1. Хәбәра Хԝәде чь мә һин дькә?

ӘМ Дькарьн һәр чәтьнайикеда чʹаре бьвиньн, чьмки Йаһоԝа йә Мамостайе мәйи Һәри мәзьн (Иша. 30:20, 21). Хәбәра Ԝи али мә дькә, сәва әм һаш һʹәму тьшти һәбьн у «бона һʹәму кьрьнед ԛәнщ һазьр сәкьни» бьн (2 Тимтʹ. 3:17). Чахе әм ль гора һинкьрьнед Кʹьтеба Пироз дьжин, әм жь мәрьвед кӧ пе «сәрԝахтийа ве дьнйайе» дьжин, сәрԝахттьр дьбьн (1 Корн. 3:19; Зәб. 119:97-100).

2. Ве готареда әме чь шеԝьр кьн?

² Ве готареда әме пебьһʹәсьн, кӧ ча сәрԝахтийа ве дьнйайе, мәрьва һелан дькә пәй хԝәстьнед хԝә кʹәвьн. Мәрʹа нәһеса йә чʹәʹв нәдьнә ньһерʹандьн у рʹабун-рʹуньштьна мәрьвед ве дьнйайе, ләма жи Кʹьтеба Пироз бадиһәԝа набежә: «Һаш жь хԝә һәбьн, нәбә кӧ йәк бь сәрԝахтийа дәрәԝә пʹучʹ дьле ԝә бькә һесир. Әԝ жь әʹдәтед мәрьва . . . тен» (Колс. 2:8). Әме ӧса жи шеԝьр кьн, кӧ чаԝа дӧ дәрәԝед пʹучʹ, дьнйайеда гәләк бәлабуйи бунә. Һәр дӧ дәрәщада әме бьвиньн, кӧ чьрʹа сәрԝахтийа ве дьнйайе беһʹьши йә, у чаԝа сәрԝахтийа Хәбәра Хԝәде жь һәр тьшти кӧ әв дьнйа дьдә, четьр у бьльндтьр ә.

3-4. Дәстпека ԛьрʹна 20-да, Амәрикайеда ньһерʹандьна щьмәʹте һьндава намусийе ча һатә гӧһастьне?

³ Амәрикайеда дәстпека ԛьрʹна 20-да ньһерʹандьна мәрьва сәр намусийе, гәләк һатийә гӧһастьне. Пешийа ве йәке, мәрьв дьфькьрин, ԝәки секс гәрәке тʹәне ортʹа жьн-мерда бә, у щурʹәки майин нә жи дьфькьрин. Ле әԝ ньһерʹандьн бәтавәбу у ньһерʹандьнәкә дьн бәла бу, кӧ кʹе ча дьхԝазә ӧса бьжи.

 ⁴ Паши Шәрʹе Һʹәмдьнйайе йа йәке, салед 1920-1929 пе ве йәке әʹйан бун, кӧ ԝи ԝәʹдәйи рʹабун-рʹуньштьна мәрьва у ньһерʹандьна ԝан сәр сексе лаптә һатә гӧһастьне. Леколинкʹарәк гьли дькә: «Синәм, театьр, кʹьлам, роман, у рекламада, ида тьштед сексуали әʹйан дькьрьн». Һьнге ӧса жи щурʹе рʹәԛаса һатә гӧһастьне, кʹижана мәрьв һелан дькьрьн бәрбь сексе. Мәрьва кʹьнщхԝәкьрьна хԝә жи гӧһастьн, у ида нәщайиз хԝә дькьрьн. Чаԝа Кʹьтеба Пирозда һатьбу пʹехәмбәртикьрьне, нишанәкә рʹожед ахьрийе ԝе әԝ буйа, кӧ мәрьв бьбьнә «рʹьһʹәтиһʹьз» (2 Тимтʹ. 3:4).

5. Паши сала 1960, дәрһәԛа намусийе ньһерʹандьна мәрьва ча һатә гӧһастьне?

