1, 2. Чьрʹа билани йә гӧһ бьдьнә Әʹфьрандаре хԝә, чахе әм әʹмьре хԝәда дьхԝазьн сафикьрьнед фәрз бькьн? (Бьньһерʹә шьклед әʹԝльн.)

ЩАҺЬЛНО, дьбәкә дәрһәԛа ахьрийа ԝә гәләк ширәта дьдьнә ԝә. Мәсәлә, дәрсдар йан мәрьвед дьн ԝәрʹа дьбежьн, ԝәки хԝәрʹа нете дайньн кӧ хԝәндьна бьльнд бьстиньн, йан жи хәбатәкә ӧса хԝәрʹа бьвиньн, кӧ гәләк пʹәрә ԛазанщ кьн. Ле Йаһоԝа ширәтед майин дьдә ԝә. Бәле, әԝ дьхԝазә ԝәки мәкʹтәбеда һун рʹьнд һин бьн, сәва паше бькарьбьн әʹбура хԝә бькьн (Колс. 3:23). Ле әԝ ширәт у принсип дьдә ԝә, сәва рʹебәри бьдә ԝә у али ԝә бькә ԝәʹде ԝан рʹожед ахьрийеда ӧса бьжин, чаԝа кӧ дьле ԝи хԝәш те (Мәт. 24:14).

² Ӧса жи бир нәкьн, ԝәки Йаһоԝа һаш жь һәр тьшти һәйә. Әԝ занә ахьрийеда ԝе чь бьԛәԝьмә, у занә ԝәки ахьрийа ве дьнйайе ԝе чь бә у әв дьнйа ԝе зутьрәке кʹӧта бә (Иша. 46:10; Мәт. 24:3, 36). Әԝ ӧса жи занә ԝәки чь дькарә бь рʹасти ԝә бәхтәԝар кә у ләзәте бьдә ԝә, у чь дькарә ԝә дьлшькәсти у бебәхт кә. Ләма жи чьԛас аԛьлайи жи мәрʹа ширәтед мәрьва бенә кʹьфше, йәкә һәрге әԝана ль гора Хәбәра Хԝәде ниньн, әԝ ширәт нькарьн билани бьн (Мәтʹлк. 19:21).

3, 4. Чаԝа ширәта хьраб сәр Адәм, Һеԝайе у зӧрʹәта ԝан һʹӧкӧм бу?

³ Ширәта хьраб жь ԝәʹде бәре те, жь Шәйтʹан, йе кӧ кәсе пешьн бу кӧ ширәтәкә хьраб да. Әԝи хԝәха бь сәри хԝә, хԝә кьрә ширәткʹар у готә Һеԝайе ԝәки йанчь ԝе әԝ у мере ԝе һе бәхтәԝар бьн, һәрге хԝә сәри хԝә бьн у ча бьхԝазьн ӧса бьжин (Дәстп. 3:1-6). Ле бь рʹасти Шәйтʹан жь ԛәлптийа хԝә әԝ ширәт да ԝан. Әԝи дьхԝәст Адәм, Һеԝа у зӧрʹәта ԝанә ахьрийе, гӧрʹа ԝида бьн у ԝи бьһʹәбиньн, нә кӧ Йаһоԝа. Ле Шәйтʹан ԛә бона мәрьва тьштәк кьрьбу? Һәр тьштед баш кӧ бал ԝана һәбу Йаһоԝа дабу ԝан, мәсәлә бахче бәдәԝ у сьһʹәт-ԛәԝата бекемаси кӧ ԝе һʹәта-һʹәтайе һәбуйа.

⁴ Ле йазьх Адәм у Һеԝайе гӧрʹа Хԝәде нәкьрьн, у хԝә жь ԝи ԛәтандьн. У ча әм гьшк заньн, ахьрийа ве йәке гәләк хьраб бу. Мина кӧлиркед ԛәтийайи, әԝана жи һеди-һеди чʹьлмьсин у мьрьн. Зарʹед ԝан жи жь бо гӧнә ахьрийа ӧса стандьн (Рʹом. 5:12). Ле бьдьнә һʹәсабе хԝә, һʹәта иро жи гәләк мәрьв нахԝазьн гӧрʹа Хԝәдеда бьн. Әԝана дьхԝазьн ӧса бьжин ча дьле ԝан дьхԝазә (Әфәс. 2:1-3). Ахьрийа ве йәке әшкәрә дьдә кʹьфше, кӧ «тʹӧ сәрԝахти . . . тʹӧнә кӧ һьмбәри Хӧдан бьсәкьнә» (Мәтʹлк. 21:30).

