Mu kidi o Bibidya ki itumbula o kizwelu “kuseluka” mukuzwela yalungu ni kukatula mu lwelu o mwenyu wa mona wala mu mala a kambe hanji o ku mu vwala. Maji sayi jivelusu mu Bibidya jitena ku tu kwatekesa ku tendela kyebhi o kibanzelu kya Nzambi yalungu ni mwenyu; kate ni mwenyu wa mona mu mala a manya.

 O mwenyu ujitu wa Nzambi. (Dimatekenu 9:6; Jisálamu 36:9) Myenyu yoso yala ni valolo phala mwene, kate mwene o mwenyu wa mona wala hanji mu divumu dya manyá. Kyenyiki, o kukatula o mwenyu wa mona wala hanji mu mala mu lwelu, kwasoko ngó ni kujibha.

 O Kitumu kyabhele Nzambi ku akwa izalayele kyambele kiki: “Hé bhukala mala ala muzoka, anga akwama muhatu wala mu mikutu iyadi, anga ki mu bhangesa kuseluka mona, maji mwene-ku kanemana ni kima, a mu bhakesa mwene mulonga, ubhana kyoso kya mu xindi diyala woso wavu muhatu’ê, ubhaka kala kya mu tetulwila adyakimi. Maji se bhukala kalunga ni kunemana, kwabhu-phe, abhana kyá mwenyu mu mwenyu.”—Makatukilu 21:22, 23. a

•  Kithangana kyebhi kimateka o mwenyu wa muthu?

•  O kwila Nzambi uloloka o muthu waselula kya mona?

•  Abha se o mwenyu wa mama mba wa kabwetele wala mu kilwezu?

 Phala Nzambi o mwenyu wa muthu umateka, kyoso o muhatu wemita. Jivelusu javulu mu Bibidya jilondekesa kwila phala Nzambi o mona wala hanji mu mala a manyá mwene muthu kyá. Tumone ifika ilondekesa kwila phala Nzambi o mwenyu wa mona wala hanji mu mala, wadifwangana ngó ni mwenyu wa kabwetele a muvwala kya.

•   Bhukaxi ka Nzumbi ikola, sobha Davidi wambe kwa Nzambi: “Mesu mé ma ngi mono mukutu wami, kyoso ngó kiluwa u di umba.” (Jisálamu 139:16) Sumbala Davidi kiluwa a mu vwalele, maji Nzambi wexile kya mu mu mona kala muthu.

•   Ande dya polofeta Jelemiya ku muvwala, Nzambi wamesenene kya kumubhana kikalakalu kyakatunda. Nzambi wambe kwa Jelemiya: “Kyoso ngo kiluwa ngi k’umba mu vumu dya mamenu, eme nga kwijiya kya, kyoso we kiluwa ngó utunda mu vumu nga ku lumbu kya, nga kubhana ku akwa jixi kukala umusesedi wá.”—Jelemiya 1:5.

•   O musoneki wa Bibidya Luka, wexile musaki wa tumbula kizwelu kimoxi ngó mu dimi dya Ngeleku phala kulombolola o mona wala mu vumu dya manya ni kabwetele a muvwala kya.—Luka 1:41; 2:12, 16.

 Woso waselulula kya mona, Nzambi utena kumuloloka. Se o muthu uxikina kya o ukexilu wa Nzambi wakutala o mwenyu, mwene katokala dingi kuditatela mu ima yabhangele mu ukulu.“Jihova walenduka, mukwa kisambu . . . tunde kuthund’èlele katé ku mazanga, mukwâ ni dikanga dya texe o ikuma yetu.” b (Jisálamu 103:8-12) Jihova uloloka o athu oso adyela o ituxi yatele mu ukulu, kate mwene o kituxi kya kuselula.—Jisálamu 86:5.

 Kala kyambe o Bibidya yalungu ni mwenyu wa kabwetele wala hanji mu mala a manya, ne kiki kituxi o kuseluka o mwenyu wa mona, ne se o sawidi ya mama mba ya kabwetele yala mu kilwezu.

 Sayi bhabha kumoneka ibhidi, kyenyiki o athu abhingi kusola se anda bhulula o mwenyu wa mama mba wa kabwetele. Se kiki kibhita, o athu abhingi kusola se anda bhulula nanyi.