1. Адәм у Һеԝайе чь ӧнда кьрьн, у ахьрийа ве йәке чь бу?

БЬ ТʹӘХМИНА ԝә, кʹе гәрәке ԛануна дайнә кӧ чь ԛәнщ ә у чь хьраб ә? Чахе Адәм у Һеԝайе бәре дара ԛәнщи у хьраби наскьрьне хԝарьн, бь ве йәке ԝана әшкәрә да кʹьфше, ԝәки итʹбарийа хԝә Йаһоԝа у ԛанунед ԝи найньн. Ԝана хԝәст ԝәки хԝәха сафи кьн чь ԛәнщ ә у чь хьраб ә (Дәстп. 3:22). Ле дина хԝә бьдьне, ԝана чь ӧнда кьр. Ԝана достийа хԝә тʹәви Йаһоԝа у жийина һʹәта-һʹәтайе ӧнда кьрьн, у ӧса жи гӧнә у мьрьн дәрбази зарʹед хԝә кьрьн (Рʹом. 5:12). Әԝ бьжартьна Адәм у Һеԝайе кӧл-дәрд ԝанрʹа ани.

2-3. а) Мәрьве Әтйопи ча хԝә да кʹьфше, гава Филипо жерʹа мьзгини шьровәкьр? б) Әм чь кʹәрәма дьстиньн чахе тенә ньхӧмандьне, у ве готареда әме кʹижан пьрса шеԝьр кьн?

² Бәрамбәр кьн, Адәм у Һеԝайе ча хԝә данә кʹьфше, ле нәмере Әтйопи хԝә ча да кʹьфше, чахе Филипо жерʹа мьзгини шьровәкьр. Әԝи нәмери кьред Йаһоԝа у Иса һьндава хԝә, ӧса ԛимәт кьр, кӧ дәрберʹа һатә ньхӧмандьне (Кʹар. Шанд. 8:34-38). Чахе әм хԝә тʹәсмили Хԝәде дькьн у мина мәрьве Әтйопи тенә ньхӧмандьне, әм әшкәрә әʹйан дькьн, ԝәки дьшекьриньн ԝан тьшта, чь кӧ Йаһоԝа у Иса бона мә кьрьнә. Әм ӧса жи нишан дькьн, кӧ итʹбарийа хԝә Йаһоԝа тиньн у баԝәр дькьн, ԝәки тʹәне һʹӧкӧме ԝи һәйә ԛануна дайнә кӧ чь ԛәнщ ә у чь хьраб ә.

³ Бьфькьрьн кӧ әм чь кʹәрәма дьстиньн чахе Йаһоԝарʹа хьзмәт дькьн. Йа пешьн, Хԝәде соз дьдә, ԝәки әме дьнйа тʹәзәда һʹәму тьштед кӧ Адәм у Һеԝайе ӧнда кьрьнә, бьстиньн у ӧса жи һʹәта-һʹәтайе бьжин. Һьн жи, бь сайа ве йәке кӧ әм итʹбарийа хԝә Иса Мәсиһ  тиньн, Йаһоԝа гӧне мә дьбахшинә у исафа тʹәмьз дьдә мә (Мәт. 20:28; Кʹар. Шанд. 10:43). Әм ӧса жи дьбьнә нәфәред малбәта Йаһоԝа, демәк хьзмәткʹаред кӧ әԝ ԛәбул дькә, у әԝ ахьрийа баш ԝанрʹа соз дьдә (Йуһʹн. 10:14-16; Рʹом. 8:20, 21). Рʹаст ә мәрьв гәләк кʹәрәма дьстинә чахе дьбә хьзмәткʹаре Йаһоԝа, ле йазьх һьнәкед кӧ дәрһәԛа Йаһоԝа пеһʹәсийанә, хԝә паш дьхьн у найенә ньхӧмандьне. Ле чь чәтьнайи рʹе ԝан дьгьрьн, кӧ бенә ньхӧмандьне? У ча әԝана дькарьн әԝан чәтьнайа сафи кьн, сәва әве гаве бавежьн?

