KIOSO Anita kia kituka Mbangi ia Jihova, o muadi uê ua kexile ni njinda iavulu.  * (Tala ku luiji.) Muéne ua kexile ku mu fidisa kuia mu iônge, ni ku tumbula o dijina dia Nzambi. Kioso kia kexile ku muivua kutumbula o dijina dia Jihova, muéne ua kexile mu kala ni njinda iavulu.

O muadi ua Anita, ka mesenene ué kuila, muéne u longa o tuana tuâ ia lungu ni Jihova, mba ku a ambata mu iônge. Kiki kia bhonzele phala muéne, mukonda ua tokalele kulonga o tuana mu kasuekele.

Kála kia londekesa o phangu ia Anita, ku muiji u nange ku moneka muthu u ku fidisa kusidivila Jihova. Nange ua mu dibhana ni ibhidi ia mukuá. Nange uene mu kata mu mivu iavulu. Nange o mon’ê, muadi uê, mba muhatu’ê uafu. Mba saí muthu ua kazola ku muiji ua xisa o kilunga kia Jihova. Mu kiki, ihi i u tena ku bhanga phala ku kolokota mu ufiiele uê kua Jihova, kioso ki u dibhana ni maka enhá?

O poxolo Phaulu uambe: ‘Eie ua tokala ku kolokota.’ (Jihebeleu 10:36) Mu kiki, ihi i tena ku ku kuatekesa kukolokota?

Kioso ki u dibhana ni ibhidi, ua tokala ku lembalala kuila, ua bhingi ku dielela kua Jihova phala ku ku kuatekesa kukolokota. Samba mu kubhinga kikuatekesu. Kiene kia bhange Ana, kioso kiafu o muadi uê. O ukaza uâ, ua tenesele kiá 30 a mivu. Ana uambe: “Muéne uendele ku salu, maji ka vutuka dingi ku bhata. Muéne ua kexile ngó ni 52 kia mivu.”

Sumbala Ana ua landukile ni salu iê, maji ua kexile hanji ni ndolo iavulu ku muxima. Ihi ia bhange? Muéne u zuela: “Nga tangela Jihova o ima ioso ia kexile ku muxima uami, nga mu dióndo ué phala ku ngi kuatekesa.” Muéne ua mono kuila, Jihova ua mu kuatekesa, mukonda kioso kia zubha ku samba, ua divu kiambote, ua tululuka. Muéne uambe dingi: “Ngejiia kuila, ku hádia, Jihova ua-nda fukununa o muadi uami.”—Filipe 4:6, 7.

Jihova ua kanena o jiselevende jê kuila, muéne ua-nda kuívua o misambu iâ. (Jisálamu 65:2) Muéne ua-nda ku a bhana o ima ioso ia bhingi, phala ku mu sidivila. Jihova ua-nda ku kuatekesa ku kala fiiele, né muene mu ithangana ia bhonzo.

Jihova u tu kuatekesa ku kolokota mu ukexilu ua mukuá. Muéne ua tu bhana o jiphange jetu mu kilunga. Tu tena ku katula mbote mu ukexilu ua di kuatekesa o jiphange mu Tesalonika, kioso kia kexile ku a zukutisa. Mu kithangana kieniókio, ene a bhingile kukolokota mu ku di suínisa. (1 Tesalonika 2:14; 5:11) Ene a kuatekesa o jiphange jâ ku kolokota mu ufiiele uâ kua Jihova, mu ku diongeka ni kukala ni ukamba mudiâ. Ihi i tua tokala kubhanga phala kukolokota mu ufiiele uetu, kála o jiphange mu Tesalonika?

Tua tokala kubhanga ukamba ni jiphange mu kilunga, ni ku di suínisa, benge benge mu ithangana ia bhonzo. (Loma 14:19) O poxolo Phaulu ua tale hadi mukonda dia izukutisu ni maka a mukuá, maji Jihova ua mu bhana o nguzu phala kukolokota. Mu kifika, Jihova ua suínisa Phaulu bhu kaxi ka jiphange. Ia lungu ni makamba mê, poxolo Phaulu uambe: “A mu ngi konda malamba.” (Kolose 4:10, 11) O jiphange jiji, ja zolele kiavulu Phaulu. Mu kiki, kioso muéne kia bhindamene kikuatekesu, ene a mu kondo o malamba mê, ni ku mu suínisa. Nange u lembalala o kithangana ki uevu o jiphange mu kilunga kiê kuzuela kima, mba kubhanga kima kia ku suínisa.

