1, 2. а) Баԝәри у һʹьзкьрьн ча һәвва гьредайи нә? б) Әме кʹижан пьрса шеԝьр кьн?

ӘМ ЙАҺОԜА һʹьз дькьн, «чьмки әԝи пешда әм һʹьзкьрьн» (1 Йуһʹн. 4:19). Йаһоԝа ӧса жи һʹьзкьрьна хԝә дьдә кʹьфше бь ве йәке, кӧ хьзмәткʹаред хԝәйи амьн кʹәрәм дькә. Әм чьԛас зәʹф Хԝәде һʹьз дькьн, һаԛас зәʹф баԝәрийа мә ԛәԝи дьбә. Әм ԛайим баԝәр дькьн, ԝәки Йаһоԝа ԝан хәлат дькә кʹижана һʹьз дькә. (Бьхунә Ибрани 11:6.)

² Йаһоԝа мәрьва кʹәрәм дькә, у әԝ йәк дьдә кʹьфше кӧ әԝ йәки ча нә у чь дькә. Һәрге әм дӧдьли нә, ԝәки Йаһоԝа ԝе кʹәрәм кә ԝан йед кӧ ль ԝи дьгәрʹьн, ԝәки ӧса нә баԝәрийа мә кем ә. Чьмки баԝәри әԝ ә, чахе әм «дӧдьли ниньн, ԝәки чь кӧ әм һивийе нә, ԝе бе сери» (Ибрн. 11:1, ДТʹ). Бәле, һәрге баԝәрийа мә һәйә, әме һивийа кʹәрәмед Хԝәде бьн, кʹижан кӧ әԝи соз дайә мә. Ле һәрге әм баԝәр дькьн кӧ Йаһоԝа ԝе мә кʹәрәм кә, әԝ чь кʹаре дькарә мәрʹа бинә? Гәло ча Йаһоԝа бәре хьзмәткʹаред хԝә кʹәрәм дькьр у ча иро кʹәрәм дькә? Ԝәрә әм шеԝьр кьн дәрһәԛа ԝе йәке.

3. Малахи 3:10-да дәрһәԛа кʹижан созе Хԝәде те готьне?

³ Йаһоԝа Хԝәде соз да кӧ хьзмәткʹаред хԝә хәлат кә. Ләма  жи әԝ дьхԝазә ԝәки әм чь кӧ дькарьн һʹәму тьшти бькьн, сәва кӧ кʹәрәмед ԝи бьстиньн. Йаһоԝа дьбежә: «Мьн бь вейа бьщерʹьбиньн, Хӧдане артешан дьбежә, ма гәло әзе . . . әʹзмана жь ԝәрʹа вәнәкьм у ԛаси кӧ тʹера ԝә дькә зедәтьр әзе бәрәкʹәте сәр ԝәва нәрьжиньм?» (Малх. 3:10). Бәле, Хԝәде мәщале дьдә мә, ԝәки әм ԝи бьщерʹьбиньн. У чахе әм әве мәщале дьдьнә хәбате, бь ве йәке әм рʹазибуна хԝә жерʹа дьдьнә кʹьфше.

4. Чьрʹа әм дькарьн баԝәрийа хԝә гьлийед Иса биньн, кʹижан кӧ Мәтта 6:33-да ньвисар ьн?

⁴ Иса готә шагьртед хԝә, кӧ һәрге әԝана Пʹадшатийа Хԝәде дайньн щийе пешийе, Хԝәде ԝе али ԝан бькә. (Бьхунә Мәтта 6:33.) Иса әԝ гьли гот чьмки әԝи заньбу, ԝәки һʹәму созед Хԝәде тʹьме тенә сери (Иша. 55:11). Ләма әм жи гәрәке баԝәр бьн, кӧ һәрге әм бь тʹәмами баԝәрийа хԝә Йаһоԝа биньн, әԝ ԝе созе хԝә бинә сери. Хԝәде хԝәха мәрʹа соз да: «Әзе тʹӧ щар жь тә нәчьм у тʹӧ щар тә бәрʹнадьм» (Ибрн. 13:5). Әԝ созе Йаһоԝа али мә дькә, ԝәки баԝәрийа хԝә гьлийед Иса биньн кӧ Мәтта 6:33-да ньвисар ьн.

