1. Әм кʹижан дӧ тьштада гәрәке дӧдьли нәбьн?

ЙАҺОԜА ХԜӘДЕ хьзмәткʹаред хԝә гәләк һʹьз дькә. Әԝи тʹьме әԝана һʹьз кьрьнә у ԝе тʹьме һʹьз бькә. Әԝ ӧса жи һәԛийе һʹьз дькә (Зәб. 33:5). Ләма әм ван дӧ тьштада гәрәке дӧдьли нәбьн: 1) Дьле Йаһоԝа дешә чахе хьзмәткʹаред ԝи рʹасти нәһәԛийе тен. 2) Әԝ соз дьдә, ԝәки нәһәԛи ԝе бе һьлдане, у әԝ ԝе диԝана ԝан бькә, йед кӧ һьндава щьмәʹта ԝи нәһәԛийе дькьн. Готара пешийеда, йа ве рʹеза готарада, * әм пеһʹәсийан ԝәки Ԛанун кӧ Хԝәде бь сайа Муса дабу щьмәʹта Исраел, сәр һʹиме һʹьзкьрьне бу. Әԝе Ԛануне һин дькьр, ԝәки әԝана һәԛ бьн, илаһи һьндава ԝанда, йед кӧ нькарьбун хԝә хԝәй кьрана (Ԛан. Дщр. 10:18). Әԝ Ԛанун әʹйан дькә, ԝәки Йаһоԝа ча дькʹәвә һʹәйра хьзмәткʹаред хԝә у бона ԝан хәм дькә.

2. Әме ве готареда щаба кʹижан пьрса шеԝьр кьн?

² Чахе щьвата Мәсиһити һатә сазкьрьне, сала 33 Д.М., Ԛануна Муса жь ԛәԝате дәркʹәт. Ле гәло Мәсиһийед һьнге бе ԛанун ман, кʹижан кӧ сәр һʹиме һʹьзкьрьне бу у һәԛи дьани? На, чьмки Мәсиһийарʹа ԛануна тʹәзә һатә дайине. Ве готареда пешийе әме шеԝьр кьн, кӧ әԝ чь ԛанун ә. Паше әме щаба ван пьрса пебьһʹәсьн: Чьрʹа әм дькарьн бежьн, ԝәки әв ԛанун сәр һʹиме һʹьзкьрьне йә? Чьрʹа әм дькарьн бежьн, ԝәки әԝ һәԛийе тинә? У мәрьвед хԝәйиһʹӧкӧм гәрәке һьндава мәрьвада ча бьн?

3. Чаԝа Галати 6:2-да те кʹьфше, чь дькʹәвә нава «ԛануна Мәсиһда»?

³ Бьхунә Галати 6:2. Мәсиһи бьн «ԛануна Мәсиһда» ньн.  Иса шагьртед хԝәрʹа гәләк ԛанун нәньвисин, әԝи рʹебәри, тʹәми у принсип да ԝан. Һʹәму тьшт чь кӧ Иса һин дькьр, дькʹәвә нава «ԛануна» Мәсиһда. Сәва әве йәке һе рʹьнд фәʹм бькьн, ԝәрә дәрһәԛа ве ԛануне һе зедә пебьһʹәсьн.

4-5. Иса ча у кʹәнге мәрьв һин дькьрьн?

⁴ Иса ча мәрьв һин дькьрьн? Йа пешьн, әԝи пе гьлийед хԝә һин дькьр. Гьлийед ԝи ԛайим сәр мәрьва һʹӧкӧм дьбун, чьмки әԝи дәрһәԛа рʹастийа Хԝәде хәбәр дьда, һин дькьр кӧ нета әʹмьр чь йә, у әʹйан дькьр, ԝәки тʹәне Пʹадшатийа Хԝәде дькарә һʹәму кӧл-дәрдед инсанәте бьдә һьлдане (Луԛа 24:19). Иса пе мәсәла хԝә жи һин дькьр. Әԝи бь жийина хԝә шагьртед хԝәрʹа нишан дькьр, кӧ әԝана гәрәке ча бьжин (Йуһʹн. 13:15).

