1, 2. Ча мәсәла Тони дьдә кʹьфше, ԝәки мәри дькарә әʹмьре хԝәда гӧһастьна бькә?

ТОНИ гәдәки щаһьл кӧ бе бав мәзьн бьбу, нәхԝәст мәкʹтәбе хьлаз кә, у дьхԝәст жь мәкʹтәбе зу дәркʹәта. Һʹәԝаса ԝи нәдьһат һин бә у әԝ һәр рʹожед Шәми у Ләʹда дьчу синәме, йан тʹәви һәвалед хԝә ԝәʹдә дәрбаз дькьр. Әԝи хьраби нәдькьр, нә жи наркотик у щьхарә дькʹьшанд, ле нета әʹмьре ԝи тʹӧнә бу. Һьн жи әԝ дӧдьли дьбу, ԝәки Хԝәде һәйә. Ле щарәке, әԝ рʹасти жьн-мерәки һат, кӧ Шәʹдед Йаһоԝа бун у тʹәви ԝан дәрһәԛа дӧдьлибуна хԝә хәбәр да у пьрс дьда ԝан. Ԝана дӧ брошур данә ԝи, бь наве «Канийа Әʹмьр-Пенщ Пьрсед Фәрз» у «Гәло Жийин Һатийә Әʹфьрандьн?».

² Чахе жьн-мер щара дӧда һатьн, Тони ньһерʹандьна хԝә гӧһастьбу. Әԝи әԝ брошур һаԛас леколин кьрьбу, кӧ әв ида ԛӧрчʹьми бун. Әԝи ӧса гот: «Хԝәде бь рʹасти жи һәйә». Әԝ ԛайил бу сәр һинбуна Кʹьтеба Пироз у ахьрийеда ньһерʹандьна ԝи сәр әʹмьр һатә гӧһастьне. Әԝ ӧса жи мәкʹтәба хԝәда бу йәк жь шагьртед лапи баш. Һәла һе директоре мәкʹтәбе жи, кʹижани дәрһәԛа баԝәрийа ԝийә тʹәзә заньбу, сәр Тони әʹщебмайи ма. Әԝи Тонирʹа гот: «Ньһерʹандьна тә алийе башда һатийә гӧһастьне у нишанед тә жи бьльнд бунә. Тӧ ӧса һати гӧһастьне,  чьмки тʹәви Шәʹдед Йаһоԝа һәвалтийе дьки?» Тони гот әре у шәʹдәтикә баш да. Әԝи бь нишанед баш мәкʹтәб хьлаз кьр у иро әԝ бәрдәстийе щьвате йә у ча пешәнг хьзмәт дькә. Әԝ ӧса жи гәләк бәхтәԝар ә, чьмки ньһа Баве ԝийи һʹьзкьри һәйә, демәк Йаһоԝа (Зәб. 68:5).

3. Йаһоԝа чь ширәте дьдә щаһьла?

³ Сәрһатийа Тони тинә бира мә, ԝәки Йаһоԝа бона щаһьла хәм дькә. Щаһьлно, әԝ дьхԝазә ԝәки һун әʹмьре хԝәда пешдачуйи у бәхтәԝар бьн. Ләма әԝ ширәте дьдә ԝә: «Әʹфьрандаре хԝәйи Һьмзор щаһьлтийа хԝәда бир нәкә» (Ԝаиз 12:1, ДТʹ). Әԝ йәк дьнйа иройинда һеса нинә, ле йәкә дьбә. Пе аликʹарийа Хԝәде һун дькарьн нә тʹәне щаһьлтийа хԝәда бәхтәԝар у пешдачуйи бьн, ле тʹәмамийа әʹмьре хԝәда. Ԝәрә ньһа әм шеԝьр кьн мәсәла Исраелийа, гава әԝана Әʹрде Создайи зәфт кьрьн у мәсәла Даԝьд чахе әԝ рʹасти Голйат һат.

4, 5. Кʹижан дәрсәкә фәрз әм дькарьн жь Исраелийа, у ӧса жи жь сәрһатийа Даԝьд у Голйат һин бьн? (Бьньһерʹә шькле әʹԝльн.)

