1. Әм гьшк чь бона мәрьвед мәйи незик дьхԝазьн?

ХУШКӘКӘ мә Паулина, * гьли дькә: «Әз чахе рʹастийе пеһʹәсийам, мьн дьхԝәст һʹәму нәфәред мьн тʹәви мьн Щьнәтеда бьн. Илаһи мьн дьхԝәст мере мьн, Ԝейн у кӧрʹе мьни бьчʹук, тʹәви мьн Йаһоԝарʹа хьзмәт кьн». Дьбәкә мәрьвед ԝәйә незик жи һе Йаһоԝа нас накьн у һʹьз накьн, у һун жи мина Паулинайе дьхԝазьн, ԝәки әԝана Йаһоԝа нас кьн.

2. Кʹижан пьрса әме ве готареда шеԝьр кьн?

² Әм нькарьн зоре нәфәред хԝә бькьн, кӧ мьзгинийе ԛәбул кьн, ле әм дькарьн ԝана һелан кьн, ԝәки һʹьш у дьле хԝә бона мьзгинийа жь Кʹьтеба Пироз вәкьн (2 Тимтʹ. 3:14, 15). Чьрʹа лазьм ә әм мәрьвед хԝәйи незикрʹа шәʹдәтийе бьдьн? Чьрʹа әм гәрәке һьндава ԝанда дьлшәԝат бьн? Әм ча дькарьн али ԝан бькьн, кӧ Йаһоԝа һʹьз бькьн? У ча ве йәкеда хушк-бьред щьвате дькарьн аликʹарийе бьдьнә мә?

3. Ль гора 2 Пәтрус 3:9, чьрʹа әм гәрәке мәрьвед хԝәйи незикрʹа шәʹдәтийе бьдьн?

³ Зутьрәке, Йаһоԝа ԝе ԛьрʹа ве дьнйайе бинә. У тʹәне әԝ мәрьв ԝе хьлаз бьн, дьле кʹижана һазьр ә мьзгинийе ԛәбул кьн (Кʹар. Шанд. 13:48). Әм гәләк ԝәʹдә у ԛәԝате хәрщ дькьн, ԝәки мәрьвед нәнасрʹа шәʹдәтийе бьдьн, ле әм илаһи дьхԝазьн ԝәки мәрьвед мәйи незик тʹәви мә Йаһоԝарʹа хьзмәт кьн. Йаһоԝа, Баве мәйи һʹьзкьри, «нахԝазә тʹӧ кәс ӧнда бә, ле дьхԝазә ԝәки һʹәму жь гӧнәкьрьне вәгәрʹьн». (Бьхунә 2 Пәтрус 3:9.)

4. Чахе әм мәрьвед хԝәйи незикрʹа шәʹдәтийе дьдьн, чь шашийе дькарьн бәрʹдьн?

 ⁴ Әм гәрәке бир нәкьн, ԝәки әм дькарьн мьзгинийа хьлазбуне бь щурʹе рʹаст у щурʹе нәрʹаст жи бәла кьн. Әм чахе мәрьвед нәнасрʹа шәʹдәтийе дьдьн, әм бь мәʹрифәти у нәрм тʹәви ԝан хәбәр дьдьн, ле чахе мәрьве хԝәйи незикрʹа шәʹдәтийе дьдьн, дьбәкә әм сәрт гьлийа дьдьнә дәсте ԝан.

5. Әм гәрәке чь бир нәкьн, гава дьхԝазьн дәрһәԛа рʹастийе тʹәви мәрьвед хԝә хәбәр дьн?

⁵ Гәләк жь мә дьбәкә пʹошман дьбьн, кӧ пешийе мә мәрьвед хԝәйи незикрʹа чь щурʹәйи шәʹдәти дьда, у дьфькьрьн кӧ хԝазьл мә щурʹәки майин бькьра. Паԝлосе шанди ширәт да Мәсиһийа: «Бьра хәбәрдана ԝә мәʹрифәти у хԝекьри бә у бьзаньбьн кӧ чаԝа щайиз ә щаба һәр кәси бьдьн» (Колс. 4:5, 6). Әве ширәте әм гәрәке бир нәкьн чахе тʹәви мәрьвед хԝә хәбәр дьдьн. Йан на, әԝана ԝе нә кӧ гӧһ бьдьнә мә, ле хԝә жь мә дур бьгьрьн у бьхәйдьн.