⁵ Иса кʹәнге һин дькьр? Әԝи ԝәʹде хьзмәтийа хԝәйә сәр әʹрде һин дькьр (Мәт. 4:23). Иса паши сахбуна хԝә жи шагьртед хԝә һин дькьр. Мәсәлә, әԝ 500 зедәтьр шагьртед хԝәва хӧйа бу у тʹәми да ԝан, ԝәки мәрьва бькьн шагьрт (Мәт. 28:19, 20; 1 Корн. 15:6). Иса ӧса жи чахе вәгәрʹийа әʹзмана, чаԝа сәре щьвате бәрдәԝам дькьр рʹебәрийе шагьртед хԝә бькә. Мәсәлә, незикайа сала 96 Д.М., Мәсиһ рʹебәри Йуһʹәннайе шанди кьр, сәва әԝ дьл бьдә Мәсиһийед бьжарти у ширәта бьдә ԝан (Колс. 1:18; Әʹйан. 1:1).

6-7. а) Һинкьрьнед Иса кʹидәре һатьнә ньвисаре? б) Чаԝа әм гӧрʹа ԛануна Мәсиһ дькьн?

⁶ Ле һинкьрьнед Иса кʹидәре һатьнә ньвисаре? Чар кʹьтебед пешьн ә Мьзгинида, гәләк тьшт те гьликьрьне чь кӧ Иса сәр әʹрде дьгот у дькьр. Кʹьтебед Ньвисаред Йунанийә дьн жи, кӧ бь рʹебәрийа рʹӧһʹе пироз һатьнә ньвисаре, али мә дькьн, ԝәки фькьр у ньһерʹандьна Иса сәр гәләк тьшта, фәʹм кьн, чьмки әԝ кʹьтеб ԝан мәрьва ньвисин, «нет-фькьра» кʹижана мина йа Мәсиһ бу (1 Корн. 2:16).

⁷ Дәрс: Һинкьрьнед Иса һʹәму алийада али мә дькьн. Демәк ԛануна Мәсиһ һʹәму дәра сәр һʹәму кьред мә һʹӧкӧм дькә, мәсәлә малда, мәкʹтәбеда, хәбатеда, у щьватеда. Ԛануна ԝи әм һин дьбьн чахе Ньвисаред Йунани дьхуньн у сәр дьфькьрьн. Чахе әм дьжин ль гора тʹәми, рʹебәри у принсипед ԝан кʹьтеба, кʹижан  кӧ жь бина бәр Хԝәде һатьнә ньвисаре, бь ве йәке әм гӧрʹа ве ԛануне дькьн. Чахе әм гӧрʹа ԛануна Мәсиһ дькьн, бь ве йәке әм гӧрʹа Йаһоԝа Хԝәдайе мәйи һʹьзкьрьне дькьн, чьмки Канийа ԝан тьшта чь кӧ Иса һин дькьр, Йаһоԝа йә (Йуһʹн. 8:28).

8. Һʹиме ԛануна Мәсиһ чь йә?

⁸ Чахе ханик сәр һʹиме ԛәԝи те авакьрьне, мәрьвед кӧ теда дьжин, хԝә бехоф у хԝәйкьри тʹәхмин дькьн. Ԛанун жи һәрге сәр һʹиме баш те сазкьрьне, мәрьвед бьн ве ԛанунеда хԝә хԝәйкьри тʹәхмин дькьн. Ԛануна Мәсиһ сәр һʹимәки лапи ԛәԝи һатийә сазкьрьне, әԝ һәйә һʹьзкьрьн. Ле чьрʹа әм дькарьн ӧса бежьн?

9-10. Кʹижан мәсәлә дьдьнә кʹьфше, ԝәки Иса һәр тьшт жь һʹьзкьрьне дькьр, у ча әм дькарьн чʹәʹв бьдьнә ԝи?

⁹ Йа пешьн, һʹәму тьшт чь кӧ Иса дькьр жь һʹьзкьрьне бу. Дьлшәԝати жь һʹьзкьрьне те. Дьле Иса дьшәԝьти бона мәрьва у гӧне ԝи ԝана дьһат, ләма әԝи мәрьв һин дькьрьн, йед нәхԝәш ԛәнщ дькьр, йед бьрчи тʹер дькьр, у йед мьри рʹадькьр (Мәт. 14:14; 15:32-38; Марԛ. 6:34; Луԛа 7:11-15). Рʹаст ә, әԝе йәке жь ԝи гәләк ԝәʹдә у ԛәԝат дьстанд, ле Иса бь рʹәзәдьли һʹәԝщед мәрьва жь һʹәԝщед хԝә бьльндтьр дьгьрт. Ле һʹьзкьрьна хԝәйә лапә мәзьн әԝи избат кьр бь ве йәке, кӧ әʹмьре хԝә да бона мәрьва (Йуһʹн. 15:13).