5. Йаһоԝа һьндава мәрьва чьда баԝәр бу? Әԝ йәк һатә сери йан на?

⁵ Ле Йаһоԝа заньбу, ԝәки ԝе һәбьн мәрьв, демәк ӧса жи гәләк щаһьл, йед кӧ ԝе бьхԝазьн ԝи нас кьн у жерʹа хьзмәт кьн (Зәб. 103:17, 18; 110:3). Йаһоԝа ԝан щаһьла гәләк ԛимәт дькә! Тӧ жи дькʹәви нав ԝанда? Һәрге әре, бешьк, тӧ гәләк тьштед ԛәнщ жь Хԝәде дьстини, чь кӧ тә гәләк бәхтәԝар дькьн. (Бьхунә Зәбур 103:5; Мәтʹлк. 10:22). Әме ньһа шеԝьр кьн һьнә тьшта, чь кӧ дькʹәвьнә нава ԝан тьштед ԛәнщ кӧ Хԝәде дьдә мә, әԝ һәнә хԝарьна рʹӧһʹани, һәвалед лапи баш, нетед керһати, у азайа рʹаст.

6. Чьрʹа һун гәрәке рʹӧһʹанида хԝә тʹер кьн, у чаԝа Йаһоԝа ве йәкеда али ԝә дькә?

⁶ Алийе рʹӧһʹанида һʹәԝщәтийа һʹәйԝана тʹӧнә, ле йа мәрьва һәйә, у тʹәне Әʹфьрандаре ԝә дькарә рʹӧһʹанида ԝә тʹер кә (Мәт. 4:4). Чахе һун гӧһ дьдьнә ԝи, һун сәрԝахтийе у фәʹмкʹарийе дьстиньн у һьн жи бәхтәԝар дьбьн. Иса гот: «Бәхтәԝар ьн әԝ, йед кӧ фәʹм дькьн һʹәԝщәтийа хԝәйә рʹӧһʹани» (Мәт. 5:3, ДТʹ). Хԝәде бона һʹәԝщәтийа ԝәйә рʹӧһʹани Хәбәра хԝә дайә ԝә у ӧса жи хԝарьна рʹӧһʹани кӧ бь сайа «хӧламе амьн у сәрԝахт» әм дьстиньн (Мәт. 24:45). Рʹасти жи чьԛас тʹер-тʹьжә у щурʹә-щурʹә хԝарьна мәйә рʹӧһʹани һәйә (Иша. 65:13, 14).

7. Һуне чь кʹаре бьстиньн, һәрге рʹӧһʹанида хԝә тʹер кьн?

⁷ Щаһьлно, әԝ хԝарьна рʹӧһʹани кӧ Хԝәде дьдә, ԝе ԝә сәрԝахт у аԛьл кә. Әԝ йәк ԝе гәләк тьштада ԝә хԝәй кә. (Бьхунә Мәтʹәлок 2:10-14.) Мәсәлә, әԝ һʹӧнӧр ԝе чʹәʹве ԝә вәкә кӧ һун һинкьрьнед ԛәлп ԛәбул нәкьн, бәʹса хәбәре һинкьрьнәкә ӧса кӧ Әʹфьрандар тʹӧнә йә. Әԝана ԝе ԝә хԝәй кьн жь ве дәрәԝийе, кӧ йанчь пʹәрә у һәбук тʹәне бәхтәԝарийе тиньн. Ӧса жи һуне дәрберʹа тедәрхьн у бьтʹәрькиньн хԝәстьнед хьраб у рʹабун-рʹуньштьна ӧса, кӧ дькарьн зийане ԝәрʹа биньн. Ләма жи щаһьлно, бьгәрʹьн сәрԝахтийа Хԝәде, аԛьл бьн у әве йәке бьшекьриньн. Чахе һун хәйсәт-һʹӧнӧред ӧса ԛазанщ кьн, һуне хԝәха тʹәхмин кьн кӧ Йаһоԝа ча ԝә һʹьз дькә у кʹара ԝә дьхԝазә (Зәб. 34:8; Иша. 48:17, 18).

