1. Чьрʹа һьнәк нькарьн леколина бькьн?

ИРО гәләк мәрьв зәʹф щәфе дькʹьшиньн, сәва әʹбура хԝә бькьн. Гәләк хушк-бьред мә гәләк сьһʹәта дьхәбьтьн, сәва нәфәред хԝә хԝәй кьн. Гәләк жи һәр рʹожәкә хәбате чәнд сьһʹәта сәр рʹе хәрщ дькьн, сәва бьгьһижьнә хәбата хԝә у бенә мале. Гәләк жь ԝана хәбата гьран дькьн, сәва пʹәре нане хԝә чекьн. Хьлазийа рʹоже, әԝ хушк-бьред кӧ ӧса дьхәбьтьн, ида һʹал дькʹәвьн! Бона ве йәке, ԛәԝата ԝан ида сәва леколинкьрьна шәхси наминә.

2. Һун чьчах хԝәрʹа ԝәʹдә дьвиньн бона леколинкьрьне?

² Ле йәкә әм гәрәке хԝәрʹа ԝәʹдә бьвиньн, сәва Хәбәра Хԝәде у әʹдәбийәтед мә леколин бькьн. Һәләԛәтийа мә тʹәви Йаһоԝа у әʹмьре мәйи һʹәта-һʹәтайе ве йәкева гьредайи йә (1 Тимтʹ. 4:15). Һьнә хушк-бьред мә, һәр рʹож шәбәԛе зу рʹадьбьн леколина дькьн, чьмки шәбәԛа зу дәнг-һʹьс тʹӧнә у һʹьше ԝан һесабуйи йә. Һьнәк жи чәнд дәԛа хьлазийа рʹоже хԝәрʹа башԛә дькьн, ԝәки тʹӧ тьшт дина ԝана нарʹәвинә, сәва тьштәки леколин бькьн у сәр бьфькьрьн.

3-4. Чь гӧһастьн һатә кьрьне бона әʹдәбийәта, у чьрʹа?

³ Бешьк, һун жи ԛайил ьн, ԝәки гәләк фәрз ә хԝәрʹа ԝәʹдә башԛә кьн бона леколинкьрьне. Ле әм чь гәрәке леколин бькьн? Дьбәкә һун хԝәрʹа дьбежьн: «Һаԛас тьшт һәйә бона хԝәндьне. Әз нә жи дькарьм перʹа бьгьһиньм һәр тьшти бьхуньм». Бона һьнә хушк-бьра һеса йә һәр тьшти чь кӧ дәрдькʹәвә, бьхуньн у бьньһерʹьн, ле гәләкарʹа чәтьн ә бона ве йәке ԝәʹдә хԝәрʹа башԛә кьн. Кʹома Рʹебәрийе һаш жь ве йәке һәйә, ләма жи ван пашԝәхтийа сафи кьр, ԝәки әʹдәбийәтед нәшьркьри у интернетеда, кем бенә дәрхьстьне.

⁴ Мәсәлә, «Кʹьтеба Һәрсали йа Шәʹдед Йаһоԝа» ида найе дәрхьстьне, чьмки сәр малпәра мә jw.org^® у ӧса жи һәр мәһ JԜ Бродкастингеда әм дькарьн дәрһәԛа сәрһатийед һʹәԝас  пебьһʹәсьн. Ӧса жи «Бьрща Ԛәрәԝьлийе» у «Һʹьшйар Бьн!» бона бәлакьрьне, ида сале се щара дәрдькʹәвьн. Әԝ гӧһастьн һатә кьрьне нә сәва ве йәке, кӧ әм әԝи ԝәʹдәйи сәр шьхӧлед дьн хәрщ кьн, ле сәва әм бькарьбьн һе зедә һʹьш-аԛьле хԝә дайньн сәр тьштед «һәрә ԛәнщ» (Фили. 1:10). Ԝәрә әм шеԝьр кьн, кӧ чаԝа әм дькарьн тьштед лапи фәрз дайньн сәр щийе пешьн, у чаԝа жь леколинкьрьна Кʹьтеба Пироз һе зедә кʹаре бьстиньн.

