1-3. а) Ль гора Зәбур 5:4-6, Йаһоԝа ча дьньһерʹә сәр хьрабийе? б) Чьрʹа әм дькарьн бежьн, ԝәки зорбәтийа һьндава зарʹа мьԛабьли «ԛануна Мәсиһ» ә?

ҺӘР щурʹә хьраби, бәр чʹәʹве Йаһоԝа Хԝәде рʹәш ә! (Бьхунә Зәбур 5:4-6.) Бьдьнә һʹәсабе хԝә, илаһи зорбәтийа сексуали һьндава зарʹа, бәр чʹәʹве Ԝи чьԛас һʹәрам ә у тьштәки ча бехԝәдети йә! Әм чаԝа Шәʹдед Йаһоԝа, чʹәʹв дьдьнә Ԝи у нәфрʹәт дькьн зорбәтийа сексуали һьндава зарʹа у нава щьвата Мәсиһитида тʹӧ щар чʹәʹве хԝә сәр ве йәке данадьн (Рʹом. 12:9; Ибрн. 12:15, 16).

² Һәр щурʹә зорбәтийа һьндава зарʹа бь тʹәмами мьԛабьли «ԛануна Мәсиһ» йә! (Галт. 6:2). Чьрʹа әм ӧса дьбежьн? Чаԝа готара пешийа веда әм пеһʹәсийан, ԛануна Мәсиһ, демәк һʹәму тьшт чь кӧ Иса һьн пе гьлийа һьн жи пе шьхӧлед хԝә һин дькьр, сәр һʹиме һʹьзкьрьн у һәԛийе бу. Мәсиһийед рʹаст ль гора ве ԛануне дьжин, у һьндава зарʹа ӧса ньн, ԝәки зарʹ тʹәхмин кьн кӧ ԝана дьбьнә хԝәйи у ԝана һʹьз дькьн. Ле зорбәтийа һьндава зарʹа әԝ һәйә тьштәки хԝәһʹьзийева гьредайи, нәрʹасти у хьраби, жь бо чь жи зарʹ хԝә ӧса тʹәхмин дькә, кӧ кәс ле набә хԝәйи у һʹьз накә.

³ Йазьх, зорбәтийа сексуали һьндава зарʹа гәләк бәлабуйи йә, у Мәсиһийед рʹаст жи рʹасти ве хьрабийе һатьнә. Чьрʹа? Чьмки «мәрьвед хьрабә хԝәйифел» тʹьжә нә, у һьнәк дькарьн бькʹәвьнә нава щьвате жи (2 Тимтʹ. 3:13). Хенщи ве йәке, һьнә мәрьвед дӧрʹу, йед кӧ хԝә дьдьнә кʹьфше ԝәки әԝана пʹара щьвате нә, кʹәтьнә бьн байе хԝәстьна бәдәнейә мьрдар, у зарʹ хьраб кьрьнә. Ԝәрә әм шеԝьр кьн, кӧ чьрʹа зорбәтийа сексуали һьндава зарʹа гӧнәки гәләк гьран ә. Паше әме шеԝьр кьн, кӧ рʹуспи чь дькьн чахе щьватеда кәсәк гӧне гьран дькә, дькʹәвә нава ве йәке ӧса жи зорбәтийа сексуали һьндава зарʹа. Ӧса жи  әме пебьһʹәсьн чаԝа де-бав дькарьн зарʹед хԝә хԝәй кьн. *

4-5. Чьрʹа зорбәти һьндава зарʹе гӧне мәзьн ә бәр зарʹе?

⁴ Зорбәтийа сексуали һьндава зарʹа, ахьрикә гәләк хьраб тинә у әԝ зийан дьреж дькʹьшинә. Әԝ йәк хенщи кӧ сәр зарʹа гәләк хьраб һʹӧкӧм дьбә, ӧса жи сәр нәфәред ԝан у хушк-бьред щьвате һʹӧкӧм дьбә, йед кӧ бона ԝан хәм дькьн. Зорбәтийа ӧса гӧнәки гәләк гьран ә.