8. Чьрʹа ньһа гәләк фәрз ә һун незики Хԝәде бьн, у ахьрийеда әԝ йәк ԝе чьда али ԝә бькә?

 ⁸ Зутьрәке, һәр пʹарәкә дьнйа Шәйтʹан ԝе кʹӧта бә. Һьнге тʹәне Йаһоԝа ԝе бькарьбә али мә бькә у мә хԝәй кә. Бь рʹасти ԝәʹдәки ӧса жи дькарә бе, чахе чʹәʹве мә ԝе дәсте ԝи бә, кӧ хԝарьна рʹоже бьдә мә (Һәбԛ. 3:2, 12-19). Бәле, ньһа йә ԝәʹдә, ԝәки незики Баве хԝәйи әʹзмана бьн у баԝәрийа хԝә һьндава ԝи ԛәԝи кьн (2 Пәт. 2:9). Һәрге һун ньһада ӧса бькьн, чь жи әʹмьре ԝәда бьԛәԝьмә, һуне хԝә мина Даԝьд тʹәхмин кьн, йе кӧ гот: «Хӧдан һәртʹьм бәр чʹәʹве мьн ә, әԝ ль мьле мьни рʹасте йә, нәфса мьне нәлькʹӧмә» (Зәб. 16:8).

9. а) Ль гора Йуһʹәнна 6:44, Йаһоԝа чь дькә? б) Нав Шәʹдед Йаһоԝада чь тьштәки мәхсус һәйә?

⁹ Йаһоԝа мала хԝәйә рʹӧһʹанида ԝан мәрьва незики хԝә дькә, нав кʹижанада әԝи тьштед баш дитийә у йед кӧ дьлсах ьн. (Бьхунә Йуһʹәнна 6:44.) Чахе һун щара пешьн насийа хԝә дьдьн мәрьве кӧ рʹастийеда нинә, һун гәләк тьшт дәрһәԛа ԝи ньзаньн ӧса нинә? Һун хенщи наве ԝи у рʹәнг-рʹуйе ԝи, дьбәкә ԛә тьштәки жи ньзаньн. Ле чахе һун щара пешьн рʹасти кәсәки тен, кӧ Йаһоԝа нас дькә у ԝи һʹьз дькә, һун дәрһәԛа ԝи ида гәләк тьшт заньн. Һәрге жи әԝ кәс жь ԝәлатәки хәриб ә, йан бәрәк у әʹдәтед ԝи жь йед ԝә щӧдә нә, һун йәкә ида епʹещә дәрһәԛа ԝи заньн у әԝ жи дәрһәԛа ԝә занә.

10, 11. Щьмәʹта Йаһоԝа чьда йәк ә, у әԝ йәк чь кʹаре тинә?

¹⁰ Мәсәлә, чахе һун рʹасти Шәʹдеки Йаһоԝа тен, ида заньн ԝәки әԝ сәр зьмане «паԛьж» хәбәр дьдә, демәк сәр зьмане рʹастийе (Сефн. 3:9). Һәрге жи әԝ сәр зьманәки хәриб хәбәр дьдә, йәкә һун заньн әԝ чь баԝәр дькә у ча дьжи, мәсәлә һун һәрдӧ жи Хԝәде баԝәр дькьн, нав-намус дьжин, у баԝәрийа ԝә һьндава ахьрийеда һәйә. Әԝ тʹәне һьнә тьшт ьн. Хенщи ве йәке, занәбуна ве йәке али ԝә дькә, ԝәки итʹбарийа хԝә һәвдӧ биньн у һәвалтийа баш у дьреж ԛазанщ кьн.