⁵ Паши сала 1960, бона мәрьва бу тьштәки нормал, ԝәки жьн-меред кӧ һәврʹа зәԝащеда ниньн, тʹәвайи бьжин. Һомосексуали у һәвԛәтандьн жи гәләк бәла бу. Филмада, рекламада у тьштед дьнда кʹижанава мәрьв мьжул дьбун, секс ида дьһа әʹйан нишан дькьрьн. Бәле, мәрьва ида принсипед намусийе пьшт гӧһе хԝәва давитьн. Ле һьнгеда һʹәта рʹожа иройин, ахьрийа ве йәке чь йә? Ньвискʹарәки ньвиси, ԝәки жь бо ве йәке кӧ мәрьв дәрһәԛа намусийе ида нафькьрьн, гәләк проблем пешда тен. Мәсәлә, жьн мер зу һәв дьԛәтьн, де йан бав тʹәне зарʹа хԝәй дькьн, мәрьв емосийалида һе хьраб дьбьн, порнографийайева гьредайи дьбьн, у диса чәтьнайед дьн пешда тен. Нәхԝәшийед жь бо һәләԛәтийа сексуали жи бәла бунә, мәсәлә ӘЙДЗӘ (нәхԝәшийа спид). Әԝ тʹәне нишанәкә, кӧ дьдә кʹьфше, ԝәки сәрԝахтийа ве дьнйайе беһʹьши йә (2 Пәт. 2:19).

6. Чьрʹа ньһерʹандьна мәрьва сәр сексе, дьле Шәйтʹан те?

⁶ Ньһерʹандьна ве дьнйайе сәр сексе, гәләк Шәйтʹан хԝәш те. Әԝ ша дьбә ԝәки мәрьв сексе алийе хьрабда дьдьнә хәбате, у әве пʹешкʹеша зәԝаще кӧ Хԝәде дайә, нашекьриньн (Әфәс. 2:2). Бенамуси нә тʹәне беһӧрмәт дькә пʹешкʹеша зарʹанине, кӧ жь Хԝәде йә, ле ӧса жи дькарә рʹе мәрьва бьгьрә, ԝәки жийина һʹәта-һʹәтайе бьстиньн (1 Корн. 6:9, 10).

7-8. Чьрʹа ньһерʹандьна Кʹьтеба Пироз дәрһәԛа һәләԛәтийа сексуали лайиԛ у кʹар ә?

⁷ Мәрьвед кӧ сәрԝахтийа ве дьне ԛәбул дькьн, дькʹәньн сәр принсипед Кʹьтеба Пироз дәрһәԛа намусийе, чьмки дьфькьрьн кӧ нәреали йә ԝан принсипа  биньн сери. Мәрьвед ԝи щурʹәйи пьрсе дьдьнә хԝә: «Чьрʹа Хԝәде пе хԝәстьнед сексуали әм әʹфьрандьнә, у паше мәрʹа дьбежә, ԝәки пәй ԝан хԝәстьна нәчьн?» Әԝ пьрс бал ԝан пешда те, чьмки ньһерʹандьна ԝан нәрʹаст ә. Әԝана дьфькьрьн кӧ дьле мәрьв чь дьхԝазә, гәрәке ве жи бькә. Ле Кʹьтеба Пироз щурʹәки майин һин дькә. Әԝ һин дькә кӧ әм гәрәке пәй һәр хԝәстьнед хԝә нәчьн у хԝә контрол кьн (Колс. 3:5). Хенщи ве йәке, Йаһоԝа мәрьвед зәԝьщирʹа пʹешкʹеш дайә, сәва бькарьбьн һʹәԝщед хԝәйә сексуали лайиԛ рʹази кьн (1 Корн. 7:8, 9). Бь сайа ве йәке, жьн-мер зәԝащеда жь сексе ләзәте дьстиньн, у бәрхԝә накʹәвьн бона ԝан тьшта, сәва кʹижана мәрьвед кӧ бенамусийе дькьн, бәрхԝә дькʹәвьн.

