1-2. а) Чьрʹа Һармәгәдон бона инсанәте мьзгини йә? б) Кʹижан пьрса әме ве готареда шеԝьр кьн?

ԜӘ Бьһистийә кӧ мәрьв чахе хәбәра «Һармәгәдон» дьбьһен, әԝана һʹәсаб дькьн, кӧ әԝ һәйә шәрʹе бь атоме йан жи хәзәба тʹәбийәте йа һʹәмдьнйайи? Ле Кʹьтеба Пироз дьбежә, ԝәки Һармәгәдон әԝ һәйә мьзгини у мәʹнийа шабуне! (Әʹйан. 1:3). Чьрʹа? Чьмки бь рʹасти шәрʹе Һармәгәдоне ԝе нә кӧ ԛьрʹа инсанәте бинә, ле хьлазбуне бинә. Чь щурʹәйи?

² Кʹьтеба Пироз дьдә кʹьфше, ԝәки шәрʹе Һармәгәдоне ԝе инсанәте хьлаз кә бь ве йәке, кӧ сәрԝертийед мәрьва бьдә һьлдане. Әв шәрʹ ԝе инсанәте хьлаз кә ӧса жи чахе мәрьвед хьраб кʹӧта кә, ле мәрьвед рʹаст хԝәй кә. Һьн жи инсанәт ԝе хьлаз бә, чьмки әԝ шәрʹ ԝе ԛьрʹа ԝан мәрьва бинә, йед кӧ әʹрде хьраб дькьн (Әʹйан. 11:18). Сәва кӧ ԝан тьшта рʹьнд фәʹм кьн, ԝәрә әм щабед ван чар пьрса шеԝьр кьн: Чь йә Һармәгәдон? Чь ԝе бьԛәԝьмә пешийа ԝи шәрʹи? Ча әм дькарьн ԝәʹде Һармәгәдоне хьлаз бьн? Һармәгәдон ида гәләк незик дьбә, ча әм дькарьн амьн бьминьн?

3. а) Хәбәра «Һармәгәдон» чь те һʹәсабе? б) Ль гора Әʹйанти 16:14, 16, чьрʹа әм дькарьн бежьн, ԝәки Һармәгәдон рʹастә-рʹаст щики сәр әʹрде нинә?

³ Бьхунә Әʹйанти 16:14, 16. Хәбәра «Һармәгәдон» Кʹьтеба Пирозда тʹәне щарәке те хәбьтандьне, у әԝ гьли сәр зьмане Ибрани те һʹәсабе «Чʹийайе Мәгидо» (Әʹйан. 16:16). Мәгидо шәһәр бу Исраела бәреда (Йешу 17:11). Ле Һармәгәдон рʹастә-рʹаст наве тʹӧ щийи нинә. Бь рʹасти әԝ һәйә әв дәрәщә, чахе «һʹәму пʹадшед дьнйайе» ԝе тʹоп бьн, сәва мьԛабьли Йаһоԝа дәрен (Әʹйан. 16:14). Ле ве готареда, әме хәбәра «Һармәгәдон» ӧса жи бьдьнә хәбате чахе хәбәрдан һәрʹә дәрһәԛа ви шәрʹи, кӧ ԝе дәрберʹа паши щьвандьна ԝан пʹадшед дьнйайе бьԛәԝьмә. Ле әм жь кʹӧ заньн, ԝәки  Һармәгәдон бь симболик те һʹәсабе щи? Йа пешьн, бь рʹасти чʹийайе Мәгидо тʹӧнә йә. Йа дӧда, дор бәре шәһәре Мәгидо һаԛас щи тʹӧнә, кӧ «һʹәму пʹадшед дьнйайе» у ордийед ԝан чʹәкед хԝәва, ԝедәре бьщьвьн. Йа сьсийа, чаԝа әме ве готареда пебьһʹәсьн, шәрʹе Һармәгәдоне ԝе һьнге дәстпебә, чахе «пʹадшед» дьнйайе мьԛабьли щьмәʹта Хԝәде дәрен, кӧ сәр һәр чар ԛӧлбед дьнйайе дьжин.