5. Чьрʹа әԝ щаба кӧ Иса да Пәтрус, баԝәрийа мә ԛәԝи дькә?

⁵ Щарәке, Паԝлосе шанди жь Иса пьрси: «Мә һʹәму тьшт һиштийә у пәй тә һатьнә, ле ахьрийа мә ԝе чаԝа бә?» (Мәт. 19:27). Иса сәва ԝе пьрсе Паԝлос сущдар нәкьр. Дәԝсе әԝи готә шагьртед хԝә, кӧ әԝана ԝе жь бо хьзмәтийа хԝә бенә хәлаткьрьне. Әԝ шандийед амьн у бьжартийед дьн, ԝе тʹәви Иса ль әʹзмана сәрԝертийе бькьн. Ле иро жи хьзмәткʹаред Хԝәде хәлате дьстиньн. Иса  гот: «Һʹәмуйед кӧ мала хԝә, йан бьред хԝә, йан хушкед хԝә, йан баве хԝә, йан дийа хԝә, йан жьна хԝә, йан зарʹед хԝә, йан әʹрдед хԝә бона наве мьн һьштьнә, әԝе сәд ԛат бьстинә у ԝе жийина һʹәта-һʹәтайе жи ԝар бә» (Мәт. 19:29). Шандийед Иса йед кӧ бона Пʹадшатийа Хԝәде тьштәк жь хԝә кем дькьрьн, әʹсә ԝе бьстандана кʹәрәмед һе мәзьн. Гәло әм хԝәха ша набьн ԝәки чь жи мә бона Пʹадшатийе жь хԝә кем кьр, мә тьштед һе ԛимәт ԛазанщ кьр, мәсәлә ча Иса гот, бав, де, бьра, хушк у зарʹед рʹӧһʹани?

6. Чьрʹа Йаһоԝа соз да хьзмәткʹаред хԝә, кӧ ԝе ԝана хәлат кә?

⁶ Йаһоԝа соз дьдә хьзмәткʹаред хԝә, ԝәки ԝе әʹсә ԝан хәлат кә. У әԝ созе ԝи али ԝан дькә, ԝәки әԝана тәнгасийада у щерʹьбандьнада амьн бьминьн. Хьзмәткʹаред Йаһоԝайи амьн хенщи ԝан кʹәрәма кӧ иро дьстиньн, ахьрийеда ԝе кʹәрәмед дьһа мәзьн бьстиньн (1 Тимтʹ. 4:8). Бәле, һәрге әм дӧдьли ниньн ԝәки Йаһоԝа ԝе «ԝан хәлат кә, кʹижан кӧ ль ԝи дьгәрʹьн», әме баԝәрийеда ԛәԝи бьн (Ибрн. 11:6).

7. Чьрʹа әм дькарьн бежьн, кӧ бона мә баԝәри һәйә ча ләнгәр?

⁷ Иса ԝәʹде хьзмәтийа сәр чʹийе гот: «Әшԛ у ша бьн, чьмки һәԛе ԝә ль әʹзмана гәләк ә. Бь ви щурʹәйи пʹехәмбәред кӧ бәри ԝә һәбун, зерандьн» (Мәт. 5:12). Хенщи ԝан йед кӧ ԝе жийина ль әʹзман бьстиньн, диса ԝе гәләк бьстиньн жийина һʹәта-һʹәтайе сәр әʹрде, у әԝ йәк бь рʹастийе мәʹни йә, ԝәки әм «әшԛ у ша бьн» (Зәб. 37:11; Луԛа 18:30). Фьрԛи тʹӧнә әме сәр әʹрде бьжин, йан сәр әʹзмана, баԝәрийа мә сәва ахьрийе бона мә ча «ләнгәрәкә һʹимгьрти» у ԛәԝи йә (Ибрн. 6:17-20). Ча ләнгәрә ԝәʹде фьртонә гәмийе хԝәй дькә, ӧса жи баԝәрийа мә кӧ Хԝәде ԝе кʹәрәма бьдә мә, һʹәму алийава мә хԝәй дькә. Әԝ баԝәри ԛәԝате дьдә мә, ԝәки әм ԝәʹде тәнгасийада сәбьр кьн.