⁸ Бәле, Кʹьтеба Пироз дәрһәԛа сексе ньһерʹандьна рʹаст һин дькә у дьбежә, ԝәки һәләԛәтийа ортʹа жьн-мер ләзәте тинә (Мәтʹлк. 5:18, 19). Ле әԝ ӧса жи дьбежә: «Бьра жь ԝә һәр кәс жи заньбә ԛальбе хԝә һʹәлал у бь намуси хԝәй кә, нә бь хԝәстьна тәме хьраб, мина пʹутпʹарьста, йед кӧ Хԝәде нас накьн» (1 Теслн. 4:4, 5).

9. а) Дәстпека ԛьрʹна 20-да, чь али щьмәʹта Йаһоԝа кьр, кӧ хԝә ль сәрԝахтийа Хәбәра Хԝәде бьгьрьн? б) Кʹижан ширәта билан те готьне 1 Йуһʹәнна 2:15, 16-да? в) Чь кьред бенамуси Рʹомайи 1:24-27-да тенә рʹезкьрьне, жь кʹижана әм гәрәке хԝә дур бьгьрьн?

⁹ Ԝәʹде дәстпека ԛьрʹна 20, щьмәʹта Хԝәде нәкʹәтә бәр байе ньһерʹандьна пʹучʹ, йа мәрьвед кӧ «шәрма рʹуйе хԝә ӧнда кьрьнә» (Әфәс. 4:19). Әԝана һәр тьшт дькьрьн сәва хԝә ль принсипед Йаһоԝа бьгьрьн. «Бьрща Ԛәрәԝьлийеда» йа мәһа 15 Гӧлане, сала 1926, дьһатә готьне ԝәки «һәр мер у һәр жьн, гәрәке тʹәмьз бә у намус бә, һьн фькьрада һьн жи кьред хԝәда, илаһи жьн һьндава мерада, у мер һьндава жьнада». Щьмәʹта Йаһоԝа чʹәʹв нәдьда мәрьвед дор бәре хԝә, у пе сәрԝахтийа һәри бьльнд дьжитьн, демәк пе сәрԝахтийа Хәбәра Хԝәде. (Бьхунә 1 Йуһʹәнна 2:15, 16.) Рʹасти жи әм чьԛас рʹази нә бона Хәбәра Хԝәде! Әм ӧса жи рʹази нә, кӧ Йаһоԝа ԝәʹдәда хԝарьна рʹӧһʹани дьдә мә, сәва әм алийе намусийеда, * нәкʹәвьнә бәр байе сәрԝахтийа ве дьнйайе. (Бьхунә Рʹомайи 1:24-27.)

10-11. Кʹьтеба Пирозда дәрһәԛа рʹожед ахьрийе чь һатийә готьне?

¹⁰ Кʹьтеба Пирозда пешда һатийә готьне, кӧ рʹожед ахьрийеда мәрьв ԝе бьбьнә «хԝәһʹьз» (2 Тимтʹ. 3:1, 2). Әм әʹщебмайи наминьн, ԝәки иро әԝ дьнйа мәрьва һелан дькә, кӧ хԝәһʹьз бьн. Әнсиклопедийакеда те готьне, ԝәки салед 1970-1979-да, кʹьтебед ӧса бәлабуйи бун, кʹижана ширәт дьһатьнә дайине, ԝәки чаԝа әʹмьре хԝәда пешдачуйи бьн. Һьнә кʹьтеба, «хԝәндәван һелан дькьрьн, ԝәки нәлазьм ә бенә гӧһастьне, у нәфькьрьн ԝәки тьштәки хьраб нав ԝанда һәйә». Мәсәлә, дина хԝә бьдьне, кʹьтебәкеда чь дьһатә готьне: «Хԝә һʹьз бькә, чьмки тӧ нава дьнйайеда кәсе лапи бәдәԝ, һежа у мәхсус и». Ве кʹьтебеда ӧса жи дьһатә готьне, ԝәки мәрьв гәрәке хԝәха сафи кә, кӧ ча рʹабә-рʹуне у ве йәке бькә чь кӧ әԝ һʹәсаб дькә рʹаст ә у ча жерʹа дәст дьдә.

