O ita ya Alumajedone kifwa o ita yasukinaku yandalwa o jinguvulu ja ngongo ni Nzambi. O jinguvulu jiji ni akwatekexi yâ amulungulukila Nzambi né mwene mu izuwa ya lelu amubhanga kiki mukudituna kubelesela o ungana wê. (Jisálamu 2:2) O ita ya Alumajedone yandazubhidisa o utuminu wa athu.—Daniyele 2:44.

 O kizwelu “Alumajedone” kimoneka ngo lumoxi mu Bibidya mu divulu dya Dijingunwinu 16:16. Mu polofesiya yiyi, o divulu dya Dijingunwinu ditanga kwila “bhu kididi, mu dimi dya Hebalayiku akixana Alumajedone,” “jisobha jatungu mu ngongo yoso” anda “kwabhongolola mu ita ya kizuwa kya dikota kya Nzambi Muteni wa Yoso.”—Dijingunwinu 16:14.

 Nanyi ni nanyi andalwa mu Alumajedone? Jezú Kidistu wandakwendesa kifuxi kya jianju, wanda kwa endesa phala kutolola o jinguma ja Nzambi. (Dijingunwinu 19:11-16, 19-21) Mu jinguma jiji mwandakalamu we yó alungulukila o ungana wa Nzambi anga atalatala Nzambi sé ujitu.—Izekiyele 39:7.

 O kwila o ita ya Alumajedone yandabhita mwene mu Oriente Médio? Kana. Mu veji yakubhita ngo mu kididi kimoxi, o ita ya Alumajedone yandabhita mu ngongo yoso.—Jelemiya 25:32-34; Izekiyele 39:17-20.

 Sayi ithangana o kizwelu Alumajedone, akitumbula we “Halu–Majedone” (mu Hebalayiku Har Meghiddohnʹ), kilombolola “Mulundu wa Mejidu.” Mu mbambe ya Izalayele yokulu Mejidu yexile mbanza. Akwa kutanga misoso atanga kuma mu jimbandu ja Mejidu mwakexile mubhitamu ita yamakota, sayi ni ita yiyi aisoneka mu Bibidya. (Afundixi 5:19, 20; 2 Jisobha 9:27; 23:29) Maji Alumajedone k’itokala kulombolola o kididi kyokulu kya Mejidu kana. Benyobho kibhwale mulundu wa dikota, o kyamukwa, né mwene mu honga yoso ya Jezeleyele ki isoko phala kukalamu o mundu woso wandalwa ni Nzambi. Mu veji dya kiki, Alumajedone kifwa maka ma kwila o atumini a ngongo andadibhongolola mu veji ya sukina phala kulungulukila o utuminu wa Nzambi.

 Kyebhi kyandakala o ima mu kithangana kya ita ya Alumajedone? Sumbala kitwejiya kyebhi Nzambi kyandalondekesa o kutena kwê, maji mwene wandakala ni mauta kala yó wakexile nau mukulu—matadi a mvula, itungutu ya ixi, mvula ya dikota, tubhya ni xofidi, jinzaji ni mauhaxi. (Jobe 38:22, 23; Izekiyele 38:19, 22; Habakuke 3:10, 11; Zakadiya 14:12) Mukonda dya kuthandanganya, amoxi mu jinguma ja Nzambi, andadijibha mudyâ, maji andatena kumona kwila Nzambi mwéne wamubhânga ni ene.—Izekiyele 38:21, 23; Zakadiya 14:13.

 O kwila o Alumajedone o dizubhilu dya mundu? Ki yandakala o dizubhilu dya ixi yetu, mukonda o ixi aibhange phala kukala inzo ya athu katé kuhádya ni hádya. (Jisálamu 37:29; 96:10; Ndongixi 1:4) O Alumajedone ki yanda bwika o athu kana, maji yandakwabhulula mukonda “mundu wavulu” wa jiselevende ja Nzambi wandabhuluka.—Dijingunwinu 7:9, 14; Jisálamu 37:34.

 Maji muveji yakulombolola ngo o ixi, o kizwelu “mundu” mu Bibidya sayi ithangana kilombolola athu aibha alungulukila Nzambi. (1 Nzwá 2:15-17) Mu ukexilu yú, o Alumajedone yandabheka “o dizubhilu dya mundu.”—Matesu 24:3, Almeida, revista e corrigida.

 Thembu kuxi kyandakwiza o Alumajedone? Kyoso kyakexile muzwela yalugu ni “hadi yadikota” yandabhwa mu ita ya Alumajedone, Jezú watange kiki: “Yalungu ni kizuwa kyenyókyo ni kithangana, sé-ku muthu wa kijiya. Né o jianju ku dyulu, né o Mona, maji Tata ngó, wakijiya.” (Matesu 24:21, 36) Maji o Bibidya ki ilondekesa kwila o Alumajedone yandabhita mu kithangana kya kutukuluka mu nzumbi kwa Jezú, kutukuluka kuku kwamateka mu 1914.—Matesu 24:37-39.