8. Баԝәрийа һьндава созед Хԝәде ча хәмед мә кем дькьн?

⁸ Һивийа мә сәр ахьрийе, ԛәԝате дьдә мә сәва кем хәма бькьн. Созед Хԝәде бона мә ча дәрман ә, кʹижан кӧ дьле мә рʹьһʹәт дькә. Рʹасти жи чьԛас әм дьлгәрм дьбьн, чахе әм баре хԝә дьдьнә сәр Йаһоԝа, у әм заньн ԝәки әԝ ԝе али мә бькә (Зб. 55:22). Әм гәрәке сәд сәләфи баԝәр бьн, ԝәки Хԝәде «дькарә . . . жь тьште кӧ әм дьхԝазьн йан жи дьфькьрьн һе гәләк зедәтьр бькә» (Әфәс. 3:20, ИМ). Бьдьнә һʹәсабе хԝә, ԝәки Йаһоԝа бона мә дькарә нә кӧ гәләк бькә, ле «гәләк зедәтьр» бькә!

9. Чьрʹа әм гәрәке дӧдьли нибьн, ԝәки дькарьн кʹәрәмед Йаһоԝа бьстиньн?

⁹ Сәва кӧ жь Йаһоԝа хәлате бьстиньн, әм гәрәке бь тʹәмами баԝәрийа хԝә ԝи биньн, у гӧрʹа тʹәми у рʹебәрийед ԝи бькьн. Муса готә щьмәʹта Исраел: «Хӧдан ԝе әʹсә дӧа ль тә бькә ль сәр ԝи әʹрди, кӧ Хӧдан Хԝәдейе тә чаԝа мьлкʹ дьдә тә кӧ ԛазьнщ ки. Тʹәне тӧ рʹьнд гӧһдарийа дәнге Хӧдан Хԝәдейе хԝә бькә у тʹам ви әʹмьре кӧ әз иро ль тә әʹмьр дькьм, бькә кӧ бьԛәдини. Чьмки Хӧдан Хԝәдейе тә ԝе дӧа ль тә бькә, чаԝа кӧ ԝи готә тә» (Ԛан. Дщр. 15:4-6). Һәрге тӧ Йаһоԝарʹа амьн дьмини, тӧ баԝәр дьки ԝәки әԝ ԝе әʹсә тә кʹәрәм кә? Бь рʹастийе мәʹни һәйә, ԝәки тӧ ве йәкеда гәрәке ԛә дӧдьли ниби.

10, 11. Йаһоԝа ча Усьв кʹәрәм кьр?

¹⁰ Кʹьтеба Пироз бона кʹара мә һатә ньвисаре. Ведәре һәнә гәләк сәрһати, кӧ чаԝа Хԝәде хьзмәткʹаред хԝәйи амьн кʹәрәм дькьр (Рʹом. 15:4). Ԝәрә сәрһатийа Усьв шеԝьр кьн. Бьред ԝи нәмамийа ԝи кьрьн у ԝи дилти фротьн, паше жьна ахайе ԝи шәрʹ авитә ԝи, у  ләма Усьв кʹәтә кәла Мьсьре. Ле гәло Хԝәде Усьв ԝи һʹалида һишт? Тӧ щар на! Йаһоԝа «тʹәви Усьв бу у һʹӧба хԝәйә амьн да кʹьфше . . . Хӧдан тʹәви ԝи бу у һʹәму шьхӧле ԝи Хӧдан жерʹа ль һәв дани» (Дәстп. 39:21-23). Ԝан тәнгасийада, Усьв бь сәбьр һивийа Йаһоԝа бу, ԝәки әԝе чʹарәке бькә.

