ГОТАРА БОНА ҺИНБУНЕ 35
Йаһоԝа Хьзмәткʹаред Хԝәйи Мьлук Ԛимәт Дькә
«Хӧдан . . . йед ньмьзә бәләнгаз дьбинә» (ЗӘБ. 138:6).
КʹЬЛАМА 48 Әм Һәр Рʹож Рʹе Һәрʹьн Тʹәви Йаһоԝа
ВЕ ГОТАРЕДА *
1. Йаһоԝа ча дьньһерʹә сәр мәрьвед мьлук? Шьровәкьн.
ЙАҺОԜА мәрьвед мьлук гәләк һʹьз дькә. Тʹәне һәләԛәтийа ԝан мәрьва йед кӧ бь рʹасти мьлук ьн, тʹәви Йаһоԝа гәләк незик у ширьн ә, ле «кʹӧбара» әԝ «дурва нас дькә» (Зәб. 138:6). Һәр кәс жь мә дьхԝазә дьле Йаһоԝа ша кә у һʹьзкьрьна ԝийә гәрм тʹәхмин кә. Бәле, мәʹнийед мәйә фәрз һәнә, сәва мьлук бьн.
2. Әме ве готареда дәрһәԛа чь шеԝьр кьн?
2 Ве готареда әме шеԝьр кьн щаба ԝан се пьрса: 1) Чь йә мьлукти? 2) Чьрʹа әм гәрәке мьлук бьн? 3) У кʹәнге мәрʹа дькарә чәтьн бә мьлук бьминьн? Әме ӧса жи пебьһʹәсьн, кӧ чахе әм мьлук ьн, әм дьле Йаһоԝа ша дькьн у хԝәха жи кʹаре дьстиньн (Мәтʹлк. 27:11; Иша. 48:17).
ЧЬ ЙӘ МЬЛУКТИ?
3. Чь йә мьлукти?
3 Мәрьве мьлук хԝә сәр мәрьварʹа нагьрә, у ԛӧрʹәбун у бабахи нав ԝида тʹӧнә. Кʹьтеба Пирозда те готьне, ԝәки мәрьве мьлук фәʹм дькә, кӧ Йаһоԝа жь ԝи зортьр ә, у ньһерʹандьна ԝи һьндава мәрьва рʹаст ә. Әԝ ӧса жи фәʹм дькә, кӧ һәр мәрьвәк тьштәкида жь ԝи баштьр ә (Фили. 2:3, 4).
4-5. Чьрʹа мәрьвед кӧ мьлук тенә кʹьфше, дькарьн бь рʹасти ԛӧрʹә бьн?
4 Һьнә мәрьв тʹәне тенә кʹьфше, кӧ мьлук ьн. Мәсәлә, әԝана дьбәкә шәрмокә нә, йан жи һьндава мәрьвада бь ԛәдьр ьн у мәʹрифәт ьн, чьмки де-баве ԝан әԝана ӧса һин кьрьнә. Ле дьле хԝәда, әԝана дькарьн гәләк ԛӧрʹә бьн. Мәрьвед ӧса, зу йан дәрәнг, ԝе әʹйан бьн кӧ дьлда бь рʹасти ча ньн (Луԛа 6:45).
5 Һәнә мәрьвед ӧса жи, йед кӧ хԝәда баԝәр ьн, йан жи сәр хԝә нә, ле әԝ найе һʹәсабе, кӧ әԝана ԛӧрʹә нә (Йуһʹн. ). Ле йәкә мәрьвед ӧса гәрәке фәсал бьн, ԝәки сәр һʹьш-аԛьле хԝә итʹбар нибьн. Фьрԛи тʹӧнә әм мәрьвнә шәрмокә нә йан сәр хԝә нә, әм гьшк жи гәрәке сәр хԝә бьхәбьтьн, ԝәки дьле хԝәда мьлук бьн. 1:46, 47
Паԝлосе шанди йәки мьлук бу у хԝә сәр мәрьварʹа нәдьгьрт (Бьньһерʹә абзаса 6) *
6. Ль гора 1 Корьнтʹи 15:10, әм чь дькарьн жь мәсәла Паԝлос һин бьн?
