ԜӘКӘ сала 1910-да де-баве мьн жь Тʹьлбисе (Гӧрщьстан), дәрбази Канадайа Рʹоавайе бун, незики шәһәре Пеле, (Саскачеван). Мә маләкә фермеда дьжит. Әз сала 1928 һатьмә буйине, у жь 6 зарʹа әз йе бьчʹук бум. Баве мьн пешийа буйина мьн мьр, ле чахе әз һе зарʹ бум дийа мьн мьр. Ԝәʹдә шунда, хушка мьнә мәзьн Луси мьр, йа кӧ 17 сали бу. Паши ве йәке, апе мьн Ник әз у хушк-бьред мьн хԝәй кьрьн.

Щарәке, чахе тʹәзә мьн дәстпекьр рʹе һәрʹьм, малбәта мьн дитьн ча әз почʹа һәспе кʹаш дькьм. Әԝана тьрсийан ԝәки һәсп ԝе мьн хә у кьрьнә ԛажини ԝәки бәрʹдьм. Пьшта мьн ԝанда бу у мьн дәнге ԝан нәдьбьһист. Ча баш ә ԝәки әԝе һәспе зийан нәда мьн, ле һәма ве рʹоже малбәта мьн фәʹм кьр кӧ әз кәрʹ-лал ьм.

Һәвале малбәта мә ширәт да, ԝәки әз тʹәви зарʹед кәрʹ-лал һин бьм. Ләма жи апе мьн Ник әз бьрьмә мәкʹтәба кʹәр-лала, кʹижан кӧ шәһәре Саскатунеда бу, (Саскачеван). Кʹидәре мьн дәстпекьр бьжим, жь малбәта мьн рʹийа чәнд сьһʹәта дур бу. Әз гәләк тьрсийам чьмки әз 5 сали бум. Мьн тʹәне ԝәʹде рʹожед һесабуне у һавинеда малбәта хԝә дьдит. Ахьрийеда, әз зьмане кәрʹ-лала һин бум у әз ша дьбум кӧ мьн ида дькарьбу тʹәви зарʹа бьлизьм.

Сала 1939-да, хушкәкә мьнә жь мьн мәстьр Марен, Бил Данилчук станд. Ԝана хушка мьн Франсис у әз бьрьмә бал хԝә у әм хԝәй кьрьн. Малбәта мәда щара пешийе әԝана рʹасти Шәʹдед Йаһоԝа һатьн. Һавине, ԝәʹде рʹожед һесабуне, ԝана чьԛас дькарьбу чь кӧ жь Кʹьтеба Пироз педьһʹәсийан, мьнрʹа гьли дькьрьн. Рʹаст бежьм мьнрʹа нәһеса бу ԝана фәʹм кьм, чьмки ԝана зьмане кәрʹ-лала ньзаньбун. Ле ԝана тʹәхмин дькьр ԝәки мьн бь  дьл рʹасти һʹьз кьр. Мьн дьдит әԝана ль гора Кʹьтеба Пироз дьжин, у ләма әз тʹәви ԝан дьчумә хьзмәтийе. Зутьрәке мьн дьхԝәст бемә ньхӧмандьне, у 5 Илоне сала 1941-да, Бил мьн тʹәшта һʹәсьнда ньхӧманд. Әԝи ав жь бире һьлда, кʹижан кӧ гәләк сар бу!

Сала 1946 һавине ԝәʹде һесабуне чахе әз вәгәрʹийамә мале, әм чун щьвата мәзьнә серʹожи ль шәһәре Кливленде, (Оһайо, Дәԝләтед Йәкбуйи). Сәр щьвата мәзьн рʹожа пешийе, хушка мьн фькьред жь бәрнаме мьнрʹа сәр кʹахаз дьньвиси. Ле рʹожа дӧда, әз әʹщебмайи мам чахе мьн дит ԝәки бона мәрьвед кәрʹ-лал бәрнамә те ԝәлгәрʹандьне. Бәрнамә бона мьн гәләк фәʹмдари бу, у әԝ ӧса баш бу кӧ мьн ахьрийеда зәлал фәʹм кьр рʹастийа Кʹьтеба Пироз!

Ԝи ԝәʹдәйи, Шәрʹе Һʹәмдьнйайе Дӧда тʹәзә хьлаз бу у насйонализм зәʹф бәла бу. Паши щьвата мәзьн, әз вәгәрʹийамә мәкʹтәбе у мьн хԝәрʹа нет дани ԝәки амьнийа хԝә Хԝәдерʹа избат кьм. Мьн ида рʹумәт нәдьда бәйрәԛе у нә жи гимн дьстра сәр зьмане кәрʹ-лала. Ӧса жи әз тʹәви щәжьна нәдьбум у нә жи дьчумә дере чаԝа шагьртед дьн дьчун. Әԝ йәк директоре мәкʹтәбе хԝәш нәһат, у әԝи дьхԝәст мьн бьдә тьрсандьне, ләма тьштед дәрәԝ дьгот сәва әз фькьред хԝә бьгӧһезьм. Дәрһәԛа ве йәке һәвалед дәрсханеда пеһʹәсийан у әʹщебмайи ман, ле әԝе дәрәще мьнрʹа рʹе вәкьр, ԝәки ԝанрʹа шәʹдәтийе бьдьм. Ләри Андрософ, Норман Дитик, у Емил Шнидер йед кӧ тʹәви мьн мәкʹтәбеда һин дьбун, һатьнә сәр рʹийа рʹастийе у һʹәта рʹожа иро бь амьни Йаһоԝарʹа хьзмәт дькьн.

