ТӦ ДЬКАРИ сәр хԝә бежи, ԝәки тӧ мәрьвәки шекьрдар и? Һәр кәс жь мә гәрәке сәр ве пьрсе бьфькьрә. Кʹьтеба Пироз дәрһәԛа ԝәʹде мә пʹехәмбәрти кьрийә, кӧ гәләк мәрьв ԝе «бешекьр» бьн (2 Тимтʹ. 3:2). Дьбәкә ԝә дитийә мәрьвед ӧса йед кӧ дьхԝазьн, ԝәки гьшк дора ԝан һәрʹьн-бен йан жи дьфькьрьн, кӧ гьшк бәр ԝан борщдар ьн. Сәр ԝан мәрьва те кʹьфше, ԝәки әԝана нә жи дьфькьрьн, кӧ гәрәке рʹази бьн бона ве йәке, чь кӧ бона ԝан дькьн. Фәʹмдари йә, ԝе ԝә хԝәш нәһата нав мәрьвед ӧсада буна.

Ле хьзмәткʹаред Йаһоԝа тенә һеланкьрьне: «Шекьрдар бьн». Әм гәрәке «һәр тьштида рʹазибуне бьдьн» (Колс. 3:15; 1 Тʹеслн. 5:18). Бь рʹасти, чахе әм шекьрдар ьн, әм гәләк кʹаре дьстиньн. Гәләк мәʹни һәнә, кӧ чьрʹа әԝ йәк ӧса нә.

Мәʹнийа мәзьн, кӧ чьрʹа әм гәрәке шекьрдар бьн, әԝ ә, кӧ әԝ йәк али мә дькә хԝә ԛимәт кьн. Мәрьве кӧ рʹази йә у шекьрдар ә, жь хԝә рʹази йә, у йед кӧ рʹазибуне дьстиньн, әԝана жи хԝә баш тʹәхмин дькьн. Ле чьрʹа рʹазибун һьн мә һьн жи мәрьвед дьн бәхтәԝар дькә? Ԝәрә мәсәләке шеԝьр кьн: Чахе тӧ дьвини кӧ мәрьв дьхԝазьн бона тә тьштәки бькьн, әԝ йәк дьдә кʹьфше, ԝәки әԝана һʹәсаб дькьн, кӧ тӧ һежа йи. Демәк, әԝана бона тә хәм дькьн. Чахе тӧ ве йәке дьвини, тӧ хԝә ԛимәт дьки. Биньн бира хԝә сәрһатийа Рʹутʹ. Боаз һьндава ԝе мәрʹдани да кʹьфше. Бешьк, Рʹутʹ гәләк ша бу, чьмки кәсәки бона ԝе хәм дькьр (Рʹутʹ 2:10-13).

Әм гәрәке илаһи жь Хԝәде рʹази бьн. Бешьк, щара һун дьшьрмиш дьбьн дәрһәԛа гәләк пʹешкʹешед кӧ Хԝәде дьдә ԝә, ча йед рʹӧһʹани ӧса жи йед физики (Ԛан. Дщр. 8:17, 18; Кʹар. Шанд. 14:17). Ле дәԝса кӧ сәра-бәра дьшьрмиш бьн, һе баш ә кʹур бьфькьрьн дәрһәԛа ԝан кʹәрәма, кӧ Хԝәде сәр ԝә у мәрьвед ԝәйи незикда дьбаринә. Һәрге һун бьфькьрьн сәр мәрʹданийа Әʹфьрандаре хԝә, һуне бь рʹазибуне тʹьжи бьн у һе зедә баԝәр кьн, ԝәки әԝ чьԛас ԝә һʹьз дькә у ԛимәт дькә (1 Йуһʹн. 4:9).

Ле хенщи кӧ сәр мәрʹданийа Йаһоԝа у кʹәрәмед ԝи бьфькьрьн, ӧса жи рʹазибуна хԝә жерʹа нишан кьн бона ԛәнщийед ԝи (Зәб. 100:4, 5). Чахе мәри рʹазибуна хԝә дьдьнә кʹьфше, әԝана бәхтәԝар дьбьн.

Диса мәʹник, кӧ чьрʹа рʹазибун кʹаре тинә, әԝ ә кӧ һәвалти ԛәԝи дьбә. Әм гьшк жи дьхԝазьн, ԝәки мә ԛимәт кьн. Чахе һун бь дьл у щан мәрьве майинрʹа бона ԛәнщийа ԝан рʹазибуна хԝә дьдьн кʹьфше, һун һәрдӧ жи незики һәв дьбьн (Рʹом. 16:3, 4). Һьн жи мәрьвед кӧ шекьрдар ьн, һазьр ьн али мәрьва бькьн. Әԝана дьвиньн ԝәки һьндава ԝанда ԛәнщийе дькьн у әԝана жи дьхԝазьн ԛәнщи бькьн. У чахе али мәрьва дьки, хԝәзьли дьби. Чаԝа кӧ Иса гот: «Хԝәзи ль дайийа, нә кӧ ль стандийа» (Кʹар. Шанд. 20:35).

