ЧАХЕ баве мьн щаһьл бу, әԝи хԝәстьбу бьбә хьзмәткʹаре дера Методист, чьмки әԝ мәрьвәки хԝәдехоф бу. Ле чахе әԝи әʹдәбйәтәкә Леколинкʹаред Кʹьтеба Пироз хԝәндьбу у дәстпекьрьбу тʹәви ԝан һәвалтийе бькә, әԝи нета хԝә гӧһастьбу. Баве мьн һатьбу ньхӧмандьне сала 1914, чахе әԝ 17 сали бу. Ԝәʹде Шәрʹе Һʹәмдьнйайе йа Йәке, гази ԝи кьрьбун кӧ һәрʹә әскәрийе. Баве мьн нәчубу әскәрийе у ләма ԝи сәр дәһ мәһа кьрьбунә Кәла Кингстоне, (Онтарйо, Канада). Чахе баве мьн жь кәле дәркʹәтьбу, әԝ бьбу бәлакьре кʹьтеба, (бәре пешәнг ӧса нав дькьрьн).

Сала 1926-да баве мьн зәԝьщи тʹәви Һазел Ԝилкенсон. Дийа ԝе рʹастийе пеһʹәсийа сала 1908-да. Әз һатьмә буйине 24 Нисане, сала 1931, әм чар зарʹ бун у әз йе дӧда бум. Хьзмәткьрьн Йаһоԝарʹа малбәта мәда щийе пешьн дьгьрт. Баве мьн Кʹьтеба Пироз гәләк ԛимәт дькьр, у әԝе йәке али мә кьр ԝәки әм жи Хәбәра Хԝәде ԛимәт бькьн. Мә тʹьме тʹәвайи ча малбәт мал бь мал хьзмәт дькьр (Кʹар. Шанд. 20:20).

Сала 1939 Шәрʹе Һʹәмдьнйайе йа Дӧда дәстпебу. Саләк дәрбаз бу у Канадайеда шьхӧле Шәʹдед Йаһоԝа һатә ԛәдәхәкьрьне. Мәкʹтәбада жь зарʹа дәʹԝа дькьрьн, ԝәки һʹӧрмәте бьдьнә бәйраԛе у гимне дәԝләте бьстьрен. У гава дәрсханеда гимне дьстран у һӧрмәте дьданә бәйраԛе, әз тʹәви хушка хԝәйә мәзьн Дороти, жь дәрсхане дәрдькʹәтьм. Әз гәләк әʹщебмайи мам чахе дәрсдара мьн сәва ԝе йәке әз беһʹӧрмәт кьрьм у гот ԝәки әз тьрсонәк ьм. Паши мәкʹтәбе чәнд шагьртед жь дәрсхана мьн, данә пәй мьн у мьн әʹрде хьстьн. Ле әԝе ԛәԝьмандьне әз һе ԛәԝи кьрьм, ԝәки әз гӧрʹа Хԝәде бькьм нә кӧ гӧрʹа мәрьва (Кʹар. Шанд. 5:29).

Чахе әз 11 сали бум, мәһа Тирмәһе сала 1942-да, әз һәԝза фермеда һатьмә ньхӧмандьне. Ԝәʹде мәһед һесабуна мәкʹтәбе, мьн хьзмәт дькьр ча пешәнге тʹатʹили, (ньһа те навкьрьне пешәнге  кʹомәкдар). Нава саләкеда мьн тʹәви се бьра хьзмәт дькьр Онтарйойа бакʹуреда, кʹидәре кӧ дарбьрʹ дьжитьн.

Йәке Гӧлане, сала 1949-да, әз бумә пешәнг. Ԝи ԝәʹдәйи филиале шьхӧле авакьрьне дькьр, у әз тʹәглиф кьрьм сәва аликʹарийе бьдьм авакьрьнеда у паше 1 Кануна Пешьн әз бумә әндәме Бәйтʹәла Канадайе. Әз һатьмә кʹьфшкьрьне идара нәшьркьрьнеда у ԝедәре әз һин бум кӧ ча мәкʹина нәшьркьрьне бьдьмә хәбате. Щарәке ӧса ԛәԝьми кӧ чәнд һʹәфтийа тʹәмамийа шәве мьн нәшьр дькьр бәлавока дәрһәԛа пәйкʹәтьна Шәʹдед Йаһоԝа Канадайеда.