6 Дина хԝә бьдьнә мәсәла Паԝлос. Йаһоԝа бь сайа Паԝлос гәләк шәһәрада щьватед тʹәзә саз кьр. Һәла һе жи дьԛәԝьмә Паԝлос хьзмәтийеда жь шандийед Иса зедәтьр кьрьбу. Ле йәкә әԝ нәдьфькьри, ԝәки әԝ жь бьра четьр ә у әԝи хԝә сәр ԝанрʹа нәдьгьрт. Әԝи бь мьлукти ани сәр хԝә: «Әз жь шандийа йе һәри паш ьм, кӧ нә лайиԛ ьм шанди жи бемә готьне, чьмки мьн щьвина Хԝәде зеранд» (1 Корн. 15:9). Паше, Паԝлос гот ԝәки һәләԛәтийа ԝи тʹәви Йаһоԝа баш ә, нә жь бо һʹӧнӧред ԝийи баш йан жи шьхӧлед ԝи, ле бь сайа ԛәнщийа Хԝәдейә мәзьн. (Бьхунә 1 Корьнтʹи 15:10.) Паԝлос бь нәʹма хԝәйә Корьнтʹийарʹа, мьлуктийеда мәсәла баш һишт. Рʹаст ә һьнәкед ԝе щьватеда хԝә сәр ԝирʹа дьгьртьн, ле йәкә әԝи пʹайе хԝә нәдьда (2 Корн. 10:10).
Карл Клейн бьра, кʹижан кӧ әндәме Кʹома Рʹебәрийе бу, бьраки мьлук бу (Бьньһерʹә абзаса 7)
7. Чаԝа бьраки навдар мьлукти да кʹьфше? Мәсәле биньн.
7 Гәләк хьзмәткʹаред Йаһоԝа дьшьдьн пе сәрһатийа Карл Клейн бьра, йе кӧ бәре әндәме Кʹома Рʹебәрийе бу. Клейн бьра сәрһатийа хԝәда бь мьлукти у бь дьле сах дәрһәԛа гәләк кемаси у чәтьнайед хԝә гьли кьр, кӧ нава гәләк салада дитьбу. Мәсәлә, хьзмәтийа мал бь мал жерʹа ӧса чәтьн бу, кӧ чахе әԝи сала 1922 щара пешийе хьзмәт кьр, паши ве йәке әԝи ида дӧ сала мал бь мал хьзмәт нәкьр. Паше, чахе әԝи Бәйтʹәледа хьзмәт дькьр, бьраки әԝ ширәт кьр, ле әԝ һерс кʹәт у жь бьра хәйди. Ӧса жи әԝ кʹәтьбу депресийа *
гьран, ле паше ԛәнщ бу. Йәкә щабдарийед ԝийи фәрз жи һәбун, жь кʹижана әԝи шабун дьстанд. Бьфькьрьн, гәләка Клейн бьра нас дькьрьн, ле әԝ мәрьвәки чьԛас мьлук бу, кӧ бь дьле сах дәрһәԛа кемаси у сьстбунед хԝә гьли кьр! Гәләк хушк-бьра бь дьл у щан тиньн бира хԝә ԝи у сәрһатийа ԝи, кʹижан кӧ әԝи бь дьле һʹәлал гьли кьр.ЧЬРʹА ӘМ ГӘРӘКЕ МЬЛУК БЬН?
8. Чаԝа 1 Пәтрус 5:6 али мә дькә кӧ әм фәʹм кьн, ԝәки мьлукти дьле Йаһоԝа ша дькә?