⁵ Әԝ йәк гӧне мәзьн ә һьндава зарʹе. Әԝ гӧнәки ӧса йә, кӧ дәрд-кӧла у зийане тинә мәрьварʹа. Чаԝа әме готара дьнда пебьһʹәсьн, әԝе кӧ зорбәтийе зарʹе дькә, зийанәкә гәләк мәзьн дьдә зарʹе у әʹмьре ԝи хьраб дькә. Пе кьре хԝәйи зӧлм, әԝ итʹбарийа зарʹе ӧнда дькә, у зарʹ ида хԝә бехоф тʹәхмин накә. Әм гәрәке зарʹа жь кьре ԝи щурʹәйи хԝәй кьн, ӧса жи бәрдьлийе у аликʹарийе бьдьнә ԝан зарʹа, йед кӧ рʹасти ве хьрабийе һатьнә (1 Тʹеслн. 5:14).

6-7. Чь щурʹәйи зорбәтийа һьндава зарʹа гӧне мәзьн ә һьндава щьвате у сәрԝеред дәԝләте?

⁶ Әԝ йәк гӧне мәзьн ә һьндава щьвате. Һәрге кәсәк жь щьвате, те нәһәԛкьрьне ве йәкеда кӧ һьндава зарʹе зорбәтийа сексуали кьрийә, әԝ наве щьвате хьраб дькә (Мәт. 5:16; 1 Пәт. 2:12). Әԝ йәк нәрʹастийа мәзьн ә һьндава бь милйона Мәсиһийед амьн, йед кӧ бона баԝәрийа хԝә «шәрʹе хԝә» дькьн, демәк һәр тьшти дькьн сәва наве Йаһоԝа рʹумәт кьн! (Щьһуд. 3). Әм тʹӧ щар наһельн, кӧ щьватеда әԝ мәрьв бьминьн, йед кӧ хьрабийе дькьн, ле тʹобә накьн у наве щьвате хьраб дькьн.

⁷ Әԝ йәк гӧне мәзьн ә һьндава сәрԝеред дәԝләте. Мәсиһи гәрәке «гӧрʹа . . . һʹӧкӧмәтийада» бьн (Рʹом. 13:1). Чахе әм ԛанунед дәԝләте тиньн сери, әм избат дькьн кӧ гӧрʹа ԝанда ньн. Һәрге кәсәк жь щьвате ԛануна дәԝләте тʹәрʹьбандийә, мәсәлә зорбәтийа сексуали һьндава зарʹе кьрийә, әԝи һьндава сәрԝеред дәԝләте гӧнә кьрийә (Бәрамбәр кьн Кʹаред Шандийа 25:8). Рʹаст ә изьна рʹуспийа тʹӧнә пе ԛануна дәԝләте кәсәки щәза кьн, ле әԝана ԝи мәрьве кӧ зорбәтийа зарʹе кьрийә, жь щәзакьрьна дәԝләте хԝәй накьн (Рʹом. 13:4). Әԝ мәрьв чь дьчинә, ве жи дьчьнә (Галт. 6:7).

8. Йаһоԝа ча дьньһерʹә сәр ве йәке, чахе мәрьв һьндава һәвдӧ гӧнә дькьн?

⁸ Йа лапә хьраб әԝ ә, кӧ зорбәтийа ӧса бәр Хԝәде гӧнәки гьран ә (Зәб. 51:4). Чахе мәрьв һьндава мәрьве майин гӧнә дькә, әԝ ӧса жи бәр Йаһоԝа гӧнә дькә. Дина хԝә бьдьнә мәсәләкә жь Ԛануне, кӧ Хԝәде дабу Исраелийа. Ԛанунеда дьһатә готьне, кӧ һәрге мәрьв мәрьвәки дьн шеландийә, йан жи һьндава ԝида ԛәлпи кьрийә, әԝи «борще хԝә ль бәр Хӧдан» нәԛәдандийә, демәк һьндава Хԝәде нәамьни дайә кʹьфше (Ԛан. Кʹаһ. 6:2-4). Бәле, һәрге кәсәк жь щьвате зорбәти зарʹе кьрийә, жь бо чь жи зарʹ ида бехофийе тʹәхмин накә, әԝ һьндава Хԝәде нәамьн ә. Әԝ ӧса жи наве Йаһоԝа гәләк беһӧрмәт дькә. Бәле, зорбәти һьндава зарʹа, бәр Хԝәде гӧнәки гәләк мәзьн у һʹәрам ә.

9. Тʹәшкиләта Йаһоԝа нава гәләк салада кʹижан информасийа сәр һʹиме Кʹьтеба Пироз дьдә у чьрʹа?