¹¹ Ӧса жи ԛәԝьми, чәнд сала шунда, Фьрәԝьн жь кәле Усьв аза кьр у әԝ хӧламе мьлук, бу мәрьвәки дӧда паши Фьрәԝьн (Дәстп. 41:1, 37-43). Чахе Усьврʹа дӧ кӧрʹ бун, Усьв наве кӧрʹе хԝәйи пешьн дани Мьнашә, чьмки әԝи гот кӧ «Хԝәде һʹәму дәрд-кӧле мьн у мала баве мьн жь бира мьн дәрхьстьн». Ле наве йе дӧда дани Әфрайим у гот: «Хԝәде ԝи ԝәлате зәлулийа мьнда, бәдәна мьн шин кьр» (Дәстп. 41:51, 52). Чьмки Усьв Йаһоԝарʹа амьн ма, ләма жи Йаһоԝа әԝ ӧса кʹәрәм кьр, ԝәки әԝи һьн Мьсьри һьн жи Исраели жь бьрчибуне хԝәй кьр. Әʹйан ә, ԝәки Усьв фәʹм дькьр әԝ кʹәрәм жь Йаһоԝа нә, у дәсте Хԝәде тʹәви ԝи йә (Дәстп. 45:5-9).

12. Иса ча амьн ма ԝәʹде тәнгасийа?

¹² Иса Мәсиһ жи, ԝәʹде тәнгасийед гьранда гӧрʹа Хԝәде дькьр у жерʹа амьн ма, у сәва ве йәке әԝ һатә кʹәрәмкьрьне. Ле гәло чь али Иса кьр, ԝәки ԝан тәнгасийада сәбьр кә? Хәбәра Хԝәде дьбежә: «Бона ԝе шабуна пешийа хԝә әԝи стун һьлани, шәрм бәр тьштәки һʹәсаб нәкьр» (Ибрн. 12:2, ДТʹ). Бона Иса шабунәкә мәзьн бу, ԝәки әԝи дькарьбу наве Хԝәде рʹумәт кә. Иса һатә хәлаткьрьне бь ве йәке, кӧ Хԝәде жь ԝи рʹази бу у гәләк шьхӧлед мәзьн да дәсте ԝи. Кʹьтеба Пироз дьбежә, ԝәки Иса «кʹеләка Хԝәдейә рʹасте сәр тʹәхт рʹуньшт». Хенщи ве йәке, Кʹьтеба Пирозда әм дьхуньн: «Хԝәде әԝ һе бьльнд кьр у навәки ӧса пʹешкʹеши ԝи кьр, кӧ жь һʹәму нава бьльндтьр ә» (Фили. 2:9).

13, 14. Йаһоԝа ча дьньһерʹә сәр кьред мә?

¹³ Әм гәрәке дӧдьли нәбьн, ԝәки Йаһоԝа ԛәԝата мә дьшекьринә, кʹижан кӧ әм бона хьзмәтийа ԝи хәрщ дькьн. Әԝ мә фәʹм дькә чахе әм сьст ьн йан чахе әм хԝәда дӧдьли дьбьн. Әԝ дькʹәвә һʹале мә у бәр дьле мәда те, чахе дьвинә кӧ мәрʹа чәтьн ә жерʹа хьзмәт кьн жь бо чәтьнайед пʹәрава гьредайи, йан сьһʹәт-ԛәԝате, йан жи дьлтәнгбуне. Әм гәрәке бь тʹәмами баԝәр бькьн, ԝәки әԝ гәләк ԛимәт дькә чахе әм һʹәму тьшти дькьн сәва ԝирʹа амьн бьминьн. (Бьхунә Ибрани 6:10, 11).