4. Чьрʹа Хԝәде шәрʹе хԝәйи хьлазийе у мәзьн, нав кьр Мәгидо?

⁴ Ле чьрʹа Йаһоԝа шәрʹе хьлазийейә мәзьн тʹәвгьредьдә тʹәви Мәгидо? Мәгидо у Нәԝала Йизрәәле, кӧ незики ԝи шәһәри бу, щийед гәләк шәрʹа бун. Щар-щара ԝан шәрʹада Йаһоԝа али щьмәʹта хԝә дькьр кӧ сәркʹәвьн. Мәсәлә, пе «авед Мәгиддо» Хԝәде али Барак һʹакьм кьр, ԝәки ордийа Кәнанийа тʹәви сәроке ԝан, демәк Сисәра, алт кә. Барак у Дәбора пʹехәмбәр, шькьри данә Йаһоԝа, чьмки әԝи бь кʹәрәмәт али ԝан кьр, кӧ ԝи шәрʹида сәркʹәвьн. Кʹьламеда ԝана ӧса дьгот, «стәйркед жь әʹзмана» мьԛабьли Сисәра шәрʹ кьрьн, у «чʹәме Кишоне ԝан малтьн у бьрьн» (Һʹакьм. 5:19-21).

5. Шәрʹе Һармәгәдоне ԝе чьда щӧдә бә жь ԝи шәрʹи, кʹижанида Барак сәркʹәт?

⁵ Барак у Дәборайе кʹьлама хԝә пе ԝан гьлийа хьлаз кьрьн: «Йа Хӧдан, бьра һʹәму нәйаред тә бь ви аԝайи тʹӧнә бьбьн; ле бәле йед кӧ тә һʹьз дькьн, бьра бьбьн мина рʹожа кӧ һеза тәда дәрдькʹәвә!» (Һʹакьм. 5:31). Ԝәʹде Һармәгәдоне жи, дьжмьнед Хԝәде ԝе ԛьрʹ бьн, ле йед кӧ Хԝәде һʹьз дькьн ԝе хьлаз бьн. Ле нава ԝан дӧ шәрʹада фьрԛи һәйә. Һармәгәдонеда щьмәʹта Хԝәде ԝе шәрʹ нәкә, у һәла һе чʹәкед ԝан жи ԝе тʹӧнә бьн! Ԛәԝата ԝан ԝе әԝ бә, кӧ әԝана рʹьһʹәт бьминьн у бьдьнә кʹьфше кӧ итʹбарийа хԝә Йаһоԝа у ордийа ԝийә әʹзмани тиньн (Иша. 30:15; Әʹйан. 19:11-15).

6. Һармәгәдонеда Йаһоԝа чь метода дькарә бьдә хәбате, сәва дьжмьнед хԝә кʹӧта кә?

⁶ Ле Хԝәде ԝе Һармәгәдонеда ча ԛьрʹа дьжмьнед хԝә бинә? Әԝ дькарә щурʹә-щурʹә метода бьдә хәбате. Мәсәлә, әԝ дькарә әʹрдһәже, тәйроке йан бьруске бьдә хәбате (Иб. 38:22, 23; Һәзԛл. 38:19-22). Әԝ дькарә ӧса бькә, ԝәки дьжмьнед ԝи мьԛабьли һәв шәрʹ кьн у ԛьрʹа һәв биньн (2 Дир. 20:17, 22, 23). У әԝ ӧса жи дькарә пе мәләкед хԝә, хьраба бькӧжә (Иша. 37:36). Хԝәде чь жи йан кʹе жи бьдә хәбате, йәкә әԝ ԝе сәркʹәвә. Һʹәму дьжмьнед ԝи ԝе кʹӧта бьн, у һʹәму мәрьвед рʹаст ԝе хьлаз бьн (Мәтʹлк. 3:25, 26).

7-8. а) Ль гора 1 Тʹесалоники 5:1-6, сәрԝеред дьнйайе ԝе кʹижан әʹламәтийа мәхсус бәла кьн? б) Чьрʹа әԝ әʹламәти ԝе дәрәԝикә хоф бә?