¹¹ Ньһерʹандьна ԝи щурʹәйи дьбәкә ԝәрʹа нас ә. Шәйтʹан Һеԝа һәма бәрбь ԝе йәке һелан кьр. Әԝи готә ԝе, кӧ әԝ дькарә «мина Хԝәде, ԛәнщи у хьрабийе» жь һәв дәрхә (Дәстп. 3:5). Иро гәләк мәри ӧса бабах ьн, ԝәки һʹәсаб дькьн кӧ тʹӧ кәс, һәла  һе Хԝәде жи, нькарә ԝанрʹа бежә чь рʹаст ә у чь хьраб ә. Мәсәлә, ньһерʹандьна ԝи щурʹәйи илаһи те кʹьфше ве йәкеда, кӧ мәрьв ча дьньһерʹьн сәр зәԝаще.

12. Әԝ дьнйа сәр зәԝаще ча дьньһерʹә?

¹² Кʹьтеба Пироз тʹәмийе дьдә мер у жьна, ԝәки һӧрмәте бьдьнә кʹьфше һьндава һәвдӧ у ӧса жи һьндава сонда зәԝаща хԝә. Кʹьтеба Пироз ӧса жи жьн-мера һин дькә, ԝәки әԝана борщдар ьн тʹәвайи бьн у һәв нәԛәтьн: «Мере де у баве хԝә бьһелә, хԝә ль жьна хԝә бьгьрә у бьбьнә бәдәнәк» (Дәстп. 2:24). Ле әԝед кӧ пе сәрԝахтийа ве дьнйайе дьжин, щурʹәки майин дьфькьрьн. Әԝана дьбежьн, ԝәки һәр кәс гәрәке бона хԝә у һʹәԝщед хԝә бьфькьрә. Кʹьтебәкеда дәрһәԛа һәвԛәтандьне һатийә готьне, ԝәки сонда зәԝаще, кӧ жьн-мер һәвдӧрʹа дьдьн у дьбежьн «һʹәта әм сах бьн», һьнә ԝәлатада ӧса һатийә гӧһастьне, «һʹәта әм һәв һʹьз бькьн». Әв ньһерʹандьна сьвьк сәр зәԝаще, бе һʹәсаб малбәта һьлдьшинә у ешәкә мәзьн тинә. Бешьк дькарьн бежьн, ԝәки ньһерʹандьна ве дьнйайе сәр зәԝаще, беһʹьши йә.

13. Мәʹник чь йә кӧ мәрьвед бабах бәр чʹәʹве Хԝәде рʹәш ьн?

¹³ Кʹьтеба Пироз дьбежә: «Хӧдан жь һʹәму кʹӧбар-бабаха зьвер ә» (Мәтʹлк. 16:5). Чьрʹа мәрьвед бабах бәр чʹәʹве Йаһоԝа рʹәш ьн? Мәʹник әԝ ә, кӧ әԝед кӧ дьбьнә хԝәһʹьз у бабах, чʹәʹв дьдьнә бабахийа Шәйтʹан. Бьдьнә һʹәсабе хԝә, Шәйтʹан дьфькьри, ԝәки Иса, бь сайа кʹижани Хԝәде һʹәму тьшт әʹфьранд, гәрәке сәре хԝә бәр ԝи дайнә у ԝи бьһʹәбинә! (Мәт. 4:8, 9; Колс. 1:15, 16). Мәрьвед кӧ хԝәһʹьз у бабах ьн, дьфькьрьн кӧ сәрԝахт у билан ьн, ле чʹәʹве Хԝәдеда әԝана бефәʹм ьн.

14. Чаԝа Рʹомайи 12:3 али мә дькә, ԝәки дәрһәԛа хԝә рʹаст бьфькьрьн?