5-6. Кʹижан әʹдәбийәта әм гәрәке кʹур леколин бькьн?

⁵ Йа пешьн, әм гәрәке чь леколин бькьн? Әм гәрәке әʹсә һәр рʹож ԝәʹдә башԛә кьн, сәва Хәбәра Хԝәде кʹур леколин бькьн. Бәрнама хԝәндьна Кʹьтеба Пирозә щьватеда, ида кем буйә, сәва әм сәр ԝан рʹеза һе зедә бьфькьрьн у дьһа зедә леколин бькьн. Хенщи кӧ бьхуньн, нета мә гәрәке әԝ бә, ԝәки рʹезед кӧ әм дьхуньн, дьле мә бьгьрьн у һе незики Йаһоԝа кьн (Зәб. 19:14).

⁶ Ле диса чь әм гәрәке кʹур леколин бькьн? Әм гәрәке ӧса жи бона «Бьрща Ԛәрәԝьлийе» у бәрнама Һинбуна Кʹьтеба Пироз дь щьватеда, хԝә рʹьнд һазьр кьн. Хенщи ве йәке, ӧса жи лазьм ә әм бьхуньн һәр «Бьрща Ԛәрәԝьлийе» у «Һʹьшйар Бьн!» кӧ бона бәлакьрьне нә.

7. Һәрге әм перʹа нагьһиньн бьхуньн у бьньһерʹьн һʹәму тьштед сәр малпәра мә у JԜ Бродкастинге, чьрʹа әм гәрәке бәрхԝә нәкʹәвьн?

⁷ Дьбәкә ньһа һун хԝәрʹа дьбежьн: «Дә баш, ле тьштед сәр малпәра мә jԝ.org ӧса жи сәр JԜ Бродкастинг ча перʹа бьгьһиньм бьхуньм у бьньһерʹьм? Нә ԝедәре жи гәләк тьшт һәнә!» Дина хԝә бьдьнә ве мәсәле: Ресторанеда щурʹә-щурʹә хԝарьнед хԝәш һәнә. Ле әԝед кӧ тенә ресторане, фәʹмдари йә нькарьн ԝан һʹәму хԝарьна бьхԝьн йан жи тәʹм кьн. Ләма жи әԝана тʹәне чәнд хԝарьна дьжберьн кӧ бьхԝьн. Мина ве йәке, һәрге һун перʹа нагьһиньн һʹәму тьштед әләктроники бьхуньн йан бьньһерʹьн, бәрхԝә нәкʹәвьн. Чьԛас һун дькарьн һаԛас бьхуньн у бьньһерʹьн. Ԝәрә әм шеԝьр кьн кӧ чь те һʹәсабе леколинкьрьн, у чаԝа жь леколинкьрьна хԝәйә шәхси һе зедә кʹаре бьстиньн.

8. Ча әм дькарьн бона «Бьрща Ԛәрәԝьлийе» хԝә һазьр кьн, у әԝ йәк ԝе мәрʹа чь кʹаре бинә?

