1. Кʹе аликʹари да кӧ Филипйайеда щьвата тʹәзә саз бу?

ЧАХЕ Паԝлосе шанди, Силас, Луԛа у Тимотʹейо, һатьнә колонийа Рʹоме, ль шәһәре Филипйайе, ԝана гәләк мәрьв дитьн, кӧ гӧһ данә мьзгинийа Пʹадшатийе. Бь аликʹарийа әԝан чар бьред хирәт, щьвата тʹәзә саз бу, у һʹәму хушк-бьред тʹәзә дәстпекьрьн тʹәвайи тʹоп бьн, дьԛәԝьмә мала Лидйайеда, йа кӧ хушкәкә гәләк меванһʹьз бу (Кʹар. Шанд. 16:40).

2. Щьвата тʹәзә зутьрәке рʹасти чь чәтьнайе һат?

² Ле зутьрәке әԝ щьвата тʹәзә кʹәтә чәтьнайе. Шәйтʹан дьжмьнед рʹастийе һелан кьрьн, ԝәки пәй ԝан Мәсиһийед амьн кʹәвьн у шьхӧле бәлакьрьна мьзгинийе бьдьнә сәкьнандьне. Паԝлос у Силас гьртьн, данә бәр шьва, у кьрьнә кәле. Паше чахе әԝана аза кьрьн, әԝана чун тʹәсәлийа ԝан хушк-бьред тʹәзә кьрьн у әԝана шьдандьн. Паше Паԝлос, Силас, у Тимотʹейо жь ԝи шәһәри дәркʹәтьн, ле ча те кʹьфше Луԛа ԝедәре ма. Ле әԝ щьвата тʹәзә ча бу? Әԝан хушк-бьред тʹәзә пе аликʹарийа рʹӧһʹе Йаһоԝа, бь хирәт бәрдәԝам кьрьн Йаһоԝарʹа хьзмәт кьн (Фили. 2:12). Рʹасти жи мәʹнийа Паԝлос һәбу, кӧ ԝанрʹа фьрнаԛ бә!

3. Ль гора Филипи 1:9-11, Паԝлос дәрһәԛа чь дӧа дькьр?

³ Ԝәкә 10 сал шунда, Паԝлос щьвата Филипйайерʹа нәʹмә ньвиси. Чахе һун әве нәʹме бьхуньн, һуне бьвиньн, ԝәки Паԝлос ча әԝ хушк-бьра һʹьз дькьрьн. Әԝи ԝанрʹа ньвиси: «Әз бь һʹӧба Мәсиһ Иса чьԛаси һʹәйра ԝә һʹәмуйада мә» (Фили. 1:8). Әԝи ԝанрʹа ӧса жи ньвиси, ԝәки бона ԝана дӧа дькьр. Әԝи жь Йаһоԝа  һиви дькьр, ԝәки али ԝан бькә сәва әԝана һʹьзкьрьна хԝә һе зедә кьн, тьштед фәрз дайньн щийе пешьн, ширһʹәлал бьн, кәсәкирʹа нәбьнә сәбәбе лькʹӧмандьне, у бәрдәԝам кьн бь бәред һәԛийева тʹьжибуйи бьн. Бешьк, һуне ԛайил бьн, ԝәки иро әм жи дькарьн жь гьлийед Паԝлос кʹарәкә мәзьн бьстиньн. Ләма ԝәрә әм бьхуньн һәла Паԝлос Филипйарʹа чь ньвисийә. (Бьхунә Филипи 1:9-11.) Ле паше әме шеԝьр кьн ԝан тьшта, бәʹса кʹижани әԝи кьр, у пебьһʹәсьн ча әм дькарьн ԝан тьшта бьдьнә хәбате.

4. а) Ль гора 1 Йуһʹәнна 4:9, 10, Йаһоԝа ча һʹьзкьрьна хԝә һьндава мә да кʹьфше? б) Әм ча гәрәке Хԝәде һʹьз бькьн?