4-5. Авери у Һана рʹасти чь чәтьнайа һатьн?

⁴ Хԝәдадӧдьлибун. Де-баве хортәки бь наве Авери, Шәʹдед Йаһоԝа нә. Баве ԝи нас дькьн ча бавәки гәләк баш у рʹуспики щерʹьбанди. Ле йәкә Авери хԝә жь ньхӧмандьне паш дьхьст. Чьрʹа? Әԝ дьбежә: «Әз дьфькьрим ԝәки әзе нькарьбьм бьбьмә мина баве хԝә». Авери ӧса жи дьтьрсийа, кӧ һәрге ахьрийеда щабдарийа бьдьнә ԝи, ԝе нькарьбә бинә сери. Әԝ гьли дькә: «Әз бәрхԝә дькʹәтьм, ԝәки әзе нькарьбьм щьватеда дӧа бькьм, готара бежьм у щьвина хьзмәтийе дәрбаз кьм».

⁵ Һана кӧ 18 сали йә, гәләк бәрхԝә дькʹәт, чьмки хԝәда дӧдьли дьбу у тьрса ԝе һәбу. Де-баве ԝе әԝ рʹастийеда мәзьн кьрьн, ле йәкә әԝ хԝәда дӧдьли дьбу, кӧ ԝе нькарьбә ль гора принсипед Йаһоԝа бьжи. Чьрʹа? Әԝе хԝә ньмьз у нәһежа тʹәхмин дькьр. Щара әԝе емосийалида хԝә ӧса хьраб тʹәхмин дькьр, кӧ һʹәмде хԝә зийан дьда бәдәна хԝә, у паше жь бо ве йәке хԝә һе хьраб тʹәхмин дькьр. Әԝ дьбежә: «Мьн дәрһәԛа ве йәке тʹӧ щар кәсәкирʹа гьли нәдькьр, һәла һе де-баве хԝәрʹа жи. Мьн хԝәрʹа дьгот, ԝәки илаһи Йаһоԝа ԝе тʹӧ щар нәхԝазә, кӧ әз бьбьмә хьзмәткʹара ԝи, чьмки әз зийане дьдьмә хԝә».

6. Чь рʹе Ванесайе дьгьрт, ԝәки бе ньхӧмандьне?

⁶ Һʹӧкӧме һәвала. Ванеса кӧ 22 сали йә, дьбежә: «Һәваләкә мьнә гәләк баш һәбу, кӧ мьн ԝәкә дәһә сала ле нас дькьр». Ванесайе дьхԝәст бе ньхӧмандьне, ле һәвала ԝе пьштгьрийа ԝе нә дькьр сәва әԝ бе ньхӧмандьне. Бона ԝе йәке дьле Ванесайе дешийа, у әԝ дьбежә: «Әз йәкә ӧса мә кӧ мьнрʹа чәтьн ә хԝәрʹа һәвала бьвиньм. Ләма әз бәрхԝә дькʹәтьм, кӧ һәрге әз тʹәви ԝе ида һәвалтийе нәкьм, әзе тʹӧ щар хԝәрʹа һәваләкә незик нәвиньм».

7. Макайла жь чь дьтьрсийа, у чьрʹа?

⁷ Тьрс кӧ шашийе бькьн. Макайла пенщ сали бу чахе бьре ԝе жь щьвате һатә дәрхьстьне. Чахе әԝ мәзьн бу, әԝе дит, ԝәки кьред бьре ԝе де-баве ԝерʹа бунә дәрдәки мәзьн. Әԝ гьли дькә: «Әз  дьтьрсийам, кӧ һәрге әз бемә ньхӧмандьне, у паше гӧнә бькьм, жь щьвате жи бемә дәрхьстьне, әзе дьле де-баве хԝә һе зәʹф бешиньм».

8. Маилз жь чь дьтьрсийа?

