Мьрьн ԝе Ча бе Һьлдане?
ЖЬ БО НӘҐӦҺДАРИЙА дә-баве мәйи пешьн Адәм у Һеԝайе, тʹәмамийа инсанәте буйә диле гӧнә у мьрьне, ле йәкә ԛьрара Хԝәде бона мәрийа нәһатийә гӧһастьне. Хԝәде бь Хәбәра хԝә, ве йәкеда мә дьдә баԝәркьрьне.
-
«Рʹасте ль әʹрде ԝар бьн у һәр-һәйе ԝе сәр бьжин» (Зәбур 37:29).
-
«Абадин мьрьне даԛӧртанд у Хӧдан, ХӦДАН, ԝе жь һʹәму ԝәщан [рʹуйе мәрийа] һестьрен чʹаван паԛьж бькә» (Ишайа 25:8).
-
«Дьжмьне хьлазийе кӧ ԝе к′оке ле бинә, мьрьн хԝәха йә» (1 Корьнтʹи 15:26).
-
«Иди мьрьне т′ӧнәбә, нә шин, нә гьри, нә еш-ешук» (Әʹйанти 21:4).
Гәло Хԝәде ԝе чаԝа мьрьне бьдә һьлданә? Кʹьтеба Пироз зәлал дьбежә: «Рʹасте һәр-һәйе ԝе . . . бьжин». Ле әԝ ӧса жи дьбежә, «ль рʹуйе әʹрде зьламе сальһ тʹӧнәйә кӧ, һәртʹьм ԛәнщийе бькә» (Ԝаиз 7:20). Гәло әв те һʹәсабе, кӧ Хԝәде мьԛабьли гьлийед хԝә дәрте у әԝе ида жь мәрийа дәʹԝа нәкә, ԝәки әԝана хԝә ль нормед ԝи бьгьрьн, кӧ бькарьбьн һʹәта-һʹәтайе бьжин? Әԝ ԝе тʹӧ щар ӧса нәкә, чьмки Әԝ «дәрәԝан накә» (Тито 1:2, ИМ). Демәк, Хԝәде ԝе чь бькә, кӧ ԛьрара хԝә дәрһәԛа инсанәте бинә сери?
ХԜӘДЕ ԜЕ МЬРЬНЕ БЬДӘ ҺЬЛДАНЕ (ИШАЙА 25:8).
БЬ САЙА КʹЬРʹИНЕ, АЗАБУН ЖЬ ДИЛТИЙА МЬРЬНЕ
Йаһоԝа Хԝәде бь һʹьзкьрьн тьштәкә ӧса дайә инсанәте, чь кӧ дькарә мә жь мьрьне хьлаз кә. Әԝ һәйә кʹьрʹин. Нета хәбәра кʹьрин әԝ ә, чахе бәрделийа ԝәк һәв те дайине, кʹижан кӧ дькарә һәԛе зьрарәке йан дәйнәки дадә. Һәр кәс жь мә гӧнәкʹар ә у нькарә жь мьрьне бьрʹәвә. Кʹьтеба Пироз дьбежә: «Тʹӧ кәс бь тʹӧ аԝайи нькарә бьрайе хԝә рʹьзгар бькә у бәрдела ԝи бьдә Хԝәда» (Зәбур 49:7).
Чахе мәрьве ԛьсур дьмьрә, пе мьрьна хԝә әԝ тʹәне һәԛе гӧнед хԝә дьдә; әԝ нькарә нә хԝә, нә жи кәсәки дьн жь гӧнәкʹарийе у мьрьне аза кә (Рʹомайи 6:7). Әм һʹәԝще кәсәки ӧса бун, кʹижан кӧ бе гӧнә у кʹамьл буйа, кӧ әʹмьре хԝә сәва гӧнед мә бьда (Ибрани 10:1-4).
Хԝәде хут дәрһәԛа ве йәке хәм кьр. Әԝи кӧрʹе хԝә Иса жь әʹзмен шандә сәр әʹрде, ԝәки әԝ мина мәрьвәки кʹамьл у бе гӧнә бе буйине (1 Пәтрус 2:22). Иса гот кӧ әԝ һатә сәр әʹрде, сәва «ә′мьре хԝә бьдә, кӧ гәләка бьк′ьр′ә» (Марԛос 10:45). Иса мьр, сәва кӧ һәԛә гӧне мә бьдә у жь дилтийа мьрьне мә аза кә (Йуһʹәнна 3:16).
МЬРЬН ԜЕ ЧЬ ЧАХ БЕ ҺЬЛДАНЕ?
Иро пʹехәмбәртийа Кʹьтеба Пироз те сери, чьмки «зәманед хьраб» һатьнә, чь кӧ избат дькә, ԝәки әм «рожед ахьрийеда» дьжин (2 Тимотʹейо 3:1). Рʹожед ахьрийе «бона Р′ожа Ахрәте тенә һьштьне, к′ижанеда мәрьвед нәп′ак ԝе ӧнда бьн һәр′ьн» (2 Пәтрус 3:3, 7). Ле мәрьвед кӧ Хԝәде һʹьз дькьн, ԝе бенә хьлазкьрьне у бь «жийина һ′әта-һ′әтайе» бенә кʹәрәм кьрьне (Мәтта 25:46).
Иса һат, ԝәки «ә′мьре хԝә бьдә, кӧ гәләка бьк′ьр′ә» (Марԛос 10:45).
Бь милйона мәрьвед дьн кӧ бенә сахкьрьне, ԝе әԝана жи жийина һәрһәйи бьстиньн. Чахе Иса бажаре Найинеда кӧрʹе жьнәбийе, кӧ тайе-тʹәне бу жь мьрьне рʹакьр, ӧса әԝи избат кьр, ԝәки сахкьрьн тьштәкә реали йә. Кʹьтеба Пироз дьбежә, ԝәки Иса гӧне хԝә ле ани, лавьк жь мьрьне рʹакьр (Луԛа 7:11-15). Паԝлосе шанди гот кӧ сахкьрьна «йен рʹаст у нәрʹаст» ԝе һәбә, «әв һевийа мьн жи жь Хԝәде һәйә». Әԝ һевийа ԛайим дьдә кʹьфше, ԝәки Хԝәде чьԛас мәрийа һʹьз дькә (Кʹаред Шандийа 24:15, ИМ).
Бь милйона мәрьв һʹьзрәта ԝе йәке нә, ԝәки һәрһәйи бьжин. Кʹьтеба Пироз дьбежә: «Йен раст ԝәлат мирас дьстиньн, һәр у һәр ль ԝе дәре рʹудьньн» (Зәбур 37:29). Ԝи чахи әԝана ԝе пʹьрʹ бәхтәԝар бьн у ләзәте бьвиньн, гава бь чʹәʹве хԝә бьвиньн чаԝа гьлийе Паԝлос кʹижан кӧ әԝи ԝәкә 2 000 сал пешда ньвисибу тенә сери: «Мьрьн, к′ане ԛиле жә′ра тә? Мьрьн, к′ане сәрк′әтьна тә?» (1 Корьнтʹи 15:55). Дьжмьне инсанәте, йане мьрьн ве бь тʹәмами бе кʹӧтакьрьне.