1. Ihi o athu ene mu banza kuila, ki kima kia iibha?

TUA tungu ku mundu uezala ni undumbu. Mu kifika, athu avulu a banza kuila, ki kima kia iibha diiala kuzeka ni diiala ni mukua, mba muhatu ni mukua, mba o athu ka kazala ku zeka kumoxi. O jifilme, o madivulu, o mimbu, ni itonokenu iéngi dingi, iezala ni undumbu. (Jisálamu 12:8) Maji né kiki, Jihova u tena ku tu kuatekesa kukala ni ukexilu uambote ku muenhu. Tu tena kuzela, ku mundu uezala ni undumbu.—Tanga 1 Tesalonika 4:3-5.

2, 3. (a) Mukonda diahi tua tokala kudituna o jihanji ja iibha ? (b) Ihi i tua-nda di longa mu milongi iii?

² Phala kusangulukisa Jihova, tua tokala kudituna o ima ioso ia zembe muéne. Maji, mukonda dia kukamba o kuiuka, etu tu tena kuzola o undumbu, kála o mbiji i mesena o kudia kuala ku nzolo. Se tu mateka kukala ni ibanzelu ia lungu ni undumbu, tua tokala kubhanga ioso phala ku i katula mu kilunji kietu. Se ki tu bhange kiki, tua-nda kudisa o jihanji ja kumesena ku bhanga  o undumbu, ni ku ta kituxi se kithangana kimoneka. Kiene ué ki zuela o Bibidia: “O hânji iaiibha ienhi’ii, ki i zubha o kuimita, i vuala kituxi.”—Tiiaku 1:14, 15.

³ O hanji ia iibha i tena kukula ku muxima uetu. Mu kiki, tua tokala kudilanga ni ima i tu mateka o kuzola. Se tu dituna o jihanji ja lungu ni undumbu, tua-nda tena kulenga o undumbu ni ima ia iibha ijila mu kubhanga o undumbu. (Ngalásia 5:16) Mu milongi íii, tua-nda zuela ia lungu ni ima itatu, ia-nda tu kuatekesa kubhânga ni jihanji ja iibha: o ukamba uetu ni Jihova, o itendelesu ia Mak’â mê, ni kikuatekesu kia jiphange jetu a kulu mu nzumbi.

4. Mukonda diahi, kima kiambote kuzukama kua Jihova?

⁴ O Bibidia iamba ku athu oso a mesena ‘kuzukama kua Nzambi’: ‘Di sukulienu, maku,’ “di zelesienu mixima.” (Tiiaku 4:8) Se Jihova u kala kamba dietu, tua-nda bhanga ioso phala ku mu sangulukisa, ki kale mu ima i tu bhanga, mba mu ibanzelu ietu. Se o ibanzelu ietu i zela, o muxima uetu ua-nda zela ué. (Jisálamu 24:3, 4; 51:6; Filipe 4:8) Jihova uejiia kuila, etu tu akua ituxi, mukonda dia kiki, tu tena kubanza mu ima ia lungu ni undumbu. Kuma ki tu mesena ku luualesa Jihova, etu tu bhanga ioso, phala kudituna o ibanzelu ia iibha. (Dimatekenu 6:5, 6) Tu bhanga ioso ni ioso, phala kuzelesa o ibanzelu ietu.

5, 6. Kiebhi o musambu u tu kuatekesa kutolola o jihanji ja iibha?

⁵ Jihova ua-nda tu kuatekesa kutolola o ibanzelu ia lungu ni undumbu, se tuia ni ku mu bhinga kikuatekesu izuua ioso. Muéne u tu bhana o nzumbi iê ikola, phala ku tu kuatekesa kukolokota mu kuzela. Mu misambu ietu, tu tena kutangela Jihova kuila, tua mesena kukala ni ibanzelu i mu sangulukisa. (Jisálamu 19:14) Ni ku dionda kuoso, tua tokala ku mu bhinga ku tu tonginina kiambote o muxima, phala kumona se tuala ni hanji ioso ioso ia iibha, i tena ku tu bhangesa ku ta kituxi. (Jisálamu 139:23, 24) Kolokota kubhinga kua Jihova phala ku u kuatekesa kudituna o undumbu ni kubhanga o ima iambote, né muene se kibhonza kiavulu.—Matesu 6:13.