⁴ Чахе Исраели незики Әʹрде Создайи бун, Хԝәде ԝанрʹа нә гот, ԝәки бона шәрʹ хԝә һазьр кьн (Ԛан. Дщр. 28:1, 2). Дәԝсе әԝи ԝанрʹа гот, ԝәки гӧрʹа тʹәмийед ԝи бькьн у итʹбарийа хԝә ԝи биньн (Йешу 1:7-9). Бь ньһерʹандьна мәрьва әԝ ширәт бекер бу! Ле бь рʹасти әԝ ширәтәкә гәләк баш бу. Йаһоԝа али щьмәʹта хԝә кьр, ԝәки шәрʹе тʹәви Кәнанийада сәркʹәвьн (Йешу 24:11-13). Бәле, сәва гӧрʹа Хԝәде бькьн баԝәрийа ԛәԝи лазьм ә, у әԝ баԝәри тʹьме кʹаре тинә. Әԝ йәк тʹьме ӧса бу у иро жи ӧса йә.

⁵ Голйат әскәрәки гәләк ԛәԝи бу, кʹижан кӧ ԝәкә 2.9 метьр бьльнд бу у чʹәкед ԝийи ԛәԝи һәбун (1 Сам. 17:4-7). Ле бал Даԝьд тʹәне 2 тьшт һәбун: шьдан у баԝәри һьндава Йаһоԝа Хԝәде. Даԝьд бәр чʹәʹвед мәрьвед бь баԝәрийа сьст, бефәʹм дьһатә кʹьфше. Ле әԝана гьшк жи шаш дьбун! Әԝ Голйат бь рʹасти йәки бефәʹм бу! (1 Сам. 17:48-51).

6. Әме ве готареда дәрһәԛа чь шеԝьр кьн?

⁶ Готара пешийа веда, мә шеԝьр кьр дәрһәԛа чар тьшта, кʹижан кӧ мә бәхтәԝар дькьн. Чар тьшт әԝ бун: хԝарьна рʹӧһʹани, һәвалед кӧ Хԝәде дьдә мә, нетед һежа, у азайа кӧ Хԝәде дьдә мә. Ԝәрә әм ньһа диса шеԝьр кьн принсипед жь Зәбур 16, у пебьһʹәсьн ча әм дькарьн жь ԝан тьшта һе зедә кʹаре бьстиньн.

7. а) Мәрьве рʹӧһʹани чь щурʹәйи йә? б) Кʹе бу «пʹара» Даԝьд, у ча әԝ йәк сәр ԝи һʹӧкӧм дьбу?

⁷ Мәрьве рʹӧһʹани баԝәрийа хԝә Хԝәде тинә у сәр тьшта пе чʹәʹве ԝи дьньһерʹә. Әԝ тʹьме рʹебәрийа Хԝәде дьгәрʹә у дьхԝазә һәр тьштида гӧрʹа ԝи бькә (1 Корн. 2:12, 13). Даԝьд ве йәкеда мәсәләкә баш һишт. Әԝи дьстьра: «Хӧдан ә пʹара мьнә жьбарә у рʹьсԛе мьн» (Зәб. 16:5). Даԝьд рʹази бу бона «пʹара» хԝә, демәк һәләԛәтийа хԝә тʹәви Хԝәде, у әԝи щи-сьтʹар бал ԝи дьгәрʹийа (Зәб. 16:1). Ахьрийа ве йәке чь бу? Даԝьд ньвиси: «Нәфса мьн әшԛ дьбә». Бәле, достийа Даԝьд тʹәви Хԝәде, шабунәкә мәзьн жерʹа дьани. (Бьхунә Зәбур 16:9, 11.)

8. Кʹижан ьн һьнә тьшт, кӧ мә бәхтәԝар дькьн?