⁸ Чахе һун леколин дькьн, әԝ те һʹәсабе кӧ һун чь жи дьхуньн, һʹьш-аԛьле хԝә дьдьнә сәр у дьфькьрьн. Демәк, әԝ найе һʹәсабе, ԝәки сәрʹа-бәрʹа бьхуньн, йан жи тʹәне щаба кʹьфш кьн. Мәсәлә, чахе һун хԝә бона «Бьрща Ԛәрәԝьлийе» сәва Һинбуне һазьр дькьн, пешийе бьхуньн «ве готареда», кӧ бьзаньбьн ԝе чь бе шеԝьркьрьне. Паше, наве готаре, бьнсәрийа у пьрсед бона ԝәкʹьландьне бьхуньн у сәр бьфькьрьн. Пәй ве йәкерʹа, готаре һеди-һеди бьхуньн у һʹьш-аԛьле хԝә бьдьнә сәр хԝәндьна хԝә. Һәр абзасәкеда дина хԝә бьдьнә щӧмла сәрәкә. Әԝ щӧмлә дькарә али ԝә бькә, кӧ нета абзасе фәʹм кьн. Ԝәʹде хԝәндьне, бьфькьрьн кӧ чаԝа һәр абзас бьнсәрийава у тʹәмамийа готарева гьредайи йә. Хәбәред кӧ ԝәрʹа нас ниньн у фькьред кӧ бона ԝә тʹәзә нә, хԝәрʹа башԛә бьньвисьн, сәва дәрһәԛа ԝан һе зедә леколин бькьн.

9. а) Ԝәʹде леколинкьрьна «Бьрща Ԛәрәԝьлийе», әм гәрәке чьрʹа у ча дина хԝә бьдьнә илаһи сәр рʹеза? б) Чаԝа Йешу 1:8-да те готьне, әм гәрәке чь бькьн хенщи хԝәндьна рʹеза?

⁹ Бь сайа һинбуна «Бьрща Ԛәрәԝьлийе» әм Кʹьтеба Пироз һин дьбьн. Ләма жи ԝәʹде леколинкьрьна готаре, рʹьнд дина хԝә бьдьнә рʹезед Кʹьтеба Пироз, илаһи ԝан рʹеза кӧ ԝе щьватеда бенә хԝәндьне.  Бьфькьрьн кӧ хәбәред сәрәкә йан жи гьлийед рʹезада, ча абзаседа нета сәрәкәва гьредайи нә. Хенщи ве йәке, ԝәʹдә башԛә кьн, сәва бьфькьрьн сәр рʹезед кӧ һун дьхуньн, у дьшьрмиш бьн кӧ чаԝа һун дькарьн әʹмьре хԝәда ԝан рʹеза бьдьнә хәбате. (Бьхунә Йешу 1:8.)

10. Ль гора Ибрани 5:14, чьрʹа де-бав гәрәке ԝәʹде ԛӧльхкьрьна тʹәви малбәте ԝәʹдә башԛә кьн, сәва зарʹед хԝә һин кьн чаԝа леколина бькьн?

¹⁰ Де-бав дьхԝазьн, ԝәки һәр һʹәфти Ԛӧльхкьрьна тʹәви Малбәте тʹәви зарʹед хԝә һʹәԝас дәрбаз кьн. Рʹаст ә де-бав гәрәке тʹьме пешда сафи кьн, кӧ ԝәʹде ԛӧльхкьрьна тʹәви малбәте чь шеԝьр кьн, йәкә әʹсә нинә ԝәки һәр гав тьштед мәзьн организә кьн у бь щурʹе мәхсус дәрбаз кьн. Де-бав дьбәкә ԝәʹде Ԛӧльхкьрьна тʹәви малбәте бәрнама һәр мәһи сәр JԜ Бродкастинге дьньһерʹьн, йан жи щара тьштед мәхсус саз дькьн, бәʹса хәбәре гәмийа Нӧһ ава дькьн. Ле хенщи ван тьшта, ӧса жи гәләк фәрз ә, кӧ зарʹа һин кьн чаԝа леколина бькьн. Зарʹ гәрәке һин бьн кӧ чаԝа хԝә бона щьвате һазьр кьн, ӧса жи һин бьн леколина бькьн, ԝәки бькарьбьн щаба ԝан пьрса бьдьн, кʹижан кӧ мәкʹтәбеда пешда тен. (Бьхунә Ибрани 5:14.) Һәрге әԝана һьнә ԝәʹде хԝә хәрщ кьн, сәва малда леколина бькьн, әԝ йәк ԝе али ԝан бькә, ԝәки һʹәԝаса ԝан пешда бе, сәва гӧһдар бьн у фәʹм кьн, кӧ чь те готьне щьватада у ӧса жи щьватед мәзьнда, кʹидәре кӧ нә һәр гав видео тенә нишанкьрьне. Де-бав гәрәке сафи кьн кӧ чьԛас ԝәʹдә хәрщ кьн сәр һәр леколинкьрьна тʹәви зарʹе, у һьлдьнә һʹәсаб сал, хәйсәт у фәрәсәтед зарʹед хԝә.