⁴ Йаһоԝа һʹьзкьрьна мәзьн да кʹьфше, кӧ Кӧрʹе хԝә шандә сәр әʹрде, ԝәки әʹмьре хԝә бьдә бона гӧнед мә. (Бьхунә 1 Йуһʹәнна 4:9, 10.) Әԝ һʹьзкьрьна Хԝәдейә ӧса мәзьн, мә һелан дькә, ԝәки әм жи ԝи һʹьз бькьн (Рʹом. 5:8). Ле әм ча гәрәке Хԝәде һʹьз бькьн? Иса щаба ве пьрсе да чахе Ферьсикирʹа гот: «Хӧдан Хԝәдейе хԝә һʹьз бькә бь тʹәмамийа дьле хԝә, бь тʹәмамийа щанийа хԝә у бь тʹәмамийа һʹьше хԝә» (Мәт. 22:36, 37). Әм нахԝазьн, ԝәки һʹьзкьрьна мә һьндава Хԝәде нивида бә, ле әм дьхԝазьн, ԝәки һәр рʹож һʹьзкьрьна мә һьндава ԝи ԛәԝи бә. Паԝлос готә Филипйа, ԝәки һʹьзкьрьна ԝан гәрәке «һе-һе . . . зедә бә». Әм диса чь дькарьн бькьн, сәва һʹьзкьрьна хԝә һьндава Хԝәде ԛәԝи кьн?

5. Һʹьзкьрьна мә ча дькарә һе ԛәԝи бә?

⁵ Әм гәрәке Хԝәде рʹьнд нас кьн, сәва ԝи һʹьз бькьн. Кʹьтеба Пироз дьбежә: «Йе кӧ һʹьз накә әԝ Хԝәде нас накә, чьмки Хԝәде һʹьзкьрьн ә» (1 Йуһʹн. 4:8). Паԝлосе шанди да кʹьфше, ԝәки һʹьзкьрьна мә һьндава Хԝәде ԝе һе мәзьн бә, һәрге әм дәрһәԛа Ԝи «занәбун у сәрԝахтийа гьһишти» ԛазанщ кьн (Фили. 1:9). Чахе мә пешийе дәстпекьр Кʹьтеба Пироз леколин бькьн, мә дәрһәԛа Хԝәде у һʹӧнӧред ԝийи ԛәнщ һьндьк заньбу, ле мә Хԝәде һʹьз кьр. Паше чахе әм дәрһәԛа Йаһоԝа һе зедә пеһʹәсийан, һʹьзкьрьна мә һьндава ԝи һе ԛәԝи бу. Ләма жи гәләк фәрз ә әм һәр гав Кʹьтеба Пироз бьхуньн у сәр бьфькьрьн! (Фили. 2:16).

6. Ль гора 1 Йуһʹәнна 4:11, 20, 21, әм ча дькарьн һʹьзкьрьна хԝә зедә кьн?

⁶ Һәрге әм Хԝәде ԛайим һʹьз дькьн, әме хушк-бьред хԝә жи һʹьз бькьн. (Бьхунә 1 Йуһʹәнна 4:11, 20, 21.) Әм дьбәкә дьфькьрьн, ԝәки һеса йә хушк-бьред хԝә һʹьз бькьн, чьмки әм гьшк жи Йаһоԝа дьһʹәбиньн у дьхԝазьн чʹәʹв бьдьнә хәйсәт-һʹӧнӧред ԝи. Әм гьшк ӧса жи чʹәʹв дьдьнә Иса, һʹьзкьрьна кʹижани ӧса мәзьн бу, кӧ әԝи әʹмьре хԝә да бона мә. Ле йәкә щара мәрʹа дькарә чәтьн бә һәвдӧ һʹьз бькьн. Дина хԝә бьдьн мәсәла щьвата Филипи.

7. Әм чь һин дьбьн жь ширәта Паԝлос, кʹижан кӧ әԝи Әйодийа у Сьнтихайерʹа да?