⁸ Мәрьвед кӧ пәй хԝәстьнед хԝә у пʹәра дькʹәвьн, нькарьн шабунәкә ӧса бьстиньн, чаԝа Даԝьд дьстанд (1 Тимтʹ. 6:9, 10). Бьраки мә жь Канадайе гот: «Мәрьв ләзәте дьстинә нә жь ве йәке чь кӧ әԝ әʹмьре хԝәда дьстинә, ле жь ве йәке кӧ әԝ чь дьдә Йаһоԝа Хԝәде, кʹижан кӧ һәр пʹешкʹешед ԛәнщ дьдә мә»  (Аԛуб 1:17). Бәле, баԝәри һьндава Йаһоԝа у хьзмәтийа ԝирʹа, әʹмьре мәда шабуне тинә у дьлрʹьһʹәтийе дьдә мә. Щаһьлно, ле һун ча дькарьн баԝәрийа хԝә ԛәԝи кьн? Һун гәрәке бона Йаһоԝа ԝәʹдә хәрщ кьн, демәк Хәбәра ԝи бьхуньн, дина хԝә бьдьнә әʹфьринед ԝи, у бьфькьрьн дәрһәԛа һʹӧнӧред ԝи у ӧса жи дәрһәԛа һʹьзкьрьна ԝи һьндава ԝә (Рʹом. 1:20; 5:8).

9. Хәбәра Хԝәде ча дькарә тә бьгӧһезә?

⁹ Чаԝа баве һʹьзкьри, Хԝәде мә ширәт у рʹаст дькә. Даԝьд ширәткьрьна Хԝәде дьшекьранд. Әԝи гот: «Пәсьне Тә әзе бьдьм, Хӧдане ширәткʹар, һʹәта шәв жи дьл нав мьнда дьбә дәрсдар» (Зәб. 16:7). Бәле, Даԝьд дьшьрмиш дьбу сәр фькьред Хԝәде, чʹәʹв дьда ньһерʹандьна ԝи у изьн дьда ԝи, ԝәки ԝи рʹаст кә у алийе башда бьгӧһезә. Һәрге һун жи ӧса бькьн, һʹьзкьрьна ԝә жи һьндава Хԝәде ԝе мәзьн бә у һуне бьхԝазьн гӧрʹа ԝи бькьн. Хенщи ве йәке, һуне рʹӧһʹанида жи бьгьһижьн. Хушкәкә мә бь наве Кристин гот: «Чахе әз леколин дькьм у сәр хԝәндьна хԝә дьфькьрьм, әз ӧса тʹәхмин дькьм те бежи Йаһоԝа хут бона мьн әԝ тьшт дайә ньвисаре!»

10. Һәрге һун рʹӧһʹанида гьһишти бьн, ль гора Ишайа 26:3 әԝ йәк ԝе чьда али ԝә бькә?

¹⁰ Һәрге һун рʹӧһʹанида мәзьн бьн, һуне ида сәр ве дьнйайе у ахьрийа ԝе, пе чʹәʹве Хԝәде бьньһерʹьн. Һьн жи Йаһоԝа ԝе занәбун у сәрԝахтийа мәзьн бьдә ԝә. Ле чьрʹа? Чьмки әԝ дьхԝазә һун әʹмьре хԝәда тьштед фәрз дайньн щийе пешьн, сафикьрьнед аԛьлайи бькьн, у бь баԝәрийе сәр ахьрийе бьньһерʹьн. (Бьхунә Ишайа 26:3.) Бьраки мә жь Амәрикайе бь наве Щошуа дьбежә: «Һәрге әм тʹьме хԝә незики Йаһоԝа бьгьрьн, ԝе бал мә тьштед фәрз тʹьме сәр щийе пешьн бьн».

11. Даԝьд һәвалед ча хԝәрʹа дьжбарт?

¹¹ Бьхунә Зәбур 16:3. Даԝьд заньбу чаԝа һәвалед рʹаст хԝәрʹа бьвинә. Әԝи хԝәрʹа ча һәвал мәрьвед ӧса дьжбарт, йед кӧ Йаһоԝа һʹьз дькьрьн. Әԝи ԝана нав кьр «пироз», чьмки әԝана нав-намус у һʹәлал бун. Зәбурбежәки дьн жи дәрһәԛа бьжартьна һәвала гьлийед ӧса гот: «Әз һогьре хофкʹешед Тә мә, кӧ хԝәй дькьн ԛанунед Тә» (Зәб. 119:63). Чаԝа мә готара пешийа веда дит, һун жи дькарьн гәләк һәвалед баш хԝәрʹа бьвиньн, йед кӧ Йаһоԝа дьтьрсьн у гӧрʹа ԝи дькьн. Ле фәʹмдари йә, һун дькарьн нә тʹәне нава щаһьлада һәвала хԝәрʹа бьжберьн.