11. Чьрʹа фәрз ә ԝәки тʹәви кʹижана әм һинбуна Кʹьтеба Пироз дәрбаз дькьн, һин кьн кӧ хԝәха леколина бькьн?

¹¹ Әм тʹәви кʹе һинбуна Кʹьтеба Пироз дәрбаз дькьн, ԝана жи гәрәке һин кьн кӧ бьзаньбьн чаԝа леколина бькьн. Чахе әԝана тʹәзә һинбуна Кʹьтеба Пироз дәстпедькьн, әм ша дьбьн гава әԝана хԝә һазьр дькьн бона һинбуне йан жи щьвате, у щаба кʹьфш дькьн. Ле әм ӧса жи гәрәке ԝана һин кьн, кӧ чаԝа кʹур леколина бькьн. Ԝи щурʹәйи чахе әԝана рʹасти проблема бен, дәԝса жь хушк-бьра бьпьрсьн кӧ чь бькьн, әԝана ԝе һин бьн хԝәха әве информасийайе әʹдәбийәтед мәда бьгәрʹьн, кʹижан ԝе али ԝан бькә.

12. Чь нетед ԝә дькарьн һәбьн чахе леколина дькьн?

¹² Һәрге һун һʹьз накьн леколина бькьн,  дьбәкә дьфькьрьн, ԝәки леколинкьрьн ԝе тʹӧ щар ԝәрʹа һʹәԝас нибә. Ле ӧса нинә. Пешийе дәстпекьн ԝәхтәки кьн леколин бькьн у паше һеди-һеди ԝәʹде хԝә зедә кьн. Бир нәкьн нета ԝә чь йә бона леколинкьрьне. Нета ԝәйә сәрәкә гәрәке әԝ бә, кӧ һе незики Йаһоԝа бьн. Нетед ԝәйә дьн жи дькарьн әԝ бьн, кӧ щаба ԝан пьрса бьгәрʹьн, кʹижан кӧ данә ԝә, йан жи информасийа дәрһәԛа проблемәке кʹижан рʹасти ԝә һатийә.

13. а) Шьровәкьн, щаһьл дькарьн кʹижан гаве бавежьн, сәва бькарьбьн мәкʹтәбеда баԝәрийа хԝә шьровәкьн. б) Чаԝа һун дькарьн ширәта жь Колоси 4:6 бьдьнә хәбате?