¹⁰ Дәрс: Әм гәрәке чʹәʹв бьдьнә Иса кӧ бькʹәвьнә һʹәйра мәрьва, нә кӧ һʹәйра хԝә, демәк пешийе һʹәԝщед ԝан һьлдьн һʹәсаб. Ӧса жи әм гәрәке дьлшәԝат бьн һьндава ԝанда, кʹерʹа мьзгинийе гьли дькьн. Чахе дьлшәԝати мә һелан дькә, кӧ мьзгинийе бәла кьн у мәрьва һин кьн, бь ве йәке әм гӧрʹа ԛануна Мәсиһ дькьн.

11-12. а) Чь дьдә кʹьфше ԝәки Йаһоԝа бона мә хәм дькә? б) Ча әм дькарьн чʹәʹв бьдьнә һʹьзкьрьна Йаһоԝа?

¹¹ Йа дӧда, Иса һʹьзкьрьна Баве хԝә әʹйан дькьр. Иса чахе һин дькьр, әԝи дьда кʹьфше кӧ Йаһоԝа хьзмәткʹаред хԝә чьԛас зәʹф һʹьз дькә у бона ԝан хәм дькә. Әԝи дьгот, ԝәки һәр кәс ԛимәт ә бәр чʹәʹве Баве мәйи әʹзмана (Мәт. 10:31). Йаһоԝа бь дьл у щан дьхԝазә, ԝәки һәр кәсе ӧндабуйи, йе кӧ тʹобә дькә, вәгәрʹә щьвате (Луԛа 15:7, 10). Йаһоԝа һʹьзкьрьна хԝә мәрʹа избат кьр бь ве йәке, кӧ Кӧрʹе хԝә кьрә ԛӧрбан бона мә (Йуһʹн. 3:16).

¹² Дәрс: Ча әм дькарьн чʹәʹв бьдьнә һʹьзкьрьна Йаһоԝа? (Әфәс. 5:1, 2). Әм гәрәке һʹәму хушк-бьред хԝә ԛимәт кьн у һʹьз бькьн, у ӧса жи чахе «пәза ӧндабуйи» вәдьгәрʹә бал Йаһоԝа, бь дьл у щан ша бьн у ԝи ԛәбул кьн (Зәб. 119:176). Әм һʹьзкьрьна хԝә һьндава хушк-бьра, бь ве йәке избат дькьн, кӧ ԝәʹде тәнгасийа кʹеләка ԝан ьн у али ԝан дькьн (1 Йуһʹн. 3:17). Чахе әм тʹәви хушк-бьра бь һʹьзкьрьн ьн, әм гӧрʹа ԛануна Мәсиһ дькьн.

13-14. а) Ль гора Йуһʹәнна 13:34, 35, тʹәмийа Иса чь те һʹәсабе, у чьрʹа әԝ тʹәмийа тʹәзә йә? б) Чаԝа әм гӧрʹа ве тʹәмийа тʹәзә дькьн?

¹³ Йа сьсийа, Иса тʹәми да шагьртед хԝә, ԝәки мина ԝи һәвдӧ һʹьз бькьн. (Бьхунә Йуһʹәнна 13:34, 35.) Әԝ тʹәмийа Иса тʹәзә йә, чьмки дәʹԝа дькә кӧ һʹьзкьрьнәкә ӧса бьдьнә кʹьфше, кʹижан кӧ Ԛануна Мусада нәдьһатә дәʹԝакьрьне. Әм гәрәке хушк-бьра ӧса һʹьз бькьн, ча Иса әм һʹьз кьрьнә. Әм гәрәке ԝана жь хԝә зедәтьр һʹьз бькьн. Гәрәке әм ӧса ԛайим ԝана һʹьз бькьн, ԝәки һазьр бьн бона ԝана әʹмьре хԝә жи бьдьн, чаԝа Иса бона мә да.