⁹ Нава гәләк салада тʹәшкиләта Йаһоԝа, дәрһәԛа зорбәтийа һьндава зарʹа гәләк информасийа дайә. Мәсәлә, готарада жь  «Бьрща Ԛәрәԝьлийе» у «Һʹьшйар Бьн!», дьһатә готьне, кӧ ча әԝ зарʹ зорбәти кʹижана кьрьнә, дькарьн бәр ԝи дәрди тәйах кьн, ча мәрьвед дьн дькарьн али ԝан бькьн у дьлбинийе бьдьнә ԝан, у ча де-бав дькарьн зарʹед хԝә хԝәй кьн. Рʹуспи сәр һʹиме Кʹьтеба Пироз, һур бь һур рʹебәри дьстиньн, кӧ чь гәрәке бькьн чахе кәсәки зорбәти зарʹа кьрийә. Тʹәшкиләт бәрдәԝам дькә леколин кә, кӧ щьват гәрәке чь бькьн, чахе педьһʹәсьн дәрһәԛа зорбәтийа сексуали һьндава зарʹа. Ле чьрʹа? Сәва кӧ һʹәму рʹуспи ԛануна Мәсиһ биньн сери, кӧ бь һʹьзкьрьне у һәԛийе һәр тьшти бькьн, гава рʹасти ве дәрәще бен.

10-12. а) Чахе рʹуспи педьһʹәсьн, ԝәки гӧнәки гьран һатийә кьрьне, әԝана чь бир накьн, у нета ԝанә сәрәкә чь йә? б) Ль гора Йуһʹәнна 5:14, 15, рʹуспи алийе хԝәда чь дькьн?

¹⁰ Чахе рʹуспи педьһʹәсьн, кӧ кәсәки гӧне гьран кьрийә, әԝана бир накьн, ԝәки ԛануна Мәсиһ дәʹԝа дькә, кӧ тʹәви кәрийе пез гәрәке бь һʹьзкьрьн бьн. Әԝана ӧса жи гәрәке ве йәке бькьн, чь кӧ бәр чʹәʹве Хԝәде рʹаст у һәԛ ә. Ләма жи чахе әԝана педьһʹәсьн, кӧ кәсәки гӧне гьран кьрийә, әԝана гәрәке дәрһәԛа гәләк тьшта кʹур бьфькьрьн. Нета ԝанә лапә фәрз әԝ ә, ԝәки Йаһоԝа һӧрмәт бә у наве ԝи бе рʹумәткьрьне (Ԛан. Кʹаһ. 22:31, 32; Мәт. 6:9). Әԝана ӧса жи хәм дькьн бона рʹӧһʹанийа хушк-бьред щьвате, у дьхԝазьн али ԝан бькьн, һьндава кʹижанада гӧне гьран һатийә кьрьне.

¹¹ Һьн жи, һәрге кәсәк, йе кӧ пʹара щьвате йә, гӧне гьран кьрийә, рʹуспи гәрәке тедәрхьн һәла әԝ бь рʹасти пʹошман буйә у тʹобә дькә йан на. Һәрге әре, рʹуспи һʹәму тьшти дькьн, сәва али ԝи бькьн, ԝәки әԝ һәләԛәтийа хԝә тʹәви Йаһоԝа диса вәгәрʹинә. (Бьхунә Аԛуб 5:14, 15.) Мәсиһийе кӧ пәй хԝәстьна хьраб кʹәтийә у гӧне гьран кьрийә, рʹӧһʹанида нәхԝәш ә. Әԝ те һʹәсабе, ԝәки әԝи һәләԛәтийа хԝә тʹәви Йаһоԝа хьраб кьрийә. * Рʹуспи чаԝа һʹәкимед рʹӧһʹани нә, ләма әԝана алийе хԝәда һʹәму тьшти дькьн, сәва «йе нәхԝәш», демәк йе кӧ гӧне гьран кьрийә, ԛәнщ кьн. Ширәтед рʹуспийа сәр һʹиме Кʹьтеба Пироз, ԝе али ԝи бькьн, ԝәки һәләԛәтийа хԝә тʹәви Хԝәде вәгәрʹинә, ле тʹәне һәрге әԝ бь рʹасти гӧне хԝә тʹобә дькә (Кʹар. Шанд. 3:19; 2 Корн. 2:5-10).

