Зәйнәб, дәрһәԛа кʹижани кӧ дь готара пешьнда һатьбу гьликьрьне, тʹәхмин кьр кӧ жь бо хәмгинийа хԝә, әԝ дәстпекьр гәләк ичке вәхԝә. Һәмьки Кʹьтеба Пироз сущдар накә кӧ ичке вәхԝьн, ле әԝ дьбежә: «Нәчә нава вәхԝарийа» (Мәтʹәлок 23:20). Нәрʹаст хәбьтандьна ичке дькарә проблемед мәзьн бьдә сьһʹәт-ԛәԝате, һәләԛәти тʹәви мәрийа дькарә зийан кә у хьраб кә. Жь бо гәләк ичкәвәхԝарьне, һәр сал бь милйона мәрьв дьмьрьн. Мәрьв дькарьбун жь гәләк проблемед ӧса хԝә хԝәйкьрана, һәрге гӧһ бьдана ширәта Кʹьтеба Пироз.

Зәйнәб һәма ӧса жи кьр. Әԝ дьбежә: «Мьн фәʹм кьр, кӧ ичкә нькарә хәмгинийа мьн бьтәмьринә у проблемед мьн сафи кә. Мьн да хәбате гьлийе жь Филипи 4:6, 7, кʹидәре кӧ те готьне: ‹Бона тʹӧ тьшти хәм нәкьн› у бьра дәрде дьле ԝә ‹Хԝәдева әʹйан бә›. Һәр шәв чахе фькьред нәбаш у хәмгини әз зәʹфт дькьрьм, мьн Йаһоԝарʹа дӧа дькьр. Мьн һʹәму һʹәстед хԝә ԝирʹа вәдькьр, ӧса жи һерса хԝә, еш у дьлтәнгийа хԝә. Мьн ԝирʹа дӧа дькьр, кӧ али мьн бькә һе баш хԝә тʹәхмин кьм. Рʹожа дьн сьбәтьре, мьн тедәрхьст кӧ һәстед ви щурʹәйи щәм мьн ида тʹӧнә бун. Әз һини дӧакьрьне дьбум у әв йәк али мьн дькьр дина хԝә бьдьмә ве йәке, чь кӧ ньһа щәм мьн һәйә, нә кӧ чь щәм мьн тʹӧнә. Мьн сафи кьр ида тʹӧ щар ичʹке вәнәхԝьм. Әв әʹдьлайа кӧ мьн ԛазанч кьрьбу ӧса ԛимәт бу бона мьн, кӧ мьн нәдьхԝәст диса әв ӧнда кьм».

Бенамуси гәләк проблем пешда тинә, мәсәлә дьлтәнги у бебәхти. Ле принсипед Кʹьтеба Пироз дькарьн али мә бькьн жь проблемед ви щурʹәйи хԝә хьлаз кьн у жь сәбәбед кӧ әԝан проблема пешда тиньн. Мәсәлә флирт у порнографйа. Хортәки щаһьл бь наве Самуйел дьбежә: «Флирт бона мьн бу тьштәкә тʹәбйәти. Щарна әз нахԝазьм әве йәке бькьм, ле чахе әз тʹәхмин дькьм кӧ йәке хԝәш тем, һьнге һʹәԝас ә бькʹәвьмә флирте». Самуйел нәһәԛ кьрьн дь ве йәкеда, кӧ әв гәләк щара дькʹәтә флирте, ле бь рʹасти һьнә дәрәщәда әԝ нә жи дьхԝәст ӧса бькә. Ахьр Самуйел нәсәкьни у ида әʹйнатара дькʹәтә флирте. Әв бьбу ԝирʹа хәйсәт, жь бо чь жи әԝ паше дьлтәнг дьбу. Әԝ дьбежә: «Әв тьштәкә зийан ә, чьмки хԝәһʹьзийе пешда тинә».