6-7. Мәсәле биньн кʹижан кӧ дьдә кʹьфше, ԝәки әм гәрәке һьндава жьн йан малхе хԝә дьлшәԝат бьн.

⁶ Дьлшәԝат бьн. Паулина, бәʹса кʹижане мә жоре кьр, дьбежә: «Пешийе, мьн дьхԝәст тʹәви мере хԝә тʹәне дәрһәԛа тьштед рʹӧһʹани хәбәр да. Мә ‹пʹаки› дәрһәԛа тьштед майин хәбәр нәдьда». Ле Ԝейн, мере Паулинайе, дәрһәԛа Кʹьтеба Пироз кем заньбу у фәʹм нәдькьр, кӧ Паулина дәрһәԛа чь хәбәр дьдә. Бона ԝи ӧса дьһатә кʹьфше, ԝәки әԝ тʹәне дәрһәԛа рʹелигийа хԝә хәбәр дьдә. Әԝ бәрхԝә дькʹәт, чьмки әԝи тʹьре жьна ԝи һатийә хапандьне у кʹәтийә сектәкә хоф.

⁷ Паулина тинә сәр хԝә, ԝәки ԝәʹдәке әԝе евара у шәми-ләʹда гәләк ԝәʹде хԝә тʹәви хушк-бьред рʹӧһʹани хәрщ дькьр, чьмки дьчу сәр щьвате, хьзмәтийе у тʹәви ԝан ԝәʹдә дәрбаз дькьр. Паулина дьбежә: «Ԝейн чахе дьһатә мале, щара малда кәс  тʹӧнә бу, у әԝи хԝә тʹәне тʹәхмин дькьр». Фәʹмдари йә, Ԝейн бира жьна хԝә у кӧрʹе хԝә дькьр, у дьхԝәст әԝана тʹәви ԝи бьн. Әԝи ньзаньбу кӧ әԝана тʹәви кʹе нә, у жерʹа ӧса дьһатә кʹьфше, кӧ жьна ԝирʹа һәвалед тʹәзә һе ԛимәт ьн, нә кӧ әԝ. Ԝейн сәр ԝан тьшта ӧса әʹщьз бу, кӧ Паулина дьда тьрсандьне, ԝәки ԝе жь ԝе бьԛәтә. Һәрге һун дәрәща Паулинайеда буна, ԝәйе ча һе зедә дьлшәԝати нишан кьра?

8. Ль гора 1 Пәтрус 3:1, 2, чь һе зедә сәр мәрьвед мәйи незик һʹӧкӧм дькә?

⁸ Бь рʹабун-рʹуньштьна хԝә, бьбьнә мәсәла баш. Гәләк щар кьред мә һе һʹӧкӧм дьбьн сәр мәрьва, нә кӧ готьна мә. (Бьхунә 1 Пәтрус 3:1, 2.) Әв йәк Паулинайе жи тʹәхмин кьрийә. Әԝ дьбежә: «Мьн заньбу, ԝәки Ԝейн мә һʹьз дькә, у бь  рʹасти нахԝазә жь мьн бьԛәтә. Ле чахе әԝи мьнрʹа дьгот, ԝәки ԝе жь мьн бьԛәтә, мьн фәʹм кьр кӧ әз гәрә ӧса бькьм, чаԝа Йаһоԝа дәрһәԛа зәԝаще һин дькә. Дәԝса кӧ мьн гәләк хәбәр да, лазьм бу пе рʹабун-рʹуньштьна хԝә бьбума мәсәла баш». Паулинайе ида зоре Ԝейн нәдькьр, ԝәки дәрһәԛа Кʹьтеба Пироз хәбәр дьн, у әԝе дәстпекьр дәрһәԛа тьштед һәррʹожи тʹәви ԝи хәбәр дә. Ԝейн дьдит кӧ Паулина дьһа әʹдьл буйә, у кӧрʹе ԝи жи буйә йәки һе мәʹрифәт у гӧһдар (Мәтʹлк. 31:18, 27, 28). Чахе Ԝейн дит, кӧ ширәтед жь Кʹьтеба Пироз ча сәр нәфәред ԝи рʹьнд һʹӧкӧм дьбьн, әԝи һʹьш у дьле хԝә вәкьр бона Хәбәра Хԝәде (1 Корн. 7:12-14, 16).

9. Чьрʹа әм гәрәке бәрдәԝам кьн али нәфәред хԝә бькьн?