⁶ Ande dia ku mateka ku di longa ia lungu ni Jihova, nange tua zolele kubhanga o ima ki i mu uabhela, nange tuene mu bhânga hanji ni jihanji ja iibha. Maji Jihova u tena ku tu kuatekesa ku lungulula o mienhu ietu, ni kubhanga o ima ia mu uabhela. Mu kifika, kioso Sobha Davidi kia bhange o undumbu ni Bete-seba, muéne ua diela o ituxi iê, ni ku dionda kua Jihova, phala ku mu bhana “muxima uengi uazele,” ni ku mu kuatekesa kubelesela. (Jisálamu 51:10, 12) Mu kiki, se m’ukulu tua kexile ni jihanji ja iibha ja lungu ni undumbu, anga tua mu bhânga-naju hanji, Jihova u tena ku tu kuatekesa kukala ni nguzu ia ku mu belesela ni kubhanga o ima ia mu uabhela. Muéne u tena ku tu kuatekesa kulenga o ibanzelu ia iibha.—Jisálamu 119:133.

7. Kiebhi o Mak’â Nzambi kia tena ku tu kuatekesa kudituna o ibanzelu ia lungu ni undumbu?

⁷ Jihova u tena kutambuijila o misambu ietu bhu kaxi ka Maka mê, o Bibidia. Mu Bibidia, tu sanga-mu o unjimu ua Nzambi, ua zele. (Tiiaku 3:17) Kioso ki tu tanga o Bibidia izuua ioso, tu izalesa o kilunji kietu ni ibanzelu ia zele. (Jisálamu 19:7, 11; 119:9, 11) Mu Bibidia, tu sanga-mu ué phangu ia athu  avulu ni itendelesu i tu kuatekesa kudituna o ibanzelu ni jihanji ja lungu ni undumbu.

8, 9. (a) Mukonda diahi, saí muzangala ua bhange undumbu ni muhatu ua kexile kidianzunga? (b) Mu kifika, ihi i tu sanga mu divulu dia Jisabhu, mu kibatulu 7, i tua tokala o kulenga?

⁸ Mu divulu dia Jisabhu 5:8, o Mak’â Nzambi a tu tendelesa kulenga o undumbu. Mu divulu dia Jisabhu, mu kibatulu 7, tu sanga-mu musoso ua munzangala, uia mu nhunga ni ku bhita bhu mbandu a inzo ia muhatu ua kexile ndumbu. O muhatu ua kexile ku mbandu ia njila, ‘ni ukembu ua kidianzunga.’ O muhatu anga uai, anga ua di bongo-nê, hé u mu bhana nzobole, ni ku mu zuela ima i mu bhangesa ku kala ni jihanji ja iibha ja kubhanga-nê undumbu. O munzangala ka ditunu o jihanji jojo, mu kiki, ua bhange undumbu ni muhatu uenhú. Sumbala muéne ka xinganekene ku ta kituxi mu luelu, maji muéne ua té kituxi. Mu kiki, ua bhiti mu ibhidi iavulu. Se o munzangala ua xinganekene mu kiluezu, hinu, ua lengele o muhatu uenhó!—Jisabhu 7:6-27.

⁹ Kala o munzangala iú, etu ué tu tena ku bhanga ima ia iibha, se ki tu kala ni unjimu ua ku mona o kiluezu. Mu kifika, m’usuku o mitelembe ia izunzumbia saí bhabha ilondekesa minangu ia undumbu, kiki, ki tena kukala kiluezu kia dikota, se tu mateka ku lungulula ni ku sota minangu iéngi ia mu londekesa o mutelembe. Kiluezu kia dikota ué, kubueta ni kujikula o jimbandu ni ima ki tu ijiia mu Internete, ku zuela ni athu ki tua ejiia mu internete, kujikula o jimbandu mu internete ji londekesa o ima ia lungu ni undumbu, mba kujikula milongi ilondekesa  o ufusa. Mu ithangana íii, o ima i tu mona i tena ku tu bhangesa kukala ni jihanji ja iibha, ni ku tu bhangesa ku kamba kubelesela Jihova.

