi i tu tena o kubhanga? Tu tena kukatula mbote mu kithangana kietu, ni kukalakala ni nguzu ietu ioso, phala kukuatekesa akuetu kuijiia ihi i kanena o Bibidia. Mu kuijiia kuila, tu Jimbangi ja Jihova, kiki, kiene o kikalakalu ki tua tokala o kubhanga. (Loma 1:14, 15) Kioso ki tu xinganeka mu ima ia-nda bhanga Kristu ku hádia, tu kala ni vondadi ia ku tula o njimbu íii ku akuetu.—Jisálamu 45:1; 49:3.

12. Mukonda diahi tu tena kudielela kuila, Jezú uejiia kiambote kiebhi kia tena kulanga o ibhangelu mu ixi?

¹² Kioso Nzambi kia bhange o ixi ni diulu, Jezú uexile ‘kumoxi bhenhobho, kala dixibulu diê.’ (Jisabhu 8:22, 30, 31; Kolose 1:15-17) Jezú uejiia kiambote o ima i bhita mu ixi. Muéne uejiia kiebhi kia tena kulanga o ibhangelu.

13, 14. Bhana kifika kilondekesa kuila, Kristu uala ni kutena kua ku langa o ibhangelu.

¹³ Kioso Jezú kia kexile mu ixi, muéne ua londekesa kuila, uala ni kutena kua Nzambi, kioso kia tena o kulanga o ibhangelu. Mu kifika, xinganeka kiebhi Jezú kia tena kukidika o kitembu kia dikota. (Tanga Marku 4:37-39.) Saí muthu, mukua ku tokuesa o Bibidia, u jimbulula kuila, o kizuelu “kitembu” a ki tange mu divulu dia Marku, mu dízui dia Ngeleku, kilombolola mvula ia dikota. Kiki kilombolola mvula iza ni matuta a xikatela, kitembu kia dikota, kinuminu, ni mvula iavulu. Kioso ki bhita, ioso i kituka ixete. O poxolo Matesu, ua zuela kuila, kuexile ‘kitembu kiavulu.’—Matesu 8:24.

¹⁴ Xinganeka: O mabhuku a bhixila katé mu bote, mu kiki mua mu bokona menha avulu. Sumbala ni jibuia ja kinuminu, ni ku bhangesa o bote ku di takula mu jimbandu javulu, Jezú ua mu zeka, mukonda ua bhuila kiavulu. Maji o maxibulu, uôma ua a kuata, anga a sota ku tonesa Jezú, exi: ‘Tua-nda fua!’ (Matesu 8:25) Ihi ia bhange Jezú? Muéne anga u tona, u kidika o kitembu, hé u ambela o menha, uixi: “Batamenu mu dixibhe!” (Marku 4:39) Kitembu anga ki batama,  kuma ku kala “kutululuka kua nzungule.” Iá madiuanu a makota, a londekesa o kutena kua Jezú kua ku langa o ibhangelu!

15. Kiebhi Jihova kia londekesa kuila, muéne uala ni kutena kua ku langa o ibhangelu?

¹⁵ O kutena kua Jezú ku tunda kua Jihova, kiki kilombolola kuila, Nzambi, o Muteni ia ioso, u tena kulanga o ibhangelu. Mu kifika, ande dia kumateka o Dilúvio, Jihova uambe: ‘Kuma kua kambe ngó sambuadi dia izuua, nga-nda kunokesa mvula mu ngongo mu makuinhi a uana a izuua ni makuinhi a uana a usuku.’ (Dimatekenu 7:4) Mu divulu dia Makatukilu 14:21 Tu tanga ué: “Jihova anga u vutula o menha a kalunga ni kitembu.” Mu divulu dia Jona 1:4 tu tanga ué: ‘Jihova u tuma kitembu kia dikota kubhuka mu kalunga, hé mu dibhanga kibhungu kionéne, naviiu anga inda i budika.’ Tu sanguluka kiavulu, mu kuijiia kuila, ku mundu uobhe, Jihova ua-nda langa o ibhangelu ioso.

16. Mukonda diahi tu sanguluka mu kuijiia kuila, Jihova ni Jezú ala ni kutena kua ku langa o ibhangelu?

¹⁶ Tu sanguluka kiavulu mu kuijiia kuila, Jihova ni Jezú ala ni kutena kua ku langa o ibhangelu. Mu Utuminu ua Kristu ua Midi ia Mivu, o athu a-nda tunga mu ixi ka-nda kala dingi ni uôma ua kima kioso kioso. Sé-ku muthu ua-nda bhita dingi mu mavuua, mba  kufua mukonda dia kalemba, kitembu ki jibha, dikende dibaza koxi a mavu, mba itungutu ia ixi. Ki tua-nda kala dingi ni uôma ua ima íii, mba kima kioso kioso, mukonda “o balaka ia Nzambi,” ia-nda kala mu’axaxi ka athu! (Dijingunuinu 21:3, 4) Tu tena ku dielela kuila, Jihova ua-nda bhana o kutena kua Jezú phala ku langa o ibhangelu, mu Utuminu uê ua Midi ia Mivu.

17. Kiebhi ki tu tena ku kaiela o phangu ia Nzambi ni ia Kristu lelu?

¹⁷ Mu kidi, etu ki tu tena ku fidisa o mavuua. Jihova ngó ni Jezú a tena ku bhanga kiki. Maji tu tena ku bhanga kima kiéngi. Tu tena ku kumbidila o milongi i tu sanga mu divulu dia Jisabhu 3:27. (Tanga.) Kioso o jiphange jetu a bhita mu mavuua, tu tena ku a kolokotesa, kua kuatekesa mu kua bhana ima ia bhindamena, ni kua konda malamba, ni kua londekesa o henda ietu. (Jisabhu 17:17) Mu kifika, tu tena kua kuatekesa kioso kia bhita mu mavuua. Saí muhatu mutudi, kioso kia buika o inzo iê ku kitembu ki jibha, uambe: “Ngi sakidila kiavulu mu ku kala mu kilunga kia Jihova, kana ngó mukonda dia ku ngi kuatekesa ni ima mu xitu, maji benge benge o kikuatekesu mu nzumbi.” Phange ia mukuá dikudi, ua divu kia iibha kioso o mvula ia dikota ia buika o inzo iê. Kioso o jiphange kia edika o nzo iê, muéne uambe: “Nga di uana kiavulu! Ki ngi tena kuzuela kioso ki nga mu divua.” Muéne uambe dingi: “Nga ku sakidila Jihova!” Tu sakidila kiavulu mukonda tu mona kuila, o jiphange jetu ja maiala ni ja ahatu, ene mu bhanga ioso phala ku dikila o ibhindamu ia akuâ. Tu sakidila kiavulu, benge benge Jihova ni Jezú Kristu, mukonda dia ku tu langa.

18. Ihi i ku diuanesa mu kuijiia o kima kia suínisa Jezú, kubhanga o madiuanu?

¹⁸ Mu sidivisu iê ia ukunji, Kristu ua londekesa kuila, muéne ‘o kutena kua Nzambi.’ Maji muéne nuka ua bhangele kima kioso kioso, phala ku di zangeleka mba ku dikila o ibhindamu iê. Jezú ua londekesa o kutena kué mu ku bhanga madiuanu, mukonda ua zolele o athu. Tua-nda di longa dingi ia lungu ni maka enhá mu milongi i kaiela.