⁹ Бәрдәԝам кьн али нәфәред хԝә бькьн. Ве йәкеда Йаһоԝа мәрʹа мәсәләкә мәзьн ә. Әԝ диса у диса мәщале дьдә мәрьва, ԝәки  мьзгинийе ԛәбул кьн у жийине бьстиньн (Йерәм. 44:4). Паԝлосе шанди Тимотʹейорʹа гот, ԝәки бәрдәԝам кә али мәрьва бькә. Ле чьрʹа? Чьмки ԝи щурʹәйи әԝи ԝе хԝә жи хьлаз кьра, у ԝан жи, йед кӧ гӧһ дьданә ԝи (1 Тимтʹ. 4:16). Әм мәрьвед хԝәйи незик һʹьз дькьн, ләма жи әм дьхԝазьн әԝана рʹастийед жь Хәбәра Хԝәде бьзаньбьн. Хәбәрдан у кьред Паулинайе ахьрийеда гәләк баш һʹӧкӧм бун сәр малбәта ԝе. Әԝ ньһа ша йә кӧ тʹәви мере хԝә Йаһоԝарʹа хьзмәт дькә. Әԝана һәрдӧ жи пешәнг ьн, у Ԝейн һьн жи рʹуспи йә.

10. Чьрʹа әм гәрәке бь сәбьр бьн?

¹⁰ Бь сәбьр бьн. Чахе мә сафи кьр кӧ гӧрʹа принсипед Хԝәде бькьн, мә әʹмьре хԝә гӧһаст, ле нәфәред мәрʹа чәтьн бу ԝан гӧһастьна ԛәбул кьн. Мәсәлә, әԝана дьвиньн, ԝәки әм ида тʹәви ԝан щәжьна дәрбаз накьн, у накʹәвьнә нава шьхӧлед политикайе. Серида, һьнә нәфәред мә дьбәкә сәр мә һерс дькʹәтьн (Мәт. 10:35, 36). Ле әм гәрәке нәфькьрьн, кӧ әԝана ида тʹӧ щар найенә гӧһастьне. Һәрге әм ида али ԝан нәкьн, кӧ баԝәрийа мә фәʹм бькьн, ӧса дәрте кӧ әм ԝана сущдар дькьн, ԝәки әԝана нәһежа нә жийина һʹәта-һʹәтайе бьстиньн. Йаһоԝа изьне надә мә, ԝәки әм диԝана кәсәки бькьн, әԝи әԝ шьхӧл дайә дәсте Иса (Йуһʹн. 5:22). Һәрге әм бь сәбьр бьн, ахьрийеда нәфәред мә дьбәкә бьхԝазьн гӧһ бьдьнә мьзгинийа мә (Бьньһерʹә чаргошә « Чахе Һин Дькьн Малпәра Мә Бьдьнә Хәбате».)

11-13. Елис ча бу һьндава де-баве хԝә, у әм жь ԝе чь дькарьн һин бьн?

¹¹ Ԝанрʹа һʹәйф бьн, ле нәһельн әԝана сафикьрьнед ԝә бьгӧһезьн (Мәтʹлк. 15:2). Дина хԝә бьдьнә мәсәла Елисе. Әԝ дәрһәԛа Йаһоԝа һьнге пеһʹәсийа, чахе жь де-баве хԝә дур дьжит. Әԝана атеист бун у һьн жи шьхӧлед политикида бун. Елисе фәʹм кьр, ԝәки әԝ гәрәке де-баве хԝәрʹа зу гьли кә дәрһәԛа тьштед баш, йед кӧ әԝ пеһʹәсийайә. Әԝ дьбежә: «Һәрге әм дәрһәԛа баԝәрийа хԝә у кьред хԝә мәрьвед хԝәрʹа дәрәнг бежьн, әԝана ԝе дьһа зәʹф әʹщебмайи бьминьн у тʹәвһәв бьн». Елисе де-баве хԝәрʹа нәʹмә дьньвиси, у дьпьрси һәла әԝана дәрһәԛа һинкьрьнед Кʹьтеба Пироз чь дьфькьрьн, мәсәлә дәрһәԛа һʹьзкьрьне, кʹижан кӧ Елис дьфькьри кӧ ԝе ԝанрʹа һʹәԝас бә (1 Корн. 13:1-13). Әԝе де-баве хԝәрʹа дьгот, ԝәки әԝ жь ԝана гәләк рʹази йә, кӧ жерʹа әмәк данә у әԝ мәзьн кьрьнә, у һьн жи әԝе ԝанрʹа пʹешкʹеш шанд. Чахе әԝ чу тʹәсәлийа ԝан кьр, әԝе һʹәму шьхӧле малда али дийа хԝә дькьр. Чахе Елисе дәрһәԛа баԝәрийа хԝәйә тʹәзә де-баве хԝәрʹа гьли кьр, пешийе әԝ йәк дьле ԝан нәһат.