10. Mukonda diahi o kuzongojola, kiluezu kia dikota? (Tala o foto ia dianga.)

¹⁰ O Bibidia i zuela ué kiebhi o diiala ni muhatu kia tokala ku di talatala. (Tanga 1 Timote 5:2.) O Jikidistá a mateka ngó ku tangesa o muthu a mesena ku kazala-nê. Ene ka tokala kuzongojola. Amoxi nange a banza kuila, o kuenda mu ukexilu u bhangesa muthu ku kala ni jihanji ja iibha ni kutala mba ku bhanga ima iéngi, sé ku kuata ku mukutu ua muthu, ki kima kia iibha. Maji, kioso o diiala ni muhatu kia mateka ku di zongojola, ene a tena ku kala ni jihanji ja iibha, ni ku di ta mu kiluezu kia ku bhanga o undumbu. Kiki kia bhitile kiá m’ukulu, lelu ki tena ué kubhita.

11. Disá diahi di tua di longo mu musoso ua Zuze?

¹¹ Zuze, phangu iambote phala etu. O muhatu ua Potifale, ua mesenene kiavulu ku bhanga o undumbu ni Zuze. Sumbala Zuze ua ditunine mu veji javulu, maji muéne ua kexile ku mu jijidika. Izuua ioso, ua kexile mu bhinga kua Zuze, phala ‘kuzeka-nê.’ (Dimatekenu 39:7, 8, 10) Saí diiala mukua kutokuesa o Bibidia uambe kuila, o muhatu ua Potifale, ua kexile mu xinganeka kuila, mukonda dia kukala ubheka-uâ, Zuze ueji mu xikina. Zuze ua kolokotele ku mu dituna ni ku mu lenga izuua ioso, ka kexile ué mu mu zongojola. Mu kiki, muéne kehela o jihanji ja iibha kukula ku muxima ué. Kioso o muhatu kia mu kuata ku divunga, ni ku mu jijidika ku bhanga-nê undumbu, ni lusolo luoso, Zuze anga “u mu xila o divunga bhu maku’ê, u lenga, u tunda bhu kanga.”—Dimatekenu 39:12.

12. Kiebhi ki tuejiia kuila, o ima i tu mona i tena ku tu bhangesa ku kala ni jihanji ja iibha ku muxima?

¹² Jezú ua tu tendelesa kuila, o ima i tu mona, i tena ku tu bhangesa kukala ni jihanji ja iibha ja lungu ni undumbu ku muxima. Muéne uambe: “Uoso ngó u tonginina muhatu ni ku mu kuatela luimbi, uate-nê kiá phànda ku muxima uê.” (Matesu 5:28) Kiki kiene kia bhitile ni Sobha Davidi. ‘Mu kuimajana ku thandu dia inzo iê, ua mono muhatu ua kexile mu zóua,’ maji muéne ua suluka ni ku mu tonginina ni ku mu xinganeka. (2 Samuuele 11:2) Sumbala ua kexile muhatu ua ngene, maji Davidi ua mu kuatela luímbi, anga ua te-nê phánda.

13. Mukonda diahi tua tokala ku ta “kikutu” ni mesu metu, ni kiebhi ki tu tena ku bhanga kiki?

¹³ Se tua mesena kudituna o ibanzelu ia iibha, tua tokala kukaiela o phangu ia Jobe. Muéne uambe: “Nga te kikutu ni mesu mami.” (Jobe 31:1, 7, 9) Kala kia bhangele Jobe, etu tu tena ku sola kudituna kukala ni ixinganeku ia iibha, kioso ki tu mona muthu uoso uoso. Se ku komputadolo ietu, ku moneka foto ia lungu ni undumbu, ngolokela ilondekesa o ufusa, mba divulu di tua mu tonginina diala ni jifoto ja ufusa, mba mu kididi kioso kioso, etu tua-nda bhanga ioso phala ku tala kuengi.

14. Ihi i tua tokala o kubhanga, phala kukolokota mu kuzela?

¹⁴ Kioso ki u xinganeka mu ima i tua di longo, nange eie u tena ku mona kuila, ua tokala ku bhanga dingi phala kutolola o jihanji ja iibha. Se u mona kuila, ua tokala kulungulula o muenhu ué, bhanga-kiu ni lusolo luoso! Se u belesela o itendelesu ia Jihova, ua-nda tena ku lenga o undumbu ni ku kolokota kuzela.—Tanga Tiiaku 1:21-25.