⁷ Әйодийа у Сьнтиха хушкед гәләк хирәт бун, йед кӧ тʹәви Паԝлос хьзмәтийеда «худан рʹетьнә». Ле дьԛәԝьмә жь бо һәвнәфәʹмкьрьне, әԝ дӧ хушк ида тʹәви һәв һәвалти нәдькьр. Чахе Паԝлос щьвата ԝанрʹа нәʹма ньвиси, наве ԝан дӧ хушка һьлда у ширәт кьр, ԝәки «йәкбуйи бьра ль һәв бен» (Фили. 4:2, 3). Паԝлос һʹәсаб кьр, ԝәки ве нәʹмеда лазьм ә ӧса жи ширәте бьдә тʹәмамийа щьвате. Нәʹмеда әԝи гот: «Һәр тьшти бе бинтәнги у бе шәрʹ у дәʹԝ бькьн» (Фили. 2:14). Бешьк, әԝ ширәта Паԝлос нә тʹәне али ԝан дӧ хушкед амьн кьр, ле ӧса жи али тʹәмамийа щьвате кьр, ԝәки һʹьзкьрьна хԝә һьндава һәвдӧ ԛәԝи кьн.

8. Чьрʹа мәрʹа дькарә чәтьн бә хушк-бьра һʹьз бькьн, ле чь дькарә али мә бькә, ԝәки ԝана һʹьз бькьн?

 ⁸ Дьбәкә әм жи мина Әйодийа у Сьнтихайе, дина хԝә дьдьн сәр шашийед хушк-бьра, у мәрʹа чәтьн ә ԝана һʹьз бькьн. Ле әм гьшк жи һәр рʹож шашийа дькьн. Һәрге әм дина хԝә бьдьнә тʹәне сәр шашийед ԝан, һʹьзкьрьна мә һьндава ԝанда ԝе һеди-һеди сар бә. Мәсәлә, бьдьнә бәр чʹәʹве хԝә щьватеда бьра бир дькә, кӧ тʹәмьзкьрьна Ода Щьватеда али мә бькә, у әм сәр ԝи һерс дькʹәвьн. Һәрге әм паше шашийед ԝийи дьн жи биньн бира хԝә у сәр бьфькьрьн, һерса мә ԝе һе гӧрʹ бә у һʹьзкьрьна мә жи һьндава ԝи ԝе һеди-һеди сар бә. Һәрге бал ԝә проблема ԝи щурʹәйи һәйә, ԝе баш бә сәр ве йәке бьфькьрьн: Йаһоԝа чаԝа кемасийед мә дьвинә, ӧса жи кемасийед хушк-бьред мә дьвинә. Ле йәкә әԝ диса жи ԝан хушк-бьра у мә һʹьз дькә. Ләма жи әм гәрәке һʹьзкьрьнеда чʹәʹв бьдьнә Йаһоԝа у һе зедә дина хԝә бьдьнә сәр һʹӧнӧред ԝани баш. Чахе әм һәр тьшти дькьн, сәва хушк-бьред хԝә һʹьз бькьн, әм тʹьфаԛи у йәктийе ортʹа һәвда ԛәԝи дькьн (Фили. 2:1, 2).

9. Чь дькʹәвьн нава тьштед «һәрә ԛәнщ», кʹижан кӧ Паԝлос нәʹма хԝәйә Филипйарʹада ньвиси?

⁹ Рʹӧһʹе пироз Паԝлос һелан кьр, ԝәки хушк-бьред Филипйайеда, у ӧса жи һʹәму Мәсиһийа ширәт кә, сәва кӧ әԝана «кʹижан һәрә ԛәнщ ә», демәк кʹижан һәрә фәрз ә, ԝе бьжберьн (Фили. 1:10). Нава тьштед һәрә ԛәнщда ньн, пирозкьрьна наве Йаһоԝа, ԛьрара ԝи, у әʹдьлайи у йәктийа щьвате (Мәт. 6:9, 10; Йуһʹн. 13:35). Чахе әʹмьре мәда әԝ тьшт сәр щийе пешьн ьн, әм избат дькьн ԝәки әм Йаһоԝа һʹьз дькьн.