⁷ Әʹламәти кӧ «дьне сәԛьрʹи у бехофи йә», ԝе пешийа дәстпека «рʹожа Йаһоԝа, ДТʹ» бе әʹламкьрьне. (Бьхунә 1 Тʹесалоники 5:1-6.) 1 Тʹесалоники 5:2-да, «рʹожа Йаһоԝа» те һʹәсабе «тәнгасийа мәзьн» (Әʹйан. 7:14). Ле ча әме пебьһʹәсьн, ԝәки әԝ тәнгасийа мәзьн ва ида ԝе дәстпебә? Кʹьтеба Пироз дьбежә, кӧ әʹламәтийа мәхсус ԝе бе әʹламкьрьне. Әԝ әʹламәти ԝе бьбә нишан, кӧ тәнгасийа мәзьн ида бәр шемике йә.

⁸ Ль гора пʹехәмбәртийе, ԝе бе әʹламкьрьне, кӧ «дьне сәԛьрʹи у бехофи йә». Ле чьрʹа сәрԝеред дьнйайе ԝе әве йәке әʹлам кьн? Гәло ԝе сәрԝеред рʹелигийа жи тʹәви ԝан бьбьнә йәк? Дьбәкә жи. Чь жи һәбә, йәкә әԝ әʹламәти ԝе дәрәԝа жь щьна бә. Ле әԝ дәрәԝи ԝе гәләк хоф бә, чьмки ԝе мәрьва бьхальфинә, йанчь әԝана ида бехофийеда ньн, ле бь рʹасти ԝе бәр шемика тәнгасийа һәрә мәзьн бьн, кʹижан кӧ тʹәрихийа инсанәтеда тʹӧ щара тʹӧнә буйә. Бәле, «һьнге хәзәбе ньшкева сәр ԝанда бе,  мина еша кʹӧлфәта һʹәмлә». Ле хьзмәткʹаред Йаһоԝайи амьн һьнге ԝе ча бьн? Рʹаст ә дьбәкә әԝана әʹщебмайи бьминьн кӧ рʹожа Йаһоԝа ньшкева дәстпебу, чьмки әԝана ԝәʹдә ньзаньн, ле йәкә әԝана бона ве рʹоже ԝе һазьр сәкьни бьн.

9. Чаԝа Хԝәде ԝе дьнйа Шәйтʹан кʹӧта кә?

⁹ Ле Йаһоԝа ԝе щарәкева ԛьрʹа тʹәмамийа дьнйа Шәйтʹан нәйнә, чаԝа ԝәʹде Нӧһда кьр. Йаһоԝа ԝе пешийе пʹарәкә дьнйа Шәйтʹан кʹӧта кә, паше жи кʹижан кӧ майә. Йа пешьн, әԝ ԝе Бабилона Мәзьн, демәк империйа религийа ԛәлп кʹӧтә кә. Паше ида ԝәʹде Һармәгәдоне, Йаһоԝа ԝе пʹара дьнйа Шәйтʹан, кӧ майә кʹӧта кә, әԝ һәйә система политики, әскәри, у комерси. Ԝәрә әм һе кʹур дәрһәԛа ԝан дӧ ԛәԝьмандьна шеԝьр кьн.

10. Ль гора Әʹйанти 17:1, 6, у 18:24, чьрʹа Йаһоԝа ԝе Бабилона Мәзьн кʹӧта кә?

¹⁰ «Диԝана . . . ԛава бь нав у дәнг». (Бьхунә Әʹйанти 17:1, 6; 18:24.) Әԝ ԛав, демәк Бабилона мәзьн, наве Хԝәде гәләк беһӧрмәт дькә. Әԝ дәрһәԛа Хԝәде дәрәԝийа һин дькә. Әԝ тʹәви сәрԝеред дьнйайе бь симболик ԛавтийе дькә, чьмки пьштгьрийа ԝан дькә. Әԝ рʹелигийа ԛәлп, ԛәԝата хԝә у һʹӧкӧме хԝә дьдә хәбате, сәва жь әндәмед хԝә пʹәра бьстинә. Хенщи ве йәке, әԝе хуна гәләка рʹетийә, ӧса жи хуна хьзмәткʹаред Хԝәде (Әʹйан. 19:2). Ле Йаһоԝа ԝе ча Бабилона Мәзьн кʹӧта кә?