8 Мәʹнийа лапә фәрз, кӧ чьрʹа әм гәрәке мьлук бьн, әԝ ә, кӧ әм бь ве йәке дьле Йаһоԝа ша дькьн. Пәтрусе шанди әԝ йәк әшкәрә да кʹьфше. (Бьхунә 1 Пәтрус 5:6.) Кʹьтебеда «Ԝәрә Бьбә Шагьрте Мьн», дәрһәԛа ԝан гьлийед Пәтрус тьштәки ӧса те готьне: «Ԛӧрʹәбун мина жәʹре йә, кʹижан кӧ ахьрикә гәләк хьраб тинә. Әԝ һʹӧнӧр, мәрьве гәләк аԛьл у зен жи, дькарә бәр чʹәʹве Хԝәде бькә бекер. Ле мьлукти дькарә мәрьве ньмьз у бәләнгаз, бәр чʹәʹве Йаһоԝа бькә йәки гәләк керһати. . . . Хԝәде ԝе ша бә тә хәлат кә, һәрге тӧ мәрьвәки мьлук би». * Рʹасти жи ԝе четьр чь һәйә, кӧ әм дькарьн дьле Йаһоԝа ша кьн! (Мәтʹлк. 23:15).
9. Чаԝа мьлукти мәрьва незики мә дькә?
9 Әм чахе мьлук ьн, ӧса әм һьн дьле Йаһоԝа ша дькьн, һьн жи хԝәха гәләк кʹаре дьстиньн. Һәрге әм мьлук ьн, мәрьв ԝе бьхԝазьн незики мә бьн. Сәва әм фәʹм кьн кӧ әԝ йәк чьрʹа ӧса нә, хԝә дайньн дәԝса мәрьвед дьн (Мәт. 7:12). Тʹӧ кәс жь мә һʹьз накә тʹәви ԝан мәрьва незик бә, йед кӧ тʹәне йа хԝә дькьн у нахԝазьн ширәта ԛәбул кьн. Ле мә хԝәш те тʹәви ԝан мәрьва бьн, йед кӧ дьлшәԝат ьн, мәрьва һʹьз дькьн, рʹәʹм у шкәсти нә (1 Пәт. 3:8). Чаԝа кӧ әм дьхԝазьн незики мәрьвед ӧса бьн, ӧса жи мәрьв ԝе бьхԝазьн незики мә бьн, һәрге әм мьлук бьн.
10. Чьрʹа мәрьвед мьлукрʹа һеса йә проблемада бәрхԝә нәкʹәвьн?
10 Мьлукти ӧса жи әʹмьре мә дьһа һеса дькә. Мәсәлә, щара әʹмьре мәда тьштед ӧса дьԛәԝьмьн, кӧ әм дьфькьрьн ԝәки әԝ нәрʹасти йә, гәрәке ӧса нибуйа. Сьлеман Пʹадша мәрьвәки билан бу. Әԝи гот: «Мьн дитийә хӧлам сәр һәспа нә, ле сәрок мина хӧлама ньга дьчьн» (Ԝаиз 10:7, ДТʹ). Мәрьвед кӧ гәләк аԛьл ьн у фәрәсәтед ԝан һәнә, нә һәр гав пʹайа у һӧрмәте дьстиньн. Ле щара мәрьвед кӧ нә бәрбьчʹәʹв ьн у фәрәсәтед ԝан кем һәнә, һе зедә ԛәдьр-һӧрмәте дьстиньн. Ле йәкә Сьлеман фәʹм дькьр, ԝәки билани йә һәрге мәри бь реали бьньһерʹә сәр әʹмьре хԝә, у бәрхԝә нәкʹәвә дәрһәԛа тьштед кӧ әʹмьре ԝида дьԛәԝьмьн (Ԝаиз 6:9). Һәрге әм мьлук ьн, мәрʹа ԝе һеса бә әʹмьре хԝәда ԛәбул кьн ԝан тьшта, чь кӧ әм һʹәсаб дькьн кӧ гәрәке ӧса нибуйа.
