1. Кʹижан ә һʹӧнӧрәки Исайи баш, кӧ мә дьлгәрм дькә? Шьровәкьн.

ГАВА әм жь бо гӧнәкʹарийа хԝә рʹасти чәтьнайа тен, әм заньн ԝәки Иса рʹьнд мә фәʹм дькә у әм гәләк дьлгәрм дьбьн. Чахе Иса сәр әʹрде бу, әԝ «тʹәви йед ша дьбьн» ша дьбу у «тʹәви йед дьгьрин» дьгьрийа (Рʹом. 12:15). Мәсәлә, чахе 70 шагьрт ша вәгәрʹийан, чьмки хьзмәтийа ԝана рʹьнд дәрбаз бьбу, һьнге Иса «бь рʹӧһʹе пироз ша бу» (Луԛа 10:17-21). Ле щарәкә дьн чахе Иса дит кӧ мьрьна Лазар мәрьвед ԝийи незикрʹа дәрдәки чьԛас мәзьн анийә, «кʹәсәра кʹур һате у дьле ԝи ешийа» (Йуһʹн. 11:33).

2. Чь али Иса кьр ԝәки һьндава мәрьва дьлшәԝат бә?

² Ле чаԝа мәрьве беԛьсур, дькарьбу һьндава мәрьвед гӧнәкʹарда ӧса рʹәʹм у дьлшәԝат бә? Бәре әʹԝльн, Иса мәрьв һʹьз дькьрьн. Чаԝа мә готара пешийа ԝеда гот, әшԛа Иса «әԝләдед инсен бу» (Мәтʹлк. 8:31). Һʹьзкьрьн һьндава мәрьва ԝи һелан дькьр, ԝәки хәйсәт у фькьред мәрьва бьзаньбә. Йуһʹәннайе шанди гот, ԝәки Иса «дьле мәрьва заньбу» (Йуһʹн. 2:25). Иса һьндава мәрьвада гәләк рʹәʹм бу, ләма жи ԝана һʹьзкьрьна ԝи һьндава хԝәда тʹәхмин дькьрьн у гӧһ дьданә мьзгинийа Пʹадшатийе. Әм жи чьԛас һе зедә дьлшәԝат бьн, һаԛас һе зедә мәрьв ԝе гӧһ бьдьнә мьзгинийа мә (2 Тимтʹ. 4:5).

3-4. а) Һәрге әм дьлшәԝат бьн, әме ча сәр хьзмәтийа хԝә бьньһерʹьн? б) Әме ве готареда дәрһәԛа чь шеԝьр кьн?

³ Паԝлосе шанди заньбу кӧ әԝ борщдар ә мьзгинийе бәла кә, у әԝ борщдари сәр мә йә жи (1 Корн. 9:16). Ле һәрге әм дьлшәԝат ьн, әме хьзмәтийа хԝә нә тʹәне ча борщдари һʹәсаб кьн, ле әме ӧса жи бона мәрьва хәм бькьн у бьхԝазьн али ԝан бькьн. Әм Кʹьтеба Пирозда дьхуньн кӧ «хԝәзи ль дайийа, нә кӧ ль стандийа» (Кʹар. Шанд. 20:35). Һәрге әм хьзмәт дькьн чьмки дьхԝазьн али мәрьва бькьн,  һьнге әме жь хьзмәтийа хԝә һе зедә шабуне бьстиньн.

⁴ Ве готареда әме шеԝьр кьн чаԝа хьзмәтийеда дьлшәԝатийе бьдьнә кʹьфше. Пешийе әме пебьһʹәсьн, ԝәки Иса ча бу һьндава мәрьва у әм жь ԝи чь дькарьн һин бьн. Паше әме шеԝьр кьн чар дәрәща, кʹижанада әм дькарьн чʹәʹв бьдьнә Иса (1 Пәт. 2:21).

5-6. а) Иса һьндава кʹеда дьлшәԝат бу? б) Чаԝа Ишайа 61:1, 2-да һатә пʹехәмбәртикьрьне, чьрʹа Иса гӧне хԝә ԝан мәрьва дьани, кʹижанарʹа мьзгини гьли дькьр?