¹³ Мәсәлә, һәрге тӧ щаһьл и, дьбәкә һәвалдәрсханед тә теорийа еволусийайе баԝәр дькьн. Фәʹмдари йә һун дьхԝазьн ԝанрʹа шьровәкьн, кӧ һун чьрʹа баԝәр дькьн, ԝәки мәрьв һатьнә әʹфьрандьне. Ле дьбәкә һун дьфькьрьн, ԝәки һуне нькарьбьн шьровәкьн. Ԝи чахи ԝәрʹа лазьм ә леколина бькьн! Ԝәʹде леколинкьрьне дӧ нетед ԝәйә сәрәкә гәрәке һәбьн: 1) Баԝәрийа хԝә ԛәԝи кьн, ԝәки Хԝәде һʹәму тьшт әʹфьрандийә у 2) һин бьн чаԝа һе рʹьнд шьровәкьн рʹастийа жь Хәбәра Хԝәде (Рʹом. 1:20; 1 Пәт. 3:15). Һун дькарьн пьрсе бьдьнә хԝә: «Һәвалдәрсханед мьн чахе пьштгьрийа теорийа еволусийайе бькьн, чь дькарьн бежьн?». Паше әʹдәбийәтед мәда леколина бькьн. Һун дькарьн әʹщебмайи бьминьн кӧ ча һеса йә мәрьварʹа дәрһәԛа баԝәрийа хԝә шьровәкьн. Һʹәчʹи зәʹф мәрьв еволусийайе баԝәр дькьн жь бо ве йәке, чьмки кәсәки кӧ әԝана ԛәдьре ԝи дьгьрьн, ԝанрʹа готийә кӧ әԝ рʹаст ә. Һәрге һун һәма тʹәне избаткьрьнәке йан дӧда ԝанрʹа бежьн, дьԛәԝьмә кӧ һун пе щаба хԝә али ԝан бькьн, йед кӧ дьхԝазьн рʹастийе пебьһʹәсьн. (Бьхунә Колоси 4:6.)

14-16. а) Чаԝа һун дькарьн һе зедә пебьһʹәсьн дәрһәԛа кʹьтебәкә Кʹьтеба Пироз, кʹижан кӧ ԝәрʹа рʹьнд нас нинә? б) Шьровәкьн кӧ ча бь сайа рʹезед маргинал, һун дькарьн дәрһәԛа кʹьтеба Амос һе зедә пебьһʹәсьн (Ӧса жи бьньһерʹьн чаргошә « Бьра Мәрьвед жь Кʹьтеба Пироз бона Ԝә Реали бьн»).

¹⁴ Бьдьнә бәр чʹәʹве хԝә, щьватеда ль гора бәрнаме те шеԝьркьрьне кʹьтебәкә бьчʹукә пʹехәмбәртийе жь Кʹьтеба Пироз, кʹижан кӧ ԝәрʹа рʹьнд нас нинә. Йа пешьн, һе зедә пебьһʹәсьн, кӧ әԝи пʹехәмбәри дәрһәԛа чь ньвисийә. Ле һун ча дькарьн ве йәке пебьһʹәсьн?

¹⁵ Йа пешьн, пьрсе бьдьнә хԝә: «Әз чь заньм дәрһәԛа ньвискʹаре ве кʹьтебе? Әԝ кʹе бу, кʹидәре дьжит у чь шьхӧл дькьр?». Һәрге әм пебьһʹәсьн, кӧ әԝ ньвискʹар жь кʹӧ бу, әме фәʹм кьн кӧ әԝи чьрʹа әԝ гьли, йан жи әԝ мәсәлә данә хәбате. Чахе һун Кʹьтеба Пироз бьхуньн, дина хԝә бьдьнә ԝан гьлийа, кʹижан кӧ хәйсәте ԝи ньвискʹари әʹйан дькьн.