¹² Әшкәрә йә, ԝәки щабдарийа рʹуспийа гәләк мәзьн ә. Әԝана щьвате һʹьз дькьн, чьмки Хԝәде щабдари дайә ԝан, кӧ мьԛати щьмәʹта ԝи бьн, у һьндава ԝанда бь һʹьзкьрьн у һәԛийе бьн (1 Пәт. 5:1-3). Әԝана дьхԝазьн, ԝәки хушк-бьред ԝан щьватеда хԝә хԝәйкьри тʹәхмин кьн. Ләма жи рʹуспи чаԝа кӧ педьһʹәсьн, ԝәки кәсәки гӧне гьран кьрийә, илаһи зорбәтийа сексуали һьндава зарʹе, дәрберʹа дәстпедькьн сәр ве пьрсе бьхәбьтьн. Дина хԝә бьдьнә пьрсед кӧ дәстпека  абзасед 13,  15 у  17-да һәнә.

13-14. Гәло рʹуспи гӧрʹа ԛанунед дәԝләте дькьн, демәк чахе ԝанрʹа дьбежьн дәрһәԛа зорбәтийа һьндава зарʹа, әԝана әʹлами полис дькьн? Шьровәкьн.

 ¹³ Гәло рʹуспи ԝан ԛанунед дәԝләте тиньн сери, демәк чахе ԝанрʹа дьбежьн кӧ һьндава зарʹе зорбәти һатийә кьрьне, әԝана полисрʹа дьбежьн? Бәле. Ԝан щийада кʹидәре ԛанунед ԝи щурʹәйи һәнә, рʹуспи чахе педьһʹәсьн дәрһәԛа зорбәтийа һьндава зарʹе, гәрәке сәрԝеред дәԝләтерʹа бежьн (Рʹом. 13:1). Ԛанунед ԝи щурʹәйи мьԛабьли ԛануна Хԝәде ниньн (Кʹар. Шанд. 5:28, 29). Ләма жи рʹуспи һәма ча дәрһәԛа ве йәке педьһʹәсьн, дәрберʹа жь филиале рʹебәрийе дьхԝазьн, кӧ ԝан ԛанунед дәԝләте чь щурʹәйи биньн сери.

 ¹⁴ Рʹуспи чахе тʹәви ԝан зарʹед, кӧ рʹасти зорбәтийе һатьнә у тʹәви де-бавед ԝан хәбәр дьдьн, гәрәке ԝанрʹа бежьн, кӧ изьна ԝан һәйә дәрһәԛа ве йәке әʹлами полис кьн. Ле һәрге кәсәк жь щьвате зорбәтийа сексуалида нәһәԛ дькьн, у дәрһәԛа ве йәке мәрьвед дьн пеһʹәсийанә, чь гәрәке бькьн? Гәло лазьм ә әԝ Мәсиһи кӧ дәрһәԛа ве йәке әʹлам кьрийә, бәрхԝә кʹәвә кӧ әԝ наве Хԝәде хьраб дькә? Тʹӧ щар на! Әԝ мәрьве зорбә, наве Хԝәде беһӧрмәт дькә.

15-16. а) Ль гора 1 Тимотʹейо 5:19, чьрʹа лап кем дӧ шәʹдә лазьм ьн, пешийа кӧ рʹуспи комитейа диԝанкьрьне саз кьн? б) Рʹуспи чь дькьн чахе педьһʹәсьн, кӧ кәсәки жь щьвате нәһәԛ дькьн зорбәтийа һьндава зарʹеда?

 ¹⁵ Чахе щьватеда кәсәки гӧне гьран кьрийә, чьрʹа те дәʹԝакьрьне, ԝәки пешийа кӧ рʹуспи комитейа диԝанкьрьне саз кьн, гәрәке дӧ шәʹдә һәбьн? Әԝ дәʹԝакьрьна һәԛ, ль гора Кʹьтеба Пироз ә. Һәрге кәсәк гӧне хԝә инкʹар дькә, дӧ шәʹдә лазьм ьн, ԝәки бе избаткьрьне кӧ әԝи гӧнә кьрийә. Ԝи чахи рʹуспи комитейа диԝанкьрьне саз дькьн. (Ԛан. Дщр. 19:15; Мәт. 18:16; бьхунә 1 Тимотʹейо 5:19.) Ле гәло әв те һʹәсабе, кӧ чахе кәсәк те нәһәԛкьрьне зорбәтийа һьндава зарʹеда, гәрәке сәрԝеред дәԝләтерʹа нәбежьн, һʹәта дӧ шәʹдә тʹӧнәбьн? На. Ве дәрәщеда дӧ шәʹдә нәлазьм ьн, чьмки әԝи кәси дьбәкә ԛануна дәԝләте тʹәрʹьбандийә, демәк тьштәки нәԛануни кьрийә.

