1-3. Mukonda diahi o phange ia muhatu u xikina ni kidi kioso kuila, Jihova uejidile o ima ia bhindamene?

LANA, muboki ua thembu ioso, ka-nda tena ku di jimba o kima kia bhitile, kioso muéne kiai mu kunda o ixi ia Alemanha, ku muvu ua 2012. Muéne uambe kuila, Jihova ua tambuijila o misambu iiadi ia bhangele. Kioso kia kexile mu maximbombo, mu kuia mu kididi kia kukuata o kiphululu, muéne ua sambe kua Jihova phala ku mu kuatekesa ku sanga muthu ua mesena ku di longa o Bibidia. Kioso kia tula bhu kididi kia kukuata o kiphululu, a mu tangela kuila, o kiphululu kiê kieji tunda ngó mu kizuua kia mukuá. Lana ua bhingi kikuatekesu kua Jihova, mukonda muéne kexile dingi ni kitadi, né kididi kia kuzeka usuku uenhó.

² Kioso Lana kia zubha o kusamba, muéne uevu muthu ku zuela: “Lana, ua nange, ihi i ua mu bhanga bhabha?” Muthu ió, uexile munzangala a di longele kumoxi mu xikola. Muéne uexile kumoxi ni mam’ê ni kuku’ê akexile ku mu lekela, mukonda  muéne ua kexile múia ku ixi ia África do Sul. Kioso Lana kia a tangela o maka akexile mu bhita nau, o mama ni kuku, a mu ixana phala kuzeka ku bhata diâ. Ene a bhange ibhuidisu iavulu ia lungu ni kixikanu kiê, ni sidivisu ia thembu ioso.

³ Mu kamene, kioso kia zubha kumatala, Lana ua tambuijila dingi ibhuidisu ia mukuá ia lungu ni Bibidia. Lana ua bhingi o mixinda iâ, phala ku suluka ni kutambuijila o ibhuidisu ia mukuá. Lana ua bhixila kiambote ku bhata diê, iú ua suluka mu sidivisu ia thembu ioso. Muéne u mona kuila, Jihova uevu o misambu iê, ni kuila, muéne uejidile o ima ia bhindamene, iú ua mu kuatekesa.—Jisálamu 65:2.

4. Ima iahi i tua bhindamena i tua-nda di longa?

⁴ Kioso ki tu bhita ni maka, tu tena kusamba kua Jihova, mu kiki, muéne uivua o misambu ietu ni ngalasa ioso. (Jisálamu 34:15; Jisabhu 15:8) Maji o musambu ua tu longo Jezú, u tu longa kuila, saí ima ia mukuá iala ni valolo ia dikota, i tu tena kubhinga mu musambu. Mu milongi íii, tua-nda di longa, se kiebhi o ima i uana ia sukina, ia bhingile Jezú mu musambu uê, i tena ku tu kuatekesa kulondekesa o ufiiele uetu kua Jihova.—Tanga Matesu 6:11-13.

5, 6. Mukonda diahi Jezú ua tu longo ku bhinga o “kúdia kuetu,” né muene se tuala ni kudia kuavulu?

⁵ Jezú ua tu tendelesa kubhinga o “kúdia kuetu,” mu veji dia ku bhinga “kúdia kuami.” Victor, kafunga ka ilunga ku África u jimbulula: “Ithangana ioso ngene mu sakidila Jihova, mukonda eme ni muhatu uami, ki tuene mu thandanganha kiavulu mu kuxinganeka se mungu tua dia ihi, né kuthandanganha ni kitadi kia kufuta o inzo. Izuua ioso, o jiphange jetu ene mu tu langa ni henda ioso. Maji, ngi samba phala o jiphange ene mu tu kuatekesa, n’a tene ku di bhana kiambote ni ibhidi ioso ia lungu ni kitadi.”

⁶ Nange etu tuala ni kúdia kuavulu, maji phange jetu ja mukuá ala mu uadiama. A mukuá a bhiti ni mavuua. Mu veji dia kusamba ngó phala ene, tu tena ué kubhanga kima phala ku a kuatekesa. Mu kifika, tu tena ku a bhana kama koso-koso ku tuala na-ku, phala ku suua o ibhindamu iâ. Tu tena ué kusangela kitadi phala ku kuatekesa o kikalakalu kia Jihova ku mundu uoso. Tuejiia kuila, o kitadi ki tu sangela, ki kuatekesa o jiphange jetu ala ni ibhindamu iavulu.—1 Nzuá 3:17.