¹⁴ Дәрс: Ча әм әве тʹәмийа ну тиньн сери? Әм бона хушк-бьра ԛӧрбана дькьн,  демәк кʹара хԝә нагәрʹьн, ле кʹара ԝана дьгәрʹьн. Хенщи кӧ әм һазьр ьн ԛӧрбана мәзьн бькьн, кӧ әʹмьре хԝә бьдьн бона ԝан, әм ӧса жи ԛӧрбанед бьчʹук дькьн сәва ԝан. Мәсәлә, чахе әм хушк-бьред әʹмьрда мәзьн дьбьн щьвате, тьштәки жь хԝә кем дькьн, сәва дьле ԝан ша кьн, йан жи жь хәбате ԝәʹдәлу дәрдькʹәвьн, сәва ԝәʹде хәзәба аликʹарийе бьдьн, ԝи щурʹәйи әм гӧрʹа ԛануна Мәсиһ дькьн. Әм ӧса жи аликʹарийе дьдьнә щьвате, ԝәки ԝедәре һәр кәс хԝә хԝәйкьри у бехоф тʹәхмин кә.

15-17. а) Чаԝа кьред Исада һәԛи дьһатә кʹьфше? б) Ча әм дькарьн чʹәʹв бьдьнә Иса?

¹⁵ «Һәԛи», чаԝа Кʹьтеба Пирозда те хәбьтандьне, те һʹәсабе ԝан тьшта бькьн чь кӧ бәр чʹәʹве Хԝәде рʹаст ьн, у фьрԛийе нәкьнә ортʹа мәрьва. Ле чьрʹа әм дькарьн бежьн, ԝәки ԛануна Мәсиһ һәԛийе тинә?

¹⁶ Йа пешьн, бьфькьрьн дәрһәԛа кьред Иса, кӧ һәԛи дьданә кʹьфше. Ԝәʹде ԝида, сәрԝеред дине Щьһуйа мьләтед майин нәфрʹәт дькьрьн, у ԛәдьре жьна нәдьгьртьн. Ле Иса һьндава һʹәмуйада һәԛ бу у фьрԛи нәдькьрә ортʹа мәрьва. Әԝи мәрьвед нәщьһу ԛәбул дькьр, чахе ԝана баԝәрийа хԝә ԝи дьанин у пәй ԝи дьчун (Мәт. 8:5-10, 13). Әԝи һʹәмуйарʹа мьзгини бәла дькьр, һьн йед дәԝләтирʹа һьн жи кʹәсибарʹа (Мәт. 11:5; Луԛа 19:2, 9). Әԝ тʹӧ щар һьндава жьнада сәрт нибу у әԝана беһӧрмәт нәдькьрьн. Дәԝсе әԝ һьндава ԝанда бь ԛәдьр у һʹәйф бу, һәла һе һьндава ԝанда жи, йед кӧ мәрьвед майин бәр тьштәки һʹәсаб нәдькьрьн (Луԛа 7:37-39, 44-50).

¹⁷ Дәрс: Әм дькарьн чʹәʹв бьдьнә Иса, у фьрԛийе нәкьнә ортʹа мәрьва, һʹәмуйарʹа мьзгинийе бәла кьн, фьрԛи тʹӧнә әԝана чь баԝәр дькьн, йан жи кʹәсиб ьн йан дәԝләти нә. Малхед мале йед кӧ Мәсиһи нә, гәрәке мина Иса һьндава жьнада бь ԛәдьр бьн. Чахе әм ӧса дькьн, әм гӧрʹа ԛануна Мәсиһ дькьн.

18-19. Иса дәрһәԛа һәԛийе чь һин дькьр, у әм жь һинкьрьнед ԝи чь дәрса һин дьбьн?

¹⁸ Йа дӧда, дина хԝә бьдьне, Иса дәрһәԛа һәԛийе чь һин дькьр. Әԝи принсипед ӧса һин дькьр, кʹижан кӧ ԝе али пәйчуйед ԝи бькьрана, ԝәки һьндава мәрьвада һәԛ буна. Мәсәлә, бьфькьрьн дәрһәԛа Ԛәйде Зерʹин (Мәт. 7:12). Бәле, әм гьшк дьхԝазьн ԝәки һьндава мәда һәԛ бьн. Ләма әм жи гәрәке һьндава мәрьва һәԛ бьн. Чахе әм ӧса бькьн, әԝана жи ԝе һелан бьн һьндава мәда ӧса бьн. Ле һәрге һьндава мәда нәһәԛийе бькьн, әм гәрәке чь бькьн? Иса шагьртед хԝә һин кьр, ԝәки итʹбарийа хԝә Йаһоԝа биньн, кӧ әԝ ԝе һәԛийе бькә ԝанрʹа, «йед кӧ шәв у рʹож һәԝара хԝә ԝи датиньн» (Луԛа 18:6, 7). Әв рʹез созәки ӧса дьдә мә: Хԝәдейе мәйи һәԛ у рʹаст, занә әм ԝан рʹожед ахьрийеда рʹасти чь тәнгасийа тен, у әԝ ԝе әʹсә ԝәʹдәда һәԛийе бинә (2 Тʹеслн. 1:6).