Чахе әз дьчумә шәһәред дьн мьн хԝәрʹа нет дани, ԝәки кәрʹ-лаларʹа шәʹдәтийе бьдьм. Мәсәлә, Монреаледа әз чум сәр щьвинәке кӧ кәрʹ-лал тʹәвайи тʹоп бьбун. Ль ԝедәре мьн шәʹдәти да Еди Тагеррʹа, йе кӧ щаһьл бу. Ԝи чахи әԝ сәроке кʹомәкә кәрʹ-лала бу, ле иро әԝ бьре мә йә, у Лаваледа (Кԝебек) щьвата кәрʹ-лалада хьзмәт дькә. Мьн ӧса жи шәʹдәти да щаһьләкирʹа, наве ԝи Жуан Арданез ә. Әԝи мина мәрьвед жь Бәройа кʹур леколин дькьр, сәва рʹастийа Кʹьтеба Пирозда баԝәр бә (Кʹар. Шанд. 17:10, 11). Әԝ жи һатә сәр рʹийа рʹастийе у ча рʹуспи бь амьни Оттаԝайеда (Онтарйо) һʹәта мьрьна хԝә хьзмәт дькьр.

Сала 1950 әз дәрбази Вәнкувәре бум. Мьн гәләк һʹьз дькьр мәрьвед кәрʹ-лаларʹа мьзгинийе гьли кьм, ле әзе тʹӧ щар бир нәкьм ве ԛәԝьмандьне кӧ тʹәви мьн ԛәԝьми. Мьн жьнькәкә бь наве Крис Спайсер кʹучеда да сәкьнандьне, ле әԝ кәрʹ-лал нибу. Әԝе ԛәбул кьр ԝәки һәр мәһ жерʹа журналед мә бьвьм, у әԝе хԝәст ԝәки әз һәрʹьм мала ԝан у рʹасти мере ԝе Гари бем. Әз чумә мала ԝан, у бь ньвисандьне сәр кʹахаса мә дьреж хәбәр да. Паши  ве рʹоже, мә ида һәв нәдит. Ле әз әʹщебмайи мам чахе сал дәрбаз бун, мьн Торонтода сәр щьвата мәзьн әԝана дитьн. Һәма ве рʹоже Гари гәрәке бьһата ньхӧмандьне. Әԝе ԛәԝьмандьне кьрә бира мьн, ԝәки чьԛас фәрз ә тʹьме мьзгинийе бәла кьн, чьмки ньзани кʹидәре йан кʹәнге ԝе дьле мәрьвада рʹасти мәзьн бә.

Ԝәʹдә шунда, әз диса дәрбази Саскатуне бум. Ль ԝедәре әз рʹасти жьнькәке һатьм, кʹижане мьнрʹа гот ԝәки әз тʹәви ԛизед ԝейә щеԝи һинбуна Кʹьтеба Пироз дәрбаз кьм. Наве ԝан Щан у Щоан Ротенбергер бун. Әԝана жи ве мәкʹтәба кәрʹ-лалада һин дьбун, кʹидәре бәре әз һин дьбум. Зутьрәке әԝ дӧ кәчʹька чь кӧ педьһʹәсийан, һәвалед хԝәрʹа дәрсханеда гьли дькьрьн. Ахьрийеда, 5 һәвалед ԝан бунә Шәʹдед Йаһоԝа. Йәк жь ԝан Йунес Колин бу. Щара пешийе мьн Йунес дит чахе мьн ида мәкʹтәба хԝә хьлаз дькьр. Ԝи чахи әԝе мьнрʹа ширьнайи да у гот кӧ әԝ дьхԝазә тʹәви мьн һәвалтийе бькә. Ԝәʹдә дәрбаз бу у әԝ бу мәрьвәкә мьнә лапә незик, әԝ бу жьна мьн.

Чахе дийа Йунесе пеһʹәсийа кӧ әԝ Кʹьтеба Пироз һин дьбә, әԝе директоре мәкʹтәберʹа гот ԝәки ӧса бькә кӧ ԛиза ԝе тʹәрк бьдә һинбуне. Директор әʹдәбйәт бь чь жи әԝ Кʹьтеба Пироз һин дьбу, жь ԝе стандьн. Ле Йунесе хԝәрʹа сафи кьр, ԝәки Йаһоԝарʹа амьн бьминә. Чахе әԝе дьхԝәст бе ньхӧмандьне, де-баве ԝе жерʹа готьн: «Һәрге тӧ бьби Шәʹде Йаһоԝа, әме тә жь мале дәрхьн!» Йунес 17 салийа хԝәда жь мал чу у Шәʹдед Йаһоԝа кӧ мьһала ԝеда дьжитьн бь дьл у щан ле бунә хԝәйи. Әԝе бәрдәԝам кьр Кʹьтеба Пироз һин бә у ахьрийеда һатә ньхӧмандьне. Чахе әм зәԝьщин сала 1960-да, де-баве ԝе нәһатьнә дәʹԝата мә. Ле сал дәрбаз бун, у ԝана һеди-һеди ԛәдьре мә дьгьртьн сәва баԝәрийа мә у ӧса жи сәва кӧ мә ча зарʹед хԝә мәзьн дькьр.