10. Әм гәрәке чь бькьн сәва беләкʹә бьн?

¹⁰ Паԝлос ӧса жи гот, ԝәки әм гәрәке «ширһʹәлал» бьн. Әԝ гьлийе Йунани щара те һʹәсабе «бекемаси». Ле әԝ йәк найе һʹәсабе, ԝәки әм гәрәке бегӧнә бьн, чьмки әм нькарьн мина Йаһоԝа Хԝәде бекемаси бьн. Ле Йаһоԝа ԝе мә һʹәсаб кә ширһʹәлал, демәк бекемаси, һәрге әм алийе хԝәда һәр тьшти бькьн, сәва һʹьзкьрьна хԝә зедә кьн у тьштед фәрз дайньн щийе пешьн. Мәсәлә, әм һʹьзкьрьне нишан дькьн ӧса жи бь ве йәке, кӧ набьнә сәбәбе лькʹӧмандьна тʹӧ кәси.

11. Чьрʹа әм гәрәке тʹӧ кәсирʹа нәбьнә сәбәбе лькʹӧмандьне?

¹¹ Беләкʹә бьн, демәк тʹӧ кәсирʹа нәбьнә сәбәбе лькʹӧмандьне, тʹәмикә гәләк фәрз ә. Ле ча әм дькарьн кәсәки бьлькʹӧминьн? Әм дькарьн ԝана бьлькʹӧминьн бь ве йәке, кӧ чь ԝәʹдәдәрбазкьрьна дьжберьн, чь кʹьнщ дьжберьн, йан һәла һе жи чь хәбате ԛәбул дькьн. Дьбәкә әм һәма ԝан тьшта накьн, чь кӧ бәр чʹәʹве Йаһоԝа хьраб ә, ле һәрге бьжартьнед мә сәр исафа кәсәки хьраб һʹӧкӧм дьбьн, йан жи әԝ кәс дьлькʹӧмә, әԝ йәк ида тьштәки гәләк хоф ә. Иса гот кӧ һе ԛәнщ ә бәрашәк стуйе мәва бе гьредане у әм бенә авитьне бьне бәʹре, нә кӧ әм бьбьнә сәбәб, кӧ кәсәк һәләԛәтийа хԝә тʹәви Йаһоԝа хьраб кә! (Мәт. 18:6).

12. Әм чь һин дьбьн жь мәсәла жьн-мере пешәнг?

¹² Дина хԝә бьдьне, ча жьн-мерәк кӧ пешәнг ьн, әԝ гьлийед Иса һьлданә һʹәсаб. Щьвата ԝанда һәбун жьн-мер, йед кӧ тʹәзә ньхӧманди бун у малбәтәкә ӧсада мәзьн бьбун, кʹидәре гәләк тьшт изьн тʹӧнә бу. Әԝ жьн-мер кӧ тʹәзә һатьн нава рʹастийе, дьфькьрин, ԝәки Мәсиһи гәрәке нәчьнә кинойе, һәла һе жи һәрге филмед щайиз бьньһерʹьн. Әԝана әʹщебмайи ман чахе пеһʹәсийан, кӧ әԝ жьн-мере пешәнг чунә филме бьньһерʹьн. Паши ве йәке, әԝ жьн-мере пешәнг  нәдьчунә кинойе, һʹәта әԝ жьн-мер исафа хԝә рʹаст һин кьрьн у һе рʹьнд фәʹм кьрьн чь рʹаст ә у чь хьраб ә (Ибрн. 5:14). Ԝи щурʹәйи әԝ жьн-мер, нишан кьрьн, ԝәки әԝ хушк-бьре тʹәзә һʹьз дькьн нә тʹәне пе гьлийа, ле ӧса жи пе кьред хԝә (Рʹом. 14:19-21; 1 Йуһʹн. 3:18).

13. Чаԝа әм дькарьн кәсәки бьвьн бәрбь гӧнә?