11. Кʹе бь симболик те һʹәсабе «щәʹнәԝьрәки соре гәвәз», у Хԝәде ԝе ча ԝи бьдә хәбате сәва Бабилона Мәзьн кʹӧта кә?

¹¹ Йаһоԝа ԝе пе «щәʹнәԝьрәки соре гәвәз» у «дәһә стьруйед» ԝи, ԛьрʹа «ԛава бь нав у дәнг» бинә. Әԝ щәʹнәԝьр бь симболик те һʹәсабе организасийа «Мьләтед Йәкбуйи». Ле дәһ стьруйед ԝи, әԝ һәнә сәрԝеред политики, йед кӧ пьштгьрийа ве организасийе дькьн. Әԝ сәрԝеред политики, ԝи ԝәʹде кӧ Хԝәде кʹьфш кьрийә, ԝе мьԛабьли Бабилона Мәзьн дәрен. Әԝана ԝе «дәсте ԝе жь һәр тьшти бькьн, ԝе тәʹзи кьн», бь ве йәке кӧ һʹәму һәбука ԝе тʹалан кьн, у хьрабийа ԝе бәр һʹәмуйа әшкәрә кьн (Әʹйан. 17:3, 16). Кʹӧтакьрьна ԝе ԛаве, ча  бежи ԝе рʹожәкеда бә, у ләма бона ԝан, йед кӧ пьштгьрийа ԝе дькьн, әԝ йәк ԝе әʹщебмайи бә. Чьрʹа? Чьмки әԝ гәләк ԝәхт хԝә ԛӧрʹә дькә у дьбежә: «Әз чаԝа пʹадша рʹуньшти мә, у нә жьнәби мә, тʹӧ щар әзе шине нәбиньм» (Әʹйан. 18:7, 8).

12. Йаһоԝа ԝе чь нәһелә сәрԝеред дьнйайе бькьн, у чьрʹа?

¹² Хԝәде ԝе нәһелә, ԝәки сәрԝеред дьнйайе щьмәʹта ԝи кʹӧта кьн. Щьмәʹта Йаһоԝа бь фьрнаԛи наве ԝи һьлданә сәр хԝә, у гӧрʹа тʹәмийа ԝи кьрьнә кӧ жь Бабилона Мәзьн дәркʹәтьнә (Кʹар. Шанд. 15:16, 17; Әʹйан. 18:4). Әԝана ӧса жи алийе хԝәда һәр тьшти дькьн, сәва али мәрьвед дьн жи бькьн жь Бабилона Мәзьн аза бьн. Ләма жи хьзмәткʹаред Йаһоԝа ԝе «жь бәлайед ԝе пʹаре нәстиньн». Ле йәкә баԝәрийа ԝан ԝе бе щерʹьбандьне.

13. а) Кʹе йә Гог? б) Ль гора Һәзәԛел 38:2, 8, 9, ԝе чь бьбә мәʹни, кӧ Гог мьԛабьли щьмәʹта Хԝәде дәре?

¹³ Пәйкʹәтьна Гог. (Бьхунә Һәзәԛел 38:2, 8, 9.) Паши кʹӧтакьрьна һʹәму рʹелигийед ԛәлп, щьмәʹта Хԝәде ԝе бьбә мина бахәкә кӧ ԝәʹде фьртонә хьлаз буйә. Шәйтʹан һьнге ԝе гәләк һерс кʹәвә. Әԝ ԝе һерса хԝә бь ве йәке бьрʹежә, кӧ пропаганда щьна, демәк «гьлийед һʹәрам» бьдә хәбате, сәва коалисйа дәԝләта, демәк йәктийа һʹәму сәрԝеред дьнйайе, һелан кә кӧ пәй хьзмәткʹаред Йаһоԝа кʹәвә (Әʹйан. 16:13, ДТʹ, 14). Әԝ коалисйа дәԝләта те навкьрьне «Гог жь әʹрде Магоге». Чахе әԝ мьԛабьли щьмәʹта Йаһоԝа дәре, һьнге шәрʹе Һармәгәдон ԝе дәстпебә (Әʹйан. 16:16).