⁵ Дина хԝә бьдьне, Иса ча шәԝат бу һьндава мәрьва. Щарәке, Иса у шагьртед ԝи гәләк ԝәстийайи бун, чьмки гәләк хьзмәт кьрьбун, ле ԛә һеса нәбьбун. Ԝана һәла һе жи «мәщал нәдьдит кӧ нане хԝә жи бьхԝарана». Ләма Иса шагьртед хԝә бьрә «щики хәԝлә», сәва һьнәки рʹьһʹәт бьн. Ле әʹлаләта мәзьн пешийа Иса у шагьртед ԝи чу ԝедәре. Гава Иса әԝ әʹлаләт ԝедәре дит, гәло әԝи ча хԝә да кʹьфше? Һьнге «гӧне ԝи ль ԝан һат, * чьмки әԝ мина пәзед бе шьван бун». У әԝи «дәстпекьр гәләк тьшт әԝ һин кьрьн» (Марԛ. 6:30-34).

⁶ Дина хԝә бьдьне, мәʹни чь бу кӧ гӧне Иса ль ԝан мәрьва һат. Әԝи дит ԝәки әԝ мәрьв «мина пәзед бе шьван бун». Дьбәкә Иса дит кӧ һьнәк жь ԝан кʹәсиб ьн у хәбата гьран дькьн сәва әʹбура нәфәред хԝә бькьн. Һьнәк жи дьбәкә дьлшкәсти бун, чьмки мәрьвед хԝәйи незик ӧнда кьрьбун. Һәрге бь рʹасти нава ԝан мәрьвада йед ӧса һәбун, Иса дькарьбу ԝана рʹьнд фәʹм кьра, чьмки ча мә готара дьнда гот, әԝ хԝәха рʹасти чәтьнайед ӧса дьһат. Иса бона ԝан мәрьва хәм дькьр, у әԝи бь дьл дьхԝәст дьлбинийе бьдә ԝан. (Бьхунә Ишайа 61:1, 2.)

7. Чаԝа әм дькарьн чʹәʹв бьдьнә Иса?

⁷ Әм жь мәсәла Иса чь һин дьбьн?  Дор бәре мә жи мәрьв «мина пәзед бе шьван» ьн у гәләк проблемед ԝан һәнә. Ԝанрʹа лазьм ә әԝ йәк, чь кӧ бал мә һәйә, демәк мьзгинийа Пʹадшатийе (Әʹйан. 14:6). Ләма әм чʹәʹв дьдьнә Ахайе хԝә, кӧ әм ԝанрʹа мьзгинийе бәла дькьн, чьмки дьле мә сәр «бетʹаԛәт у кʹәсиба дьшәԝьтә» (Зәб. 72:13). Гӧне мә ԝан мәрьва те, у әм дьхԝазьн чьԛас дькарьн али ԝан бькьн.

8. Чь щурʹәйи әм дькарьн хьзмәтийеда шәԝат бьн һьндава мәрьвада? Мәсәле биньн.

⁸ Чь дькарә али мә бькә, ԝәки һьндава ԝан мәрьвада дьлшәԝат бьн, йед кӧ хьзмәтийеда рʹасти мә тен? Әм гәрәке хԝә дайньн дәԝса ԝан мәрьва у һьндава ԝанда ӧса бьн, чаԝа мәйе бьхԝәста һьндава мәда буна * (Мәт. 7:12). Дина хԝә бьдьне, кʹижан чар дәрәщада әм дькарьн ве йәке бькьн. Йа пешьн, дина хԝә бьдьнә һʹәԝще һәр кәси башԛә. Чахе әм мьзгинийе бәла дькьн, шьхӧле мә мина шьхӧле һʹәким ә. Һʹәким дина хԝә дьдә һʹәԝще һәр кәси башԛә. Әԝ пьрса дьдә йе нәхԝәш у рʹьнд гӧһ дьдә ԝи, чахе әԝ дәрһәԛа симптомед сьһʹәт-ԛәԝата хԝә гьли дькә. Һʹәким тʹӧ щар дәрберʹа жерʹа дәрман наньвисә, ле әԝ пешийе леколин дькә сәва тедәрхә еша ԝи чь йә, у тʹәне паши ве йәке жерʹа ԝи дәрмани дьньвисә, кӧ жерʹа лазьм ә. Мина ве йәке, әм жи хьзмәтийеда гәрәке һьндава һʹәмуйа методәке нәдьнә хәбате, ле дәԝсе һьлдьн һʹәсаб дәрәщә у ньһерʹандьнед һәр кәси башԛә.

9. Чахе хьзмәтийеда рʹасти мәрьва тен, әм гәрәке чь нәфькьрьн?