¹⁴ Кʹьтеба Пироз мә һин дькә, ԝәки әм гәрәке дәрһәԛа хԝә ча бьфькьрьн. Әԝ дьбежә ԝәки ве йәкеда хьраби тʹӧнә, һәрге әм рʹаст хԝә һʹьз бькьн. Иса гот «һәвале  хԝә ԝәкә хԝә һʹьз бькә». Әԝ йәк дьдә кʹьфше, ԝәки әм гәрәке бона хԝә жи бьфькьрьн (Мәт. 19:19). Ле Кʹьтеба Пироз һин накә, ԝәки әм гәрәке хԝә сәр мәрьварʹа бьгьрьн. Дәԝсе әԝ дьбежә: «Тьштәки бь һәврʹькʹийе нәкьн у ль наве хԝә нәгәрʹьн, ле жь ԝә һәр йәк бь мьлуктийе һәвале хԝә сәр хԝәрʹа бьгьрә» (Фили. 2:3; бьхунә Рʹомайи 12:3.)

15. Бь тʹәхмина ԝә чьрʹа ньһерʹандьна Кʹьтеба Пироз сәр хԝәһʹьзийе, керһати йә?

¹⁵ Иро гәләк мәрьвед кӧ хԝә аԛьл һʹәсаб дькьн, сәр ве ширәта Кʹьтеба Пироз дькʹәньн. Әԝана дьбежьн, кӧ һәрге тӧ хԝә сәр мәрьварʹа нәгьри, тӧйе бьби мәрьвәки сьст, у мәрьв ԝе тә бона кʹара хԝә бьдьнә хәбате. Ле гәло ахьрийа ве ньһерʹандьна дьнйа Шәйтʹан чь йә? Әм чь дьвиньн? Мәрьвед хԝәһʹьз, йан жи нәфәред ԝан ԛә бәхтәԝар ьн? Ԛә һәвалед ԝани рʹаст һәнә? Һәләԛәтийа ԝан тʹәви Хԝәде незик ә? Бь тʹәхмина ԝә, чь һе ахьрийа баш тинә, сәрԝахтийа ве дьнйайе, йан сәрԝахтийа жь Хәбәра Хԝәде?

16-17. Сәва чь әм гәрәке рʹази бьн жь Хԝәде у чьрʹа?

¹⁶ Әԝед кӧ пәй сәрԝахтийа мәрьвед ве дьнйайе дьчьн, мина туристәки нә, кʹижан кӧ жь туристәки дьн дьпьрсә, ԝәки рʹе нишани ԝи кә, ле һәрдӧ жи ӧнда бунә. Иса дәрһәԛа мәрьвед «сәрԝахт» йед һьнге, гот: «Әԝә кор ьн у рʹебәре кора нә. Һәгәр кор рʹебәрийе кора бькә, һәр дӧйе жи бькʹәвьнә чʹәʹле» (Мәт. 15:14). Бь рʹасти жи, сәрԝахтийа ԝе дьнйайе бәр сәрԝахтийа Хԝәде, бефәʹмти йә.

¹⁷ Ширәта Кʹьтеба Пироз, тʹьме «керһати йә бона һинкьрьне, леһьлатьне, рʹасткьрьне у ширәткьрьна жийина рʹастийеда» (2 Тимтʹ. 3:16). Әм гәләк жь Йаһоԝа рʹази нә, ԝәки әԝ бь сайа тʹәшкиләта хԝә, мә жь сәрԝахтийа ве дьнйайе хԝәй дькә! (Әфәс. 4:14). Хԝарьна рʹӧһʹани кӧ әԝ дьдә мә, ԛәԝате дьдә мә сәва әм хԝә ль принсипед жь Хәбәра ԝи бьгьрьн. Рʹасти жи әԝ ԛәдьрәки чьԛас мәзьн ә бона мә, ԝәки Йаһоԝа пе Хәбәра хԝә сәрԝахтийа лапә баш мә һин дькә!