¹⁹ Дәрс: Чахе әм ԝан принсипа биньн сери, кʹижан кӧ Иса һин дькьр, әме һьндава мәрьвада һәԛ бьн. У һәрге ве дьнйа Шәйтʹанда кәсәк нәһәԛи мә кьрийә, әм гәрәке дьлрʹьһʹәт бьминьн, чьмки заньн кӧ Йаһоԝа ԝе диԝана ԝан бькә, йед кӧ нәһәԛи мә кьрьнә.

20-21. а) Йед хԝәйиһʹӧкӧм һьндава мәрьва гәрәке ча бьн? б) Мер ча дькарә һʹьзкьрьна һʹәлал бьдә кʹьфше, у бав гәрәке һьндава зарʹед хԝәда ча бьн?

²⁰ Ль гора ԛануна Мәсиһ, әԝед кӧ хԝәйиһʹӧкӧм ьн, гәрәке һьндава мәрьва ча бьн? Һʹиме ԛануна Мәсиһ әԝ һәйә һʹьзкьрьн, ләма мәрьвед хԝәйиһʹӧкӧм гәрәке бь ԛәдьр у бь һʹьзкьрьн бьн тʹәви  ԝан, бона кʹе жи щабдар ьн. Әԝана гәрәке бир нәкьн кӧ Мәсиһ дьхԝазә, ԝәки һʹәму кьред мәда һʹьзкьрьн бе кʹьфше.

²¹ Малбәтеда. Мер гәрәке жьна хԝә ӧса һʹьз бькә, чаԝа кӧ «Мәсиһ щьвин һʹьз кьр» (Әфәс. 5:25, 28, 29). Әԝ гәрәке чʹәʹв бьдә һʹьзкьрьна Исайә һʹәлал, демәк һʹәԝщед жьна хԝә дайнә щийе пешьн, у бькʹәвә һәйрʹа ԝе, нә кӧ һәйрʹа хԝә. Һьнә мерарʹа чәтьн ә жьна хԝәрʹа һʹьзкьрьна ӧса бьдьн кʹьфше, чьмки дьбәкә ԝе маледа кʹидәре әԝана мәзьн бунә, ԛәдьр у һʹьзкьрьн кем һәбуйә. Рʹаст ә ԝан мерарʹа һеса нинә бенә гӧһастьне, ле йәкә әԝана гәрәке ве йәке бькьн, сәва кӧ гӧрʹа ԛануна Мәсиһ бькьн. Мер кӧ жьна хԝә һʹьз дькә у кʹара ԝе дьгәрʹә, ԝе ԛәдьре жьна хԝә ԛазанщ кә. Бавед кӧ зарʹед хԝә һʹьз дькьн, ԝе тʹӧ щар дьле ԝан нәешиньн нә пе гьлийа, нә жи пе кьред хԝә (Әфәс. 4:31). Дәԝсе, әԝана ԝе һʹьзкьрьна хԝә у ԛәбулкьрьна хԝә зарʹарʹа бьдьнә кʹьфше, сәва зарʹ хԝәйкьри хԝә тʹәхмин кьн. Бавед ӧса, һʹьзкьрьн у итʹбарийа зарʹед хԝә ԛазанщ дькьн.

22. Анәгори 1 Пәтрус 5:1-3, хԝәйе «пәза» кʹе йә, у рʹуспи һьндава ԝанда гәрәке ча бьн?