⁹ Чахе һун хьзмәтийеда рʹасти кәсәки тен, нәфькьрьн ԝәки һун дәрәща ԝи мәрьви йан жи баԝәрийа ԝи заньн, у чьрʹа әԝ ве йәке баԝәр дькә (Мәтʹлк. 18:13). Дәԝса ве йәке, пьрса бьдьнә ԝи сәва дәрһәԛа ԝи у баԝәрийа ԝи тьштәки пебьһʹәсьн (Мәтʹлк. 20:5). Мәсәлә, пьрса бьдьнә мәрьва дәрһәԛа хәбат, малбәт, әʹмьре ԝан у ньһерʹандьна ԝан, һәрге әԝ йәк нав мьләте ԝәда щайиз ә. Чахе әм мәрьва дьдьн хәбәрдане, ԝи щурʹәйи әм дьһельн, ԝәки әԝана мәрʹа бежьн, кӧ чьрʹа әԝана һʹәԝще мьзгинийе нә. Чахе әм дәрһәԛа ԝана һьнәки заньн, әм ида һʹәԝщед ԝан фәʹм дькьн у дькарьн аликʹарийе бьдьнә ԝан, чаԝа кӧ Иса али мәрьва дькьр (Бәрамбәр кьн 1 Корьнтʹи 9:19-23).

10-11. Анәгори 2 Корьнтʹи 4:7, 8, диса ча әм дькарьн хьзмәтийеда дьлшәԝатийе бьдьнә кʹьфше? Мәсәле биньн.

¹⁰ Йа дӧда, бьдьнә бәр чʹәʹве хԝә кӧ мәрьв ча дьжи. Бь рʹасти әм дькарьн мәрьва гәләк тьштада фәʹм кьн. Нә әм жи мина ԝан гӧнәкʹар ьн у рʹасти чәтьнайа тен (1 Корн. 10:13). Әм заньн кӧ жийин ве  дьнйайеда чьԛас чәтьн ә. Әм тʹәне пе аликʹарийа Йаһоԝа сәбьр дькьн у ԛәԝи дьминьн. (Бьхунә 2 Корьнтʹи 4:7, 8.) Ле ньһа бьфькьрьн ԝәки әԝ мәрьвед кӧ Йаһоԝа нас накьн, ве дьнйайеда бей аликʹарийа ԝи ча дьжин. Мина Иса, дьле мә жи бона ԝан дьшәԝьтә, у әм дьхԝазьн «мьзгинийа ԛәнщийе» ԝанрʹа гьли кьн (Иша. 52:7).

¹¹ Дина хԝә бьдьнә мәсәла бьраки, кӧ наве ԝи Сергей йә. Пешийа кӧ әԝ рʹастийе пебьһʹәсийа, гәләк шәрмокә бу у һьндьк хәбәр дьда. Жерʹа чәтьн бу тʹәви мәрьва хәбәр дә у фькьред хԝә бежә. Ԝәʹдә дәрбаз бу, Сергей дәстпекьр Кʹьтеба Пироз һин бә. Әԝ дьбежә: «Чахе әз Кʹьтеба Пироз һин дьбум, әз пеһʹәсийам кӧ Мәсиһи борщдар ьн дәрһәԛа баԝәрийа хԝә мәрьварʹа гьли кьн. Һʹәлал бежьм әз нә жи дьфькьрим, ԝәки әзе бькарьбьн ве йәке бькьм». Ле әԝ дьфькьри дәрһәԛа ԝан мәрьва, йед кӧ дәрһәԛа рʹастийе нәбьһистьбун, у әԝи дьда бәр чʹәʹве хԝә, кӧ әʹмьре ԝан бей Йаһоԝа чь щурʹәйи йә. Әԝ гьли дькә: «Әз гәләк бәхтәԝар бум у дьле мьн рʹьһʹәт бу чахе әз тьштед тʹәзә пеһʹәсийам. Мьн фәʹм дькьр кӧ мәрьвед дьн жи гәрәке әԝан рʹастийа пебьһʹәсьн». Сергей нав хԝәда һе зедә дьлшәԝати пешда ани, у әԝи тедәрхьст, ԝәки мерхасийа ԝи һе зедә бу сәва мьзгинийе бәла кә. Сергей дьбежә: «Әз нә жи дьфькьрим, ԝәки чахе мәрьварʹа дәрһәԛа Кʹьтеба Пироз гьли кьм, әзе һе зедә хԝәда баԝәр бьм у мерхас бьм. Хенщи ве йәке, баԝәрийа мьн жи һе зедә ԛәԝи бу». *

12-13. Чьрʹа әм гәрәке бь сәбьр бьн һьндава ԝанда, тʹәви кʹижана әм һинбуне дәрбаз дькьн? Мәсәле биньн.