12. Чьрʹа Даԝьд у Йонатʹан һәвалед баш бун?

¹² Даԝьд тʹәне тʹәви йед ԝәкә хԝә һәвалти нәдькьр. Те бира ԝә бона ԝи һәваләки лапи баш кʹе бу? Наве ԝи Йонатʹан бу. Һәвалтийа ԝан йәк жь һәвалтийед лапи баш ә, кӧ Кʹьтеба Пирозда ньвисарьн. Ле ԝә заньбу ԝәки Йонатʹан ԝәкә 30 сали жь Даԝьд мәстьр бу? Ле гәло чьрʹа әԝана һәвалед ӧса баш бун? Чьмки әԝана һәрдӧ жи Хԝәде баԝәр дькьрьн, ԛәдьре һәвдӧ дьгьртьн у мерхасийа һәвдӧ дьдитьн гава тʹәви дьжмьнед Хԝәде шәрʹ дькьрьн (1 Сам. 13:3; 14:13; 17:48-50; 18:1).

13. Чаԝа һун дькарьн һе зедә һәвала хԝәрʹа бьвиньн? Мәсәле биньн.

¹³ Мина Даԝьд у Йонатʹан, әм жи ша дьбьн, гава тʹәви ԝан мәрьва һәвалтийе дькьн, йед кӧ Йаһоԝа һʹьз дькьн у баԝәрийа хԝә ԝи тиньн. Киера, йа кӧ гәләк сал ә Хԝәдерʹа хьзмәт дькә, дьбежә: «Мьн хԝәрʹа нав тʹәмамийа дьнйайеда һәвал дитьнә, йед кӧ жь щурʹә-щурʹә мьләта нә у әʹдәтед ԝан щурʹә-щурʹә нә». Чахе һун жи ӧса бькьн, һуне әшкәрә бьвиньн кӧ чаԝа Кʹьтеба Пироз у рʹӧһʹе пироз мә дькә малбәтәкә ԛәԝи.

14. а) Чь ԝе али ԝә бькә нетед рʹӧһʹани дайньн пешийа хԝә? б) Һьнә щаһьл чь дьфькьрьн дәрһәԛа нетед рʹӧһʹани?

¹⁴ Бьхунә Зәбур 16:8. Әʹмьре Даԝьдда хьзмәти Хԝәдерʹа щийе пешьн дьгьрт. Һәрге һун жи чʹәʹв бьдьнә ԝи, бәрдәԝам кьн Йаһоԝарʹа хьзмәт кьн у нетед рʹӧһʹани дайньн пешийа хԝә, һуне жь әʹмьре хԝә ләзәте бьстиньн. Бьраки бь наве Стивен гот: «Чахе әз нете датиньм пешийа хԝә, у дьгьһижьмә ве нета хԝә, паше жи дьньһерʹьм сәр пешдачуйина хԝә, ӧса әз ша у дьлрʹьһʹәт дьбьм». Бьраки щаһьл жи жь Алманйайе, йе кӧ ньһа ԝәлате хәрибда хьзмәт дькә, гот: «Әз нахԝазьм, кӧ чахе әз кал бьм у сәр әʹмьре хԝәйи бәре бьньһерʹьм, бьвиньм ԝәки әз тʹәне бона әʹмьре хԝә фькьримә». Әм баԝәр ьн, ԝәки һун, демәк щаһьл жи ӧса дьфькьрьн. Бь пʹешкʹешед кӧ Хԝәде дайә ԝә, ԝи һӧрмәт кьн у аликʹарийе бьдьнә мәрьва (Галт. 6:10). Нетед рʹӧһʹани дайньн пешийа хԝә, у дӧада жь Йаһоԝа һиви кьн, ԝәки али ԝә бькә кӧ һун бьгьһижьнә ԝан нета. Дӧдьли нәбьн, кӧ әԝ ԝе әʹсә щаба дӧайед ԝә бьдә (1 Йуһʹн. 3:22; 5:14, 15).