7. Ihi ia mesenene ku tu longa Jezú kioso kiambe: “Kizuua kia mungu, kana ku ki kuatela hele?”

⁷ Kioso Jezú kia zubha kulonga o ukexilu uambote ua kusamba, muéne ua tu tendelesa phala ki tu bhinge ngó o jimbote. Muéne uambe kuila, se Jihova u zuika o iangu ku mukáu, “kífua ki ki mu kala kot’èlele o ku mi zuika enu, enu mua tolo o kuxikana? Kienhiki kana kukala ni hele, muexi: . . . tu zuata-hi?” Mu ku suluka, muéne uambe dingi: “Kizuua kia mungu, kana ku ki kuatela hele.” (Matesu 6:30-34) Ki tu bhingi kuthandanganha ni ima i tua-nda bhindamena ku hádia.  Mu veji dia kiki, tua tokala kusanguluka ni ima i tuala na-iu, kabasa kizuua. Mu kifika, tu tena kusamba kua Nzambi phala ku tu kuatekesa kukala ni inzo, kusanga salu phala ku dikila o muiji uetu, ni kukala ni unjimu ua kubatula kiambote o maka a lungu ni sauidi ietu. Maji saí kima kia beta dingi kota ki tua tokala kubhinga mu musambu.

8. O izuelu ia Jezú ia lungu ni kúdia kuetu kua kizuua ni kizuua, i tu lembalesa ihi? (Tala o foto ia dianga.)

⁸ O izuelu ia Jezú ia lungu ni kúdia kuetu kua kizuua ni kizuua, i tu lembalesa kima kia mukuá kia zuelele muéne: “O muthu ki ku mbolo ngó kua muena o muenhu, maji ku maka moso ma tunda ku dikanu dia Nzambi.” (Matesu 4:4) Mu kiki, tua tokala kukolokota mu kusamba kua Jihova, phala ku tu longa ni ku tu bhana o ima i tua bhindamena phala ku mu zukama.

9. Mukonda diahi o ituxi ia difu ni makongo?

⁹ Jezú uambe: “Tu loloke o makongo metu.” Mu kithangana kia mukuá muéne uambe: “Tu loloke o i kuma ietu.” (Matesu 6:12; Luka 11:4) Muéne ua zuela o ima íii, mukonda o ituxi ietu ia difu ni makongo. Ku muvu ua 1951, O Mulangidi ua jimbulula kuila, kioso ki tu ta kituxi, kia difu ni ku ta dikongo kua Jihova. Etu tua tokala kuzola ni kubelesela Jihova. Mu kiki, kioso ki tu ta kituxi kua Nzambi, ki tua mu bhana kua muéne o kima kia mu  tokala. O Mulangidi ua jimbulula ué kuila, se Jihova ua mesenene, ueji batula o ukamba uê n’etu. Uene uambe dingi: ‘Kioso muthu kia ta kituxi ulondekesa kuila, ka zolo Nzambi.’—1 Nzuá 5:3.

10. Mukonda diahi Jihova u loloka o ituxi ietu, ni ihi i tua tokala o kubhanga?

¹⁰ Tu sakidila kiavulu Jihova, mu kubhana Jezú kala sata, phala ku tu loloka o ituxi! Etu tua bhindamena o muloloki ua Jihova izuua ioso. Kua bhiti kiá 2.000 ja mivu tundé kiafu Jezú bhu kididi kietu, maji katé lelu, tuene mu katula hanji mbote mu sata ia kukula kua Jezú. Tua tokala kusakidila Jihova izuua ioso, mukonda dia ujitu iú ua dikota. Sé-ku muthu mudietu ueji tena kufuta o sata ia bhingile phala ku tu bhulula ku kituxi ni kalunga. (Tanga Jisálamu 49:7-9; 1 Phetele 1:18, 19.) O izuelu “tu loloke o makongo metu,” i tu sanga mu musambu ua tu longo Jezú, i tu lembalesa kuila, k’etu ngó tua bhindamena o ku tu loloka, maji ni jiphange jetu ué. Jihova ua mesena kuila, tu a banza ué, ni ku xinganeka mu ukamba uâ ni muéne. Mu kiki, tua tokala ku a loloka ni lusolo, kioso ene kia tu bhanga kima ki tu luualesa. Mu kidi, saí bhabha o ima ia bhanga, ima iofele, maji kioso ki tu loloka o jiphange jetu, tu londekesa o henda ietu kua ene. Tu londekesa ué o kisakidilu kietu kua Jihova, mukonda dia ku tu loloka.—Kolose 3:13.