¹² Йа сьсийа, һьндава ԝанда бь сәбьр бьн, тʹәви кʹижана һинбуна Кʹьтеба Пироз дәрбаз дькьн. Бир нәкьн, кӧ әԝ мәрьв дьбәкә һьнә рʹастийед Кʹьтеба Пироз рʹьнд ньзаньн йан жи ԛә ньзаньн. Ле гәләк мәрьв баԝәрийа хԝә һʹьз дькьн у әԝ  йәк кʹур нав ԝанда рʹуньштийә. Әԝана һʹәсаб дькьн, ԝәки баԝәрийа ԝан йәктийе дькә нава малбәт, мьләт у мәрьвед ԝан. Ле ча әм дькарьн али ԝан бькьн?

¹³ Бьфькьрьн дәрһәԛа ве мәсәле: Чь дьԛәԝьмә чахе пʹьра кәвьн хьраб дьбә у гәрәке бе гӧһастьне? Гәләк щар, һʹәта кӧ йа тʹәзә бе авакьрьне, йа кәвьн һәла һе те хәбьтандьне. У гава ида йа тʹәзә ава дьбә, йа кәвьн ида дьдьн һьлдане. Мина ве йәке, әм жи һʹәта кӧ мәрьварʹа бежьн, ԝәки баԝәрийа хԝәйә «кәвьн» кӧ гәләк ԛимәт дькьн, бьтʹәрькиньн, әм пешийе гәрәке али ԝан бькьн пебьһʹәсьн у һʹьз кьн рʹастийед «тʹәзә», кʹижан кӧ әԝана ньзаньн. Тʹәне паши ве йәке әԝана ԝе һазьр бьн бьтʹәрькиньн баԝәрийа хԝәйә бәре. Сәва мәрьв ԝан гӧһастьна бькә, ԝәʹдә лазьм ә (Рʹом. 12:2).

14-15. Ча әм дькарьн али ԝан мәрьва бькьн, йед кӧ дәрһәԛа жийина һʹәта-һʹәтайе ньзаньн йан жи кем заньн? Мәсәле биньн.

¹⁴ Һәрге әм хьзмәтийеда тʹәви мәрьва бь сәбьр бьн, әме һивийе нибьн кӧ әԝана һәма ча рʹастийа Кʹьтеба Пироз пебьһʹәсьн, дәрберʹа фәʹм бькьн йан жи ԛәбул кьн. Дәԝса ве йәке, дьлшәԝати мә һелан дькә, ԝәки пешийе али ԝан бькьн сәва әԝана бьфькьрьн кӧ Кʹьтеба Пироз чь дьбежә. Дина хԝә бьдьн мәсәле, кӧ чаԝа әм дькарьн тʹәви мәрьва шеԝьр кьн дәрһәԛа жийина һʹәта-һʹәтайе щьнәтеда сәр әʹрде. Гәләк мәрьв дәрһәԛа ве йәке һьндьки заньн йан жи ԛә тьштәки ньзаньн. Дьԛәԝьмә әԝана баԝәр дькьн, ԝәки мьрьн хьлазийа һәр тьшти йә, йан жи дьфькьрьн ԝәки һʹәму мәрьвед ԛәнщ дьчьн сәр әʹзмана. Әм ча дькарьн али ԝан мәрьва бькьн?

¹⁵ Бьрак гьли дькә кӧ әԝ ча дәрһәԛа ве йәке мәрьварʹа шьровәдькә. Бәре әʹԝльн, әԝ ԝанрʹа Дәстпебун 1:28 дьхунә. Паше әԝ жь хԝәйе мале дьпьрсә, кӧ бь тʹәхмина ԝи Хԝәде дьхԝәст ԝәки мәрьв кʹидәре у чаԝа бьжин. Гәләк мәрьв щаба хԝә ӧса дьдьн: «Сәр әʹрде бәхтәԝарийеда бьжин». Паше, бьра дьхунә Ишайа 55:11, у дьпьрсә кӧ гәло нета Хԝәде һатийә гӧһастьне йан на. Гәләк щар хԝәйе мале дьбежьн на. Паши ве йәке, әԝ бьра ԝанрʹа Зәбур 37:10, 11 дьхунә у дьпьрсә кӧ ахьрийа инсанәте ԝе ча бә. Бь сайа шеԝьркьрьна пе Кʹьтеба Пироз, әԝи али чәнд мәрьва кьр фәʹм бькьн, кӧ Хԝәде дьхԝазә ԝәки мәрьвед ԛәнщ щьнәтеда һʹәта-һʹәтайе сәр әʹрде бьжин.

