ҺӘРГЕ ТӦ жи рʹасти ԛәзийа һатийи, те бькарьби фәʹм бьки ԝан мәрийа, йед кӧ дькʹәвьнә һʹаләки ӧса мәсәлә ча: дьлтәнги, хальфандьн, бәрхԝәкʹәтьн. Гәләк мәрьвед ӧса, ԛӧдум дькʹәвьн у ида нахԝазьн бьжин.

Һәрге тә жи һʹәму тьшт жь бо ԛәзийе ӧнда кьрийә, дьԛәԝьмә тӧ дьфькьри ԝәки ида нькари тәйах ки. Йан жи дьбә тӧ дәстпеки бьфькьри, ԝәки нә жи һежа йә бьжийи. Чь жи һәбә, Кʹьтеба Пироз дьбежә, ԝәки һежа йә тӧ бьжийи, чьмки ахьрийа баш һивийа тә йә.

Ԝаиз 7:8 дьбежә: «Даԝийа тьштәки жь дәстпека ԝе ԛәнщтьр ә». Чахе тӧ паши ԛәзийе йан хәзәба, дәстпедьки бейи сәр һʹьше хԝә, дькарә тәва ӧса бе кʹьфше, кӧ жийина тә ида кери тьштәки найе. Ле гава тӧ сәбьр дьки у ԛәԝате дьди хәбате ԝәки алийе хԝә бьки, һʹале тә дькарә баш бә.

Кʹьтеба Пироз пʹехәмбәртийе дькә дәрһәԛа ԝи ԝәхти, гава «еди ԝе . . . дәнге гьри у дәнге фәрйаде нәйен бьһистьн» (Ишайа 65:19). Әв тьштәкә реали йә, чьмки бьн сәрԝертийа Пʹадшатийа Хԝәдеда әʹрд ԝе бьбә щьнәт (Зәбур 37:11, 29). Ԛәзи у хәзәб ԝе ида тʹӧнә бьн. Һʹәму щурʹә дәрд у кӧл ԝе бира мә һәрʹьн, чьмки Хԝәдайе Һьмзор соз дьдә: «Ԝе биранина тьштен бәре нәйен кьрьн у нәйен рамане» (Ишайа 65:17).

Бьдә һʹәсабе хԝә, ԝәки хԝәха Әʹфьрандаре мә чь дьбежә: «Һевийе у ахьрийа баш бьдьмә ԝә», демәк жийина бәхтәԝар, бьн сәрԝертийа Пʹадшатийа Хԝәде (Йерәмйа 29:11). Занәбуна ве йәке дькарә али мә бькә, кӧ нета жийина мә һәбә. Сали, дәрһәԛа кʹижане кӧ готара пешьнда һатьбу готьне, дьбежә: «Чахе дьди бәр чʹәʹве хԝә һʹәму тьштед баш, кӧ Пʹадшатийа Хԝәде ль ахьрийе ԝе бона мә бькә, әв йәк али мә дькә тәйах кьн у гәләк дина хԝә нәдьн тьштед хьраб кӧ жийина мәда дьԛәԝьмьн».

Ԝе баш бә кӧ һе зедә пебьһʹәси, һәла Пʹадшатийа Хԝәде зутьрәке ԝе чь бькә бона инсанәте. Һәрге тӧ ӧса бьки, те бькарьби нава чәтьнайед хԝәда, хԝә ԛайим бьгьри, чьмки ахьрийа гәләк баш һивийа тә йә. Ле ида ньһа Кʹьтеба Пироз рʹебәрийа керһати дьдә, чь кӧ ԝе али тә бькә тәйах ки. Ԝәрә әм чәнд мәсәла шеԝьр кьн.