ЧЬЧАХ ДЬКАРӘ ЧӘТЬН БӘ КӦ МЬЛУК БЬН?
Чьрʹа чәтьн ә дәрәща ӧсада мьлук бьминьн? (Бьньһерʹә абзаса 11-12) *
11. Әм гәрәке чь бькьн чахе мә ширәт дькьн?
11 Һәр рʹож әм дькарьн избат кьн, кӧ әм мьлук ьн. Дина хԝә бьдьн чәнд дәрәща: Чахе ширәте дьдьнә мә. Ԝе баш бә ԝәки әм бир нәкьн, кӧ һәрге кәсәк дьхԝазә мә рʹаст кә у ширәт кә, ԝәки ӧса нә, шашийа мә ӧса бьчʹук нинә, ча әм һʹәсаб дькьн. Дәрәщед ӧсада, чахе мә ширәт дькьн, дьбәкә әм ширәте ԛәбул нәкьн. Әм дькарьн сәр ԝи мәрьве кӧ ширәт да, һерс кʹәвьн, йан жи бьхәйдьн кӧ әԝи чь щурʹәйи әԝ ширәт да мә. Ле һәрге әм мьлук ьн, әме сәр хԝә бьхәбьтьн, ԝәки ньһерʹандьна рʹаст хԝәй кьн.
12. Ль гора Мәтʹәлок 27:5, 6, чьрʹа әм гәрәке рʹази бьн жь ԝан хушк-бьра, йед кӧ ширәта дьдьнә мә? Мәсәле биньн.
12 Мәрьве мьлук ширәте дьшекьринә. Сәва әве йәке рʹьнд фәʹм кьн, бьдьнә бәр чʹәʹве хԝә ве мәсәле: Һун тʹәви чәнд хушк-бьра щьватеда хәбәр дьдьн, у йәк жь ԝана ԝә дьбә алики у бь дәнге ньмьз ԝәрʹа дьбежә, кӧ сәр дьране ԝә хԝарьн майә. Фәʹмдари йә, һуне һьнәки шәрм бькьн, ле йәкә һуне гәләк рʹази бьн жь ԝи, кʹе ԝәрʹа әԝ йәк гот. Бь рʹасти, дьбәкә ԝәйе бьхԝәста кӧ ԝәрʹа һе зу бьготана! Мина ве йәке, әм гәрәке мьлук бьн у рʹази бьн жь хушк у бьра, йед кӧ мерхасийе дьдьнә кʹьфше у ԝәʹдәда ширәтед лазьм дьдьнә мә. Әм ԝан мәрьва һʹәсаб дькьн ча дост, нә кӧ дьжмьн. (Бьхунә Мәтʹәлок 27:5, 6; Галт. 4:16).
Чьрʹа мәрʹа мьлукти лазьм ә, чахе кәсәк щьватеда щабдарийа дьстинә? (Бьньһерʹә абзаса 13-14) *
13. Әм ча дькарьн мьлуктийе нишан кьн, чахе щьватеда кәсәк щабдарийа дьстинә?
13 Чахе кәсәк щабдарийа дьстинә. Рʹуспик бь наве Щейсон, тинә сәр хԝә: «Чахе әз педьһʹәсьм, кӧ кәсәк щабдарийа дьстинә, әз щара хԝәрʹа дьфькьрьм, ле чьрʹа нәданә мьн». Ԛә ԝә жи хԝә ӧса тʹәхмин кьрийә? Рʹаст ә, чахе әм дьхԝазьн бона Йаһоԝа һе зедә бькьн, әԝ тьштәки баш ә (1 Тимтʹ. 3:1). Ле әм гәрәке фькьред хԝәда фәсал бьн. Һәрге әм фәсал нибьн, әм дьле хԝәда дькарьн ԛӧрʹә бьн. Мәсәлә, бьрак дькарә бьфькьрә кӧ щьватеда әԝ ә лапи баш, кʹе кӧ дькарә фьлан шьхӧли йан жи щабдари бинә сери. Йан жи кʹӧлфәта Мәсиһи дькарә бьфькьрә: «Әԝи шьхӧли мере мьн ԝе дьһа баш бькә, нә кӧ әԝ бьра!». Ле һәрге әм бь рʹасти мьлук ьн, фькьред ӧса ԝе нәйенә һʹьше мә.