15. Se tu mona kuila, kia bhonzo kutolola o jihanji ja iibha, mukonda diahi kima kiambote ku bhinga kikuatekesu?

¹⁵ Se u mona kuila, kia mu ku bhonza ku tolola o jihanji ja iibha ubheka ué, zuela ni muthu mu kilunga uene mu sidivila kia Jihova mu mivu iavulu, u tena ku ku bhana milongi mba itendelesu bhu kaxi ka Mak’â Nzambi. Nange ki ku bhonza ué kuzuela o maka mê ni athu engi, maji kima kiambote ku bhinga kikuatekesu ku akuenu. (Jisabhu 18:1; Jihebeleu 3:12, 13) O Jikidistá a kulu mu nzumbi, a tena ku ku kuatekesa ku mona kiebhi ki ua tokala o kulungulula o ukexilu ua muenhu uê. Mu ku suka-ku, bhanga ioso phala kulungulula o ima i kufidisa kukala ni Ukamba uambote ni Jihova.

16, 17. (a) Kiebhi o tufunga kia tena kukuatekesa o athu a mona kuila, kia a bhonzo kutolola o jihanji ja iibha? Bhana phangu. (b) Mukonda diahi o athu ene mu tala o ufusa a tokala kubhinga kikuatekesu ni lusolo?

¹⁶ Benge benge o tufunga mu kilunga, ene dingi a ala ni unjimu ua ku tu kuatekesa. (Tanga Tiiaku 5:13-15.) Saí muzangala mu ixi ia Brasil, ua kexile mu bhânga ni jihanji ja iibha mu mivu iavulu. Muéne uambe: “Eme nga kijidile kuila, Jihova ua zembele o ixinganeku iami, maji nga kexile ni jisonhi javulu ja kuzuela o ima ienii ni athu engi.” Saí kafunga ua mono kuila, o munzangala iú, ua bhindamene kikuatekesu, anga ua mu suínisa kubhinga kikuatekesu ku tufunga. O munzangala u zuela: “Nga diuana kiavulu ni henda ia londekesa o tufunga, ene a ngi londekesa henda ia dikota, o ia tokalele ndenge. Ene evu o maka mami ni muanhu uoso. Bhu kaxi ka Bibidia a ngi kuatekesa kumona dingi kuila, Jihova ua ngi zolo kiavulu, a sambe ué kumoxi n’eme. Kiki kia ngi kuatekesa ku xikina o itendelesu ia ngi bhana bhu kaxi ka Bibidia.” Kioso kia kolesa o ukamba ué ni Jihova muéne uambe: “Lelu, nga tendela kuila, kima kiambote kubhinga kikuatekesu, mu veji dia kuambata ubheka uetu mba kusueka o maka u tua mu bhita nau.”

¹⁷ Se eie uene mu tala ufusa, ua tokala ku sota kikuatekesu ni lusolo. Se u laleka kiavulu phala kubhinga kikuatekesu, u tena ku di tá mu kiluezu kia kubhanga o undumbu. Mu kiki, ua-nda bhangesa akuenu kudivua kia iibha, ni ku bhangesa ué athu engi ku zuela kia iibha kua Jihova. Athu avulu a bhingi kiá kikuatekesu ku tufunga, ni kuxikina o itendelesu ia bhanene, phala kusangulukisa Jihova ni ku kolokota mu kilunga kiê.—Jisálamu 141:5; Jihebeleu 12:5, 6; Tiiaku 1:15.

18. Ihi i ua mesena kukolokota o kubhanga?

¹⁸ O ufusa ua mu di bandekesa dingi ku mundu ua Satanaji. Maji, o jiselevende ja Jihova ene mu bhanga ioso phala kukolokota kukala ni ixinganeku iambote, ni kukolokota mu kuzela. Jihova u sanguluka kiavulu mu ku mona o Jikidistá jiji. Tu zukame dingi kua Jihova, ni kukaiela o itendelesu i tu sanga mu Maka mê, ni mu kilunga kiê. Mu kubhanga kiki, tua-nda sanguluka kiavulu ni kukala ni kitongoluelu kia zele. (Jisálamu 119:5, 6) Ku hádia, kioso Satanaji kia-nda mu tolola, tua-nda tunga ku mundu uobhe, ua zele ua Nzambi.