16-17. Ль гора Мәтʹәлок 3:27, диса чь щурʹәйи әм дькарьн дьлшәԝатийе нишан кьн? Мәсәле биньн.

¹⁶ Йа чара, бьфькьрьн ча мәрьварʹа бьдьн кʹьфше, кӧ һун бона ԝан хәм дькьн. Мәсәлә, һәрге әм ԝәʹдәки ӧса дәре ԝан дьхьн, кӧ әԝана бәтал ниньн, ԝе баш бә әм бахшандьне бьхԝазьн у бежьн, ԝәки кʹәнге ԝәʹде ԝан һәбә әме һьнге бен. Йан жи, һәрге хԝәйе малерʹа аликʹарийа бьчʹук лазьм ә, али ԝи бькьн. Йан һәрге йед әʹмьрда мәзьнрʹа йан жи сәԛәтрʹа лазьм ә һәрʹьн дькʹане,  ԝан дәрәщада әм дькарьн али ԝан бькьн. (Бьхунә Мәтʹәлок 3:27.)

¹⁷ Хушкәке малбәтәкерʹа ԛәнщикә бьчʹук кьр, чь кӧ бәре баш ани. Ве малбәтеда зарʹа вьрʹни мьр, у дьле хушке гәләк шәԝьти бона ԝан, ләма әԝе ԝанрʹа нәʹмә ньвиси. Нәʹмеда әԝе рʹезед жь Кʹьтеба Пироз ньвиси, кӧ дьлбинийе дьдьн. Әԝе малбәте ча хԝә да кʹьфше, чахе әԝ нәʹмә хԝәндьн? Дийа зарʹа мьри хушкерʹа ньвиси: «Дӧһӧ мьн хԝә гәләк хьраб тʹәхмин дькьр. Ле тӧ ньзани әԝ нәʹма тә ча дьле мә гьрт. Әз гәләк жь тә рʹази мә. Әз пе гьлийа нькарьм бежьм әԝе нәʹме дьлбиникә ча да мә. Дӧһӧ, мьн әв нәʹмә ԝәкә 20 щара хԝәнд. Әз әʹщебмайи мам, кӧ әԝ нәʹмә чьԛас нәрм, бь дьл у дьлшәԝатийе бу. Әм бь тʹәмамийа дьле хԝә жь тә рʹази нә». Бешьк, әм дькарьн бәред баш бьстиньн, гава хԝә датиньн дәԝса мәрьвед кӧ тәнгасийада ньн, у паше тьштәкида али ԝан дькьн.

18. Анәгори 1 Корьнтʹи 3:6, 7, әм сәр хьзмәтийа хԝә ча гәрәке бьньһерʹьн?

¹⁸ Һьлбәт, әм гәрәке рʹаст бьньһерʹьн сәр хьзмәтийа хԝә. Әм мәрьва дәрһәԛа Хԝәде һин дькьн, ле шьхӧле лапә фәрз әм накьн, Хԝәде дькә. (Бьхунә 1 Корьнтʹи 3:6, 7.) Тʹәне Йаһоԝа мәрьва незики хԝә дькә (Йуһʹн. 6:44). Ахьрийеда дьле мәрьвава гьредайи йә, кӧ мьзгинийе ԛәбул кьн йан на (Мәт. 13:4-8). Бир нәкьн, Иса дьнйайеда Мамостайе лапи баш бу, ле йәкә гәләк мәрьва мьзгинийа ԝи ԛәбул нәкьрьн! Ләма жи әм гәрәке бәрхԝә нәкʹәвьн, кӧ гәләк мәрьв гӧһ надьнә мә у мьзгинийе нахԝазьн.

19. Әме чь кʹаре бьстиньн, һәрге хьзмәтийеда дьлшәԝатийе нишан кьн?

¹⁹ Әме бәред баш бьстиньн, һәрге хьзмәтийеда дьлшәԝатийе нишан кьн. Әме жь хьзмәтийа хԝә һе зедә шабуне бьстиньн, чьмки мәрʹданийе дьдьнә кʹьфше. У әм али мәрьвед дьлсах дькьн, ньһерʹандьна кʹижана һьндава жийина һʹәта-һʹәтайе рʹаст ә, сәва ԝанрʹа һеса бә мьзгинийе ԛәбул кьн (Кʹар. Шанд. 13:48). Ләма жи ԝәрә «һʹәта кӧ ԝәхт дәстед мәда йә, һʹәмуйарʹа ԛәнщийе бькьн» (Галт. 6:10). Һьнге әме шабуне бьстиньн, чьмки рʹумәте бьдьнә Баве хԝәйи әʹзмана (Мәт. 5:16).