15. Кʹижан нета һун дькарьн дайньн пешийа хԝә? (Бьньһерʹьн чаргошә « Һьнә Нетед Рʹӧһʹани»).

¹⁵ Ле һун кʹижан нета дькарьн дайньн пешийа хԝә? Бәʹса хәбәре, щьватеда пе гьлийед хԝә щаба хԝә бьдьн, бьбьнә пешәнг йан жи Бәйтʹәледа хьзмәт кьн. Йан жи зьмане тʹәзә һин бьн сәва дәшта зьмане хәрибда хьзмәт кьн. Бьраки щаһьл бь наве Барак, йе кӧ хьзмәткʹаре һәртʹьм ә, дьбежә: «Әз чахе һәр рʹож чʹәʹве хԝә вәдькьм у заньм кӧ әз һʹәму ԛәԝата хԝә дьдьмә Йаһоԝа, әз тьштәки ӧса тʹәхмин дькьм, кӧ тʹӧ шьхӧләкә дьн бәрамбәри ве йәке набә».

16. Даԝьд ча дьньһерʹи сәр ԛанун у принсипед Йаһоԝа, у чьрʹа?

¹⁶ Бьхунә Зәбур 16:2, 4. Чаԝа мә готара пешийа веда дит, ԛанун у принсипед Хԝәде мә аза дькьн, у али мә дькьн ԛәнщийе һʹьз кьн у хьрабийе нәфрʹәт кьн (Амс. 5:15). Йаһоԝа бона Даԝьд Канийа ԛәнщийе бу. Ԛәнщи әԝ һәйә һʹӧнӧрәкә намуси, кӧ һәр шьхӧл у фькьрада те кʹьфше. Даԝьд һәр тьшт дькьр сәва чʹәʹв  бьда Хԝәдайе хԝә. Әԝи нәфрʹәт дькьр әԝ тьшт, чь кӧ бәр чʹәʹве Хԝәде рʹәш бун, бәʹса хәбәре, пʹутпʹарьсти. Мәрьвед кӧ пʹутпʹарьстийе дькьн, хԝә дьһʹәрьминьн, чьмки һӧрмәт-рʹумәта кӧ Йаһоԝа Хԝәдерʹа дькʹәвә, дьдьнә пʹута (Иша. 2:8, 9; Әʹйан. 4:11).

17, 18. а) Даԝьд чь фәʹм дькьр дәрһәԛа һʹәбандьна ԛәлп? б) Чь иро мәрьварʹа кӧл у дәрда зедә дькә?

¹⁷ Ԝәʹде бәре, гәләк щар бенамуси дькʹәтә нава һʹәбандьна ԛәлпда (Һос. 4:13, 14). Гәләк мәрьва хԝәш дьһат әԝ һʹәбандьна ԛәлп, чьмки дькарьбун хԝәстьнед хԝәйә бәдәне рʹази кьн. Ле гәло әԝе йәке әԝана бәхтәԝар дькьрьн? Тʹӧ щар на! Чаԝа Даԝьд гот, әԝед кӧ пәй ԝан хӧдана дькʹәтьн, тʹәне кӧл у дәрд хԝәрʹа зедә дькьрьн. Ԝана ӧса жи ԛьрʹа гәләк зарʹа дьанин, сәва ча ԛӧрбан ԝан хӧданарʹа бьдьн (Иша. 57:5). Әԝ берʹәʹмти бәр чʹәʹве Йаһоԝа рʹәш бу! (Йерәм. 7:31). Һәрге ԝә ԝи ԝәʹдәйида бьжита, бешьк һуне гәләк жь де-баве хԝә рʹази буна, йед кӧ баԝәрийа хԝә Йаһоԝа дьанин у гӧрʹа ԝи дькьрьн.