Ԝәʹдә шунда, әз ида Идара Хьзмәтийеда дьхәбьтим. Щарәке мьн жь пешәнга интервийу һьлда, йед кӧ дәрбази Кԝебеке дьбун, кʹидәре кӧ пәйкʹәтьнед ԛайим һәбун. Йәк жь ԝана Мери Зазула бу, йа кӧ жь Едмонтоне бу, (Алберта). Де-баве ԝе әндәмед дера Мәсиһийа бун. Ләма чахе Мерийе тʹәви бьре хԝә Що, готә де-баве хԝә кӧ әԝана ԝе бәрдәԝам кьн Кʹьтеба Пироз һин бьн, де-бав бәри ԝан дан у жь мале дәрхьстьн. Мәһа Һʹәзиране сала 1951, Мери у Щон һатьнә ньхӧмандьне, у шәш мәһа паши ньхӧмандьне, ԝана дәстпекьр ча пешәнг хьзмәт кьн. Ԝәʹде интервийу, әз әʹщебмайи мам кӧ Мери ча Хԝәде һʹьз дькә. Мьн дьле хԝәда гот ԝәки әԝ һәма әԝ ԛизьк ә кʹе жи әз дьхԝазьм бьстиньм. Ахьрийеда паши нәһ мәһа, 30 Чьләйе, сала 1954-да мә һәв станд. Һʹәфтек дәрбаз бу у әм тʹәглиф кьрьн ԝәки шьхӧле бәрпьрсийартийе һин бьн. Паши дӧ сала, мә дәстпекьр Онтарйойа бакʹуреда шьхӧле бәрпьрсийартийе бькьн.

Шьхӧле бәлакьрьна мьзгинийе нав тʹәмамийа дьнйайе гәләк пешда дьчу у гәләк мисйонер лазьм бун. Әм дьфькьрин кӧ һәрге мә Канадайеда зьвьстане бәр сӧрʹ-сәрме у һавинеда бәр мьхмьхка тәйах кьр, мә кʹӧ жи кʹьфш кьн, әме бькарьбьн һәр дәрәщада тәйах кьн. Мәһа Тирмәһе сала 1956-да, мә Мәкʹтәба Гиләд хьлаз кьр у әм һатьнә кʹьфшкьрьне Бразилйайеда.

Чахе әм һатьнә филиала Бразилйайеда, мә дәстпекьр зьмане Португали һин бьн. Пешийе әм һин бун кӧ ча хәбәрдане дәстпекьн, паше жи әм пешанина кьн йа журнале бь әзбәри һин бун у ида мә дәстпекьр һәрʹьнә хьзмәтийе. Мә сафи кьр кӧ һәрге хԝәйе малерʹа һʹәԝас бә, әме жерʹа рʹеза дәрһәԛа жийина бьн Пʹадшатийа Хԝәдеда бьхуньн. Чахе әм щара пешьн дәркʹәтьн хьзмәтийе, жьнькәке рʹьнд гӧһе хԝә да мә. Чахе мьн жерʹа Әʹйанти 21:3, 4 хԝәнд, паше ньшкева әз хәрьԛим, чьмки әз һини һәԝа шьл у гәрме нәбьбум.