⁸ Тьрс бәр мьԛабьлибуне. Гәдәки щаһьл наве кʹижани Маилз ә, дийа ԝи нә Шәʹде Йаһоԝа йә, ле баве ԝи у демарʹийа ԝи хьзмәткʹаред Йаһоԝа нә. Әԝ гьли дькә: «Мьн 18 сала тʹәви дийа хԝә дьжит, у әз дьтьрсийам жерʹа бежьм, кӧ әз дьхԝазьм бемә ньхӧмандьне. Мьн заньбу кӧ әԝе ча хԝә да кʹьфше чахе баве мьн бу Шәʹде Йаһоԝа у әз дьтьрсийам кӧ әԝ ԝе рʹе мьн бьгьрә».

9. Чахе һун пебьһʹәсьн кӧ Йаһоԝа ча бь һʹьзкьрьн у сәбьр ә, һуне һелан бьн чь бькьн?

⁹ Адәм у Һеԝайе нәхԝәстьн Йаһоԝарʹа хьзмәт кьн, чьмки һʹьзкьрьна хԝә һьндава ԝи ԛәԝи нәкьрьн. Ле йәкә Йаһоԝа изьн да ԝан, кӧ дьреж бьжин у зарʹед ԝан һәбьн, у хԝәха сафи кьн чаԝа зарʹед хԝә хԝәй кьн. Ахьрийа сафикьрьна Адәм у Һеԝайе, демәк кӧ хԝә сәри хԝә бьн, зутьрәке да кʹьфше ԝәки ԝана нәаԛьлайи кьр. Кӧрʹе ԝани мәзьн бьре хԝәйи нәнәһәԛ кӧшт, у паши ве йәке зорбәти у хԝәһʹьзи нава мәрьвада бәла бу (Дәстп. 4:8; 6:11-13). Ле йәкә Йаһоԝа чʹарә кьр, ԝәки һʹәму зарʹед Адәм у Һеԝайе, йед кӧ бьхԝазьн жерʹа хьзмәт кьн, хьлаз кә (Йуһʹн. 6:38-40, 57, 58). Чахе һун пебьһʹәсьн кӧ Йаһоԝа ча бь сәбьр у һʹьзкьрьн ә, һʹьзкьрьна ԝә һьндава ԝи ԝе мәзьн бә. Һуне нәхԝазьн мина Адәм у Һеԝайе бьжартьна нәрʹаст бькьн, ле әʹмьре хԝә тʹәсмили Йаһоԝа бькьн.

10. Чьрʹа фькьрандьна сәр Зәбур 19:7 дькарә али ԝә бькә Йаһоԝарʹа хьзмәт кьн?

¹⁰ Бәрдәԝам кә дәрһәԛа Йаһоԝа һе зедә пебьһʹәсә. Чьԛас һе зәʹф һун дәрһәԛа Йаһоԝа пебьһʹәсьн, һаԛас һе зедә һуне баԝәр бьн, ԝәки дькарьн хьзмәтийеда пешдачуйи бьн. Авери, бәʹса кʹижани мә жоре кьр, дьбежә: «Чахе мьн созе Хԝәде жь Зәбур 19:7 (Бьхунә.) дьхԝәнд у сәр дьфькьрим, мьн ԛәԝат станд у әз хԝәда баԝәр бум». Чахе Авери дит кӧ әԝ созе Йаһоԝа сәр ԝи һатә сери, һʹьзкьрьна ԝи  һьндава Хԝәде һе мәзьн бу. Һʹьзкьрьн ӧса жи али мә дькә хԝә жь ԝан тьшта дур бьгьрьн, кʹижан ԝи хԝәш найен у ԛәԝате дьдә мә, ԝәки жерʹа хьзмәт кьн. Һана бәʹса кʹижане мә жоре кьр, дьбежә: «Бь сайа хԝәндьн у леколинкьрьна Кʹьтеба Пироз, мьн фәʹм кьр, кӧ чахе мьн зийан дьда бәдәна хԝә, мьн дьле Йаһоԝа жи дешанд» (1 Пәт. 5:7). Һанайе чь жи жь Хәбәра Хԝәде педьһʹәсийа, әʹмьре хԝәда дьда хәбате (Аԛуб 1:22). Әԝ дьбежә: «Чахе мьн гӧрʹа Йаһоԝа дькьр у дьдит ча әԝ йәк мьнрʹа кʹаре тинә, мьн ԝи һе ԛайим һʹьз кьр. Ньһа әз дӧдьли ниньм, ԝәки гава мьнрʹа аликʹарийа Йаһоԝа лазьм бә, әԝ ԝе әʹсә тʹьме рʹебәрийе мьн бькә». Һанайе әв хәйсәт кӧ зийан дьда хԝә, тʹәрьканд. Әԝе хԝә тʹәсмили Йаһоԝа кьр у һатә ньхӧмандьне.

