1. Йаһоԝа чь дьдә мә?

ЙАҺОԜА азайе дьдә мә, ԝәки хԝәха бьжберьн ча бьжин. Әԝ мә һин дькә кӧ бьзаньбьн ча сафикьрьнед кӧ ԝи хԝәш тен, биньн сери (Зәб. 119:173). Чьԛас зедә әм биланийа жь Хәбәра Хԝәде дьдьнә хәбате, һаԛас зедә әм сафикьрьнед баш дькьн (Ибрн. 5:14).

2. Чахе әм тьштәки сафи дькьн, чь дькарә мәрʹа чәтьн бә?

² Һәрге жи мә сафикьрьнәкә билани кьрийә, йәкә дьԛәԝьмә мәрʹа чәтьн ә ве йәке һʹәта хьлазийе биньн сери. Дина хԝә бьдьнә ԝан мәсәла: Бьраки щаһьл хԝәрʹа сафи кьрийә, ԝәки бь тʹәмами Кʹьтеба Пироз бьхунә. Әԝ чәнд һʹәфтийа ве йәкеда рʹьнд пешда дьчә, ле паше дьсәкьнә. Хушк сафи дькә, ԝәки бьбә пешәнг, ле паш дьхә. Кʹомәкә рʹуспийа тʹәвайи сафи кьрьн, ԝәки щьвата хԝәда һе зедә сәрледана шьвантийе бькьн, ле мәһ дәрбаз бун ԝана һе дәстпенәкьр ве йәке биньн сери. Әԝ һәр се дәрәщә щурʹә-щурʹә нә, ле тьштәкида мина һәв ьн. Ԝана сафикьрьна хԝә һʹәта хьлазийе нәанинә сери. Ԛьрʹна йәкеда, Мәсиһийед Корьнтʹи рʹасти чәтьнайа ӧса һатьн. Ԝәрә әм дина хԝә бьдьне, һәла әм жь ԝана чь дькарьн һин бьн.

3. Корьнтʹийа чь сафи кьрьн, ле чь ԛәԝьми?

³ Незики сала 55 Д.М., Мәсиһийед Корьнтʹида сафикьрьна фәрз кьрьн. Әԝана пеһʹәсийан, ԝәки хушк-бьред ԝани рʹӧһʹани Оршәлимеда у Щьһустанеда тәʹли-тәнгасийада у кʹәсибийеда ньн, у кӧ щьватед майин сәва аликʹарийе бьдьнә ԝан, пʹәрә тʹоп дькьрьн. Жь ԛәнщийе у мәрʹданийа хԝә, хушк-бьред Корьнтʹе хԝәрʹа нет данин, ԝәки әԝана жи ве йәкеда аликʹарийе бьдьн у жь Паԝлос пьрсин, ԝәки әԝана ча дькарьн али ԝан бькьн. Әԝи рʹебәри шандә ве щьвате у Тито кʹьфш кьр, сәва пʹәре ԛӧрбанкьри тʹоп кә (1 Корн. 16:1; 2 Корн. 8:6). Ле чәнд мәһ шунда Паԝлос пеһʹәсийа, ԝәки ԝана чь кӧ сафи кьрьбун нәанинә сери. Ахьрийа  ве йәке ԝе әԝ буйа, кӧ ԛӧрбанкьрьна ԝан ԝе һазьр нибуйа һьнге, гава гәрәке бьвьрана Оршәлиме тʹәви ԛӧрбанкьрьнед щьватед майин (2 Корн. 9:4, 5).

4. Ль гора 2 Корьнтʹи 8:7, 10, 11, Паԝлос дьл да Корьнтʹийа кӧ чь бькьн?