¹¹ Бәле, һәрге һун хьзмәткʹаре Йаһоԝа нә, һәвалед ԝәйи лапи баш һәнә.  Бьдьнә һʹәсабе хԝә, һәрге жи ԝә тʹӧ щар әԝана нәдитьнә, йәкә һәвалед ԝәйә ӧса нав тʹәмамийа дьнйайеда һәнә! Хенщи щьмәʹта Йаһоԝа, ԛә бал кәсәки пʹешкʹешәки ӧса ԛимәт һәйә?

12. Кʹижан нетед баш һун дькарьн бьдьнә пешийа хԝә?

¹² Бьхунә Ԝаиз 11:9–12:1. Щаһьлно, чь нетед ԝәйә рʹӧһʹани һәнә? Мәсәлә, дьбәкә ԝә хԝәрʹа нет данийә һәр рʹож Кʹьтеба Пироз бьхуньн, йан жи дьбәкә һун дьхԝазьн һе рʹьнд щьватеда щаба хԝә бьдьн у пе дәрса дәркʹәвьн. Һун ча хԝә тʹәхмин дькьн гава дьвиньн йан жи кәсәки дьн ԝәрʹа дьбежә, ԝәки ԝә чь нет дайә пешийа хԝә, һун ве йәкеда пешда чунә? Бешьк, һун гәләк ша дьбьн! Бәле, һун гәрәке ша бьн, чьмки һәла һе ԝан тьштед бьчʹукда жи һун хԝәстьна Йаһоԝа датиньн щийе пешьн, у бь ве йәке чʹәʹв дьдьнә Иса (Зәб. 40:8; Мәтʹлк. 27:11).

13. Чьда хьзмәтийа мә жь нетед ве дьнйайе мәхсустьр ә?

¹³ Чахе һʹьш-аԛьле ԝә сәр хьзмәтийа Йаһоԝа йә, һун шьхӧле ӧса дькьн, кʹижан кӧ ԝә бәхтәԝар дькә у шабуне ԝәрʹа тинә. Әԝ шьхӧле ԝә тʹӧ щар бадиһәԝа нинә. Паԝлос ньвиси: «Ԛәԝин бьминьн, жь щийе хԝә нәһʹәжьн, һәр гав шьхӧле Хӧданда пешда һәрʹьн, бьзаньбьн хәбата ԝә бош-бәтал нинә ль бәр Хӧдан» (1 Корн. 15:58). Әԝед кӧ нетед ве дьнйайе датиньн пешийа хԝә, мәсәлә сәва дәԝләти бьн у навдар бьн, бәхтәԝар ниньн. Һәрге жи әԝана гьһиштьнә нетед хԝә, йәкә ахьрийеда дьле ԝан вала йә (Луԛа 9:25). Әԝе йәке әм жь Сьлеман жи педьһʹәсьн (Рʹом. 15:4).

14. Һун жь сәрһатийа Сьлеман чь һин дьбьн?

¹⁴ Сьлеман кӧ мәрьвәки гәләк дәԝләти у ԛәԝат бу, дьхԝәст әʹмьре хԝәда тьштәки бьщерʹьбинә. Әԝи хԝәст ԝәки кʹефхԝәшийева мьжул бә у бьвинә, һәла әԝ йәк ԝе чь кʹаре бинә (Ԝаиз 2:1-10). Әԝи хԝәрʹа мал ава кьрьн, бахчә у парк чекьрьн, у тьштәк жь хԝә кем нәдькьр, чь дьле ԝи дьхԝәст дькьр. Ле паши ве йәке әԝи ча хԝә тʹәхмин дькьр? Әԝ бәхтәԝар у дьлрʹьһʹәт бу? Әԝи хԝәха дәрһәԛа хԝә гот: «Зьвьрим у бона кӧ ль һʹәму кʹаред кӧ дәстед мьн кьрьнә . . . ньһертьм у а вай, гьшк вала йә . . . тʹӧ ԛазанщ тʹӧнәбу» (Ԝаиз 2:11). Рʹасти жи дәрсәкә чьԛас ԛәԝи йә! Ле һун жь сәрһатийа ԝи чь дәрсе хԝәрʹа һин дьбьн?