 Әм ча мисйонер шәһәре Кампоседа һатьнә кʹьфшкьрьне, кʹидәре кӧ ньһа 15 щьват һәнә. Чахе әм һатьнә ԝи шәһәри, ԝи чахи тʹәне кʹомәки һәбу у ӧса жи мала мисйонера, кʹидәре кӧ чар хушка дьжит: Естер Трейси, Рамона Бауер, Луиза Швартс у Лоран Брукс (ньһа бь фамила Ԝолен). Ԝе маледа шьхӧле мьн әԝ бу, ԝәки аликʹарийе бьдьм щийе кʹьнщшуштьнеда у ӧса жи дара биньм ԝәки бькарьбьн хԝарьне чекьн. Щарәке, Дӧшәме паши һинбуна «Бьрща Ԛәрәԝьлийе», мьн у кʹӧлфәта хԝә һәврʹа хәбәр дьда кӧ ча рʹож дәрбаз бу. Жьна мьн вәләзийа бу сәр диване у чахе әԝе сәре хԝә сәр бәʹлги һьлда, ньшкева бьн бәлги мәʹр дәркʹәт. Әм зьравԛәтанди бун, һʹәта мьн әԝ мәʹр кӧшт.

Чахе саләк дәрбаз бу кӧ әм зьмане Португали һин дьбун, әз һатьмә кʹьфшкьрьне ча бәрпьрсийаре мьһале. Мә бь әʹмьре һеса дьжит. Мә щийе жь шәһәр дәр дьжит, кʹидәре кӧ лус тʹӧнә бу, әм сәр халиче рʹадьзан, у әм пе һәсп у фьрхуне дьчун-дьһатьн. Чахе әм дьчунә щийе дур ԝәʹде кампанийа хьзмәтийе, әм пе трене һʹәта шәһәр чун у мә ль ԝедәре маләкә мәзьнда отʹахәк кʹьре һьлда. Филиале мәрʹа 800 журнал шанд сәва кӧ әм хьзмәтийеда бәла кьн. Мәрʹа лазьм бу гәләк щар һәрʹьнә пʹосте бен, ԝәки ԝан ԛӧтʹийа бь журнала бьвьн ԝи щийи кʹидәре әм дьман.

Сала 1962, нав тʹәмамийа Бразилйайеда, бона бьра у хушкед мисйонер Мәкʹтәба Хьзмәтийе дәрбаз бу. Әз шәш мәһа бей Мери дьчумә щурʹә-щурʹә щийа, сәва әве мәкʹтәбе дәрбаз кьм. Мәсәлә, Манауседа, Белемеда, Фортәлазайеда, Ресифеда, у Салвадореда. Мьн Манауседа саз кьр щьвата мәзьн йа се рʹожи, кӧ ода операйа нав у дәнгда дәрбаз бу. Жь бо баранед ԛайим ава бона вәхԝарьне ԛьреж бу у һьн жи щийе нанхԝарьне жи тʹӧнә бу ԝәки ԝәʹде һесабуне хԝарьне бьхԝьн. (Ԝи ԝәʹдәйи, сәр щьватед мәзьн хԝарьн дьһатә дайине.) Ләма әз чум щәм офисере әскәрийе у мьн жерʹа дәрһәԛа чәтьнайа мә гьли кьр. Әԝи бь дьл һаԛас ав да мә, кӧ һʹәта хьлазийа щьвата мәзьн тʹера мә кьр. Хенщи ве йәке, әԝи әскәр шандьн, ԝана дӧ чадьред мәзьн мәрʹа анин у гьредан сәва әм теда хԝарьне чекьн у нан бьхԝьн.

Һʹәта кӧ әз дур бум, Мерийе щийе арш-верша Португали шәʹдәти дьда. Һʹьш-аԛьле ԝан мәрьвада тʹәне әԝ бу кӧ пʹәра чекьн. Ләма жи Мерийе нькарьбу ԝанрʹа шәʹдәти бьда, чьмки ԝана гӧһе хԝә нәдьданә ԝе. Әԝ дьлтәнг бу у ләма готә һәвалед хԝәйә Бәйтʹәледа кӧ ԝе нәхԝаста Португаледа бьжита. Ле һьнә ԝәʹдә шунда, Мери гәләк әʹщебмайи ма, чьмки мә тʹәглифкьрьн станд кӧ Португаледа хьзмәт кьн. Ԝи ԝәʹдәйи Португаледа шьхӧле бәлакьрьна  мьзгинийе ԛәдәхәкьри бу, ле йәкә әм рʹази бун ԝәки һәрʹьн.