¹⁴ Ӧса жи бира хԝәда хԝәй кьн, ԝәки Йаһоԝа дӧа дьбьһе. Ләма тʹӧ щар дӧдьли нәбьн ԝәки әԝ әʹсә ԝе щаба дӧайед ԝә бьдә (Зәб. 65:2). «Баве дьлшәԝатийе у Хԝәдейе һʹәму бәрдьлийе», ԝе әʹсә аликʹарийе бьдә мә, ча емосийалида ӧса жи рʹӧһʹанида. Мәсәлә, дьбәкә әԝ бь сайа хушк-бьред мә аликʹарийе бьдә мә (2 Корн. 1:3). Дьле Йаһоԝа гәләк ша дьбә чахе әм һьндава мәрьва дьлшәԝат ьн. «Йе кӧ аликʹарийа кʹәсиб дькә, әԝ дәйн дьдә Хӧдан у Хӧдане жи бәр дайина ԝива, ԝи хәлат кә» (Мәтʹлк. 19:17; Мәт. 6:3, 4). Жь ве рʹезе әм дьвиньн ԝәки чахе әм аликʹарийе дьдьнә ԝан йед кӧ тәнгасийеда ньн, Йаһоԝа әван кьред мәйи баш һʹәсаб дькә ча дәйн сәр хԝә, демәк әм ча бежи Жерʹа дәйни дьдьн. У әԝ соз дьдә, ԝәки ԝе мә кʹәрәм кә бона ԛәнщийа мә.

15. Һун һивийа кʹижан кʹәрәма нә? (Бьньһерʹә шькле әʹԝльн.)

¹⁵ Мәсиһийед кӧ бь рʹӧһʹе пироз һатьнә кʹьфшкьрьне, һивийе нә ԝәки ԝе бьстиньн «кʹофийа рʹастийе, йа кӧ Хӧдан, Һʹакьме рʹаст» ԝе бьдә ԝан (2 Тимтʹ. 4:7, 8). Ле һәрге һун һивийа ве кʹәрәме ниньн, ле  һивийе нә кӧ бьжин һʹәта-һʹәтайе сәр әʹрде, әԝ найе һʹәсабе ԝәки Хԝәде ԝә һе кем ԛимәт дькә. Бь милйона мәрьв, бь дьл у щан һивийе нә кӧ ԝе жийина һʹәта-һʹәтайе щьнәтеда бьстиньн. Әԝана «хер-хԝәшийева ԝе хьне бьн у ша бьн» (Йуһʹн. 10:16; Зәб. 37:11).

16. Әм чь бәрдьлийе дьстиньн жь 1 Йуһʹәнна 3:19, 20?

¹⁶ Щара, әм дьбәкә дьфькьрьн ԝәки әм шьхӧле Хԝәде гәләк һьндьк дькьн, йан жи дьбәкә әм дӧдьли дьбьн һәла Йаһоԝа ԛимәт дькә чь кӧ әм дькьн. Дьбәкә щара әм һәла һе дӧдьли бьн, кӧ гәло әм һежа нә ԝәки кʹәрәма Хԝәде бьстиньн. Чахе фькьред ӧса тенә һʹьше ԝә, ԝәрә әм бир нәкьн ԝәки «Хԝәде жь дьле мә мәстьр ә у һәр тьшти занә». (Бьхунә 1 Йуһʹәнна 3:19, 20.) Чахе әм баԝәрийа хԝә Йаһоԝа тиньн, у жь һʹьзкьрьне чьԛас дькарьн һʹәму тьшти дькьн, әԝ ԝе әʹсә мә кʹәрәм кә, һәрге жи әм һʹәсаб дькьн ԝәки әм бона ԝи гәләк һьндьк дькьн (Марԛ. 12:41-44).

17. Ньһа әм чь кʹәрәма дьстиньн?

¹⁷ Һәла һе ве дьнйа хьрабда жи кӧ ԝе зутьрәке кʹӧта бә, Йаһоԝа щьмәʹта хԝә кʹәрәм дькә. Әԝ хәм дькә, ԝәки хьзмәткʹаред ԝийи рʹаст ԝе щьнәʹта рʹӧһʹанида пешда һәрʹьн, кʹижан кӧ бь хԝарьна рʹӧһʹани тʹер-тʹьжә йә (Иша. 54:13). Чаԝа Иса соз да, Йаһоԝа ида ньһа мә кʹәрәм дькә, бь ве йәке кӧ малбәта мәйә рʹӧһʹани һәйә, кӧ жь хушк-бьра йә нав тʹәмамийа дьнйайеда (Марԛ. 10:29, 30). Хенщи ве йәке, әԝед кӧ ль Хԝәде дьгәрʹьн дьлрʹьһʹәт у бәхтәԝар ьн (Фили. 4:4-7).