15. Ль гора Зәбур 32:8, чьрʹа баԝәри гәләк фәрз ә, у әԝ чь кʹаре дьдә мә?

¹⁵ Һьнә мәрьв тʹәне сәр шашийед хԝә һин дьбьн у ахьрийа хьраб дьстиньн. Йаһоԝа нахԝазә тʹәви ԝә жи ӧса бьԛәԝьмә. Ләма ԝәрʹа лазьм ә баԝәри сәва кӧ гӧрʹа Хԝәде бькьн у ԛьрара ԝи дайньн щийе пешьн. Әԝ баԝәри беһʹәсаб ԛимәт ә у ԝе тʹӧ щар ԝә дьлшькәсти нәкә. Бәле, Йаһоԝа ԝе тʹӧ щар «һʹьзкьрьна кӧ ԝә бона наве ԝи да кʹьфше», бир нәкә (Ибрн. 6:10). Ләма жи щаһьлно, һәр тьшти бькьн сәва баԝәрийеда бьшьдьн, у һуне бьвиньн кӧ Баве ԝәйи әʹзмана тʹьме ԛәнщийа ԝә дьхԝазә. (Бьхунә Зәбур 32:8.)

16. Чьрʹа әм гәрәке азайе ԛимәт кьн у бь билани бьдьнә хәбате?

¹⁶ Паԝлос ньвиси: «Хӧдан ль кʹӧ дәре бә, ль ԝе дәре жи азайи һәйә» (2 Корн. 3:17). Бәле, Йаһоԝа азайе һʹьз дькә у кьрийә дьле мәда жи, ԝәки азайе һʹьз бькьн. Ле йәкә әԝ ӧса жи дьхԝазә ԝәки һун азайа хԝә рʹаст бьдьнә хәбате, ԝәки нәкʹәвьнә ԛәзийе. Дьбәкә һун ԝан щаһьла нас дькьн, йед кӧ порнографийайе дьньһерʹьн, бенамусийе дькьн, спортед хофва мьжул дьбьн, йан наркотика  у щьхаре дькʹьшиньн. Бь рʹасти әԝана жь ԝан тьшта ԝәʹдәлу ләзәте дьстиньн, ле паше әԝ йәк сәр ԝан бьһа рʹудьне. Мәсәлә, дьбәкә нәхԝәш дькʹәвьн, тьштед хьрабва тенә гьредане, йан жи дьмьрьн (Галт. 6:7, 8). Әшкәрә йә, «азайа» ԝан дәрәԝ ә у әԝана хԝәха хԝә дьхапиньн (Тито 3:3).

17, 18. а) Чахе әм гӧрʹа Хԝәде дькьн, ча әм азайе дьстиньн? б) Чь щурʹәйи Адәм у Һеԝа жь мәрьвед иройин һе аза бун?

¹⁷ Бәʹса хәбәре, һун чьԛас мәри нас дькьн, йед кӧ жь бо ве йәке нәхԝәш кʹәтьнә, чьмки пе принсипед Кʹьтеба Пироз нәжитьнә? Әʹйан ә, кӧ чахе әм гӧрʹа Йаһоԝа дькьн, әм кʹаре дьстиньн, сьһʹәт-ԛәԝата мә жи баш ә у азайа мә жи һәйә (Зәб. 19:7-11). Һьн жи чахе һун азайа хԝә бь билани дьдьнә хәбате, демәк ԛанун у принсипед Хԝәде һьлдьдьнә һʹәсаб, һун мәщале дьдьн Хԝәде у де-бавед хԝә, ԝәки итʹбарийа хԝә ԝә биньн у һе зедә азайе бьдьнә ԝә. Бь рʹасти Хԝәде соз да, ԝәки әԝ ԝе һʹәму хьзмәткʹаред хԝәйи амьнрʹа азайа тʹам бьдә, кʹижан кӧ Кʹьтеба Пироз нав дькә «азайи у рʹумәта зарʹед Хԝәде» (Рʹом. 8:21).