¹² Чахе Елис малда тʹәви де-баве хԝә бу, әԝе чаԝа һәр гав, һәр рʹож Кʹьтеба Пироз дьхԝәнд. Әԝ дьбежә: «Бь сайа ве йәке дийа мьн фәʹм кьр, ԝәки Кʹьтеба Пироз бона мьн чьԛас фәрз ә». Ле Баве Елисе ԝи ԝәʹдәйи хԝәст дәрһәԛа Кʹьтеба Пироз һе зедә пебьһʹәсә, сәва фәʹм кә чьрʹа ԛиза ԝи ньһерʹандьна хԝә гӧһастийә. Әԝи хԝәст Кʹьтеба Пирозда тьштәки ӧса бьвинә, чь кӧ һәв нагьрә. Елис гьли дькә: «Мьн Кʹьтеба Пироз да баве хԝә, у мьн теда һьнә фькьред кӧ мьн хԝәш дьһатьн, кʹьфш кьрьбу». Ахьрийа ве йәке чь бу? Баве ԝе дәԝса кӧ шашийа бьвинә, чь кӧ әԝи Хәбәра Хԝәдеда хԝәнд гәләк дьле ԝи гьрт.

¹³ Әм гәрәке нәһельн кӧ нәфәред мә сафикьрьнед мә бьгӧһезьн, ле әм гәрәке ԝанрʹа һʹәйф у нәрм бьн, һәрге жи әԝана мьԛабьли мә дәртен (1 Корн. 4:12б). Мәсәлә, дийа Елисе мьԛабьли ԝе рʹабу. Әԝ дьбежә: «Чахе әз һатьмә ньхӧмандьне, дийа мьн мьнрʹа гот, кӧ әз ԛизәкә хьраб ьм у ле һʹьз накьм». Ле Елисе ча хԝә да кʹьфше? Әԝ гьли дькә: «Әз жь хәбәрдана дәрһәԛа баԝәрийа хԝә нәрʹәвийам. Мьн бь ԛәдьр шьровәкьр, кӧ мьн ида сафи кьрийә бьбьмә Шәʹде Йаһоԝа, у кӧ әзе нета хԝә  нәгӧһезьм. Мьн дийа хԝә да баԝәркьрьне, ԝәки әз бь рʹасти ле һʹьз дькьм у әм һәрдӧ жи гьрийан. Мьн жерʹа хԝарьнәкә хԝәш чекьр. Паши ве йәке, дийа мьн ида фәʹм кьр, ԝәки бь сайа Кʹьтеба Пироз әз дьбьмә мәрьвәкә һе баш».

14. Чьрʹа әм гәрәке нәһельн, ԝәки нәфәред мә сафикьрьнед мә бьгӧһезьн?

¹⁴ Ԝәʹдә лазьм ә сәва мәрьвед мәйи незик бь тʹәмами фәʹм кьн, ԝәки бона мә чьԛас фәрз ә Йаһоԝарʹа хьзмәт кьн. Мәсәлә, чахе Елисе инкʹар кьр әԝ хәбат, кʹижан кӧ де-баве ԝе бона ԝе бьжартьбун, у сафи кьр ԝәки бьбә пешәнг, һьнге дийа ԝе диса гьрийа. Ле Елисе сафикьрьна хԝә нәгӧһаст. Әԝ дьбежә: «Һәрге әм бьһельн кӧ нәфәред мә тьштәкида сафикьрьна мә бьгӧһезьн, әԝана ԝе щарәкә дьн жи ӧса бькьн. Ле һәрге әм ԝанрʹа һʹәйф бьминьн у йәкә сафикьрьна хԝә нәгӧһезьн, әԝана дьбәкә гӧһ бьдьнә мә». Әԝ йәк ӧса жи ԛәԝьми дәрәща Елиседа. Де-баве ԝе ньһа пешәнг ьн, у баве ԝе һьн жи рʹуспи йә.

15. Ль гора Мәтта 5:14-16 у 1 Пәтрус 2:12, чаԝа «кьрьнед . . . ԛәнщ» йед хушк-бьред мә, дькарьн али нәфәред мә бькьн?