14. Гог ԝе чь фәʹм кә?

¹⁴ Гог ԝе итʹбарийа хԝә дәсте хԝәйи «гошт» бинә, демәк ордийа хԝәйә мәзьн (2 Дир. 32:8). Ле әме итʹбарийа хԝә Йаһоԝа Хԝәде биньн, чь кӧ ԝе бәр чʹәʹве мьләта беһʹьши бә. Чьрʹа? Чьмки хӧданед Бабилона Мәзьнә бәре, кӧ ԛәԝат бу, әԝана хьлаз нәкьрьн жь «щәʹнәԝьр» у «дәһә стьруйед» ԝи! (Әʹйан. 17:16). Ләма жи Гог ԝе бьфькьрә, кӧ ԝе һеса ԛьрʹа мә бинә. Әԝ ԝе «мина әʹԝьрәки» кӧ әʹрде дадьдә, пәй щьмәʹта Йаһоԝа кʹәвә (Һәзԛл. 38:16). Ле  Гог ԝе зутьрәке бьвинә, ԝәки әԝ кʹәтийә тʹәльке у нькарә хьлаз бә. Мина Фьрәԝьн бәр Бәʹра Сор, Гог ԝе пебьһʹәсә, ԝәки әԝ мьԛабьли Йаһоԝа шәрʹ дькә (Дәркʹ. 14:1-4; Һәзԛл. 38:3, 4, 18, 21-23).

15. Ԝәʹде шәрʹе Һармәгәдоне Иса ԝе чь бькә?

¹⁵ Мәсиһ у ордийед ԝийи әʹзмана, ԝе щьмәʹта Хԝәде хьлаз кьн, ле Гог ордийед ԝива ԝе ԛьрʹ кьн (Әʹйан. 19:11, 14, 15). Ле чь ԝе бьԛәԝьмә тʹәви дьжмьне Йаһоԝайи сәрәкә, Шәйтʹан, йе кӧ пе пропаганда ԛәлп сәрԝеред дьнйайе хапандьн, сәва әԝана шәрʹе Һармәгәдонеда мьԛабьли щьмәʹта Хԝәде дәркʹәвьн? Иса ԝи у щьнед ԝи, ԝе бавежә «гәлийе һәй-ԝайе», кʹидәре кӧ әԝана ԝе һʹәзар сали гьрти бьн (Әʹйан. 20:1-3).

16. а) Әм ча дьдьнә кʹьфше, кӧ «Хԝәде нас» дькьн? б) Һәрге әм Йаһоԝа нас дькьн, әԝ йәк ԝе ча ԝәʹде Һармәгәдоне бона мә кʹәрәм бә?

¹⁶ Фьрԛи тʹӧнә әм гәләк ԝәхт рʹастийеда ньн йан тʹәзә, сәва әм хьлаз бьн әм гәрәке бьдьнә кʹьфше, кӧ «Хԝәде нас» дькьн у «гӧрʹа Мьзгинийа дәрһәԛа Хӧдане мә Иса, ДТʹ», дькьн (2 Тʹеслн. 1:7-9). Әм Хԝәде нас дькьн, һәрге заньн әԝ чь һʹьз дькә у чь һʹьз накә, у һәрге принсипед ԝи заньн. Әм ӧса жи избат дькьн кӧ ԝи нас дькьн, гава ԝи һʹьз дькьн, гӧрʹа ԝи дькьн у бь тʹәмами тʹәне ԝи дьһʹәбиньн (1 Йуһʹн. 2:3-5; 5:3). Чахе әм дьдьнә кʹьфше, кӧ Хԝәде нас дькьн, әԝ ԛәдьрәки ӧса дьдә мә, кӧ әм жи «алийе ԝива наскьри» нә, у әԝ йәк ԝе мә ԝәʹде Һармәгәдоне хьлаз кә (1 Корн. 8:3). Чьрʹа? Чьмки һәрге әм «алийе ԝива наскьри» нә, әԝ те һʹәсабе кӧ Хԝәде мә ԛәбул дькә.

17. Чь те һʹәсабе «гӧрʹа Мьзгинийа дәрһәԛа Хӧдане мә Иса» бькьн?