¹⁸ Азайа Адәм у Һеԝайе ԝи щурʹәйи бу. Биньн бира хԝә, бахче Еденеда Хԝәде чьԛас тʹәми да ԝан? Тʹәне йәк. Ԝана гәрәке тʹәне бәре дарәке нәхԝарана (Дәстп. 2:9, 17). Бона ԝә әԝ тʹәми ԝе сәрт бьһата кʹьфше йан хьраб буйа? Фәʹмдари йә на. Ле ньһа әве тʹәмикә Хԝәде бәрамбәри ԝан гәләк ԛануна бькьн, кʹижан мәрьва дәрхьстьнә, у дьхԝази нахԝази гәрәке ԝан ԛануна һин би у бини сери.

19. Чаԝа әм дькарьн бь рʹасти аза бьн?

¹⁹ Йаһоԝа биланийе дьдә кʹьфше һьндава хьзмәткʹаред хԝә. Әԝи нә кӧ гәләк ԛанун дайә мә, ле бь сәбьр мә һин дькә сәва әм ԛануна һʹьзкьрьне биньн сери. Әԝ дьхԝазә әм бьжин пе принсипед ԝи у хьрабийе нәфьрʹәт кьн (Рʹом. 12:9). Иса ԝәʹде хьзмәтийа хԝәйә сәр чʹийе, һин кьр кӧ хьраби жь кʹидәре дәстпедьбә (Мәт. 5:27, 28). Мәсиһ чаԝа Пʹадша Пʹадшатийа Хԝәдеда, ԝе бәрдәԝам кә мә дьнйа тʹәзәда жи һин кә, сәва кӧ ньһерʹандьна мә һьндава рʹастийе у хьрабийе бь тʹәмами мина йа ԝи бә (Ибрн. 1:9). Әԝ ӧса жи ԝе сьһʹәт-ԛәԝата бекемаси бьдә мә. Бьдьнә бәр чʹәʹве хԝә, ԝәки әме тʹӧ щар кӧл-дәрдед кӧ жь гӧнә әм дькʹьшиньн, иди нәвиньн. Паше әме ве азайерʹа ша бьн, кӧ Йаһоԝа соз дьдә мә.

20. а) Йаһоԝа ча азайа хԝә дьдә хәбате? б) Һун чь дькарьн һин бьн жь мәсәла Хԝәде?

²⁰ Һьлбәт, азайа мә ԝе бь синор бә. Әме әве азайа хԝә бьдьнә хәбате бь һʹьзкьрьна һьндава Хԝәде у мәрьва. Ԝи щурʹәйи әме чʹәʹв бьдьнә Йаһоԝа. Рʹаст ә синоре азайа ԝи тʹӧнә, ле йәкә әԝ тʹьме һәр тьшти бь һʹьзкьрьне дькә у һьндава хьзмәткʹаред хԝә жи әԝ ӧса йә (1 Йуһʹн. 4:7, 8). Демәк ида фәʹмдари йә, кӧ әме бь рʹасти һьнге аза бьн, чахе чʹәʹв бьдьнә һʹьзкьрьна Хԝәде.

21. а) Даԝьд чь дьфькьри дәрһәԛа Йаһоԝа? б) Готара дьнда әме дәрһәԛа чь шеԝьр кьн?

²¹ Һун ԛимәт дькьн ԝан һʹәму тьштед ԛәнщ кӧ Йаһоԝа дьдә ԝә, мәсәлә хԝарьна рʹӧһʹани, һәвалед баш, нетед һежа, у азайа рʹаст? (Зәб. 103:5). Һәрге әре, һун жи ӧса дьбәкә дьфькьрьн чаԝа Даԝьд кӧ Зәбур 16:11-да ньвисар ә: «Те рʹийед әʹмьр мьнва әʹйан ки. Шабунәкә мәзьн ә ль бәр диндара Тә, һʹәта-һʹәтайе хер у хԝәши дәсте Тәйи рʹастеда йә». Готара дьнда ԝе бе шеԝьркьрьне дәрһәԛа хьзнед дьнә ԛимәт жь Зәбура 16. Ԝедәре ԝе һе һур бь һур бе шьровәкьрьне, кӧ чаԝа һун дькарьн жь әʹмьре хԝә ләзәте бьвиньн.