18, 19. Хьзмәткʹаред Йаһоԝа ча ԛимәт дькьн кʹәрәмед ԝи?

¹⁸ Хьзмәткʹаред Йаһоԝа нав тʹәмамийа дьнйайе, кʹәрәмед пʹьрʹ баш дьстиньн. Мәсәлә, Бйанка кӧ жь Алманйайе йә, гьли дькә: «Әз чь жи бькьм йәкә нькарьм бь тʹәмами рʹазибуна хԝә Йаһоԝарʹа бьдьмә кʹьфше, жь бо ве йәке кӧ әԝ тʹьме али мьн дькә чахе әз дьлтәнг ьм у һәр рʹож кʹеләка мьн ә. Әва дьнйа һәвкʹәти йә у теда дьлсари йә. Ле чахе әз хԝә ль Йаһоԝа дьгьрьм, дәсте ԝида әз хԝә хԝәйкьри тʹәхмин дькьм. Чахе әз бона ԝи ԛӧрбана дькьм, әԝ тʹьме бь сәда щара зедәтьр мьн кʹәрәм дькә».

¹⁹ Ԝәрә бьньһерʹьн мәсәла Паула, кӧ 70 сали йә. Нәхԝәшийа ԝейә пьште һәйә, у бона ве йәке жерʹа чәтьн ә рʹе һәрʹә. Әԝ дьбежә: «Кем рʹе дьчьм найе һʹәсабе кем хьзмәт кьм. Әз бь щурʹә-щурʹә метода мьзгинийе бәла дькьн, мәсәлә пе тʹеле у нәформал. Дәфтʹәрәкә мьн һәйә, кʹижанеда әз рʹезед жь Кʹьтеба Пироз у фькьред жь әʹдәбйәтед мә дьньвисьм, у сәва дьлрʹьһʹәт бьм щара әз ве дәфтʹәре дьхуньм. Әве дәфтʹәре әз нав дькьм ‹Дәфтʹәра Мьнә Хьлазкʹар›. Һәрге әм сәр созед Йаһоԝа дьфькьрьн, дьлтәнги ԝәʹдәлу йә. Йаһоԝа тʹьме кʹеләка мә йә, ԝәки дәсте хԝә дьрежи мә кә, у фьрԛи тʹӧнә әм чь дәрәщада ньн». Дьбәкә дәрәща ԝә ӧса нинә ча йа Бйанка йан Паула. Ле һун дькарьн бьфькьрьн, ԝәки Йаһоԝа ча ԝә у йед дор бәре ԝә кʹәрәм дькә. Чьԛас рʹьнд ә кӧ әм дьвиньн, Йаһоԝа ча ньһа мә кʹәрәм дькә, у ӧса жи дьдьнә бәр чʹәʹве хԝә чаԝа ԝе ахьрийеда мә кʹәрәм кә!

20. Һәрге әм бәрдәԝам дькьн Йаһоԝарʹа бь дьл у щан хьзмәт дькьн, әм дькарьн һивийа чь бьн?

²⁰ Тʹӧ щар бир нәкьн, ԝәки Хԝәде дӧайед ԝәйи бь дьл ԝе әʹсә ԛәбул кә у кʹәрәм кә. У дӧдьли нәбьн, ԝәки һәрге «һун әʹмьре Хԝәде биньнә сери», һуне «бьгьһижьнә созе ԝи» (Ибрн. 10:35, 36). Дә ԝәрә әм бәрдәԝам кьн баԝәрийа хԝә һе ԛәԝи кьн у бь дьл у щан шьхӧле Йаһоԝа бькьн. Бәле, әм баԝәр ьн ԝәки Йаһоԝа бона ве йәке ԝе әʹсә мә хәлат кә! (Бьхунә Колоси 3:23, 24.)