¹⁸ Иро жи һʹәбандьна ԛәлп гәләк щар бенамусийе ԛәбул дькә, һәла һе һомосексуалийе жи. Ле ахьрийа ве йәке бәред гәләк хьраб тинә, чьмки әԝана йанчь азайе дьстиньн, ле бь рʹасти тʹӧ кʹаре настиньн (1 Корн. 6:18, 19). Мәрьв «дәрд у кӧлед хԝә зедә дькьн», у дьбәкә һун хԝәха жи ве йәке дьвиньн. Ләма щаһьлно, гӧһ бьдьнә Баве хԝәйи әʹзмана. Дӧдьли нәбьн ԝәки һәрге һун гӧрʹа ԝи бькьн, әԝ йәк ԝе бона кʹара ԝә бә. Кʹур бьфькьрьн кӧ әԝ ләзәта ԝәʹдәлу кʹижан мәрьв дьстинә, гава пәй хԝәстьнед хԝәйә бәдәне дькʹәвә, ахьрийа чьԛас хьраб тинә (Галт. 6:8). Щошуа бәʹса кʹижани мә жоре кьр, гот: «Әм дькарьн азайа хԝә ӧса бьдьнә хәбате ча дьхԝазьн, ле чахе әм рʹаст надьнә хәбате, әм тʹӧ кʹаре настиньн».

19, 20. Кʹижан кʹәрәм һивийа ԝан щаһьла нә, йед кӧ баԝәрийа хԝә Йаһоԝа тиньн у гӧрʹа ԝи дькьн?

¹⁹ Иса готә шагьртед хԝә: «Һәгәр һун сәр һинкьрьна мьн бьминьн, һуне рʹаст шагьртед мьн бьн. Һуне рʹастийе нас кьн у рʹастийе ԝә аза кә» (Йуһʹн. 8:31, 32). Бәле, әԝ азайи ӧса жи һәйә азайа жь рʹелигийа ԛәлп, нәзанийе, у һинкьрьнед ԛәлп. Һьн жи, әме ахьрийеда «тʹәви азайи у рʹумәта зарʹед Хԝәде бьн» (Рʹом. 8:21). Һәрге һун сәр һинкьрьна Иса бьминьн, һәла һе ньһа жи һун дькарьн әве азайе тәʹм кьн. Ԝи щурʹәйи һуне нә кӧ тʹәне «рʹастийе нас кьн», ле анәгори ве бьжин.

²⁰ Щаһьлно, әве азайе кӧ Хԝәде дьдә ԝә бьшекьриньн. Азайа хԝә бь аԛьлайи бьдьнә хәбате, чьмки ӧса һуне ахьрийеда пешдачуйи бьн у сафикьрьнед билан бькьн. Бьраки щаһьл гот: «Һәрге щаһьлтийеда азайа хԝә бь билани дьди хәбате, әԝ йәк ԝе али тә бькә ԝәʹде сафикьрьнед мәзьн кӧ ахьрийеда рʹасти тә бен, мәсәлә кʹижан хәбата лайиԛ ԛәбул ки, сафи ки бьзәԝьщи йан мер ки, йан жи ԝәʹдәлу азәп бьмини».

21. Чаԝа һун дькарьн рʹийа Хԝәдеда бьминьн?

²¹ Ве дьнйайеда, әԝ жийин кӧ мәрьв һʹәсаб дькьн жийина лапә баш, ԝәʹдәлу йә. Әм ньзаньн сьбе ԝе чь бьԛәԝьмә (Аԛуб 4:13, 14). Ләма жи аԛьлайи йә кӧ рʹийа Хԝәдеда бьминьн, кʹижан кӧ ахьрийеда ԝе мәрʹа «жийина кӧ рʹасти жийин ә» бьдә, демәк жийина һʹәта-һʹәтайе (1 Тимтʹ. 6:19). Ле Хԝәде тʹӧ щар зоре мә накә рʹийа ԝида һәрʹьн. Әм хԝәха гәрәке ве йәке бьжберьн. Ләма жи щаһьлно, Йаһоԝа бькьн «пʹара» хԝә, бьшекьриньн ԝан тьштед ԛәнщ кӧ әԝ дьдә ԝә (Зәб. 103:5). У дӧдьли нәбьн, ԝәки әԝ дькарә «һʹәта-һʹәтайе хер у хԝәши» у «шабунәкә мәзьн» бьдә ԝә (Зәб. 16:11).