11. Mukonda diahi kima kiambote kuloloka akuetu?

¹¹ Kuma tu akua ituxi, saí bhabha ki bhonza kiavulu kuloloka o athu a tu bhanga ima ia iibha. (Ijila 19:18) Se tu kuata kuzuela ni jiphange mu kilunga o kima kia iibha kia tu bhange, ene a-nda di ta ué mu maka, kiki ki tena ku bhangesa o kilunga ku di uanuna. Se tu suluka ni kubhanga o ima íii, tua-nda londekesa kuila, ki tu bhana valolo ku ujitu ua Nzambi, mu kiki ki tua-nda katula mbote mu sata ia kukula kua Jezú. (Matesu 18:35) Se ki tu loloka akuetu, Jihova ka-nda tu loloka ué. (Tanga Matesu 6:14, 15.) Se tua mesena kuila Jihova u tu loloka, ki tu tokala ku suluka mu ku bhanga ima ia mu ibhila.—1 Nzuá 3:4, 6.

12, 13. (a) Ihi ia bhiti ni Jezú kioso kia mu batizala? (b) Mukonda diahi ki tu tokala kutatela akuetu se a tu nganala? (c) Ihi ia londekesa Jezú mu ku kolokota kukala fiiele katé mu ufuilu uê?

¹² O izuelu “ku tu ehele kudibhala mu kudianguka,” ia tumbula Jezú mu musambu ua tu longo, i tu lembalesa o kizulukutu kia bhiti kioso kia mu batizala. O nzumbi ikola ia Nzambi ia mu ambata mu kikangalakata, “phala Diabhu ku mu funhisa.” (Matesu 4:1; 6:13) Mukonda diahi Jihova uehela o kima kiki kubhita? Jihova ua tumikisa Jezú mu ixi, phala ku batula o maka oso a moneka, kioso Adá ni Eva a ditunu o ungana ua Jihova. Mukonda dia kubhukumuka kuâ, kua moneka ibhuidisu ia bhingile ku i tambuijila. Mu kifika, o kuila Jihova ua lueza kioso kia bhange o athu? O kuila o muthu ua iuka ueji tena kukala fiiele kua Jihova, né muene se a mu tendala kua ‘Satanaji?’ O kuila o athu eji ditunda dingi kiambote se a di tumine mudiâ? (Dimatekenu 3:4, 5) Ku hádia, kioso kia-nda  tambuijila o ibhuidisu ioso íii, kala kia mesena Jihova, o athu oso, ki kale ku diulu ni mu ixi, a-nda kuijiia kuila Jihova muéne ua beta kota kuijiia o kutumina.

¹³ Jihova muthu ua zele, mu kiki, muéne ka tena ku lola muthu ni ima ia iibha. Satanaji muéne mukuá ku ‘tendala.’ (Matesu 4:3) Satanaji u fikisa ku tu nganala mu maukexilu avulu. Maji etu tu tena kusola. Kala muthu mudietu u tena kusola se ua-nda kuehela ku mu nganala mba kana. (Tanga Tiiaku 1:13-15.) Kioso kia mu tendala kua Satanaji, Jezú ua ditunu ni lusolo mu ku tumbula o Mak’â Nzambi. Jezú ua kolokotele mu ufiiele uê kua Nzambi. Maji Satanaji ka bhuila. Muéne ua kingila “kithangana kiengi,” phala kutendela Jezú. (Luka 4:13) Maji kabasa kima kia bhangele Satanaji, Jezú ua kolokotele mu kubelesela Nzambi, o Ngana iê. Muéne ua londekesa kuila, o athu a iuka a tena kukolokota kukala fiiele kua Jihova, né muene mu izukutisu ia bhonzo. Maji né kiki, Satanaji uene hanji mu tendala o akaiedi a Jezú katé muene ni eie phala kuxibhaka Jihova.