Сала 1964-да, әм дәрбази Лисбоне (Португал) бун. Ԝи чахи полисйа (PIDЕ) Португале дьзива пәй бьред мә дькʹәтьн. Ләма чахе әм һатьнә ԝедәре, әм рʹасти бьра нәһатьн сәва кӧ ԝана нәкьнә ԛәзийе. Мә отʹах кʹьре һьлда у ԝедәре дьман. Әм һивийа визе бун у чахе мә виза хԝә станд, мә мал кʹьре һьлда. Пенщ мәһ дәрбаз бу у мәһа Чьләйе, сала 1965-да, мә ида дькарьбу тʹәви бьред филиале хәбәр да. Әм гәләк шабун чахе щара пешьн әм чунә щьвате!

Әм пеһʹәсийан кӧ һәр рʹож полис дькʹәтьнә малед бьред мә. Одед Щьвата дадайи бун, у ләма щьват дьзикава малада дәрбаз дьбун. Бь сәда хушк у бьра дьбьрьнә полисе, сәва ԝана бьщерʹьбиньн у гьлийа жь ԝана дәрхьн. Полис һьндава ԝанда гәләк сәрт бун у зоре ԝана дькьрьн, ԝәки наве бьра бежьн йед кӧ щьват дәрбаз дькьрьн. Бона ве йәке, бьра ида бей фәмил наве һәв һьлдьдан, мәсәлә Хосе йан жи Пауло. У мә жи ӧса дькьр.

Бона мә лапә фәрз әԝ бу, ԝәки щәм хушк-бьра хԝарьна рʹӧһʹани һәбә. Мери щабдар бу ԝәки «Бьрща Ԛәрәԝьлийе» у әʹдәбйәтед дьн бьньвисә сәр кʹахазед ӧса, кʹижан кӧ паше дькарьбун пе мимеографе копи бькьрана.

Мәһа Һʹәзиране сала 1966-да, диԝана мәзьн дәрбаз бу Лисбонеда. Тʹәмамийа Щьвата Фәжу кӧ жь 49 хушк-бьра бу, бьрьнә диԝане чьмки ԝана дьзикава маләкеда щьват дәрбаз дькьрьн. Мьн әԝ хушк-бьра бона диԝане һазьр кьрьн. Мьн тʹәмашә чекьр ԝәки йанчь әз прокурор ьм у диԝанеда бьра нәһәԛ дькьм. Мә заньбу әме бьдьнә дәр, ле мә фәʹм дькьр ԝәки әме шәʹдәтийа мәзьн бьдьн. Адвокате мә чахе әм бәр диԝане хԝәй дькьрьн, бь мерхаси гьлийед Гамалйел гот кӧ Кʹьтеба Пирозда ньвисар ьн (Кʹар. Шанд. 5:33-39). Сәд һʹәйф, ле әԝ 49 хушк-бьра кьрьнә кәле сәр ԝәкә 45 рʹожа һʹәта 5 мәһ у нива. Паше нучеда дәрһәԛа ве диԝане әʹлам кьрьн. Ле мә шабунәкә мәзьн станд чахе адвокате мә дәстпекьр Кʹьтеба Пироз һин бә у бе сәр щьвате.

Мәһа Кануна Пешьн сала 1966, әз ча бәрпьрсийаре филиале һатьмә кʹьфшкьрьне. Мьн бона пьрсед ԛанунева гьредайи гәләк ԝәʹдә хәрщ дькьр. Мә һʹәму тьшт кьр сәва кӧ Шәʹдед Йаһоԝа бь ԛануни изьне бьстиньн кӧ аза хьзмәт кьн (Фили. 1:7). Ахьрийеда, 18 Кануна Пешьн, сала 1974 мә изьн станд. Жь офиса сәрәкә Нейтан Нор у Фредерик Франс һатьн Португале, ԝәки сәр щьвина гәләк мәхсус тʹәви мә ша бьн. Әԝ щьвин дәрбаз бу шәһәре Опорто у Либсонеда, кʹидәре кӧ 46 870 хушк-бьра һатьбун.