11. Ванесайе чь кьр сәва һәвалед баш ԛазанщ кә, у әм жь ве йәке чь һин дьбьн?

¹¹ Бь билани һәвала хԝәрʹа бьжберә. Ванеса бәʹса кʹижане мә жоре кьр, ахьрийеда фәʹм кьр, ԝәки һәвала ԝе рʹе ԝе дьгьрә Йаһоԝарʹа хьзмәт кә. Ләма Ванесайе һәвалтийа хԝә тʹәви ԝе ԛәтанд. Хенщи ве йәке, әԝе ида нава щьватеда һәвалед тʹәзә дьгәрʹийа. Ванеса гьли дькә ԝәки мәсәла Нӧһ у малбәта ԝи али ԝе кьрьн. Әԝ дьбежә: «Мәрьвед дор бәре Нӧһ у малбәта ԝи Йаһоԝа һʹьз нәдькьрьн, ле ԝана һәврʹа һәвалти дькьр». Паше Ванеса һатә ньхӧмандьне у бу пешәнг. Әԝ ньһа дьбежә: «Әԝе йәке али мьн кьр, кӧ мьн һәвалед баш хԝәрʹа дит нә тʹәне щьвата хԝәда, ле щьватед майинда жи». Һун жи дькарьн һәвалед баш хԝәрʹа бьвиньн, һәрге тʹьме нав шьхӧле Йаһоԝада бьн (Мәт. 24:14).

12. Чь щурʹә тьрс бал Адәм у Һеԝайе тʹӧнә бу, у ахьрийа ве йәке чь бу?

¹² Хԝәдехоф бьн. Чахе әм дьтьрсьн кӧ дьле Йаһоԝа бешиньн, әԝ хԝәдехофи кʹаре мәрʹа тинә (Зәб. 111:10). Һәрге Адәм у Һеԝайе әԝ щурʹә тьрс нав хԝәда пешда бьанийана, әԝана ԝе мьԛабьли Йаһоԝа дәрнәкʹәтана. Ле йазьх ӧса нибу, ԝана пьшта хԝә да Хԝәде. Чахе ԝана ӧса кьр, чʹәʹве ԝана вәбун у ԝана бь тʹәмами фәʹм кьр, ԝәки әԝана бунә гӧнәкʹар. Ԝана тʹәне дькарьбу гӧнә у мьрьне дәрбази зарʹед хԝә кьн. Ԝана фәʹм кьр кӧ кʹәтьнә чь  һʹали, чьмки гӧрʹа Хԝәде нәкьрьн. У ԝана шәрм кьр кӧ тәʹзи нә, ләма бәдәна хԝә дадан (Дәстп. 3:7, 21).

13-14. а) Ль гора 1 Пәтрус 3:21, чьрʹа гәрәке әм бәр тьрса мьрьне нәләрьзьн? б) Чь мәʹнийед мә һәнә, кӧ Йаһоԝа һʹьз бькьн?