⁴ Корьнтʹийа сафикьрьна баш кьрьн, у Паԝлос бона баԝәрийа ԝанә ԛәԝи у мәрʹданийа кӧ ԝана дьхԝәст бьда кʹьфше, пʹайе ԝан да. Ле әԝи ӧса жи дьл да ԝан, ԝәки ԝана чь жи дәстпекьр биньн сери. (Бьхунә 2 Корьнтʹи 8:7, 10, 11.) Әԝ дәрәща ԝан мә һин дькә, ԝәки һәла һе Мәсиһийед амьнрʹа жи щара нәһеса йә сафикьрьнед баш һʹәта хьлазийе биньн сери.

5. Әме ве готареда кʹижан пьрса шеԝьр кьн?

⁵ Мина ԝан Корьнтʹийа, мәрʹа жи дьбәкә щара чәтьн бә сафикьрьнед хԝә биньн сери. Чьрʹа? Чьмки жь бо гӧнәкʹарийа мә нав мәда әԝ хәйсәт һәйә, кӧ тьшта дәрәнги хьн. Йан жи щара тьштед ӧса дьԛәԝьмьн, кӧ әм һивийе нибун, у жь бо ве йәке найе стандьне сафикьрьна хԝә биньн сери (Ԝаиз 9:11; Рʹом. 7:18). Ле ча әм дькарьн сафикьрьна хԝә бьщерʹьбиньн у бьфькьрьн һәла лазьм ә әве сафикьрьне бьгӧһезьн йан на? У чь дькарә али мә бькә, ԝәки сафикьрьнед хԝә һʹәта хьлазийе биньн сери?

6. Кʹәнге дьбәкә мәрʹа лазьм бә сафикьрьна хԝә бьгӧһезьн?

⁶ Һьнә сафикьрьнед фәрз әме тʹӧ щар нәгӧһезьн. Мәсәлә, әме тʹӧ щар сафикьрьна хԝә кӧ Йаһоԝарʹа хьзмәт кьн у жьн йан мере хԝәрʹа амьн бьминьн, нәгӧһезьн (Мәт. 16:24; 19:6). Ле сафикьрьнед майин, щара лазьм ә әм бьгӧһезьн. Чьрʹа? Чьмки дәрәщә тенә гӧһастьне. Ле кʹижан гав дькарьн али мә бькьн, кӧ чьԛас дькарьн сафикьрьнед лапә баш бькьн?

7. Әм бона чь гәрәке дӧа бькьн, у чьрʹа?

⁷ Дӧа бькьн, ԝәки Хԝәде биланийе бьдә ԝә. Йаһоԝа рʹебәри Аԛуб кьр, ԝәки бьньвисә: «Һәгәр сәрԝахтийа йәки жь ԝә тʹера ԝи накә, бьра һиви жь Хԝәде бькә у ԝе жь ԝирʹа бе дайине» (Аԛуб 1:5). Дькарьн бежьн, сәрԝахти «тʹера» мә гьшка накә. Ләма жи чахе һун сафикьрьна дькьн, у ӧса жи чахе дьхԝазьн сафикьрьне бьгӧһезьн, аликʹарийе жь Йаһоԝа бьхԝазьн. Һьнге Йаһоԝа ԝе әʹсә али ԝә бькә, кӧ сафикьрьна бь билани бькьн.

8. Әм чь гәрәке бькьн пешийа кӧ тьштәки сафи кьн?

⁸ Кʹур леколина бькьн. Жь Хәбәра Хԝәде ширәта бьгәрʹьн, әʹдәбйәтед кӧ тʹәшкиләта мәда һәнә бьхуньн, у тʹәви мәрьве бь итʹбар хәбәр дьн, йе кӧ дькарә ширәтед баш бьдә ԝә (Мәтʹлк. 20:18). Әԝ һәр тьшт гәләк фәрз ьн пешийа ве йәке чахе әм сафи дькьн кӧ хәбате бьгӧһезьн, дәрбази щики дьн бьн, йан жи чь пʹешәйи бьстиньн, сәва әʹбура хԝә бькьн у бькарьбьн хьзмәт кьн.