¹⁶ Паше, ԝе баш бә һун пебьһʹәсьн әԝ кʹьтеб кʹәнге һатийә ньвисаре. Әԝе йәке һун дькарьн пебьһʹәсьн «Ԝәлгәрʹандьна Дьнйа Тʹәзәда», кӧ сәр щурʹә-щурʹә зьмана һәйә, хьлазийеда «Навәрока Кʹьтебед Кʹьтеба Пирозда». Хенщи ве йәке, һун дькарьн бьньһерʹьн брошура «Рʹебәри бона Һинбуна Кʹьтеба Пироз», әʹламәтийа бь нәхшда, сәр рʹупʹелед 14-17, кʹидәре рʹезкьри нә навед пʹехәмбәр у пʹадшед кӧ һьнге дьжитьн. Чахе һун кʹьтебәкә пʹехәмбәртийе леколин дькьн, ԝе баш бә кӧ пебьһʹәсьн чь дьԛәԝьми ԝи ԝәʹдәйи, чахе әԝ кʹьтеб дьһатә ньвисаре. Әԝи пʹехәмбәри щьмәʹт ширәт дькьр, кӧ хԝә жь кʹижан ньһерʹандьнед хьраб, йан жь кʹижан шьхӧла дур бьгьрьн? Ԝәʹде ԝида кʹе дьжит? Сәва дәрһәԛа әʹмьре ԝи һе зедә пебьһʹәсьн, дьԛәԝьмә ԝәрʹа лазьм бә кʹьтебед дьнда бьгәрʹьн. Мәсәлә, сәва һе кʹур фәʹм бькьн, кӧ чь дьԛәԝьми ԝәʹде  Амос пʹехәмбәр, ԝе баш бә һун бьхуньн рʹезед жь 2 Пʹадшати у 2 Дирок, кʹижан кӧ рʹезед маргинал ьн йед Амос 1:1. Хенщи ве йәке, һун дькарьн бьньһерʹьн ньвисаред Һосәйада, кӧ дьԛәԝьмә ԝәʹде Амосда дьжит. Әԝ һʹәму кани ԝе али ԝә бькьн, ԝәки рʹьнд фәʹм кьн кӧ Амос чь ԝәʹдәйида дьжит (2 Пʹадш. 14:25-28; 2 Дир. 26:1-15; Һос. 1:1-11; Амс. 1:1).

17-18. Пе мәсәлед абзаседа йан жи пе мәсәла хԝә, шьровәкьн кӧ чаԝа информасийед һур, дькарьн леколинкьрьна Кʹьтеба Пироз һе һʹәԝас кьн.

¹⁷ Чахе әм Кʹьтеба Пироз дьхуньн, ԝе баш бә кӧ бьхԝазьн һе зедә пебьһʹәсьн. Бәʹса хәбәре, һун дьхуньн пʹехәмбәртийа жь Зәкәрйа сәре 12, кʹидәре те пʹехәмбәртикьрьне дәрһәԛа мьрьна Мәсиһ (Зәкәр. 12:10). Чахе һун гьһиштьнә рʹеза 12, һун дьхуньн ԝәки «әшира мала Натʹан», демәк малбәта ԝи, бона мьрьна Мәсиһ ԝе гәләк бьгьри у бәрхԝә кʹәвә. Дәԝса кӧ әԝ информасийа бьчʹук пьшт гӧһе хԝәва бавежьн, һун дьсәкьньн у пьрсе дьдьнә хԝә: «Ортʹа мала Натʹан у Мәсиһда, чь һәвгьредан һәйә? Гәло дәрһәԛа ве йәке һе зедә информасийа һәйә?» Ньһа һун леколине дәстпедькьн, чьмки дьхԝазьн ве йәке пебьһʹәсьн. Рʹеза маргинал ԝә дьбә бәрбь 2 Самуйел 5:13, 14, жь кʹидәре һун педьһʹәсьн, ԝәки Натʹан кӧрʹе Даԝьд Пʹадша бу. Рʹеза маргинала дӧда Луԛа 3:23, 31 йә, кʹижан кӧ әʹйан дькә, ԝәки Натʹан кал-баве Мәрйәме бу (Бьньһерʹә «Бьрща Ԛәрәԝьлийе», Тʹәбах 2017, рʹупʹела 32, абзаса 4). Һун әʹщебмайи дьминьн! Һун заньн ԝәки ль гора пʹехәмбәртийе, Иса гәрәке жь рʹькʹьнийата Даԝьд бьһата (Мәт. 22:42). Ле кӧрʹед Даԝьд 20 зедәтьр бун. Ньһа ԝәрʹа фәʹмдари йә, кӧ чьрʹа Зәкәрийа хут бәʹса малбәта Натʹан кьр, ԝәки ԝе шина Иса бькьн, чьмки Иса жь рʹькʹьнйата ԝи бу.