¹³ Бәле, әм гәрәке жь Хԝәде бьтьрсьн, ԝәки дьле ԝи нәешиньн, ле жь тьрса мьрьне әм гәрәке нәләрьзьн. Йаһоԝа рʹе мәрʹа вәкьрийә, ԝәки әм жийина һʹәта-һʹәтайе бьстиньн. Һәрге әм гӧнә бькьн, ле һʹәлал гӧне хԝә бьдьнә рʹуйе хԝә, Йаһоԝа ԝе шашийед мә бьбахшинә. Әԝ ԝе мә бьбахшинә сәр һʹиме баԝәрийа мә һьндава ԛӧрбана Кӧрʹе ԝи. Йа пешьн, кӧ ча әм баԝәрийа хԝә дьдьнә кʹьфше, әԝ ә, кӧ әм әʹмьре хԝә тʹәсмили Хԝәде дькьн у тенә ньхӧмандьне. (Бьхунә 1 Пәтрус 3:21.)

¹⁴ Гәләк мәʹнийед мә һәнә, кӧ Йаһоԝа һʹьз бькьн. Хенщи кӧ әԝ һәр рʹож тьштед баш дьдә мә сәва әм ша бьн, әԝ ӧса жи дәрһәԛа хԝә у ԛьрара хԝә рʹастийе мә һин дькә (Йуһʹн. 8:31, 32). Әԝи щьвата Мәсиһити дайә мә, сәва рʹебәрийе мә бькә у аликʹарийе бьдә мә. Әԝ ӧса жи али мә дькә, ԝәки әм бәр чәтьнайа тәйах кьн, у һевийе дьдә мә кӧ әм бьжин һʹәта-һʹәтайе сәр әʹрде (Зәб. 68:19; Әʹйан. 21:3, 4). Чахе әм дьфькьрьн кӧ Йаһоԝа ча әʹйан дькә, ԝәки әԝ мә һʹьз дькә, дьле мә бь һʹьзкьрьне тʹьжи дьбә. У чахе әм Йаһоԝа һʹьз дькьн, әм һин дьбьн тьрса рʹаст нав хԝәда пешда биньн. Әм дьтьрсьн ԝәки дьле Ԝи кәси нәешиньн, кʹижани әм зәʹф һʹьз дькьн, демәк дьле Йаһоԝа.

15. Макайла ча әв тьрс кӧ ԝе шашийа бькә, жь дьле хԝә дәрхьст?

¹⁵ Макайла кӧ дьтьрсийа ԝәки ԝе шашийа бькә, чахе фәʹм кьр кӧ Йаһоԝа бахшандьнеда гәләк рʹәʹм ә, әв тьрс жь дьле хԝә дәрхьст. Әԝ гьли дькә: «Мьн фәʹм кьр, ԝәки әм гьшк гӧнәкʹар ьн, ләма әме шашийа бькьн. Ле мьн ӧса жи фәʹм кьр, ԝәки Йаһоԝа мә һʹьз дькә у ԝе сәр һʹиме ԛӧрбана Иса бьбахшиньнә мә». Һʹьзкьрьна Макайлайе һьндава Йаһоԝа, ԝе һелан кьр, кӧ хԝә тʹәсмили Йаһоԝа бькә у бе ньхӧмандьне.

16. Чь али Маилз кьр ԝәки тьрса мьԛабьлибуне жь дьле хԝә дәрхә?