¹³ Әм ӧса жи дькарьн кәсәки бьлькʹӧминьн бь ве йәке, кӧ ԝана бәрбь гӧнә бьвьн. Ле ча әԝ йәк дькарә бьԛәԝьмә? Бьдьнә бәр чʹәʹве хԝә ве дәрәще. Мәрьвәки кӧ бәре гәләк ичʹкә вәдьхԝар, ле паше һинбуна Кʹьтеба Пироз дәстпекьр, ахьрийеда анщах тʹәрька ичʹке да. Әԝ фәʹм дькә, ԝәки гәрәке ида тʹӧ щар ичʹке вәнәхԝә. Әԝи әʹмьре хԝәда гәләк гӧһастьн кьр у һатә ньхӧмандьне. Ԝәʹдә дәрбаз дьбә, бьраки кӧ хушк-бьра тʹәглифи мала хԝә дькә, сәва тʹәвайи ԝәʹдә дәрбаз кьн, ԝан гьлийа жерʹа дьбежә: «Ньһа тӧ ида Мәсиһи йи, у рʹӧһʹе Йаһоԝайи пироз сәр тә һәйә. Һʹӧнӧрәки бәре рʹӧһʹе пироз, әԝ һәйә хԝәгьртьн. Демәк, һәрге хԝәгьртьна тә һәйә, тӧ дькари ичʹке һьнәки вәхԝи». Бьдьнә бәр чʹәʹве хԝә, ахьри ԝе чьԛас хьраб бә, һәрге әԝ бьре тʹәзә гӧһ бьдә ширәта ԝийә нәрʹаст у диса пәй ичʹке кʹәвә!

14. Чаԝа щьватед мә али мә дькьн, ԝәки ширәтед жь Филипи 1:10 бьдьнә хәбате?

¹⁴ Щьватед мә али мә дькьн, ԝәки ширәтед жь Филипи 1:10 щурʹә-щурʹә дәрәщада бьдьнә хәбате. Йа пешьн, чь кӧ әм сәр щьвата шеԝьр дькьн у педьһʹәсьн, мәрʹа нишан дькә, кӧ бона Йаһоԝа чь йа лапә фәрз ә. Йа дӧда, әм һин дьбьн, кӧ  ча ԝан тьшта кʹижан кӧ әм педьһʹәсьн, бьдьнә хәбате сәва ширһʹәлал бьн, демәк бекемаси бьн. У йа сьсийа, «һʹьзкьрьне у ԛәнщикьрьнеда» һелана бьдьнә һәв (Ибрн. 10:24, 25). Чьԛас әм жь хушк-бьред хԝә һелане бьстиньн, һаԛас һʹьзкьрьна мә һьндава Хԝәде у хушк-бьред мә, ԝе һе мәзьн бә. Һәрге әм ԛайим Хԝәде у хушк-бьра һʹьз дькьн, әме тʹӧ щар нәһельн, ԝәки кәсәк сәва мә бьлькʹӧмә.

15. Чь те һʹәсабе «бь бәред һәԛийева тʹьжибуйи бьн»?

¹⁵ Паԝлос гәләк дӧа дькьр, сәва хушк-бьред Филипи, «бь бәред һәԛийева тʹьжибуйи бьн» (Фили. 1:11). Бешьк, нава «бәред һәԛийеда» бу һʹьзкьрьна ԝан һьндава Йаһоԝа у щьмәʹта ԝи. Әԝ ӧса жи дьһатә һʹәсабе, кӧ әԝана дәрһәԛа баԝәрийа хԝә һьндава Иса у һевийа хԝә, мәрьвед дьнрʹа жи гьли дькьрьн. Филипи 2:15-да, Паԝлос мәсәләкә майин тинә, «шәԝԛ бьдьн мина рʹонайед әʹзмана». Әԝ гьли тинә бира мә гьлийед Иса, кӧ әԝи сәр шагьртед хԝә гот, ԝәки әԝана «рʹонайа дьнйайе нә» (Мәт. 5:14-16). Әԝи ӧса жи тʹәми да ԝан, кӧ мәрьва бькьнә шагьрт, у гот кӧ әԝана ԝе «һʹәта сәре дьне жи бьбьнә шәʹдед» ԝи (Мәт. 28:18-20; Кʹар. Шанд. 1:8). Әм «бәред һәԛийе» дьдьн чахе чьԛас дәсте мә те, бь хирәт әԝ шьхӧле лапә фәрз тиньн сери.