Һʹәфт кӧрʹед мә һәнә, ле әԝана кәрʹ-лал ниньн. Бона мьн у жьна мьн, нәһеса бу зарʹед хԝә мәзьн кьн, ле мә зьмане кәрʹ-лала ԝана һин дькьр, сәва тʹәви ԝан хәбәр дьн у рʹастийе бькьн дьле ԝан. Хушк-бьред щьватеда зәʹф али мә кьрьн. Мәсәлә, щарәке бьра незики мә бу у гот ԝәки кӧрʹәки мә Ода Щьватеда гьлийед нәщайиз дьбежә. Бь сайа ԝи бьрайи мә дәрберʹа кӧрʹе хԝә ширәт кьр. Чар кӧрʹед мьн Щеймс, Щери, Николас у Стивен тʹәви жьн у малбәта хԝә бь амьни Йаһоԝарʹа хьзмәт дькьн. Әԝ һәр чар жи рʹуспи нә. Һьн жи Николас тʹәви жьна хԝә Дәбора, филиала Британйайеда аликʹарийе дьдьнә ԝәлгәрʹандьна зьмане кәрʹ-лала. Ле Стивен у жьна ԝи Шанан филиала Дәԝләтед Йәкбуйида кʹома ԝәлгәрʹандьнеда ньн, йа зьмане кәрʹ-лала.

Мәһәк мабу кӧ 40 сале зәԝаща мә тʹәмам буйа, Йунес мьр, чьмки рәԛа (кʹансәра) ԝе һәбу. Нава тәнгасийа хԝәда әԝ ԛәԝи ма у баԝәрийа ԝе ԛайим бу кӧ мьри ԝе рʹабьн. Әз гәләк һивийа ве рʹоже мә чахе диса ԝе бьвиньм.

Мәһа Сьбате сала 2012, әз әʹрде кʹәтьм у ԛорʹька мьн шькәст. Мьн фәʹм кьр ԝәки мьнрʹа аликʹари лазьм ә. У ләма әз чумә бал кӧрʹәки хԝә. Ньһа әм шәһәре Калгарида щьвата кәрʹ-лалада ньн, у ль ԝедәре жи әз ча рʹуспи хьзмәт дькьм. Дькарьм бежьм ԝәки әԝ щара пешийе йә кӧ әз щьвата кәрʹ-лалада мә. Бьдьнә һʹәсабе хԝә кӧ әз жь дәстпека сала 1946 щьвата инглизида бум. Гәло ча әз рʹӧһʹанида ԛәԝи мам? Йаһоԝа созе хԝә ани сери кӧ хԝәйе етʹима йә (Зәб. 10:14). Әз гәләк жь ԝан хушк-бьра рʹази мә, йед кӧ али мьн кьрьнә рʹӧһʹанида нәкʹәвьм. Мәсәлә, ԝана сәр кʹахаса фькьред жь щьвате мьнрʹа дьньвисин, зьмане кәрʹ-лала һин дьбун у чьԛас дькарьбун мьнрʹа ԝәлдьгәрʹандьн.

Рʹаст бежьм, щара әз бәрхԝә дькʹәтьм, чьмки нькарьбум фәʹм кьра чь кӧ дьһатә готьне, йан жи кӧ йед дьн мьн фәʹм нәдькьрьн. Ле ԝи ԝәʹдәйида, әз сәр гьлийед Пәтрус дьфькьрим, кӧ әԝи Исарʹа гот: «Хӧдан, әме һәрʹьнә щәм кʹе? Готьнед жийина һʹәта-һʹәтайе щәм тә нә» (Йуһʹн. 6:66-68). Чаԝа хушк-бьред дьнә кәрʹ-лал салийед мьнда, әз жи һин бумә бь сәбьр бьм. Әз һин бум итʹбарийа хԝә Йаһоԝа у тʹәшкиләта ԝи биньм, у әԝе йәке мьнрʹа гәләк кʹәрәм анин! Ньһа сәр зьмане мьн хԝарьна рʹӧһʹани тʹьжә һәйә, у әз ләзәте дьстиньм кӧ дьчьмә сәр щьвата у щьватед мәзьн сәр зьмане кәрʹ-лалайи Америки. Бь рʹастийе әʹмьре мьн бәхтәԝар у бь кʹәрәма тʹьжә бу, чьмки мьн Йаһоԝарʹа, Хԝәдайе мәйи Зоррʹа хьзмәт дькьр.