¹⁶ Чахе рʹуспи педьһʹәсьн, ԝәки кәсәки жь щьвате зорбәтийа һьндава зарʹеда нәһәԛ дькьн, әԝана анәгори ԛанунед дәԝләте полисрʹа дьбежьн, у паше леколина дькьн кӧ чь ԛәԝьмийә. Паше әԝана сәр һʹиме Кʹьтеба Пироз сафи дькьн, кӧ лазьм ә комитейа диԝанкьрьне саз бә йан на. Һәрге әԝ әндәме щьвате гӧне хԝә инкʹар дькә, рʹуспи гьлийед шәʹда леколин дькьн. Мәʹнийа рʹуспийа һәйә, ԝәки комитейа диԝанкьрьне саз кьн, һәрге лап кем дӧ шәʹдә һәбьн. Йәк йе кӧ дәрһәԛа ве йәке әʹлами ԝан кьрийә, у йе дӧда, йе кӧ гьлийед ԝи избат дькә, йан жи дьбежә кӧ әԝи мәрьви зарʹед дьн жи хьраб кьрийә. * Ле һәрге шәʹде дӧда тʹӧнә, әв найе һʹәсабе ԝәки әԝе кӧ ԝи нәһәԛ дькә, дәрәԝа дькә. Һәрге жи бь сайа дӧ шәʹда нәйе избаткьрьне, кӧ әԝи зорбәти зарʹе кьрийә, йәкә рʹуспи фәʹм дькьн, ԝәки дьбәкә жи гӧне гьран һатийә кьрьне, жь бо чь жи мәрьва зийана мәзьн стандьнә. Рʹуспи бәрдәԝам дькьн бәр дьле ԝанда тен у али ԝан дькьн, йед кӧ зийан стандьнә. Хенщи ве йәке, ида чʹәʹве рʹуспийа сәр ԝи мәрьви йә, йе кӧ зорбәтийеда һатийә нәһәԛкьрьне, сәва әԝ зийане нәдә әндәмед щьвате (Кʹар. Шанд. 20:28).

17-18. Шьровәкьн рола рʹуспийа комитейа диԝанкьрьнеда.

 ¹⁷ Рола комитейа диԝанкьрьне чь йә? Хәбәра «диԝанкьрьн» найе һʹәсабе, ԝәки рʹуспи сафи дькьн, кӧ әԝ мәрьв, кʹижани зорбәти зарʹе кьрийә у ԛануна дәԝләте тʹәрʹьбандийә, алийе полисда гәрәке бе щәзакьрьне йан на. Рʹуспи накʹәвьнә нава шьхӧлед сәрԝеред дәԝләте у тьштед криминали дьдьнә дәсте ԝан (Рʹом. 13:2-4; Тито 3:1). Шьхӧле рʹуспийа әԝ ә, кӧ диԝане бькьн, демәк сафи кьн, һәла әԝ кәс дькарә щьватеда бьминә йан на.

¹⁸ Чахе комитейа диԝанкьрьне саз дьбә, рола рʹуспийа тʹәне әԝ ә, кӧ алийе рʹӧһʹанида диԝане бькьн. Әԝана сәр һʹиме Кʹьтеба Пироз диԝане дькьн, һәла әԝ кәс кӧ зорбәти кьрийә, бь рʹасти пʹошман буйә у тʹобә дькә йан на. Һәрге әԝ тʹобә накә, әԝ жь щьвате те дәрхьстьне у дәрһәԛа ве йәке щьватеда те әʹламкьрьне (1 Корн. 5:11-13). Һәрге әԝ тʹобә дькә, әԝ  дькарә щьватеда бьминә. Ле йәкә рʹуспи ԝе жерʹа бежьн, кӧ әԝ ԝе гәләк сал йан жи дьбәкә тʹӧ щар, щьватеда тʹӧ щабдарийа нәстинә. Ӧса жи сәва зарʹед щьвате бенә хԝәйкьрьне, щьватеда рʹуспи башԛә де-бавед зарʹарʹа дьбежьн, ԝәки фәсал бьн у чʹәʹвед ԝан сәр зарʹед ԝан бә, чахе зарʹ незики ԝи мәрьви нә. Чахе рʹуспи ве йәке дькьн, гәрәке фәсал бьн, ԝәки кәсәкирʹа нәбежьн, кӧ әԝ мәрьв зорбәти кʹе кьрийә.