16. Чаԝа Филипи 1:12-14 дьдә кʹьфше, ԝәки әм дькарьн ча рʹонайи шәԝԛ бьдьн, һәла һе чәтьнайада жи? (Бьньһерʹә шькле рʹуйе журнале.)

¹⁶ Фьрԛи тʹӧнә әм чь дәрәщада ньн, әм дькарьн чаԝа рʹонайи шәԝԛ бьдьн. Щара әԝ дәрәща кӧ бь тʹәхмина мә рʹе мә дьгьрә кӧ мьзгинийе бәла кьн, дькарә мәрʹа бьбә мәщал, ԝәки ве йәке бькьн. Паԝлосе шанди, мәсәлә, чахе Рʹомеда гьртийе малда бу, әԝи һьнге Филипийарʹа нәʹмә ньвиси. Ле зьнщира рʹе ԝи нәдьгьртьн,  ԝәки шәʹдәтийе бьдә ԝан, йед кӧ нобәдари дькьрьн у тʹәсәлийа ԝи дькьрьн. Паԝлос бь хирәт нава ԝан дәрәщада мьзгини бәла дькьр, у әԝе йәке хушк-бьра шьданд у мерхаси да ԝан, ԝәки хәбәра Хԝәде бь меркʹими «бе . . . тьрс бежьн». (Бьхунә Филипи 1:12-14; 4:22).

17. Чаԝа һьнә хушк-бьра ԝәʹде чәтьнайа жи бәред баш тиньн?

¹⁷ Гәләк хушк-бьред мә мина Паԝлос мерхасийе дьдьнә кʹьфше. Ԝана ԝан ԝәлатада дьжит, кʹидәре нькарьн аза хьзмәт кьн, ләма жи әԝана дьгәрʹьн щурʹә-щурʹә метода, кӧ чаԝа мьзгинийе бәла кьн (Мәт. 10:16-20). Ԝәлатәки ӧсада, бәрпьрсийарәки мьһале ширәт да мьзгинвана, ԝәки әԝана һин бьн шәʹдәтийе бьдьн мәрьвед хԝәйи незик, щинар, һәвалед мәкʹтәбеда, һәвалхәбатчийа у мәрьвед нас. Нава дӧ салада, һәжмара щьвата ԝе мьһаледа гәләк мәзьн бу. Әм дьбәкә ԝи ԝәлатида нажин, кʹидәре әм нькарьн әшкәрә мьзгинийе бәла кьн, ле йәкә әм дькарьн дәрсәкә фәрз һин бьн жь хушк-бьред сәрԝахт: Тʹьме мәщала бьгәрʹьн, сәва чьԛас дькарьн мәрьварʹа шәʹдәтийе бьдьн у дӧдьли нәбьн, кӧ Йаһоԝа ԝе ԛәԝате бьдә ԝә, ԝәки һун чәтьнайада жи жерʹа хьзмәт кьн (Фили. 2:13).

18. Әм гәрәке сафи кьн чь бькьн?

¹⁸ Ньһа ԝәʹдәки ӧса йә, кӧ әм гәрәке әԝан ширәта, кʹижан Паԝлос нәʹмеда бона Филипийа ньвиси, әʹмьре хԝәда бьдьнә хәбате. Ләма ԝәрә әм әʹмьре хԝәда тьштед фәрз дайньн щийе пешьн, ширһʹәлал, демәк бекемаси бьн, тʹӧ кәсирʹа нәбьнә сәбәбе лькʹӧмандьне, у бәред һәԛийе бьдьн. Һьнге һʹьзкьрьна мә ԝе һе зедә бә, у әме пәсьна бьдьнә Баве хԝәйи һʹьзкьри, Йаһоԝа!