 Йаһоԝа дәри вәкьр ԝәки гьравед дьнда жи кӧ сәр зьмане Португали хәбәр дьдьн, мьзгинийе пебьһʹәсьн. Мәсәлә гьравед Азорес, Щапе Верде, Мадера у Сао Тому у Принсип. У чьмки шьхӧле бәлакьрьна мьзгинийе пешда дьчу, мәрʹа лазьм бу филиала һе мәзьн. Чахе филиал ава бу, мәһа 23 Нисане сала 1988-да, Милтон Һеншел готара тʹәсмилкьрьна филиале хԝәнд, кʹидәре кӧ 45 522 хушк у бьра һатьбун. Әм гәләк ша бун ԝәки 20 хушк-бьред кӧ бәре Португаледа ча мисйонер хьзмәт кьрьбун, бона ве щьвина мәхсус вәгәрʹийабунә Португале.

Нава салада, әм жь бьред амьн гәләк тьшт һин дьбун. Мәсәлә, әз дәрсәкә ԛимәт һин бумә жь Теодор Йарач, чахе аликʹарчийе ԝи бум ԝәʹде тʹәсәликьрьна филиала. Мә тʹәсәлийа филиаләке кьр, кʹидәре кӧ чәтьнайикә мәзьн һәбу. Сәва ве чәтьнайе сафи кьн, чь дәсте Комитейа Филиале дьһат, ԝана кьр. У Йарач сәва ԝан бьра дьлгәрм кә, готә ԝан: «Ньһа ида бьһельн бьра рʹӧһʹе пироз йа хԝә бькә». Бь дәһа сал пешда, чахе әм чубунә Бруклине, әз у жьна мьн Мери, тʹәви Франс бьра у йед дьн, еварәке тʹоп бун ԝәки тʹәвайи ԝәʹдә дәрбаз кьн. Хьлазийеда мә ԝирʹа гот ԝәки мәрʹа гьлики бежә дәрһәԛа гәләк салед хьзмәтийа хԝә Йаһоԝарʹа у ширәте бьдә мә. Әԝи мәрʹа гот: «Ширәта мьн әԝ ә: Хԝәшийада жи, чәтьнайада жи тʹәшкиләта Йаһоԝада бьминьн. Тʹәне әԝ тʹәшкиләт ԝи шьхӧли дькә, кʹижан кӧ Иса тʹәми да шагьртед хԝә кӧ бькьн, демәк бәлакьрьна мьзгинийа Пʹадшатийа Хԝәде!»

Әз у жьна мьн һәма ӧса жи дькьн у әм бәхтәԝар ьн. Ӧса жи, әм бь шабун тиньн бира хԝә ԝи ԝәʹдәйи чахе мә тʹәсәлийа филиала дькьрьн. Мә бь сайа ԝан тʹәсәликьрьна, хушк-бьред щаһьл у әʹмьрда мәзьн дьлгәрм дькьр, ԝәки хьзмәтийа ԝанә бь амьни гәләк те ԛимәткьрьне. Мә әԝана һелан дькьрьн, ԝәки бәрдәԝам кьн Йаһоԝарʹа хьзмәт кьн.

Әм ньһа 80 сали зедәтьр ьн. Гәләк нәхԝәшийед Мери һәнә (2 Корн. 12:9). Әм ӧса жи рʹасти чәтьнайед дьн жи дьһатьн. Ле ԝан чәтьнайада баԝәрийа мә дьһа ԛәԝи бу у нета мә әв бу ԝәки һʹәта хьлазийе Хԝәдерʹа амьн бьминьн. Чахе әм дьфькьрьн сәр әʹмьре хԝә, әм фәʹм дькьн ԝәки Йаһоԝа чьԛас гәләк мә кʹәрәм дькә. *