14. Ihi i tua tokala o kubhanga phala ka tu nganale?

¹⁴ O ibhuidisu ia bhangele ia lungu ni ungana ua Jihova, ia bhingi hanji ku i tambuijila. Jihova uehela hanji Satanaji ku tu tendala. Jihova ka tu ehela “kudibhala mu kudianguka.” Mu kidi, muéne uejiia kuila, etu tu tena kukolokota kukala fiiele kua muéne, mu kiki, muéne uala polondo phala ku tu kuatekesa. Maji muéne ka tu jijidika kubhanga o  ima ia iuka. Muéne u xila o ufôlo uetu. Mukonda dia kiki, muéne u tu ehela kusola, se tua-nda mu kala fiiele mba kana. Se ki tua mesena ku tu nganala, tua tokala kubhanga ima iiadi: Kuzukama kua Jihova, ni kukolokota kusamba mu kubhinga o kikuatekesu kiê. Kiebhi Jihova kia tambuijila o misambu ietu phala tu kolokote mu jitendasá?

15, 16. (a) Jitendasá jebhi ji tua tokala kutolola? (b) Se a tu nganala, tua-nda tatela nanhi?

¹⁵ Jihova u tu bhana o nzumbi ikola, phala ku tu kuatekesa ku zoka ni kutolola o jitendasá ja Satanaji. Jihova ua tu bhana ué o Bibidia, ni milongi bhu kaxi ka kilunga, phala ku tu dimuna ni ku tu londekesa o iluezu. Mu kifika, muéne u tu dimuna phala ki tu zange o kithangana kietu, ni kitadi ni nguzu ietu, ku ima ki tu i bhindamena. Espen ni Janne, a tungu ku ixi muala o umvuama uavulu, ku Europa. Ene a kalakala mivu iavulu kala aboki a thembu ioso, bhu mbambe ia ixi mua bhindamene dingi aboki. Kioso kia vuala o mona, a xisa o kikalakalu kia aboki a thembu ioso, lelu ala ni tuana tuiadi. Espen u zuela: “Tuene mu samba kua Jihova phala ki tu dibhale mu kudianguka lelu, mukonda dia kukamba kithangana kia soko phala kubhanga o sidivisu ia Jihova, kala ki tua kexile mu bhanga m’ukulu. Tuene mu bhinga kua Jihova phala ku tu kuatekesa kukolokota kukala fiiele, ni kusuína mu ukunji.”

¹⁶ O tendasá ia mukuá i tua tokala kutolola, o kutala o ufusa. Se a tu kuata bhu kaxi ka tendasá íii, ki tu tokala kutatela Satanaji. Mukonda diahi? Mukonda Satanaji ni mundu uê, ka tena ku tu jijidika kubhanga kima kioso kioso kia iibha. Saí athu a mona o ufusa, mukonda dia kukolokota ku xinganeka mu ima ia iibha. Maji saí jiphange javulu ja mala ni ja ahatu, a tolola o tendasá íii, etu ué tu tena ku i tolola.—1 Kolindo 10:12, 13.

17. (a) Kiebhi ki tu tena kulondekesa kuila, tua mesena kuma Jihova u tu ‘kudila kua Satanaji?’ (b) Ubhulukilu uebhi ua zukama?

¹⁷ Kiebhi ki tu tena ku londekesa kuila, tua mesena kuma Jihova u tu ‘kudila kua Satanaji?’ Etu ki tu “tokala ku mundu,” ki tu tokala ué “kuzola o mundu, mba o ima iene ku mundu.” (Nzuá 15:19; 1 Nzuá 2:15-17) Tua-nda sanguluka kiavulu kioso Jihova kia-nda buika Satanaji ni mundu iú ua iibha! Kuma kithangana kiki ki ki tula luua, tua tokala kulembalala kuila, Satanaji uala ni “njinda iavulu, kuma muène uejiia kuila o thembu iê ia butu kia.” Muéne ua-nda bhanga ioso, phala ku tu fidisa kubheza Jihova. Mukonda dia kiki, tua tokala kusuluka ni ku samba phala Jihova ku tu kudila kua Satanaji.—Dijingunuinu 12:12, 17.

18. Ihi i tua tokala o kubhanga, se tua mesena kutunga ku mundu sé Satanaji?

¹⁸ O kuila eie ua mesena kutunga ku mundu sé Satanaji? Kolokota mu kusamba phala o Utuminu ua Nzambi uíze, o dijina dia Nzambi a di xile, ni ku samba phala o vondadi iê a i bhange mu ixi. Dielela kua Jihova phala ku ku langa ni ku ku bhana ioso i ua bhindamena, phala kukolokota mu ufiiele uê. Bhanga ioso phala kukumbidila o musambu ua tu longo Jezú.