9. Әме чь кʹаре бьстиньн һәрге һьндава хԝәда һʹәлал бьн?

⁹ Мәʹнийа сафикьрьна хԝә бьщерʹьбиньн. Бона Йаһоԝа гәләк фәрз ә, кӧ әм чьрʹа у бь чь нете фьлан тьшти дькьн (Мәтʹлк. 16:2). Әԝ дьхԝазә, ԝәки әм һʹәму тьштада һʹәлал у дьлтʹәмьз бьн. Ләма жи гава әм тьштәки сафи дькьн, әм дьхԝазьн һьндава хԝәда у мәрьвед дьнда рʹаст у һʹәлал бьн. Һәрге нетед мә бь тʹәмами рʹаст нибьн, ԝе мәрʹа чәтьн бә сафикьрьна хԝә биньн сери. Мәсәлә, бьраки щаһьл сафи дькә, кӧ бьбә пешәнг. Ле һьнә ԝәʹдә шунда жерʹа чәтьн дьбә сьһʹәтед пешәнгийе перʹа бьгьһинә, у ләма әԝ ида хьзмәтийеда шабуне навинә. Әԝи тʹьре нета ԝийә кӧ бьбә пешәнг әԝ ә, ԝәки дьле Йаһоԝа ша кә. Ле дьбәкә пешийе нета  ԝийә сәрәкә әԝ бу, ԝәки дьле де-баве хԝә ша кә йан жи дьле кәсәки дьн?

10. Чь лазьм ә сәва гӧһастьна бькьн?

¹⁰ Дина хԝә бьдьн ве мәсәле: Мәрьвәк кӧ Кʹьтеба Пироз һин дьбә, сафи кьрийә ԝәки щьхаре бьтʹәрькинә. Пешийе һʹәфтеки йан жи дӧ һʹәфтийа әԝ щьхаре накʹьшинә, ле паше дәстпедькә диса бькʹьшинә. Ахьрийеда әԝи бь тʹәмами тʹәрька щьхаре да! Һʹьзкьрьна ԝи һьндава Йаһоԝа у хԝәстьна ԝи кӧ дьле Ԝи ша кә, али ԝи кьр әви хәйсәти бьтʹәрькинә (Колс. 1:10; 3:23).

11. Чьрʹа лазьм ә нетед конкрет дайньн пешийа хԝә?

¹¹ Нетед конкрет дайньн пешийа хԝә. Һәрге нетед ԝә конкрет бьн, ԝәрʹа ԝе дьһа һеса бә биньн сери. Мәсәлә, бәʹса хәбәре ԝә хԝәрʹа сафи кьрийә, кӧ һәр гав Кʹьтеба Пироз бьхуньн. Ле һәрге ԝә плана бона хԝәндьне конкрет кʹьфш нәкьрийә, ԝәрʹа ԝе чәтьн бә әве нета хԝә биньн сери. * Йан жи мәсәлә, рʹуспийед щьватеда сафи кьрьнә, ԝәки һе зедә сәрледанед шьвантийе бькьн, ле ԝәʹдә дәрбаз бу, ԝана нета хԝә нәани сери. Ԝана дькарьбун ԝан пьрса бьдьнә хԝә, сәва әве сафикьрьне биньн сери: «Мә ԛә конкрет сафи кьрийә, кӧ кʹижан хушк-бьрарʹа лазьм ә сәрледанед шьвантийе бькьн? Мә ԝәʹдә кʹьфш кьрийә, кӧ кʹәнге тʹәсәлийа ԝан бькьн?».

12. Чь дьбәкә мәрʹа лазьм бә бькьн, у чьрʹа?