14. Әм чь дькарьн жь Муса һин бьн, кӧ әԝи хԝә ча да кʹьфше чахе мәрьвед дьн жи щабдари стандьн?
14 Әм дькарьн жь Муса дәрсәкә фәрз һин бьн, кӧ әԝи ча хԝә да кʹьфше, гава мәрьвед дьн щабдари стандьн. Муса рʹебәри щьмәʹта Исраеле дькьр, у әԝи әв шьхӧле хԝә ԛимәт дькьр. Ле әԝи ча хԝә да кʹьфше, чахе Йаһоԝа изьн да кӧ мәрьвед дьн тʹәви ԝи щабдари биньн сери? Муса тʹӧ щар һʹәвсуди ԝан нәкьр (Жьмар 11:24-29). Әԝ йәки мьлук бу у жь мәрьвед майин аликʹари ԛәбул кьр, кӧ тʹәви ԝи шьхӧле һʹакьмтийе бькьн (Дәркʹ. 18:13-24). Бь сайа ве йәке, нав Исраелийада ида гәләк меред щабдар һәбун, йед кӧ дькарьбун һʹакьмтийе бькьн. Жь ве йәке те кʹьфше, кӧ Муса нәдькʹәтә һʹәйра наве хԝә, ле дькʹәтә һʹәйра щьмәʹте, чьмки хәм дькьр бона ԝан. Рʹасти жи мәсәләкә чьԛас баш ә бона мә! Әм гәрәке бир нәкьн, кӧ һәрге әм дьхԝазьн бона Йаһоԝа керһати бьн, дьһа фәрз ә мьлук бьн, нә кӧ гәләк аԛьл бьн. Рʹаст ә Йаһоԝа «бьльнд ә, ле йед ньмьзә бәләнгаз дьбинә» (Зәб. 138:6).
15. Дәрәщед гәләк хушк-бьра ча һатьн гӧһастьне?
15 Чахе дәрәщед мә тенә гӧһастьне. Ԝан рʹожед пашԝәхтийада, гәләк хушк-бьред кӧ гәләк сала Йаһоԝарʹа хьзмәт дькьн, кʹьфшкьрьнед тʹәзә стандьнә. Мәсәлә, сала 2014 тʹәшкиләта мә сафи кьр, ԝәки ида бәрпьрсийаред нәһийе тʹӧнә бьн, ләма ԝанрʹа у жьнед ԝанрʹа һатә готьне, ԝәки хьзмәткьрьна һәртʹьмә майин дәстпекьн. Дәстпека ве саледа, ӧса жи һатә сафикьрьне, ԝәки бәрпьрсийаред мьһале, йед кӧ гьһиштьнә 70 сали,
ида ве кʹьфшкьрьнеда ԝе хьзмәт нәкьн. У бьред кӧ 80 сали дәрбаз бунә, ида ԝе щьватеда ча координаторе кʹома рʹуспийа хьзмәт нәкьн. Хенщи ве йәке, ԝан чәнд салед пашԝәхтийеда, гәләк хушк-бьред жь Бәйтʹәле, дәштеда һатьнә кʹьфшкьрьне. Һьнәк жи ида хьзмәткʹаред һәртʹьм ниньн, чьмки сьһʹәт-ԛәԝата ԝан хьраб буйә, йан малбәта ԝанда борщдари зедә бунә, йан жи жь бо мәʹнийед дьн.16. Ча хушк-бьра ԝәʹде гӧһастьна мьлукти данә кʹьфше?
