Kana. O Bibidya ki izwela kwila o kitadi kima kyayibha. Yene we ki izwela kwila o kitadi kyene kibhekela o ima yayibha yene kumundu. Maji sayi ya amba kwila “o kitadi kyene o lundanji lubhekela o ima yoso yayibha” kiki kikyene kilonga o Bibidya. Mukidi o Bibidya izwela “o kuzola o kitadi kyene o lundanji lubhekela o ima yoso yayibha.” a—1 Timote 6:10, Almeida, atualizada; a ênfase é nossa.

•  Ihi ilonga o Bibidya yalungi ni kitadi?

•  Mukonda dyahi o Bibidya itubhana itendelesu yalungu ni kuzola o kitadi?

•  Mukonda dyahi kima kyambote kukayela o itendelesu ibhana o Bibidya yalungu ni kuzola o kitadi?

•  Jivelesu jizwela yalungu ni kitadi

 O Bibidya izwela kwila o kitadi kitena kubhekela mbote yavulu kumwenyu wa muthu maji se mwene ukala ni kilunji. Mukifika, o Bibidya izwela o kitadi kitena kukala “ki vungina kala kilembeketa.” (Ndongixi 7:12) O Bibidya we, iximana yo azalela akwa, kiki kyalungu we ni yo akwatekesa akwa ni kitadi.—Jisabhu 11:25.

 Maji we, o Bibidya itutendelesa yalungu ni kukala ni lwimbu lwa kitadi. Yene yamba: “Ki mu kale mu akwa lwimbi lwa kitadi, yoso i mwa mono i mi soke.” (Jihebelewu 13:5) Ihi ilombolola o velusu yiyi? Ilombolola kwila twatokala kutala o kitadi mu ukexilu wasoko, kitwatokala kumono o kitadi kala kyene o kima kyabeta dingi kota. Twatokala kusanguluka ni ima itwabhindamena, kala o kudya, izwatu, ni inzo.—1 Timote 6:8.

 O mukwa lwimbi kanda lundula o mwenyu wakalelaku. (Efezu 5:5) Mukonda dyahi? Kyadyanga, mukonda o lwimbi lwasoko ni kubheza iteka, mba ubhezelu wamakutu. (Kolose 3:5) Lwakayadi, mukonda o athu akwa lwimbi atena kubhanga ima yayibha phala kukala ni ima yandala. Jisabhu 28:20 dizwela yo “woso-phe u di sukila kuta jimbongo mu lusolo, kindala u bonga milonga.” O muthu wazolo o kitadi utena kujibha, kuzwela makutu, kunyana ni kubhanga ima yamukwa yayibha.

 Nemwene se o muthu kabhangye o ima yiyi, o lwimbi lwakitadi utena kubhekela maka engi. O Bibidya izwela kwila “o yó amesena kyavulu kukala jimvwama, adibhala mu jitendasá ni mu mibhetu ni mu jihânji javulu jayibha.”—1 Timote 6:9.

 O Bibidya ilonga o ima yazolo Nzambi ni ya mwibhila. Kitwa tokala kubhanga ima yayibha phala kukala ni kitadi. Se o vondadi yetu okubhanga o vondadi ya Nzambi, twanda sanguluka mukwijiya kwila twamubhanga o kima kyatokala. Se tubhanga kiki, Nzambi wanda tena kutukwatekesa. Mwene wakanena: “Eme nuka nganda kuxisa, ki nganda kubwazeka we, kana.” (Jihebelewu 13:5, 6) Mwene we utudyelelesa kwila “Muthu u kala ni kutongoloka, hinu u bonga mabesá ma nzungule.”—Jisabhu 28:20.