Kana, o ixi nuka anda ku ibwika bhukaxi ita mba túbhya. Nuka we anda ku ibhinganesa. O Bibidya ilonga kuma Nzambi wabhange o ixi phala o athu kutungamu katé ku hádya ni hádya.

•   “Ixi-phe ixalela ku athu yá ayuka, ene a ilundula, mwene mwatunga, o thembu yâ ki ibhu.”—Jisálamu 37:29.

•   “[Nzambi] watena kutula madisesa ma’xi katé ya kwata, ki ixikina ku ilundumuna.”—Jisálamu 104:5.

•   ‘O ixi inangenena katé ku hádya ni hádya.’—Ndongixi 1:4.

•   ● “Nzambi watenene kumba oxi, yú wa iyudika; wa ixikika, ka i ʹxya kiphulungunzu kya hatu, kana; wa ibhange phala athu kutungamu.”—Izaya 45:18.

 Nzambi kanda kwebhela kwila, o athu abwika o ixi bhukaxi ka ima kala o kuxidisa o ixi, ita mba ima yengi. Mu kidi Nzambi wanda bwika “yó ene mu bwikisa o ixi.” (Dijingunwinu 11:18) Kyebhi mwene kyanda bhanga kiki?

 Nzambi wanda bhinganesa o utuminu wa athu kene mutena kulanga o ixi, ni kubheka o unguvulu wayuka, wa dyulu. O unguvulu yu, o Utuminu wa Nzambi. (Daniyele 2:44; Matesu 6:9, 10) Jezú, o mana wa Nzambi mwene wanda kala o Sobha ya Utuminu yú. (Izaya 9:6, 7) Kyoso kyexile mu ixi, Jezú wabhange madiwanu walondekesa kwila mwene wala ni kutena kwa kulanga o ibhangelu. (Máluku 4:35-41) Kuma Jezú mwene o Sobha ya Utuminu wa Nzambi, mwene wanda tena kulanga o ixi ni munza. Mwene wanda bhanga ima ya ubhe, yanda kwatekesa o ixi kukala dingi payizu kala kyexile mu njaludim ya Edene.—Matesu 19:28; Luka 23:43.

 Kana, ki kyene kilonga o Bibidya. O athu amateka kubanza kiki, mukonda dya kutendela kyayibha o divulu dya 2 Phetele 3:7. Dyene dyamba: “O dyulu ni ixi yalaku kindala, yobhake phala ku ibwikisa ni túbhya.” Tumone pondo jiyadi jabetakota jitena kutu kwatekesa kutendela kyambote o velusu yiyi.

1.   Mu Bibidya o izwelu “dyulu,” “ixi,” ni “túbhya” itena kulombolola ima yavulu. Mu kifika o divulu dya Dimatekenu 11:1, dyamba: “Ixi yoso anga ikala ni uzwelelu umoxi.” Mu velusu yiyi o kizwelu “ixi,” kilombolola o athu atungile mu thembu yenyoyo.

2.   O milongi mu jivelusu ja dyanga jilondekesa se ihi ilombolola o izwelu dyulu, ixi, ni túbhya, imoneka mu divulu dya 2 Phetele 3:7. O jivelusu 5 ni 6, jizwela yalungu ni Diluvyu mu izuwa ya Nowé. Mu izuwa yenyoyo, athu avulu a abwika, maji o ixi ka ibwika. Mu kidi o “ixi” yobwike kwala o diluvyu, yexile o athu akwâ uswéya. (Dimatekenu 6:11) Nzambi wabwika we o “dyulu” mba o athu ayibha akexile mutumina o mundu mu izuwa yenyoyo. Kyenyiki, o athu ayibha a abwika maji o ixi, kana. Kyoso kya bwika o athu mu diluvyu, Nowé ni mwiji wê abhuluka, anga avwala twana phala ku izalesa dingi o ixi.—Dimatekenu 8:15-18.

 Kala o menya a Dilúvyu, o “túbhya” twotumbule mu divulu dya 2 Phetele 3:7, ki tu lombolola o kibwikilu kya ixi, kana, maji o kibwikilu kya athu ayibha. Nzambi wakanena “maulu ma ubhe ni ixi ya ubhe,” mwenyomo “mwanda kala o kuyuka.” (2 Phetele 3:13) O “ixi ya ubhe,” ilombolola o athu anda tunga mu thembu yenyoyo. Ene anda kwa tumina kwala o “maulu ma ubhe,” mba nguvulu ya ubhe. O unguvulu yu, o Utuminu wa Nzambi wanda bhangesa o ixi yoso kukala Palayizu. Mwenyomo mwanda kala ngó kutululuka.—Dijingunwinu 21:1-4.