Jihova ua bhana-ku ué o tufunga mu kilunga. O maiala iá, a tena ku ku suínisa ni ku kubhana itendelesu iambote bhu kaxi ka Bibidia. Ene a ala “kala disuamenu kiza o kitembu, dilengelu kiza o kalêmba, mukua ni jingiji ja menha mu mikáu ia kukuta, uila ue kala kilembeketa kia ditadi dionéne mu ixi ia kikáku, mua kambe o menha.” (Izaia 32:2) Tu sanguluka mu kuijiia kuila, o jiphange jiji, jala polondo phala ku tu kuatekesa. Mu kiki, kioso ki u di bhana ni ibhidi, sota o tufunga. Ene a tena ku ku kuatekesa kukolokota mu kusidivila Jihova.

Mu kidi, o tufunga ka tena kubatula o maka oso u ua mu dibhana nau. Ene akua ituxi ué, kala eie. (Ikalakalu 14:15) Maji u tena ku divua kiambote se u zuela ni kafunga, mu kusuluka, muéne u samba kua Jihova, ni ku mu tangela o maka u ua mu bhita nau. (Tiiaku 5:14, 15) Mu kifika, o tufunga mu ixi ia Itália, a kuatekesa phange uene mu kata mu mivu iavulu. O phange ua zuela: “O henda ia londekesa o jiphange mu ku ngi kunda mu veji javulu, ia ngi kuatekesa kusuína.” Se ua mu dibhana ni ibhidi, Jihova ua mesena kuila, u bhinga kikuatekesu ku tufunga.

Se tu ta o sidivisu ia Jihova ku pholo, Jihova ua-nda tu kuatekesa. Kiki kiene kia bhange John. Kioso kia kexile ni 39 dia mivu, muéne ua kuata uhaxi ua bhonzele ku u saka. Muéne ua divu kuma ka tokalele ku kuata o uhaxi uenhú, mukonda uexile hanji munzangala. Muéne ua thandanganhele ni muhatu’ê, ni mon’ê uexile ngó ni mivu itatu. Muéne uambe: “Muhatu uami ua kexile ni kikalakalu kia kulanga o mon’etu ni eme, ni ku ngi ambata mu inzo ia kusaka ithangana ioso.” Mukonda dia ukexilu ua ku mu saka, muéne ua kexile mu bhuila kiavulu, o divumu dia kexile ué ku mu kata. Maji kuexile dingi maka a mukuá. O Tata ia John ua kexile ué mu kata kiavulu, mu kiki, ua bhingile ué muthu phala ku mu langa.

Ihi ia kuatekesa John ni muiji uê ku dibhana ni maka enhá? Sumbala John ua kexile mu kata, muéne ua bhange ioso phala o muiji uê ku ta o sidivisu ia Jihova ku pholo. Muéne uambe: “Tua kexile múia mu iônge ithangana ioso, semana joso tua kexile mu boka, tua kexile ué mu bhanga o ubhezelu uetu ku muiji ithangana ioso, né muene se kia bhonzele.” John ua mono o valolo ia kukala ni ukamba uambote ni Jihova. Sumbala ku dimatekenu muéne ua divuile kia iibha, anga u kala ni hele, mu kubhita kithangana muéne ua tululuka. Muéne uejidile kuila Jihova ua mu zolo, ni kuila ua mu bhana o nguzu ia bhingile. Se u thandanganha ni kima mba u kala ni hele, Jihova u tena ué ku ku kuatekesa. John uambe: “Jihova u tena ku kusuínisa, kála kia bhangele ni eme.”

Se ua mu dibhana ni ibhidi, lembalala o izuelu ia Phaulu kioso kiambe: ‘Eie ua tokala kukolokota.’ Dielela kua Jihova mu kusamba. Zukama ku jiphange ja kilunga kiê, bhinga kikuatekesu ku tufunga, kolokota ku ta o ubhezelu ua Jihova ku pholo. Muéne ua-nda ku kuatekesa ku dibhana ni ibhidi ioso i ua mu dibhana na-iu kindala, mba ia-nda moneka ku pholo.