 ¹⁸ Дина хԝә бьдьнә, мәсәләкә дьн. Әм кʹьтеба Луԛа сәре пешьнда дьхуньн дәрһәԛа мьлйакʹәт Щьбрайил, кʹижан кӧ тʹәсәлийа Мәрйәме кьр, у жерʹа дәрһәԛа кӧрʹе кӧ гәрәке жерʹа бе буйине, гот: «Әԝе мәзьн бә у Кӧрʹе Йе Һәри Жорьн ԝе бе готьне. У Хӧдан Хԝәде ԝе тʹәхте баве ԝи Даԝьд бьдә ԝи. Әԝе һʹәта-һʹәтайе пʹадшатийе сәр мала Аԛуб бькә» (Луԛа 1:32, 33). Әм дьбәкә һʹәчʹи зәʹф дина хԝә дьдьнә сәр гьлийе ԝийи пешьн, кӧ дьбежә ԝәки сәр Иса ԝе бе готьне «Кӧрʹе Йе Һәри Жорьн». Ле Щьбрайил ӧса жи пʹехәмбәрти кьр, ԝәки Иса ԝе «пʹадшатийе . . . бькә». Дьбәкә әм ньһа дьшьрмиш дьбьн, кӧ гьлийед Щьбрайил чь дьһатьнә һʹәсабе бона Мәрйәме. Гәло дьԛәԝьмә әԝ дьфькьри кӧ гьлийед ԝи тенә һʹәсабе, ԝәки Иса ԝе щийе Пʹадша Һеродәс бьгьрә, йан жи ԝе бьбә мәрьве паши ԝи у сәрԝертийе сәр Исраеле бькә? Ԝәки Иса бьбуйа пʹадша, ԝе Мәрйәм бьбуйа дийа пʹадше, у малбәта ԝе ԛәсьреда бьжита. Ле тʹӧ щики найе готьне, ԝәки Мәрйәме дәрһәԛа ве йәке һәма гьлик Щьбрайилрʹа готийә, у нә жи тʹӧ щики ньвисар ә, кӧ әԝе хԝәстийә Пʹадшатийеда щийе бьльнд бьгьрә, чаԝа дӧ шагьртед Иса хԝәстьн (Мәт. 20:20-23). Әԝ информасийа бьчʹук дьдә кʹьфше, ԝәки Мәрйәм рʹасти жи мәрьвәкә мьлук у шкәсти бу!

19-20. Чаԝа Аԛуб 1:22-25 у 4:8-да те готьне, нета леколинкьрьне чь йә?

¹⁹ Әм гәрәке бир нәкьн, ԝәки нета мәйә сәрәкә, кӧ чьрʹа әм Хәбәра Хԝәде у әʹдәбийәтед мә леколин дькьн, әԝ ә, кӧ әм незики Йаһоԝа бьн. Әм ӧса жи дьхԝазьн һе рʹьнд бьвиньн, кӧ әм мәрьвнә ча ньн у бьзаньбьн нав хԝәда чь гӧһастьна бькьн, сәва дьле Хԝәде ша кьн. (Бьхунә Аԛуб 1:22-25; 4:8.) Һәр гав чахе әм дәстпедькьн леколина бькьн, әм гәрәке жь Йаһоԝа рʹӧһʹе ԝийи пироз бьхԝазьн. Әм гәрәке жь Йаһоԝа һиви кьн, сәва али мә бькә, кӧ бь тʹәмами кʹаре бьстиньн жь леколине, у тедәрхьн кӧ әԝ дьхԝазә әм чьда бенә гӧһастьне.

²⁰ Ԝәрә әм гьшк чʹәʹв бьдьнә ԝи мәрьви, дәрһәԛа кʹижани зәбурбеж ньвиси: «Шабуна ԝи һинкьрьна Хӧданда йә, шәв у рʹож сәр ве һинкьрьне кʹур дьфькьрә. . . . [Әԝ] чь жи дьхԝазә мийасәр дьбә» (Зәб. 1:2, 3).