¹⁷ «Мьзгинийа дәрһәԛа Хӧдане мә Иса», ӧса жи те һʹәсабе һʹәму рʹастийед кӧ Иса һин дькьр, кʹижан кӧ әм Хәбәра Хԝәдеда дьхуньн. Әме бьдьнә кʹьфше кӧ гӧрʹа ве мьзгинийе дькьн, һәрге ԝан тьшта әʹмьре хԝәда бьдьнә хәбате. Әԝ те һʹәсабе Пʹадшатийа Хԝәде дайньн щийе пешьн, гӧрʹа принсипед Хԝәде бькьн, у мьзгинийа  Пʹадшатийе бәла кьн (Мәт. 6:33; 24:14). Әԝ ӧса жи те һʹәсабе пьштгьрийа Мәсиһийед бь рʹӧһʹе пироз бьжарти бькьн, щабдарийед ԝани фәрзда (Мәт. 25:31-40).

18. Мәсиһийед бьжарти ԝе чь щурʹәйи хәлат кьн ԝана, йед кӧ пьштгьрийа ԝан дькьн?

¹⁸ Хьзмәткʹаред Хԝәде йед бьжарти, ԝе зутьрәке «пәзед . . . дьн» хәлат кьн, бона ԛәнщийа ԝан, демәк пьштгьрийа ԝан (Йуһʹн. 10:16). Ле чаԝа? Пешийа дәстпека шәрʹе Һармәгәдоне, һʹәму 144 000 йед бьжарти ида ԝе сәр әʹзмана бьн, чаԝа рʹӧһʹед нәмьри. Әԝана һьнге ԝе бьбьнә пʹара ордийа әʹзмани, кʹижан кӧ ԝе ԛьрʹа Гог бинә, ле «әʹлаләтәкә . . . мәзьн», демәк щьмәʹта Йаһоԝа хьлаз кә (Әʹйан. 2:26, 27; 7:9, 10). Бәле, һьнге әԝ әʹлаләта мәзьн ԝе чьԛас ша бә, кӧ ԛәдьрәки ӧса бал ԝан һәбу, ԝәки пьштгьрийа Мәсиһийед бьжарти дькьрьн, һʹәта кӧ әԝана сәр әʹрде бун.

19-20. Нава тәнгасийада ча әм дькарьн амьн бьминьн, гава Һармәгәдон гәләк незик ә?

¹⁹ Ԝәʹде ԝан рʹожед ахьрийеда, гәләк хьзмәткʹаред Йаһоԝа рʹасти тәнгасийа тен. Ле нава ԝан тәнгасийада жи әм дькарьн бь шабуне сәбьр кьн (Аԛуб 1:2-4). Бона ве йәке, мәрʹа лазьм ә һәр гав бь дьл у щан дӧа бькьн (Луԛа 21:36). Ле әм гәрәке ӧса жи ль гора дӧайед хԝә тьштәки бькьн, демәк Хәбәра Хԝәде һәр рʹож леколин бькьн, сәр бьфькьрьн, у дәрһәԛа пʹехәмбәртийед кӧ зутьрәке гәрәке бенә сери, леколин бькьн (Зәб. 77:12). Һәрге әм ԝан тьшта бькьн у хьзмәтийеда хирәт бьн, әме баԝәрийа хԝә у һевийа хԝә ԛәԝи хԝәй кьн!

²⁰ Бьфькьрьн кӧ һуне чьԛас ша бьн у әʹщебмайи бьминьн гава Бабилона Мәзьн кʹӧта бә у шәрʹе Һармәгәдон дәрбаз бә! Ле бьдьнә бәр чʹәʹве хԝә, әме ча бәхтәԝар бьн, гава наве Хԝәде бе һӧрмәткьрьне у изьна сәрԝертийа ԝи бь тʹәмами бе избаткьрьне! (Һәзԛл. 38:23). Бәле, рʹасти жи Һармәгәдон мьзгини йә бона ԝан, йед кӧ Хԝәде нас дькьн, гӧрʹа Кӧрʹе ԝи дькьн у һʹәта хьлазийе амьн дьминьн! (Мәт. 24:13).