ЩАРА ДӦДА, чахе Тони чу бал ԝе жьньке, әԝе жьньке диса жи тʹәви ԝе шәрʹ кьр. Гәло Тони ча хԝә да кʹьфше? Әԝ гьли дькә: «Бона мьн гәләк чәтьн бу, чьмки әз нәһәԛ нибум кӧ әԝе мьн ӧса беһӧрмәт кьр». Һәла һе ве дәрәщеда жи, Тони диса жь жьньке бахшандьн хԝәст у готә жьньке ԝәки әԝ фәʹм дькә һʹале ԝе.

Һәрге һун дәԝса Тони буна, ԝәйе ча хԝә бьда кʹьфше? Гәло ԝәйе мьлукти у нәрми бьда кʹьфше, йан ԝәрʹа ԝе чәтьн буйа кӧ хԝә бьгьрьн у һерс нәкʹәвьн? Һәрге һʹәлал бежьн, һеса нинә дәрәща ӧсада нәрм у рʹьһʹәт бьн. Чахе әм стреседа ньн йан кәсәк һерса мә тинә, бь рʹастийе чәтьн ә кӧ шкәсти у нәрм бьн.

Ле Кʹьтеба Пироз Мәсиһийа һелан дькә ԝәки әԝана шкәсти у нәрм бьн. Кʹьтеба Пироз әԝан һʹӧнӧра гьредьдә тʹәв биланийе у сәрԝахтийе. Аԛуб пьрсәкә ӧса дани: «Нава ԝәда кʹи сәрԝахт у аԛьл ә?» Паше әԝ щаба ве пьрсе дьдә: «Бьра әԝ бь пʹәргалийа хԝәйә ԛәнщ, кьред хԝә бь мьлуктийа сәрԝахтийе бьдә кʹьфше» (Аԛуб 3:13). Ле гәло чаԝа мьлукти у нәрми биланийа жь Хԝәде  дьдьнә кʹьфше? У чь дькарә али мә бькә ԝәки чʹәʹв бьдьнә Хԝәде ԝан һʹӧнӧра?

Мьлукти у нәрми дькарьн шәрʹ-дәʹԝа бьдьнә сәкьнандьне. «Щаба нәрм һерсе датинә, ле готьна һʹьшк һерсе рʹадькә» (Мәтʹлк. 15:1).

Һерсбун дькарә шәрʹ-дәʹԝа һе гӧрʹ кә, чьмки һерс ча бежи ньфте бәри сәр агьр дьдә (Мәтʹлк. 26:21). Ле шкәсти у нәрми һерсе датинә у шәрʹ-дәʹԝа дьтәмьринә. Мәрьве шкәсти һәла һе дькарә дьле дьжьмьн жи нәрм кә.

Тони ве йәкеда избат бу. Чахе әԝе жьньке дит ԝәки Тони нәрм щаба ԝе дьда, әԝ жьньк гьрийа. Әԝе жерʹа гот кӧ әԝ гәләк дьлтәнг ә жь бо чәтьнайед хԝә у малбәта хԝә. Тони жерʹа шәʹдәти да. Ахьрийеда, әԝе жьньке дәстпекьр һин бә Кʹьтеба Пироз, чьмки Тони тʹәви ве жьньке нәрм у рʹьһʹәт бу.

Чахе мәрьв шкәсти у нәрм ә, әԝ бәхтәԝар дьбә. «Хԝәзи ль шкәстийа, чьмки дьнйайе пʹара ԝан бә» (Мәт. 5:5).

Чьрʹа мәрьвед шкәсти бәхтәԝар ьн? Мәрьвед кӧ бәре һерс бун, чахе һатьнә гӧһастьне у бунә нәрм у шкәсти, ньһа бәхтәԝар ьн. Әʹмьре ԝан алийе башда һатә гӧһастьне, у әԝана заньн ԝәки ахьрийа баш һивийа ԝан ә (Колс. 3:12). Адолфо, кʹижан кӧ Испанйайеда бәрпьрсийаре мьһале йә, тинә бира хԝә ԝәки пешийа әԝ рʹастийе пеһʹәсийа, әԝ мәрьвәки ча бу.

Әԝ дьбежә: «Әз бәхтәԝар нибум. Хәйсәте мьн ӧса бу ԝәки әз зу һерс дькʹәтьм, ӧса һерс дькʹәтьм ԝәки һьнә һәвалед мьн, жь бо хәйсәте мьн дьтьрсийан, чьмки әз гәләк шәрʹуд бум. Ле рʹожәк һат чахе һʹәму тьшт һатә гӧһастьне. Нав шәрʹда шәш щара пе кʹере мьн хьстьн у һьндьк дьма әз бьмьрама».

Ле ньһа Адолфо мәрьвед дьн ширәт дькә у һин дькә кӧ шкәсти у нәрм бьн, ча пе гьлийед хԝә ӧса жи пе рʹабун-рʹуньштьна хԝә. У гәләка хԝәш те хәйсәте ԝийи нәрм у һʹәйф. Адолфо дьбежә ԝәки гәләк ша йә кӧ әԝи хәйсәте хԝә гӧһаст. У әԝ гәләк жь Йаһоԝа рʹази йә, чьмки әԝи али ԝи кьр кӧ шкәсти у нәрм бә.

Мәрьвед шкәсти дьле Йаһоԝа ша дькьн. «Кӧрʹе мьн, сәрԝахт бә у дьле мьн ша кә, кӧ әз бькарьбьм щаба ԛардаред хԝә бьдьм» (Мәтʹлк. 27:11).

Шәйтʹан, дьжмьне Йаһоԝайи мәзьн ԛәрфе хԝә ԝи дькә. У мәʹнийа Хԝәде һәйә ԝәки һерса хԝә сәр ԝи бьрʹежә, ле Кʹьтеба Пироз дьбежә, ԝәки Йаһоԝа сәбьр ә у зу һерс накʹәвә (Дәркʹ. 34:6). Чахе әм жи чʹәʹв дьдьнә Хԝәде ве йәкеда кӧ зу һерс нәкʹәвьн у шкәсти бьн, ӧса әм биланийе дьдьнә кʹьфше у бь ве йәке дьле Йаһоԝа ша дьбә (Әфәс. 5:1).

Әԝ дьне бь һерсе, шәрʹа у дәʹԝа тʹьжә йә. У ве дьнйайеда әм дькарьн рʹасти йед «кʹӧбар, бабах, кʹьфьр . . . берʹәʹм, бӧхданбеж, тәмсьст,» у зӧлмкʹара бен (2 Тимтʹ. 3:2, 3). Ле әԝ найе һʹәсабе ԝәки Мәсиһи гәрә сәр хԝә нәхәбьтьн кӧ нәрм у шкәсти бьн. Хәбәра Хԝәде дьбежә ԝәки «сәрԝахтийа жорьн . . . әʹдьл ә, мьлук у бәрбьһер ә» (Аԛуб 3:17). Һәрге әм мәрьве әʹдьлайиһʹьз бьн у хԝәгьрти бьн, бь ве йәке әме избат кьн, ԝәки мә биланийа жь Хԝәде ԛазанщ кьр. Әԝ билани ԝе али мә бькә ԝәки һерс нәкʹәвьн у нәрм щаба хԝә бьдьн ԝанрʹа йед кӧ һерса мә тиньн, у ӧса жи әме һе незики Йаһоԝа бьн, йед кӧ Канийа биланийа мәзьн ә!