¹⁶ Маилз, кʹижан кӧ дьтьрсийа ԝәки дийа ԝи ԝе рʹе ԝи бьгьрә кӧ әԝ бе ньхӧмандьне, жь бәрпьрсийаре мьһале ширәт хԝәст. Маилз дьбежә: «Әԝи гьли кьр, ԝәки дийа ԝи жи Шәʹде Йаһоԝа нибу. Әԝи али мьн кьр, ԝәки бьфькьрьм ча бежьмә дийа хԝә, кӧ әԝ хԝәстьна мьн ә ԝәки бемә ньхӧмандьне, нә кӧ баве мьн зоре мьн дькә». Дийа Маилз сафикьрьна ԝирʹа ԛайил нибу, ләма ахьрийеда Маилз жь мал чу, ле йәкә әԝи нета хԝә ани сери. Әԝ дьбежә: «Әз педьһʹәсийам кӧ Йаһоԝа чьԛас тьштед ԛәнщ бона мьн кьрийә, у әԝе йәке дьле мьн гьрт. Әз дәрһәԛа ԛӧрбана Иса кʹур дьфькьрим, у мьн фәʹм кьр ԝәки Йаһоԝа ча ԛайим мьн һʹьз дькә. Әԝе фькьре әз һелан кьрьм, ԝәки мьн хԝә тʹәсмили Йаһоԝа кьр у һатьмә ньхӧмандьне».

17. Чь мәщала мә һәйә?

¹⁷ Чахе Һеԝайе Еденеда бәре даре хԝар, әԝе бь ве йәке Баве хԝә инкʹар кьр. У гава Адәм жи тʹәви ԝе бу йәк, бь ве йәке әԝи да кʹьфше, ԝәки әԝи нәшекьранд әԝ һʹәму тьштед ԛәнщ, чь кӧ Йаһоԝа бона ԝи кьрьбу. Ле әм гьшк дькарьн избат кьн, ԝәки мина Адәм у Һеԝайе бешекьр ниньн. Әм бона һәр тьшти, чь кӧ Йаһоԝа бона мә дькә, жь ԝи рʹази нә. Чахе әм тенә ньхӧмандьне, әм Йаһоԝарʹа дьдьнә кʹьфше, ԝәки әм баԝәр дькьн кӧ тʹәне һʹӧкӧме ԝи һәйә бона мә ԛануна дайнә, кӧ чь ԛәнщ ә у чь хьраб ә. Ӧса әм избат дькьн, ԝәки әм Баве хԝә һʹьз дькьн у итʹбарийа хԝә ԝи тиньн.

18. Чаԝа һун дькарьн хьзмәтийеда пешдачуйи бьн?

¹⁸ Паши ньхӧмандьне әм гәрәке бәрдәԝам кьн, һәр рʹож пе ԛанун у принсипед Йаһоԝа бьжин, нә кӧ хԝә сәри хԝә бьн. Бь милйона хьзмәткʹаред Хԝәде ӧса дьжин. Һун жи дькарьн мина ԝан бьн, һәрге кʹур фәʹм бькьн Хәбәра Хԝәде, һәртʹьм тʹәви хушк-бьра һәвалтийе бькьн, у бь хирәт мәрьварʹа гьли кьн чь кӧ һун дәрһәԛа Баве хԝәйи һʹьзкьрьн педьһʹәсьн (Ибрн. 10:24, 25). Чахе һун сафикьрьна дькьн, гӧһ бьдьнә ширәта Йаһоԝа, кʹижан кӧ әԝ бь сайа Хәбәра хԝә у тʹәшкиләта хԝә дьдә ԝә (Иша. 30:21). Һьнге, һуне һәр шьхӧле хԝәда пешдачуйи бьн (Мәтʹлк. 16:3, 20).

19. Дәрһәԛа чь һун гәрәке тʹӧ щар бир нәкьн у чьрʹа?

¹⁹ Һәрге һун тʹьме бьфькьрьн, кӧ чаԝа рʹебәрийа Йаһоԝа ԝәрʹа кʹаре тинә, һʹьзкьрьна ԝә һьндава ԝи у принсипед ԝи ԝе һе мәзьн бә. Паше чь жи Шәйтʹан бькә, һуне хьзмәтийа хԝә Йаһоԝарʹа, нәдьнә сәкьнандьне. Бьдьнә бәр чʹәʹве хԝә әʹмьре паши һʹәзар сали. Һуне фәʹм бькьн, ԝәки сафикьрьна ԝә кӧ бенә ньхӧмандьне, әʹмьре ԝәда сафикьрьнәкә лапә баш бу!