¹⁵ Йаһоԝа мәрьва незики хԝә дькә пе «кьрьнед . . . ԛәнщ» йед хьзмәткʹаред хԝә. (Бьхунә Мәтта 5:14-16; 1 Пәтрус 2:12.) Һәрге һәвалзәԝаще ԝә Шәʹде Йаһоԝа нинә, бьфькьрьн һәла әԝ жь щьвата ԝә кәсәки нас дькә? Паулинайе, бәʹса кʹижане мә жоре кьр, хушк-бьра тʹәглифи мала хԝә кьр, сәва мере ԝе Ԝейн һе рʹьнд ԝана нас кә. Ԝейн тинә бира хԝә, кӧ чаԝа бьраки али ԝи кьр, ԝәки фәʹм кә кӧ Шәʹдед Йаһоԝа бь рʹасти мәрьвнә чь щурʹәйи нә. Әԝ дьбежә: «Әԝи жь хәбате  рʹожәкә һесабуне һьлда, у һатә мала мә, сәва әм тʹәвайи пе телевизоре спорте бьньһерʹьн. У әз хԝәрʹа фькьрим, ԝәки ‹Әԝ фанатик нинә!›».

16. Чьрʹа лазьм ә әм мәрьвед хԝә тʹәглифи щьвате кьн?

¹⁶ Ӧса жи ԝе аликʹарикә мәзьн бә, һәрге әм нәфәред хԝә тʹәглиф кьн, кӧ тʹәви мә бенә щьвате (1 Корн. 14:24, 25). Ԝейн щара пешьн һатә сәр Евара Биранине, чьмки Биранин паши хәбата ԝи бу, у бәрнамә жи кьн бу. Әԝ дьбежә: «Мьн ве рʹоже бь тʹәмами фәʹм нәкьр кӧ готар дәрһәԛа чь бу, ле мәрьвед ԝедәре гәләк сәр мьн һʹӧкӧм бун. Әԝана незики мьн дьбун, сьлав дьданә мьн у бь дьл дәсте хԝә дькьрьнә дәсте мьн. Мьн тʹәхмин кьр кӧ әԝана гьшк жи дьлсах ьн». Щьватеда ӧса жи жьн-мерәк Паулинайерʹа гәләк һʹәйф бун, ԝана али ԝе дькьрьн, ԝәки бькарьбә тʹәви кӧрʹе хԝә бе сәр щьвате у хьзмәтийе. Ләма чахе Ԝейн ахьрийеда сафи кьр, кӧ әԝ гәрәке һе зедә пебьһʹәсә дәрһәԛа баԝәрийа Паулинайе, әԝи ԝи бьрайирʹа гот, ԝәки дьхԝазә әԝ һинбуна Кʹьтеба Пироз тʹәви ԝи дәрбаз кә.

17. Бона чь әм гәрәке хԝә сущдар нәкьн, ле чьрʹа әм гәрәке бәрдәԝам кьн али нәфәред хԝә бькьн?

¹⁷ Әм дьхԝазьн ԝәки һʹәму нәфәр у мәрьвед мәйи незик тʹәви мә бьбьнә йәк кӧ Йаһоԝарʹа хьзмәт кьн. Рʹаст ә әм һʹәму тьшти дькьн, сәва әԝана бьбьнә хьзмәткʹаред Хԝәде, ле дьбәкә йәкә әԝана рʹастийе ԛәбул нәкьн. Һәрге ӧса бә, әм гәрәке хԝә сущдар нәкьн бона сафикьрьна ԝан, чьмки әм нькарьн зоре кәсәки бькьн кӧ баԝәрийа мә ԛәбул кьн. Һәрге һун бәхтәԝар ьн, кӧ Йаһоԝарʹа хьзмәт дькьн у шабуна ԝә һәйә, әԝана ԝе әве йәке бьвиньн, у дьԛәԝьмә әԝ йәк ԝе сәр ԝана һʹӧкӧм бә. Бона ԝана дӧа бькьн, бь нәрми у мәʹрифәти тʹәви ԝан хәбәр дьн. Бәрдәԝам кьн али ԝан бькьн, кӧ мьзгинийе ԛәбул кьн (Кʹар. Шанд. 20:20). Дӧдьли нәбьн, ԝәки Йаһоԝа ԝе щәфе ԝә кʹәрәм кә. У һәрге нәфәред ԝә гӧһ бьдьнә ԝә, әԝана ԝе хьлаз бьн!