16 Бона ԝан хушк-бьра, чәтьн бу ԝан гӧһастьна бькьн. Фәʹмдари йә, әԝана һʹьз дькьрьн кʹьфшкьрьна хԝәйә бәре, у гәләка жь ԝан әԝ шьхӧле хԝә бь сала дькьр. Һьнәка ча бежи «шин» дькьрьн, һʹәта кӧ һини гӧһастьнед тʹәзә бун. Ԝәʹдә дәрбаз бу, у әԝана ида һини дәрәща хԝә бун. Чьрʹа? Мәʹнийа әʹԝльн әԝ ә, кӧ әԝана Йаһоԝа һʹьз дькьн. Ԝана заньбу, ԝәки хԝә тʹәсмили Хԝәде кьрьнә, нә кӧ тʹәсмили шьхӧләки, навәки, йан жи кʹьфшкьрьнәке (Колс. 3:23). Әԝана ша нә кӧ бь мьлукти бәрдәԝам дькьн Йаһоԝарʹа хьзмәт кьн, фьрԛи тʹӧнә кʹидәре хьзмәт дькьн. Әԝ хушк-бьра «һʹәму хәмед хԝә» давежьнә сәр Йаһоԝа, чьмки заньн ԝәки әԝ бона ԝана хәм дькә (1 Пәт. 5:6, 7).
17. Чьрʹа әм рʹази нә, кӧ Хәбәра Хԝәде мә һелан дькә мьлук бьн?
17 Әм гәләк рʹази нә, ԝәки Хәбәра Хԝәде мә һелан дькә кӧ мьлук бьн. Чахе әм ви һʹӧнӧре ԛимәт нав хԝәда пешда тиньн, һьн әм кʹаре дьстиньн һьн жи мәрьвед дьн. Хенщи ве йәке, чахе әм мьлук ьн, әм дьһа һеса тәнгасийада тәйах дькьн. Ле йа лапә фәрз, әм незики Йаһоԝа Баве хԝәйи әʹзмана дьбьн. Әм чьԛас мәрьвнә бәхтәԝар ьн, кӧ заньн ԝәки «Йе Бьльнд у Һәри Мәзьн», хьзмәткʹаред хԝәйи мьлук һʹьз дькә у ԛимәт дькә! (Иша. 57:15, ДТʹ).
КʹЬЛАМА 45 Фькьред Дьле Мьн
^ абз. 5 Һʹӧнӧрәкә лапә фәрз кӧ әм гәрәке бал хԝә пешда биньн, әԝ һәйә мьлукти. Ле чь йә мьлукти? Чьрʹа әм гәрәке мьлук бьн? У чьрʹа чәтьн ә мьлук бьминьн чахе дәрәщед мә тенә гӧһастьне? Әԝ готар ԝе щаба ԝан пьрсед фәрз бьдә.
^ абз. 7 Бьньһерʹә готар бь наве «Йаһоԝа Әз Гәләк Хәлат кьрьм», журнала «Бьрща Ԛәрәԝьлийеда» йа 1 Щотмәһе, сала 1984.
^ абз. 8 Бьньһерʹьн сәре 3, абзаса 23.
^ абз. 53 ШЬРОВӘКЬРЬНА ШЬКЬЛ: Паԝлос мала бьракида, бь мьлукти у бь дьл у щан тʹәви хушк-бьра у ӧса жи тʹәви зарʹа хәбәр дьдә.
^ абз. 57 ШЬРОВӘКЬРЬНА ШЬКЬЛ: Бьра жь бьраки щаһьл ширәте ԛәбул дькә, кӧ сәр һʹиме Кʹьтеба Пироз ә.
^ абз. 59 ШЬРОВӘКЬРЬНА ШЬКЬЛ: Бьраки әʹмьрда мәзьн һʹәвсудийе бьре щаһьл накә, йе кӧ щабдарийа хԝәрʹа ша дьбә.