19-22. Де-бав чь дькарьн бькьн сәва зарʹед хԝә хԝәй кьн? (Бьньһерʹә шькле рʹуйе журнале.)

¹⁹ Сәва зарʹ жь зийане бенә хԝәйкьрьне, кʹе йә щабдар? Де-бав щабдар ьн. * Де-бавно, «әԝләд пешкʹешед Хӧдан ьн», демәк Йаһоԝа зарʹ пʹешкʹеш данә ԝә (Зәб. 127:3). Ләма жи һун щабдар ьн сәва зарʹед хԝә хԝәй кьн. Ле чь һун дькарьн бькьн, ԝәки зарʹед хԝә жь зорбәтийе хԝәй кьн?

²⁰ Йа пешьн, пебьһʹәсьн кӧ чь йә зорбәти. Бьзаньбьн мәрьвед кӧ зарʹа хьраб дькьн чь щурʹәйи нә, у чь метʹода дьдьнә хәбате сәва зарʹа бьхапиньн. Тедәрхьн у фәсал бьн чь щурʹә мәрьв у кʹижан дәрәщә дькарьн хоф бьн (Мәтʹлк. 22:3; 24:3). Бир нәкьн, ԝәки һʹәчʹи зәʹф әԝ мәрьв зорбәтийе зарʹа дькьн, кʹижан ԝан зарʹарʹа нас ьн у зарʹ итʹбарийа хԝә ԝана тиньн.

²¹ Йа дӧда, тʹьме тʹәви зарʹед хԝә бькʹәвьнә хәбәрдане, ԝәки әԝана аза ԝәрʹа дьле хԝә вәкьн (Ԛан. Дщр. 6:6, 7). Рʹьнд гӧһ бьдьнә ԝан чахе әԝана ԝәрʹа гьлийа дькьн (Аԛуб 1:19). Бир нәкьн, бона ԝан зарʹа, кʹижан кӧ рʹасти зорбәтийе һатьнә, чәтьн ә дәрһәԛа ве йәке хәбәр дьн. Әԝана дьбәкә дьтьрсьн кӧ ԝе тʹӧ кәс ԝана баԝәр нәкә, йан жи әԝе кӧ зорбәти ԝан кьрийә, әԝ данә тьрсандьне, кӧ кәсәкирʹа нәбежьн. Һәрге һун тʹәхмин дькьн, ԝәки зарʹ хԝә щурʹәки дьн дьгьрә, бь нәрми пе пьрса ԝана бьдьнә хәбәрдане, у паше бь сәбьр гӧһ бьдьнә ԝан.

²² Йа сьсийа, зарʹед хԝә һин кьн. Анәгори салед әʹмьре ԝан, ԝанрʹа дәрһәԛа сексе гьли кьн. Зарʹед хԝә һин кьн кӧ бьзаньбьн чь бежьн у чь бькьн, чахе кәсәк бь щурʹе нәлайиԛ дәсте хԝә дьдә ԝан. Бьдьнә хәбате информасийа кӧ тʹәшкиләта Йаһоԝа дьдә дәрһәԛа ве йәке, кӧ ча зарʹед хԝә хԝәй кьн (Бьньһерʹә чаргошә бь наве « Һин бьн у Зарʹед Хԝә жи Һин кьн»).

23. Әм ча дьньһерʹьн сәр зорбәтийа һьндава зарʹа, у готара дьнда әме щаба кʹижан пьрсе пебьһʹәсьн?

²³ Әм Шәʹдед Йаһоԝа сәр зорбәтийа сексуали һьндава зарʹа ӧса дьньһерʹьн, чаԝа гӧнәки гьран у кьре һʹәрам. Ль гора ԛануна Мәсиһ, әм тʹӧ щар мәрьвед зорбә хԝәй накьн, ԝәки жь һәԛе кьред хԝә хьлаз бьн. Ле әм ча дькарьн али ԝан бькьн, йед кӧ рʹасти ве хьрабийе һатьнә? Әме готара дьнда щаба ве пьрсе пебьһʹәсьн.