¹² Бь реали бьньһерʹә сәр дәрәща хԝә. Бал мә һәр кәси һаԛас ԝәʹдә, тьшт, у ԛәԝат тʹӧнә йә, ԝәки һәр тьшти бькьн чь әм дьхԝазьн. Ләма жи әм гәрәке бь реали у рʹаст бьньһерʹьн сәр дәрәща хԝә. Щара дьбәкә лазьм бә һун сафикьрьна хԝә бьгӧһезьн, чьмки ԛәԝата ԝә нагьһиже кӧ ве йәке биньн сери (Ԝаиз 3:6). Бәʹса хәбәре, ԝә сафикьрьна хԝә щерʹьбанд, паше гӧһаст, чьмки ӧса лазьм бу, у һун дьфькьрьн кӧ гәрәке ида биньн сери. Ԝәрә пенщ гава шеԝьр кьн, кӧ дькарьн али ԝә бькьн сафикьрьна хԝә биньн сери.

13. Ча һун дькарьн ԛәԝате бьстиньн сәва сафикьрьна хԝә биньн сери?

¹³ Дӧа бькьн, ԝәки ԛәԝата ԝә һәбә кьрьна хԝә биньн сери. Хԝәде дькарә ве йәке бькә дьле мә, кӧ әм сафикьрьна хԝә биньн сери (Фили. 2:13). Ләма жи жь Йаһоԝа рʹӧһʹе пироз бьхԝазьн, сәва ԛәԝате бьдә ԝә нета хԝә биньн сери. Бәрдәԝам кьн дӧа бькьн, һәрге жи һун дьфькьрьн кӧ щаба дӧайе ԝә дәрәнги дькʹәвә. Чаԝа Иса гот: «Бьхԝазьн һуне [рʹӧһʹе пироз] бьстиньн» (Луԛа 11:9, 13).

14. Принсипа Мәтʹәлок 21:5-да ча дькарә али ԝә бькә, кӧ сафикьрьна хԝә биньн сери?

¹⁴ Хԝәрʹа плане чекьн. (Бьхунә Мәтʹәлок 21:5.) Сәва нет йан жи сафикьрьна хԝә һʹәта хьлазийе биньн сери, ԝәрʹа план лазьм ә. Паше ԝәрʹа лазьм ә хԝә ль ве плане бьгьрьн. Мәсәлә, ԝәʹде сафикьрьнәке конкрет хԝәрʹа бьньвисьн, кӧ ԝәрʹа чь лазьм ә сәва сафикьрьна хԝә биньн сери. Һун дькарьн шьхӧле мәзьн пʹарәвәкьн сәр шьхӧлед бьчʹук, сәва әԝи шьхӧли биньн сери. Паԝлос ширәт да Корьнтʹийа, ԝәки «һәр йәкшәм» пʹәре бона ԛӧрбане башԛә кьн, дәԝса кӧ һивийа Паԝлос бьн һʹәта әԝ бе у паше тʹоп кьн (1 Корн. 16:2). Һәрге әм шьхӧле мәзьн пʹарәвәкьн, мәрʹа ԝе баргьран нибә кӧ ԝан тьшта биньн сери.

15. Чахе әм хԝәрʹа башԛә дьньвисьн дәрһәԛа шьхӧлед хԝә, әԝ йәк чьда дькарә кери мә бе?

¹⁵ Һәрге һун дәрһәԛа сафикьрьна хԝә башԛә хԝәрʹа бьньвисьн кӧ ча биньн сери, һуне бькарьбьн һʹәта хьлазийе биньн сери (1 Корн. 14:40). Мәсәлә, бона кʹома  рʹуспийа рʹебәри һәйә, ԝәки рʹуспики кʹьфш кьн сәва һәр сафикьрьна кʹома рʹуспийа бьньвисә, у ӧса жи кӧ кʹе гәрәке әԝи тьшти бькә у кʹәнге гәрәке әԝ шьхӧл хьлаз бә. Ԝан рʹуспийарʹа йед кӧ пәй ве рʹебәрийе дьчьн, дьһа һеса йә сафикьрьна хԝә биньн сери (1 Корн. 9:26). Һун жи шьхӧле хԝә дькарьн ӧса бькьн. Мәсәлә, һәр рʹож бьньвисьн кӧ һун чь гәрәке бькьн, у пешийе чь бькьн. Әԝ йәк ԝе али ԝә бькә нә кӧ тʹәне шьхӧлед хԝә биньн сери, ле ӧса жи ԝәʹдәки кьнда һе зедә тьшт бькьн.