Самуйел хԝәнд готара бона щаһьла, йе кӧ ль сәр малпәра жԝ.орг һатьбу данине. У әԝ фькьри сәр Мәтʹәлок 20:11, кʹидәре кӧ те готьне: «Һʹәта ԛәнщи йан хьрабийа хәйсәте зарʹе жи бь кьред ԝи кʹьфш дьбьн». Чаԝа әв йәк али ԝи кьр? Самуйел фәʹм кьр, кӧ флирта ԝи һʹәрам у нәрʹаст бу. Ньһа әԝ дьбежә: «Мьн ӧса жи фәʹм кьр, ԝәки щаһьлед кӧ дькʹәвнә флирте, хәйсәтед нәбаш нав хԝәда пешда тиньн, жь бо чь жи ль ахьрийе әԝана дь зәԝащеда жи дьбьнә һәвалпʹарәки хьраб. Мьн дәстпекьр бьфькьрьм, кӧ чаԝа жьна мьнә ахьрийе, ԝе хԝә тʹәхмин кә, һәрге бьвинә кӧ әз тʹәви кʹӧлфәтәки дькʹәвмә флирте. Мьн фәʹм кьр ԝәки әв хәйсәт дькарә зийане бинә. Рʹаст ә һеса йә бькʹәвьнә флирте, ле әв найе һʹәсабе кӧ әв йәк рʹаст ә». Самуйел һатә гӧһастьне. Әв жь флирте хԝә дур гьрт у әв йәк али ԝи кьр жь бенамусийе жи хԝә хԝәй кә.

Һʹале Антонио һе хьраб бу у әв дькарьбу һеса бькʹәта бенамусийе. Әԝ порнографийайева гьредайи бу. Рʹаст ә әԝ зәԝьщи бу сәр кʹӧлфәте, кʹижани кӧ пʹьрʹ һʹьз дькьр, ле әԝи тедәрхьст, ԝәки диса у диса дькʹәвә бьн тʹәлька порнографийайе. Әԝ гот кӧ дьфькьри сәр 1 Пәтрус 5:8, чь кӧ бь рʹасти али ԝи кьр. Ль вьр ньвисар ә: «Сәрԝахт бьн, һʹьшйар бьминьн! Мирещьне нәйаре ԝә мина шер мьрʹә-мьрʹа ԝи йә, дьгәрʹә кʹа кʹе һʹуфи хԝә кә». Антонио дьбежә: «Әва дьнйа, дәр-дора мә бь шькьлед порнографийайе тʹьжә йә, у әв шькьл дькарьн кʹур бькʹәвнә һʹьше мә. Әв рʹез бь рʹасти жи али мьн кьр бьфькьрьм дәрһәԛа канийа ԝан щерʹьбандьна. Әз һин бум дәрбера бькьмә бира хԝә, кӧ әԝ шькьл жь Мире-щьна йә. Ньһа әз заньм, ԝәки тʹәне Йаһоԝа дькарә али мьн бькә, ‹һʹәстед хԝә бьгьрьм, у сәрԝахт бьм›, сәва кӧ бькарьбьм һʹьше хԝә, дьле хԝә у зәԝаща хԝә контрол бькьм». Антонио, аликʹарийа лазьм станд, у ахьрийе әԝи әв хәйсәте хԝәйә хьраб тʹәрьканд. Әв йәк һәмьки али ԝи кьр, кӧ жь проблемед гьран жи хԝә дур бьгьрә.

Зәлал ә, кӧ Кʹьтеба Пироз ширәте керһати дьдә, чь кӧ дькарә али мә бькә жь проблемед гьран хԝә хьлаз кьн. Ле чь әм дькарьн бежьн дәрһәԛа проблемед кӧ ида кʹӧр рʹуньштьнә у кʹьфш ә кӧ ԛә жь ԝан ида хьлаз нәбьн? Ԝәрен әм бьньһерʹьн кӧ чаԝа Хәбәра Хԝәде дькарә али мә бькә әв пьрсед чәтьн сафи кьн.