²² Щьватеда. Рʹуспи гәрәке бир нәкьн, кӧ хԝәйе «пәз» әԝана ниньн (Йуһʹн. 10:16; бьхунә 1 Пәтрус 5:1-3.) Әв гьли, «кәрийе пәзе Хԝәде» у «пʹара» Хԝәде, тинә бира рʹуспийа ԝәки Йаһоԝа йә хԝәйе ԝан пәза. Әԝ дьхԝазә, ԝәки һьндава пәзед ԝи бь һʹьзкьрьн у нәрм бьн (1 Тʹеслн. 2:7, 8). Рʹуспийед кӧ бь һʹьзкьрьн щабдарийа хԝә чаԝа шьван тиньн сери, ԛәбулкьрьна Йаһоԝа дьстиньн. Әԝ рʹуспи ӧса жи һʹьзкьрьн у ԛәдьре хушк-бьра ԛазанщ дькьн.

23-24. а) Шьхӧле рʹуспийа чь йә чахе кәсәк щьватеда гӧне гьран дькә? б) Чахе әԝана ԝан проблема сафи дькьн, гәрәке чь бир нәкьн?

²³ Ле һәрге кәсәки гӧне гьран кьрийә,  ԝи ԝәʹдәйи шьхӧле рʹуспийа чь йә? Шьхӧле ԝан, жь шьхӧле һʹакьм у рʹуспийед бәре, кӧ бьн Ԛануна Мусада бун, щӧдә дьбә. Ль гора Ԛануна Муса, әԝ меред кʹьфшкьри, нә тʹәне әԝ проблем сафи дькьрьн, кʹижан кӧ һʹәбандьна Йаһоԝава гьредайи бун, ле ӧса жи шьхӧлед криминал у ԛачахтийе. Ле бьн ԛануна Мәсиһда, рʹуспи тʹәне ԝан проблема сафи дькьн, кʹижан кӧ һʹәбандьна Йаһоԝава гьредайи нә. Әԝана фәʹм дькьн кӧ тьштед криминал щабдарийа сәрԝеред дәԝләте йә, кʹижанарʹа Хԝәде һʹӧкӧм дайә. Демәк һʹӧкӧме ԝан һәйә, мәсәлә, щьрме бьдьнә сәр ԝи мәрьви кӧ ԛануне дьтʹәрʹьбинә, йан жи ԝи бькьнә кәле (Рʹом. 13:1-4).

²⁴ Ле рʹуспи щабдар ьн чь бькьн, чахе щьватеда кәсәки гӧнәки гьран кьрийә? Әԝана сәр һʹиме Кʹьтеба Пироз һәр тьшти леколин дькьн у паше сафикьрьна дькьн. Әԝана бир накьн, кӧ һʹьзкьрьн әԝ һәйә һʹиме ԛануна Мәсиһ. Ләма жи һʹьзкьрьн рʹуспийа һелан дькә, кӧ бьфькьрьн у ԝан тьшта һьлдьн һʹәсаб: Чь гәрәке бе кьрьне, сәва щьватеда али һәр кәси бькьн, һьндава кʹижанада хьраби һатийә кьрьне? Ле һьндава ԝи кәси йе кӧ гӧне гьран кьрийә, һʹьзкьрьн рʹуспийа һелан дькә тедәрхьн: Һәла әԝ гӧне хԝә тинә рʹуйе хԝә йан на? Әм дькарьн али ԝи бькьн, кӧ әԝ рʹӧһʹанида ԛәнщ бә?

25. Готара дьнда әме дәрһәԛа чь шеԝьр кьн?

²⁵ Әм чьԛас рʹази нә жь Хԝәде, кӧ әм бьн ԛануна Мәсиһда ньн! Һәрге һәр кәс жь мә һәр тьшти алийе хԝәда дькә сәва гӧрʹа ве ԛануне бькә, щьвата мә ԝе бьбә щики ӧса, кʹидәре һәр кәс ԝе тʹәхмин кә, ԝәки ԝи һʹьз дькьн, ԛимәт дькьн у хԝәй дькьн. Ле әм иро дьнйакә ӧсада дьжин, кʹидәре «мәрьвед хьраб» хьрабийеда пешда дьчьн (2 Тимтʹ. 3:13). Ләма әм гәрәке фәсал бьн. Ле ча щьвата Мәсиһити һәԛийа Йаһоԝа дьдә кʹьфше, чахе хәбәрдан дьчә дәрһәԛа зорбәтийа сексуали һьндава зарʹа? Готара дьнда әме щаба ве пьрсе бьдьн.