16. Чь гәләк фәрз ә сәва сафикьрьна хԝә биньн сери, у ча Рʹомайи 12:11 ве йәке дьдә кʹьфше?

¹⁶ Хирәт бьн, ԝәки нетед хԝә биньн сери. Мәрʹа ԛәԝат у ԝәʹдә лазьм ә, сәва хԝә ль нетед хԝә бьгьрьн, ԝәки һʹәта хьлазийе биньн сери. (Бьхунә Рʹомайи 12:11.) Паԝлос готә Тимотʹейо, ԝәки хԝә бьдә шьхӧле хԝә у нава ԝан тьштада бьминә, сәва бьбә дәрсдаре баш. Әԝе ширәте әм гәрәке һьлдьн һʹәсаб, чахе нетед рʹӧһʹани датиньн пешийа хԝә (1 Тимтʹ. 4:13, 16).

17. Ча Әфәси 5:15, 16 дькарә али мә бькә, кӧ нета хԝә биньн сери?

¹⁷ Ԝәʹде хԝә бь билани пʹарәвәкьн. (Бьхунә Әфәси 5:15, 16.) Хԝәрʹа ԝәʹдә бьжберьн сәва сафикьрьна хԝә биньн  сери у әԝи ԝәʹдәйи нәгӧһезьн. Һивийа ԝәʹде лапи баш нибьн, чьмки дьбәкә әԝ ԝәʹдә нә жи ԝе бе (Ԝаиз 11:4). Фәсал бьн ԝәки тьштед нәфәрз ԝәʹдә у ԛәԝате жь ԝә нәстиньн, ԝәки һун бькарьбьн тьштед һе фәрз бькьн (Фили. 1:10). Һәрге те стандьн, хԝәрʹа ԝәʹдәки ӧса башԛә кьн, кӧ кәсәк ԝә ащьз нәкә. У ӧса бькьн кӧ мәрьв бьзаньбьн, ԝәки ԝи ԝәʹдәйи һун бәтал ниньн у һʹьш-аԛьле хԝә бь тʹәмами дьдьн сәр шьхӧле хԝә. Ԝе баш бә тʹела хԝә весиньн у ԝи ԝәʹдәйи нәкʹәвьнә интернете сәр малпәред сосйал. *

18-19. Һәрге жи нәһеса йә сафикьрьна хԝә биньн сери, чь дькарә али ԝә бькә?

¹⁸ Бьфькьрьн сәр ахьрийа сафикьрьна хԝә. Ахьрийа сафикьрьна ԝә мина хьлазийа рʹеԝитийе йә. Һәрге һун дьхԝазьн бьгьһижьнә щики, рʹе чьԛас жи чәтьн бә, һуне рʹийа хԝә бәрдәԝам кьн, у һәрге жи лазьм бә һуне рʹийа хԝә бьгӧһезьн. Ԝи щурʹәйи, һәрге әм дьфькьрьн сәр ахьрийа сафикьрьнед хԝә, әме һʹәта хьлазийе сафикьрьна хԝә биньн сери, һәрге жи рʹасти чәтьнайа бен (Галт. 6:9).

¹⁹ Бәле, сафикьрьнед баш бькьн у һʹәта хьлазийе биньн сери, нәһеса йә. Ле пе аликʹарийа Йаһоԝа һун дькарьн билани у ԛәԝате бьстиньн, кʹижан кӧ ԝе али ԝә бькә шьхӧле хԝәйи дәстпекьри биньн сери.