Роберт Еммонс, директоре университета Калифорнйайе, дәрһәԛа рʹазибуне гот, кӧ сәва шекьрдар бьн, әм гәрәке фәʹм кьн, ԝәки әм һәвдӧрʹа лазьм ьн, чьмки әм щара дьдьн, щара жи дьстиньн. Сәва әм сах бьминьн у бәхтәԝар бьжин, әм гәләк тьштада һʹәԝще мәрьва дьбьн. Мәсәлә, әԝана хԝарьне дьдьнә мә, йан жи алийе сьһʹәт-ԛәԝатеда али мә дькьн (1 Корн.  12:21). Мәрьве шекьрдар рʹазибуна хԝә әʹйан дькә сәва ве йәке, чь кӧ бона ԝи дькьн. Ле ԝә хԝәрʹа кьрийә хәйсәт, ԝәки рʹазибуна хԝә бьдьнә кʹьфше, чахе ԝәрʹа ԛәнщийе дькьн?

Һәрге әм шекьрдар ьн, әме дина хԝә бьдьнә сәр тьштед позитив, нә кӧ йед негатив. Бь симболик бежьн, һʹьше мә мина филтьре йә. Әԝ али мә дькә һе зедә һʹьш-аԛьле хԝә бьдьнә сәр тьштед баш, ле тьштед нәбаш жь һʹьше хԝә дәрхьн. Ӧса мәрʹа дьбә хәйсәт, кӧ дина хԝә бьдьн сәр тьштед баш у һе кем сәр проблема бьфькьрьн. Чьԛас зедә әм шекьрдар бьн, һаԛас зедә әме әʹмьре хԝәда бькарьбьн тьштед баш бьвиньн, у әԝ йәк ԝе али мә бькә кӧ дьһа рʹази бьн. Һәрге әм әʹмьре хԝәрʹа рʹази бьн, әме ве йәке бькьн, чь кӧ Паԝлос гот: «Тʹьме пе Хӧдан ша бьн» (Фили. 4:4).

Шекьрдари али мә дькә, ԝәки дәрһәԛа тьштед нәбаш кем бьфькьрьн. Нькари бьди бәр чʹәʹве хԝә кӧ мәрьв һьн шекьрдар бә һьн жи һʹәвсудийе бькә, дьлтәнг бә, йан жи һерс бә. Мәрьвед шекьрдар ӧса жи пәй пʹәра накʹәвьн. Әԝана рʹази нә ве йәкерʹа, чь кӧ щәм ԝан һәйә, у пәй ве йәке накʹәвьн кӧ һе зедә ԛазанщ кьн (Фили. 4:12).

Чаԝа Мәсиһи һун фәʹм дькьн, ԝәки Шәйтʹан дьхԝазә һун ԝан рʹожед ахьрийеда, ԝәʹде чәтьнайа дьлтәнг бьн у бәрхԝәкʹәвьн. Әԝ ԝе гәләк ша бә, һәрге ньһерʹандьна мә нәрʹаст бә у әм бькьнә кӧтә-кӧт. Һәрге ньһерʹандьна мә ӧса бә, ԝәʹде хьзмәтийе мәрьв ԝе кем бьхԝазьн гӧһ бьдьнә мьзгинийе. Рʹазибун бәре рʹӧһʹе пирозва гьредайи йә. Мәсәлә, әм шабуне дьстиньн гава дьвиньн тьштед баш кӧ Хԝәде дьдә мә, у баԝәрийа мә һәйә һьндава һʹәму созед ԝи дәрһәԛа ахьрийе (Галт. 5:22, 23).

Һун чаԝа хьзмәткʹаред Йаһоԝа дьбәкә ԛайил ьн ве йәкерʹа, чь кӧ ве готареда һатә готьне дәрһәԛа рʹазибуне. Фәʹмдари йә, ԝәки рʹазибун у ньһерʹандьна позитив хԝәха пешда найе. Ле бәрхԝә нәкʹәвьн, һун дькарьн бьбьнә мәрьве шекьрдар. Чаԝа? Ԝәʹдә хԝәрʹа башԛә кьн, сәва һәр рʹож бьфькьрьн сәр һьнә тьштед әʹмьре хԝәда, бона чь жи һун рʹази нә. Чьԛас һе зедә һун ве йәке бькьн, һаԛас ида әԝ йәк ԝе ԝәрʹа бьбә хәйсәт. Ӧса һуне жь ԝан мәрьва, йед кӧ тʹәне сәр чәтьнайед хԝә дьфькьрьн, бәхтәԝартьр бьн. Һәрге һун бьфькьрьн сәр тьштед баш, кӧ Хԝәде у мәрьвед дьн бона ԝә дькьн, әԝ йәк ԝе ԝә бәхтәԝар кә. Һун дькарьн хԝәрʹа дәстпекьн ԝан тьшта бьньвисьн. Мәсәлә, дӧ йан се тьшта бьньвисьн, бона кʹижана һун һәр рʹож рʹази нә.

Бь готьна һьнәкед кӧ дәрһәԛа шекьрдарийе леколин дькьн, чахе әм «һәр гав рʹазибуне дьдьнә кʹьфше, әԝ йәк дькарә хәбата нейронед мәжуйе мә бьгӧһезә, кӧ әм һе позитив бьньһерʹьн сәр әʹмьре хԝә». Мәрьве шекьрдар бәхтәԝар ә. Ԝәрә әм тʹьме кʹәрәмед хԝә һʹәсаб кьн, ша бьн тьштед башрʹа кӧ әʹмьре мәда һәнә, у тʹьме рʹази бьн! Дәԝса кӧ әм һʹәсаб кьн, ԝәки әм һежайи ԝан тьштед баш ьн, ԝәрә әм «шькьрийе жь Хӧданрʹа бькьн, жь бәр кӧ әԝ ԛәнщ ә»! Бәле, «һәр тьштида рʹазибуне бьдьн» (1 Дир. 16:34; 1 Тʹеслн. 5:18).